أولاد مدني ... أبو بكر عباس نشازاً

أولاد مدني ... أبو بكر عباس نشازاً


07-03-2014, 05:54 PM


  » http://sudaneseonline.com/cgi-bin/sdb/2bb.cgi?seq=msg&board=470&msg=1404406499&rn=0


Post: #1
Title: أولاد مدني ... أبو بكر عباس نشازاً
Author: معاوية الزبير
Date: 07-03-2014, 05:54 PM

أولاد مدني ، على الأقل الذين تعرفت عليهم، لاحظت فيهم حاجة متفردة، الواحد فيهم لما يجئ يعرّف بنفسه في مناسبة ما، لا يكتفي بالقول إنه من مدني،
بل يردف سريعا للإضافة أو للتوضيح لا أدري: حي الدباغة، الدرجة، ود أزرق، بانت، أو أي حي آخر من هناك.
مش بس لما يعرّف بنفسه بل أيضا عندما يحدثك عن زول آخر من ناس مدني.

أظن أنهم يعتقدون أنه من الطبيعي أن يكون السوداني من مدني (أن يكون السودان ود مدني) ولذلك عليه أن يوضح من وين في دولة مدني، حتى يكتمل التعريف (الهوية).
نحن ناس كوستي مثلا عادة ما نكتفي بذكر اسم مدينتنا في التعريف عن أنفسنا، إلا إذا زول وجّه لينا سؤال تمهيدي: من وين في كوستي، عشان يسألك تاليا: بتعرف ناس هناي؟

إلا أبو بكر عباس دا (زميل المنبر الجديد) عرفته مؤخرا للأسف (1998) وأقمنا معاً حتى غادرت الإمارات إلى قطر والصداقة ممتدة، لي هسه ما عارفو من وين في دولة مدني!

أوصاف الثناء التي تكال في الترحيب بالمنضمين الجدد (من معارفهم طبعا)، من شاكلة: شفيف وأخو أخوان ..الخ، انسهكت معانيها من كثرة الاستخدام، حتى أصبحت لا تعرّف بأي شئ...
لدرجة أن من يقرأها لا يتوقف عند مقاصدها أو معانيها، بل يقفز فوقها سريعا، واضعا قدمي نظره على الحروف البارزة: كريم (الكاف)، إنساني (النون)، ود بلد (دَل ل ل ل).
وبعض القراء يجنب نفسه مشقة هذا التقافز ويمشي دايركت على النجيضة كان ما لقاها نيّه.

أكثر ما يغيظني فيه إنو عاقل ومسؤول ويحسب جيدا لخطواته قبل التحرك، (ثلاث صفات وربما هي صفة واحدة لا أدري، أملك ما يهزمها من قولة تيت أول الجولة).
وهو من نوع الصديق العدو العاقل، لا يجاملك ولا يواسيك عندما ترتكب حماقة ما، ولكن هذا لا يعني إنو لا يأبه بالأصدقاء أو حتى الأغراب،
هو فقط يوفر دوره حتى تصل الأمور حافة جهنم، ولكي لا تفضحه وسط أصدقائه في النعيم، يتلقفك ويتركك في أي درجةٍ دنيا في الجنان: أهو مسلم والسلام.

بقي شئ أخير، وهو أن هذا البوست كتب للترحيب بانضمام (حكيم المعوز النابغة، الأولتان منه والثالثة تقرير حال) لمنبر سودانيز،
ولكن صادف ذلك واحدة من أسوأ فترات المنبر خشونة ورعونة، وعزّ عليّ أن يأتي أبو بكر في تلك الفترة، وتخيلته صوت الطفلة الوسط اللمة منسية.

أهلا بابن أخت أمير المؤمنين، وما تنسانا من الشفاعة. وبجيك بهناك، وتحياتي إلى هاشم.

