على لسان صديقي ماو من داخل السجن

أنا في حراسات الأوسط أمدرمان وبكرة يتم عرضي علي القاضي علشان يحدد حجم الإصابات عندي و يكتب لي بها تقرير أمشي به المستشفي علشان أخذ أورنيك ثمانية طبي وحقي يا ناس جهاز الأمن ما بخلي أبداً ...

تكلفة دخول الهاتف ريبيكا العادي ده تجاوزت المائة ألف جنيه رشوة والآن أصبحت مشكلة الشحن الكهرباء دي بقت حاجة ثانية . . . يعني أنا اليوم ده كله من الصباح دافع وأدفع رشاوي إلي عساكر عمر البشير غصباً عني بس علشان أكون معكم أنتوا ديل وأهم شئ أكون متواصل مع أمي ستي وست ستي وتاج رأسي ونور عيوني وحبيبتي وأي شئ في الدنيا دي هي أمي . . . أنا كويس يا أمي طول ما أنتي كويسة و تسلمي لي يا رب

في ناس شابكني لك يا ماو ما كان تهرب يا ماو أهرب . . . و الله بلاط الحراسات العفن ده و الحشرات دي أفضل و أحسن لي من أجعظ سكن خارج الوطن و أنا هارب . . . أنا لن أهرب و أترك وطني إلي الكيزان الفئران أبدا . . . أموت في أرضي

تصبحون علي وطن و خمسين ألف جنيه أشحن بها كهرباء الهاتف صارت ما عندي الآن و أتمني لكم دوام المظاهرات و الثورات . . . تشحن بس هاتف ريبيكا كهرباء بي خمسين ألف جنيه سوداني لا غير . . . في حد عنده اعتراض؟

حاجة أخيرة و منها البطارية تقطع موية و نور . . .يا ناس الشرطة ما عندكم عشاء؟ و قالوا في ميزانية طعام قاعدة تمشي وين؟ داخل الحراسات لا توجد أي خدمات يا منظمات حقوق الإنسان . . . و الله يا كيزان كان أحسن لكم أكون برة السجن ده و أنا كده يا دوب لقيت لي مواضيع ثورية قوية تخدم و تحرك القضية السودانية

حذير يا شرفاء أنا حلفت ما أدفع غرامة ولا أي زول يدفع لي غرامة . . . أنا ما مقتنع بهم أجي كمان أدفع لهم . . . علشان الغرامة دي بكرة يشتروا بها رصاصة في صدر و رأس مواطن سوداني آخر. عليكم الله ما تدفعوا لي أي غرامة و أنا حلفت أمي علي ذلك

أصدقاء ماو مساء الخير عليكم . . . أنا من داخل حراسات القسم الأوسط أمدرمان و محتاج لي رصيد أي نوع من أنواع الشبكات علشان أقدر أمشي الأمور هنا مع الأشياء التي لا تتم إلا بواسطة الرشوة . . . يعني ترسل لك عسكري يقول لك أنا عائز حقي و الآن أنا رسلت عسكري جاب لي الهاتف مشحون كهرباء و قال عائز حقه و أنا صراحة لله كل ما أملك كمل اليوم رشاوي مقدمة إلي عساكر عمر البشير الفاسدين واحد واحد و للأسف لا يوجد أي واحد بدون مقابل مالي يستطيع بأن يقدم لك أي خدمة حتى ولو كانت دخول الحمام . . . و الله يا كيزان أنا كل يوم ازداد ضدك شحنات قوية جدا جدا جدا جدا جدا

المؤمن مصاب و ربنا كتب لي الحكم ده لي خير و تحسبونه شرا و هو خيرا لكم . . . العفو و العافية من الجميع ما عدا الكيزان و لكم يوم يا كيزان و الله أطلع من السجن ده إلا تطيروا ده لو أنا من أساسه وجدت لكم بقية و أثق كامل الثقة في الثوار الأحرار الشرفاء

0901806096 - 0117221140
دي أرقام أمي عليكم الله كل يوم مساء وصباح بس رسالة لها تقولوا لها ماو قال لكي أبقي الصمود لأنه هو باقي الصمود لأنه هو ما زيف