ليه ياكروز تبكيهو الغزال الشارد(قصيدة)-توجد صورة

ليه ياكروز تبكيهو الغزال الشارد
برازيلية قدرها فى الثرى وعطارد
كان ما انت زول حقار ودمك بارد
ما بتقبل تشوف دمع العيون وتطارد

عيون كتالة لو شافن قبيلى كلوزا
ما بلعبلو تونى كروز واختها موزا
مقاعد السامبا وكتين للحسان محجوزة
شن خصانى فى المانيا وقضية فوزة

كان بى ايدى كل الكون اكون فى طوعن
والبكاء والنواح ما بنكتب لى نوعن
الشايلات ثمار البرتكان فى فروعن
نيمار كان شديد ما اكنا شفنا دموعن

وكتين قشت الدمع الملا النضارة
حسيت قعدتى وسندة قفايا خسارة
الما شالت الدوكة وبروها صغارة
ما تستاهل الدمعة البقت قطارة

ليه ياخديرة بتزود عليها جراحة
وتخلى اللؤلؤ اتقاطر على التفاحة
لو نيمار دخل بدرى ولقالو مساحة
كان شفنا ابتسامة وانشراح وسماحة

الشافعة التلووح للخلوق بى ايدة
كان عشمانة فى كورة ونتيجة سعيدة
لو شاف الحكم هادى الدموع فى خديدة
مفروض ارجى نيمار انجبر وإعيدة

يا المخرج اقيف واللقطة لى ما تعودة
وما بحمل اشوف سيل الدموع فى خدودة
بعد ما المانيا عملت ها العمائل السودة
كرهت المرسيدس و البورش والاسكودة
القصيدة إنتشرت في الفيس بووك إنتشار النار في الهشيم ولا أدري من هو مؤلفها

و كتب آخر:
في الألماني جيت أكتب حروف مسداري
ده التيم الحريف لخبط علي أفكاري
كان إتنين صفر كان سقت ليك أعذاري
إلا السبعة شينة وحامضة يا أسكولاري
أسياد الكفر مالكم بقيتو ضحايا
زي تيم الوصيف يوم لاقي ناس شلباية
يا توماس مولر
والله سبعة كفاية
ما تزيد العدد أرحم
عزيز دنيايا
يا حليل الدفاع
يا حليل زمان ناس كافو
ترسوه الدفاع
و إتأمنت أطرافو
روبرتو الرهيب
منو الجماعة بخافو
من خط الوسط
كانت عجيبة أهدافو
يا حليل ناس زمان
روماريو ملك الكورة
رونالدو الحريف
المبدع الأسطورة
إلا الليلة شايفكم
خربتو الصورة
بعد الإمتياز
جبتولنا تيم ماسورة

سيف كل عام وانت بخير
ياخى ديل الالمان تحسبوا لعب الجنس الاري
تبكوا بث

الاخ سيف
تحية طيبة

القطع الاخدر ده حق الشاعر ود مسيخ

القصيدة كلها منسوبة للشاعر الجميل صلاح ود مسيخ

رمضان كريم وشكرا لتوضيحاتكم يا شباب