Post: #2
Title: Re: أولاد مدني ... أبو بكر عباس نشازاً
Author: عبدالحفيظ ابوسن
Date: 07-03-2014, 06:19 PM
Parent: #1

اولا بالتبادي
انت غاتس وين
ثانين ابوبكر ده طلع قريبي ياخ ,,, اهل والدة ابي من الغريباب ناس ود الناير ويمتون لناس اب قناية بأواصر القربي
سمعت بأمير المؤمنين ده من اهلي بالعريباب وسمعت بنوادره قبل سنوات ,,, ويتمون نوادره
زول ماممكن تناقشو إلا يقنعك
مثقف وبالو طويل

Post: #3
Title: Re: أولاد مدني ... أبو بكر عباس نشازاً
Author: معاوية الزبير
Date: 07-03-2014, 06:46 PM
Parent: #2

مشتاقين والله يا أبو سن، قلنا نبتعد عن المنبر أربعين يوما قبل بداية شهر الصوم
Quote: زول ماممكن تناقشو إلا يقنعك مثقف وبالو طويل
أها قريبك أبو بكر دا لا يقل شأنا، wait and see

Post: #4
Title: Re: أولاد مدني ... أبو بكر عباس نشازاً
Author: باسط المكي
Date: 07-03-2014, 06:53 PM
Parent: #1

Quote: هو من نوع الصديق العدو العاقل، لا يجاملك ولا يواسيك عندما ترتكب حماقة ما، ولكن هذا لا يعني إنو لا يأبه بالأصدقاء أو حتى الأغراب

معاوية كل سنة وانت طيب كفيت ووفيت
وعبرك التحيايا لبابكر

Post: #5
Title: Re: أولاد مدني ... أبو بكر عباس نشازاً
Author: معاوية الزبير
Date: 07-03-2014, 07:02 PM
Parent: #4

ازيك يا باسط وأحوالك
ما تخليني أبدأ في الكلام بتاع الشكر الزغنا منو في المتن
لكن على كلٍ يظل أبو بكر من الشخصيات المميزة التي عرفتها طوال حياتي
مودتي ورمضان كريم

Post: #6
Title: Re: أولاد مدني ... أبو بكر عباس نشازاً
Author: عبدالحفيظ ابوسن
Date: 07-03-2014, 07:08 PM
Parent: #5

مأزق الترحيب محرج
وحكايه تجليهو محرجه
لكن يا معاوية كان لوقوف من يعرفني معي ردا في اول بوستاتي دفعا لي
ف شنو
زمان لامن يكون في كادر خطابي جديد كل ما يعاين ليك في الركن تهز راسك موافقا
دعم نفسي ولكنه لا يجدي لمن لا يملك المهاره

Post: #7
Title: Re: أولاد مدني ... أبو بكر عباس نشازاً
Author: معاوية الزبير
Date: 07-03-2014, 07:23 PM
Parent: #6

Quote: زمان لامن يكون في كادر خطابي جديد كل ما يعاين ليك في الركن تهز راسك موافقا
دعم نفسي ولكنه لا يجدي لمن لا يملك المهاره
عجبتي حتة هزة الراس دي، السينما جنبكم ومكتبة مصطفى صالح خطوات، لازم تكون لاحاظ
لكن اطمنك أبو بكر دا جاي ساني أسنانو من منتديات أخرى، كما إنو متابع سودانيز وغيرو منذ سنوات طويلة، وجااهز لكل الاحتمالات

إن شاء الله تكون جات شوية مطرة تبدد القيظ دا وتساعد مع جغيمات الوضوء على اجتياز هذا الركن الملتهب في الإسلام

Post: #8
Title: Re: أولاد مدني ... أبو بكر عباس نشازاً
Author: حامد بدري
Date: 07-03-2014, 08:10 PM
Parent: #7

رمضان كريم ومبروك عواشركم وتصومو وتفطرو على خير
ناس مدنى ناسن عشرتوم تتمنى بالجد شباب زي الورد مدينه متجانسه واحلى مافيها بدون تميييز ونبذ تام للقبليه والعنصريه

Post: #95
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-13-2014, 07:57 AM
Parent: #8

Quote: مدينه متجانسه واحلى مافيها بدون تميييز ونبذ تام للقبليه والعنصريه

سلام يا حامد،
كلامك صاح، مدني الحديثة نبذت العنصرية الإثنية، لكنها مارست عنصرية جديدة على من كانوا سبباً في إزدهارها؟؟
ح أوضح العنصرية دي في ردي على أبو سنينة لاحقاً

الأخت نعمات
شكرا على الترحيب

Post: #9
Title: Re: أولاد مدني ... أبو بكر عباس نشازاً
Author: نعمات عماد
Date: 07-03-2014, 08:43 PM
Parent: #1

رمضان كريم معاوية الزبير و أبوبكر عباس و ضيوفكم المرحبين .

