الحاجة ست البنات برازيلية الهوى

القصة بدأت عندما تجمعنا في بيت ناس عماد كنش حيث إشتراك Bein Sports ساري المفعول والشاشة المسطحة ثلاثية الأبعاد وبعد أن تجمهرنا وبدأت كبابي الآبري تتطاقش إذا بحبوبة صلاح الحاجة ست البنات تنقشط في نصنا ولأنها سوف تفسد لنا متعة المشاهدة قال لها محاولاً مخرجتها إنتي يا حاجة ما صليتي العشا ، قالت ليهو زمان يا ولدي إلا الليلة عيني طالقه ومابيه النوم. أها قلت النقعد معاكم شوية ، ولأن الموضوع خلاص بايظ قال لها نصراالدين إنتي بتشجعي ياتو منتخب ، وفي هذه الأثناء جابت الكاميرا لقطات من المدرجات ، أها حبوبتنا شافت الجكس البرازيلي أصفر أخضر أزرق ، قالت ليهم الرسول ديل منو ، قالو ليها ديل مشجعي البرازيل قالت ليهم أها أنا معاهم ، يا حاجة وألمانيا مالها ، المانيا ياتا يا ولدي قالو ليها ديل أها ما شايفه الشقراوات ، قالت ليهم ووب علي ووووب علي لا لا يالرسول فونا مكجنه النسوان الشعرن زي قندول عيش الريف أححححححمر بري بري بري منهن ، أها قوم يا مجدي صور الحاجة تصوير بليغ قاال ليها إنتي أصلك داقة شلوفتك أخضر وكان دايره ليك شوية fill-in بالألوان لشخلوك الثلاثة الفي كل جضم زي شعار الأديداس وتبقي برازيلية من ساوباولو كمان.
أها بدأت المباراة وتوالت الأهداف توش شوت توش لغاية ما وصلن خمسة قومي يا حبوبة عماد كنش إتخارجي وقالت نعست ، قال ليها أوب اللول ما كان تجيك النعسة دي في الدقيقة الخامسة من المباراة تنعسي لينا بعد القون الخامس أها دي يدرنوها كيف هسي وفي حارس زي مانويل نوير.
والله يا عماد أنا أول مرة أقتنع بأنه في زول كجج وكج كبير زي حبوبتك ممكن جداً البرازيل أو أي منتخب في العالم ينهزم وفي أرضه وبين جمهوره لكن هزيمة مذلة زي دي ولا حتى أكثر المتشائمين كان متوقعها. صحيح أن البرازيل ساعدها الحظ في التأهل والوصول لهذه الأدوار وأنها التحكيم في بعض مبارياتها أثر بدرجة كبيرة في النتائج لكن الحصل دا كارثة سوف تبقى آثارها ما بقى الدهر ، وعليك الله لمن المنتخب السوداني يكون لاعب مع كوت ديفوار خلي حبوبتك تشجع ساحل العاج عشان نفوز عليهم لأنها دايماً النتائج معها بتكون عكسية

هههههههههههههههههههه

والله يا الملا عمر هزيمة البرازيل التاريخيه دي لا بينفع تلصقوها في حبوبة صلاح ولا حبوبة صلاح غريبه

دي تبلعوها بس وتسكتوا.ههههههههههههه

قال كج قال!!
ده قال لك كح الغلابه البرزيلين الكسروا بيوتهم العشوائيه عشان تصبح العاصمه تلائم المونديال!!

يا تراجي
تحياتي
أنا ضد منتخب البرازيل وبخاصة في هذا المونديال يعني شفتي الحظ في مبارة تشيلي والمكسيك وظلم الكروات ، البرازيل ماضي لكن هسي ما عندهم حاجه ، والكورة بتدي البديها بس بصراحة لو دخلت فيها حبوبة صلاح غريبة كان المنتخبين خرجوا من المونديال لا ألمانيا ولا البرازيل ما كان فازت ولا حتى يلعبوا على المركزين الثالث والرابع بالرغم من أن الفرق الباقية أربعة ، كيف أسألي غريبة صاحب الغرائب وحبوبته.
والله يا تراجي حبوبة عماد كنش دي إكتشفنا إنها سلاح خطير ناويين نجربو في مجال السياسة السودانية المخستكة يا صابت يا أصباتنا في مقتل المهم بنخطط الآن وربنا يسهل الأمور في هذه الأيام.
ما قلتي لي إنتي اليوم مع الطواحين ولا رفاق ميسي
كل الود

أها ست البنات دخلت كمان في التحليل الرياضي وقالت وحات الشيخ أب عمتن متكية وأب قبتن لبنية وأب مكوتن صينية (النون هنا ما نون نسوه لزوم التنوين وكده) الراجل أب شنباً زي زق ال###### دا (تقصد السيد فيليبي سكولاري) بايع الكورة وإستندت في ذلك للصورة التي يؤشر فيها السيد سكولاري بالرقم (7) وهو ما إنتهت عليه نتيجة المباراة.


أها يا جماعه الكورة دا قول ست البنات إنتو قولكم شنو

الشينة منكورة الجوهرة السوداء بي زاااتو قال هو ما برازيلي بعد الهزيمة