صديق معاوية أكيد مثله ، قلب ابيض كقطن الجزيرة و عمق كالنيل

الأزرق و عبارة ندية كنسمات مدنى .أحلى اقامة بالمنبر نتمناها لك.

Post: #10
Title: Re: أولاد مدني ... أبو بكر عباس نشازاً
Author: abas
Date: 07-03-2014, 10:19 PM
Parent: #9

ود المدير يا حبيب كل سنة وانت طيب

ورمضان كريم

ياخ والله ود عباس ده احلي زول

وديل من اولاد بانت في دولة مدني احلي ناس

Post: #11
Title: Re: أولاد مدني ... أبو بكر عباس نشازاً
Author: الصادق صديق سلمان
Date: 07-03-2014, 10:54 PM
Parent: #10

شكرا يا معاوية
ترحيبك بابن مدني نعتبره ضمنيا ترحيبا بمدني
و لأنو ناس مدني لسة فيهم شوية من حاجات مدني الزمان

فمرحبا به هنا

Post: #12
Title: Re: أولاد مدني ... أبو بكر عباس نشازاً
Author: معاوية الزبير
Date: 07-03-2014, 11:05 PM
Parent: #10

Quote: ناس مدنى ناسن عشرتوم تتمنى بالجد شباب زي الورد
والله يا حامد ما كتبتُ ما كتبت إلا من وحي عشرتهم الجميلة في الإمارات
قبل عامين وبعد غيبة طويلة زادت على عشر سنوات زرتهم مرة بمعية الصديق زميل المنبر فاقد الباسوورد هاشم الحسن
وبعدها بعام بمعية ضيف البوست فوجدتهم كما هم سوى أنهم إتحملوا أولاد وكان عهدنا زمااان خفافا إلا من هم الوطن

Post: #13
Title: Re: أولاد مدني ... أبو بكر عباس نشازاً
Author: معاوية الزبير
Date: 07-03-2014, 11:29 PM
Parent: #12

Quote: صديق معاوية أكيد مثله
المعنى يا نعمات نتوقف عن شكرو ولّ شنو؟
غايتو أي كلمة أكتبها عنو، أنا مسؤول منها، ولو بالغت في حاجة أكيد هو ح يخارجني بما لم اكتشفه فيه بعد
رمضانك كريم، وشكرا على حسن الظن

Post: #14
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 00:16 AM
Parent: #13

Quote: ياخ والله ود عباس ده احلي زول
وديل من اولاد بانت في دولة مدني احلي ناس
قلت لي من بانت يا عباس! يمين إلا كلامك دا
أهو بختكم معاهو غربة ووطن
مودتي
------------------
تحياتي يا الصادق
Quote: ترحيبك بابن مدني نعتبره ضمنيا ترحيبا بمدني و لأنو ناس مدني لسة فيهم شوية من حاجات مدني الزمان فمرحبا به هنا

مدني كانت زمان، زمااان، محطة للارتياح من وعثاء السفر بالنسبة لي ناس كوستي ومدن أخرى من وإلى الخرطوم، عشان كدا ليها مكانة خاصة.
أكيد ناس مدني لسه فيهم شئ من حاجات زمان خاصة المغتربين منهم
شكرا ياخ

Post: #15
Title: Re: أولاد مدني ... أبو بكر عباس نشازاً
Author: اسامة عثمان السيد
Date: 07-04-2014, 01:30 AM
Parent: #14

ا عشا الضيفان ناس مدنى ديل لمن امشى السودان بركبو ويجونى يسلمو على فى محلى ، بنات واولاد ، بحبهم جدا وماتنسى عندى معاهم لحم ودم بنات اخوى امهم من مدنى شفت كيف ؟ وعندى علاقة خاصة بمدنى وناسها ، من كانت محطة السكة الحديد وبنجى عابرين المحطة بالقطر من الابيض ، اول ما يقولو القطر وصل مدنى النارية تنطلق ، محبة شديدة ، زيادة على كل دا حببونى فيها ناس الفاتح حسين وعثمان النو وبهاء هاشم ، وباختصار اولاد معهد الموسيقى والمسرح المن مدنى ، واولهم السنى دفع الله ، شفت مدنى جارية فى الدم كيف ؟

مرحب بيك وكلامك سمح

Post: #16
Title: Re: أولاد مدني ... أبو بكر عباس نشازاً
Author: اسامة عثمان السيد
Date: 07-04-2014, 01:39 AM
Parent: #15

مرحب بيك ومرحب بصديقك ابوبكر

Post: #17
Title: Re: أولاد مدني ... أبو بكر عباس نشازاً
Author: محمد البشرى الخضر
Date: 07-04-2014, 02:45 AM
Parent: #16

أولاد مدني ورد في الأثر الشعبي إنّهم بجلّو المخاواة :)
مرحب بأبوبكر عبّاس
تحيّاتي ود الزبير ورمضان كريم تصوم وتفطر على خير إن شاء الله

Post: #18
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 03:52 AM
Parent: #17

أسامة عثمان، يمين عشا الضيفان دي كان ختت ناس مدني تاني ما عندها ناس
مرة أيام الجامعة جاي من مصر مطلع التمانينات، وصلت الخرطوم يوم وقفة عيد ضحية
أصريت أسافر كوستي عشان العيد هناك أحضروا، كنا غضين وحديثي عهد بالابتعاد عن الأهل
وصلت مدني المغيرب عن طرق البصات طبعا، ولما جات الساعة تسعة بات واضحا أن من المستحيل العثور على بص ماشي كوستي
مشيت على أول كشك لبيع الخردوات سألت صاحبو عن لكوندا أو فندق قريب ويكون سعرو رخيص
وحكيت ليهو حكايتي. قال لي استنى شوية أقفل الكشك دا وأوديك الفندق بي نفسي
قعدنا يمكن زي ساعة وشوية وقفل الدكان، نادى ولد صغير خالاهو في أضانو الولد جا شال الشنطة وخب قدامنا
ونحن ماشين وراهو من شارع لي زقاق لغاية ما وصلنا بيت عادي، لقينا الولد الشال الشنطة فاتح الباب وواقف قدامو
عمك قال لي "ادخل يا ولدي بلا فندق معاك الدنيا عيد ونحن عندنا ولد واحد ومسافر للقراية برا وما عارفين هسه الحاصل بيهو شنو"
سلمنا وصلينا واتعشينا ونمنا، والصباح صلينا العيد ورجعنا ضبحنا وأصرت الأسرة ما أغادر إلا بعد أضوق لحمة الخروف.
ــــــــــــــــــــــــــــــــــــــــــــــــــــــــــــــ
الأسرة كانت عادية تجدها في أي حتة في السودان، لو قابلتهم اليوم لما عرفتهم والبيت عادي والدنيا زاتا كانت عادية ولم نكن نعرف وقتها
أن الحال دا ما عادي وأن علينا أن نعض عليه بالنواجذ وغير النواجذ ونحاصروا مثل أكتر باك عكلةً مع مهاجم خطير
والحمد لله من قبل ومن بعد
ــــــــــــــــــــــــــــــــــــــــــــــــــ
Quote: فيها ناس الفاتح حسين وعثمان النو وبهاء هاشم ، وباختصار اولاد معهد الموسيقى والمسرح المن مدنى ، واولهم السنى دفع الله ،

أحمد النو (شقيق عثمان) من الناس القاصدهم عشت معه في عجمان، والسني أهو عايشين معاهو وجاورناهو في الدوجة دي
وتحياتي لبهاء هاشم والفاتح حسين
ولك المودة

Post: #19
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 04:32 AM
Parent: #18

Quote: أولاد مدني ورد في الأثر الشعبي إنّهم بجلّو المخاواة
ود البشرى، دي بركة الشهر الكريم الجابتك دي، حسبتك زعلان والله!
أنا ما بعرف كوشتينة لكن احتياطا كدا بقوليك ديل يسيكوك في قبولك ولو كانوا لاعبين بي سمعتهم بس، بدون ورق
ياخ ديل ناس بحبوا بعض لامن يكيفوك، كانوا بتلموا في بيتنا في عجمان أيام الخميس والجمع زي تلاتين واحد كدا
جايين من كل إمارات الإمارات يكشتنوا ويتلاسنوا ويزبطوا الحلل، والجمعة بالليل يتفارقوا متوادعين بالأحضان
ومتواعدين على اللقاء الأسبوع الجاي

حريف تزورونا في العيد كان الله حيانا!
مودتي يا حبيب

Post: #20
Title: Re: أولاد مدني ... أبو بكر عباس نشازاً
Author: يحي قباني
Date: 07-04-2014, 04:42 AM
Parent: #18

Quote: أولاد مدني ورد في الأثر الشعبي إنّهم بجلّو المخاواة :)
مرحب بأبوبكر عبّاس
تحيّاتي ود الزبير ورمضان كريم تصوم وتفطر على خير إن شاء الله

بجلو المخاواة ساكت ...

بالله صاحبنا كشكش من اولاد مدني ... منقط الحريق نقيط ... وبلعب معانا طوالي ...

مره جاني صاحبي من الامارات ... وهو من اولاد مدني ( برضو ) ...

في الاول قال ما داير يلعب كشتينه لانو طول جداً منها ...

بعد التحنيس قعد ... وكشكش صاحبنا قعد علي يمينو ...

و لفت البلية و كشكش قافل قفله ( كراع ) ###### ... :)

و صاحبي يشيل و يجلي فيهو وهو بتونس مع المجموعه ...

لمن كشكش زهج و قال ليهو انت ما قلت مطول منها ...

رد صاحبي ... مسيييخ و قال ليهو ... فعلا مطول و الله ...

لكن تخيل الجَلا ده اصلوا ما عندى مشكله فوقو ...

طبعا صاحبنا سب دين لي مدني ... وناس مدني ...
____________________________
تحياتي ود الزبير و تحيات خاصات لابوبكر عباس ....

احب مدني ... و اموت في كوستي ...

لي ذكريات مع اولاد شاني في مدني و اولاد الكنزي في كوستي ...

لو كُتبت علي صفحات المنبر ... لفقدنا باسويردنا ....

خلونا في عنكوليب مدني ... و في سمك كوستي

Post: #21
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 06:40 AM
Parent: #20

Quote: لي ذكريات مع اولاد شاني في مدني و اولاد الكنزي في كوستي ...
لو كُتبت علي صفحات المنبر ... لفقدنا باسويردنا ....
خلونا في عنكوليب مدني ... و في سمك كوستي
افقدوا ياخ إنت أصلو ح تفقد عزيز
اكتب خلي الجيل الحالي وجيلنايعرف حاجة
الخبرات دي لازم تتراكم عبر الأجيال، انت قايل الحصل للبلد دا من شنو؟!
مداخلاتك تثري أي بوست يا قباني، خلاص عفيناك من الذكريات عشان المنبر ما يفقدك

Post: #22
Title: Re: أولاد مدني ... أبو بكر عباس نشازاً
Author: عبدالحفيظ ابوسن
Date: 07-04-2014, 06:55 AM
Parent: #21

يا قباني أي كنز في الكنوز ,فجميعهم علي بعد كوراكة من دارنا ,, ولنا في دارهم اصحاب ودفعة ,,
واشهرهم بكوستي ابناء عمنا المرحوم محمد احمد ابراهيم الكنزي ومشهور ب البطري , وابناؤه من دفعتكم ابراهيم وحسن ومن دفعتي اصدقائي مبارك بطري وصديق
بحرض فيك اكتب ساي

Post: #31
Title: Re: أولاد مدني ... أبو بكر عباس نشازاً
Author: يحي قباني
Date: 07-04-2014, 03:43 PM
Parent: #21

Quote: افقدوا ياخ إنت أصلو ح تفقد عزيز
اكتب خلي الجيل الحالي وجيلنايعرف حاجة
الخبرات دي لازم تتراكم عبر الأجيال، انت قايل الحصل للبلد دا من شنو؟!
مداخلاتك تثري أي بوست يا قباني، خلاص عفيناك من الذكريات عشان المنبر ما يفقدك

و الله يا ود الزبير مرات ببقي عزيز لديك عديل لما تلقي ليك شئ مايل و داير تعدلو او شئ عديل داير تميلوا ... ههه

اما موضوع الخبرات و الحاصل للبلد ...فاوافقك الرأي مليون المية ...

صاحبي زمان لما كنا ( شباب ) يا ود الزبير ... العصرية كان ما شرب ليهو علبتين بيرة باردااات ما برتاح ...

مشي السودان السنة الفاتت ورجع ... قال لي ماشاء الله البلد بقي فيها صحوة اسلامية ....

و الشباب السغار كلهم ( برتادوا ) المساجد ...!!!

قلت ليهو خليني من كلمة مساجد دي ....

عليك الله ( برتادوا ) دى كانت وين و انت (بتكرفس ) في علبة الهنيكين الفاضية زمان؟

Post: #32
Title: Re: أولاد مدني ... أبو بكر عباس نشازاً
Author: يحي قباني
Date: 07-04-2014, 03:50 PM
Parent: #31

Quote: يا قباني أي كنز في الكنوز ,فجميعهم علي بعد كوراكة من دارنا ,, ولنا في دارهم اصحاب ودفعة ,,
واشهرهم بكوستي ابناء عمنا المرحوم محمد احمد ابراهيم الكنزي ومشهور ب البطري , وابناؤه من دفعتكم ابراهيم وحسن ومن دفعتي اصدقائي مبارك بطري وصديق
بحرض فيك اكتب ساي

بس يا ود ابسن ... ياهم ...

تنزل من البص ... تقطع شريط السكة حديد ... وانت جوة بيتهم ...

ايام ياخ ...

يا سيدي انا دفعتي في ( المعمار ) و فردتي ابراهيم الكنزي ... و اول امس كنا بنتكلم و نجرجر في الذكريات العجيبة ...

و حسن ( الامبراطور ) طبعا شلتنا برضوا ....

لكن شايفك ذكرتهم كلهم و ( عصام ) الكارثة مالك ما طريتوا هههههه ... قاعد و لا خلي كوستي

انا يا حفيظ ذكرياتي معاهم من كوستي لغاية ( المقينص ) ... اها كيف معاك ...!!!

Post: #23
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-04-2014, 07:18 AM
Parent: #1

يا مُعاوية الزبير، يا أخي، دخلتني في مُشكلة بالبوست السمح دا! يا أخي، أنا أكبر مُشكلة عندي انو ما بعرف أقول كلام رقيق للآخر وهسع مُحتار أجامل الحلوين ديل كيف!
أول ديت لي (لقاء عاطفي) بالجامعة (بالسنة الأولى 84) بالنشاط كنت مُحتار ح أقول فيهو شنو للبت الإتشعبطت فوقي دي! مشيت شارع الجمهورية إشتريت لي قميص أصفر وأصريت أتعشي في سفرة البركس بالعدس الأصفر، وبعد العشاء قشرت بالقميص الأصفر ومشيت النشاط، قعدنا في الكافتريا وناديت الجرسون همست ليهو في أضانو يجيب أتنين عصير منقة، الوقت قبل وصول العصير كان طويل خلاص، وبقينا زي وصف الشاعر الحلمنتيشي:
أعايت ليك تدنقري إتّي
تعايني لي؛ أدنقر أنا
الجرسون جاب العصاير، البت عاينت لي بإستغراب (ليش ما سألتها تشرب شنو؟) وقالت لي: دا شنو دا؟
قلت ليها: عصير منقة وكمان أصفر وأشرت للقميص
قعدت تضحك ضحك شديد واستغليت الفرصة وقلت ليها: شوف يا ستي، أنا قبل أدخل الجامعة دي كنت بعرف أتونس في حاجتين فقط هما فريق أهلي مدني والفنان صديق سرحان وهسع زاد عليهم ولعي بالجمهوريين، دحين إختاري؟
طبعا إختارت صديق سرحان، ولي قدام عرفت انو أنا ما بتحبّ لكن بتصاحب.

Post: #24
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 08:26 AM
Parent: #23

أها يا عبد الحفيظ دا كلامك عن أبو قناية خال أبو بكر
Quote: زول ماممكن تناقشو إلا يقنعك مثقف وبالو طويل

ودا ردي ليك
Quote: أها قريبك أبو بكر دا لا يقل شأنا، wait and see

----------------
يا بكوري
Quote: ولي قدام عرفت انو أنا ما بتحبّ لكن بتصاحب
غايتو الحمد لله الطلعنا رجال "إنما تأسى على الحب النساء"
بعدين تعال، أوعى يكون أهلي مدني وصديق سرحان برضهم بلبسو أصفر! قال أصفر قال
يعني هسه أم العيال دي قسمة ونصيب

Post: #25
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 09:16 AM
Parent: #24

سالما يا سالاما من الفيسبوك
معليش ياخ من البيت ما بتطلع معاي مشاركات الفيسبوك
مدني قلب الجزيرة أرض المحنة وعلى قول عمر الحاج موسى
أنجبت وما برحت.. أعطت وما انفكت.. جادت وما فتئت

لم يسعفنا الحظ بملاقاتك يومذاك إن شاء الله في الجايات
مودتي الكبيرة

Post: #28
Title: Re: أولاد مدني ... أبو بكر عباس نشازاً
Author: قصي محمد عبدالله
Date: 07-04-2014, 12:15 PM
Parent: #25

معاوية سلام،
وسلام لابن بانت الدكتور البيطري بكوري.
ورمضان كريم على الجميع
من أبجديات الإحترام أن يتوقف الشخص عن كل شئ عندما يسمع اسم عاصمة منطقته،
ناهيك عن ذكر مدينة أو قرية مولده و منشأه وملعبه.
و عليه أن يركز مع المتحدث في كلامه ليستفيد و يفيد.
حبابك اسفيريا في ديارنا الواسعة، ونتطلع لنتبرك بزيارتك الأقدامية الميمونة.
ليس فقط في مدينة ودمدني،
ولكن أيضا في قراها الغربية والشمالية الممتدة لنهايات الترع والجداول المجاورة لحدود النيل الابيض والموازية للحدود الشرقية لمنطقة الدويم وحتى منطقة جبل أولياء.
تحياتي وتقديري

Post: #26
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-04-2014, 09:20 AM
Parent: #1

أب سن سلام،
جميل يا أخي، يكون عندنا قرابة مع أهل البطانة، يا سيدي ما ممكن تكون من العريباب ولسع ما قعدتا مع أمير المؤمنين!
أمير المؤمنين دا من الناس البشدو ليهم الرحال ولو إتّا موجود بالسودان تحيّن المناسبات والأعياد وشرّك لأمير المؤمنين بهناك، ما بتندم.

Post: #27
Title: Re: أولاد مدني ... أبو بكر عباس نشازاً
Author: HAIDER ALZAIN
Date: 07-04-2014, 11:11 AM
Parent: #26

هو يعني ابوبكر عباس جديد بالمنبر ؟
نادراً ما انظر لتاريخ تسجيل زول لكن ابوبكر كتابته كتابة زول قديم قدم الكسرة وخطه وااضح و افكاره انيــقة :)

مرحب ابوبكر ومرحب بمدني واهل مدني كلهم خاصة ناس عترة ..
يآخي متمني الم في المنبر دا في زول من عترة عشان اشكي ليهو من نميري البوليص ..

Post: #29
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 12:51 PM
Parent: #27

Quote: هو يعني ابوبكر عباس جديد بالمنبر ؟
نادراً ما انظر لتاريخ تسجيل زول لكن ابوبكر كتابته كتابة زول قديم قدم الكسرة وخطه وااضح و افكاره انيــقة :)
ما جديد يا ود الزين
لكن أنا (الزول زميل غرفة في السكن لسنوات) ما عملت واجب الترحيب به في وقتها لأنو المنبر كان فاير ومليان شتايم وهلم ركلا،
الآن بعد ما صفدوا الشياطين قلنا أن تأتي متأخرا الخ
أشكرك يا حيدر على المداخلة وأتمنى لك صياما مقبولا.

Post: #30
Title: Re: أولاد مدني ... أبو بكر عباس نشازاً
Author: حاتم يوسف العبيد
Date: 07-04-2014, 01:03 PM
Parent: #27

أهلا وسهلا بالأحباب ...... ناسنا ناس مدني .....

شكلنا دفعة أو قريب دفعة ..... يس أكيد لو أتكلمنا ح نعرف بعض ....

الأصحاب والدفعة في بانت كتااار ... أولاد عمك التجاني (أحمد التجاني - عضو البورد)/ ناس علي رجب / ناس عمك يونس (رحم الله العزيز نادر)... ناس حمد حماد (اعتقد ناس الجراري / ناس جيبتو ... و......و......


يللا ..... أتفضل ول قدام



....

Post: #33
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 03:52 PM
Parent: #30

Quote: معاوية سلام،
وسلام لابن بانت الدكتور البيطري بكوري.
ورمضان كريم على الجميع
وعليكم السلام يا قصي
أعجبتني ردودك في بوست الفتنة اللي فتحو ضيفنا
أيوا خليك كدا، أبوبكري دا زول خاطف لونين ما تضمنو
يعني ممكن يقعد يلكشرك في أصول السلفية مستشهدا بأسطورة رأس المال

صوما مقبولا يا أخي الحبيب

Post: #34
Title: Re: أولاد مدني ... أبو بكر عباس نشازاً
Author: ALGARADABI
Date: 07-04-2014, 05:19 PM
Parent: #33

الحبيب أبوبكر
سفير البياطرة وشيال همومهم
ما خلي بيطري في السودان ، حتى شكت السعية من جوره عليها ....
ده الشايل هموم الناس .....الساعي في الخير بينهم
فهو رجل من الذين قيل عنهم ( اختصه الله بقضاء حوائج الناس ، حببه في الخير و حبب الخير فيه)
والله نحبه لله فهو رجل لا تملك الا أن تحبه

معاوية ، بالله انتا كنتا هنا ؟؟ فاتتنا الصحبة الحلوة

ملحوظة:
أظن مداخلتي دي الاولي بعد سنتين من الغياب
ولسان الحال يقول غايب السنين الليله مالو غنا العصافير غلبو

Post: #35
Title: Re: أولاد مدني ... أبو بكر عباس نشازاً
Author: معاوية الزبير
Date: 07-04-2014, 10:00 PM
Parent: #34

حاتم يوسف مرحب بيك انت زاتك
دفعتك شنو ياخ بكون درسك في الجامعة
بكري دا ديناصور ما تديهو فرصة يقدل بينا

Post: #36
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 09:36 AM
Parent: #35

Quote: معاوية ، بالله انتا كنتا هنا ؟؟ فاتتنا الصحبة الحلوة
القرضابي يا وسيم الروح والمحيا
كنت هناك ساكت! أنا هسع لما أحن للماضي بستذكر الإمارات (والله جد)، السودان دا بقى خارج النافوخ
أما أبوبكر هذا، فعليه اللعنة إذ جعل سقف الخير عاليا هكذا في سمق قامته

مودتي ياخ وشكرا لكل ما تقدمه لنا عندكم

Post: #37
Title: Re: أولاد مدني ... أبو بكر عباس نشازاً
Author: حمد عبد الغفار عمر
Date: 07-05-2014, 10:52 AM
Parent: #36

معاوية وأبوبكر والزوار

كل سنة وانتو طيبين

ونرحب بأبوبكر عباس

Post: #38
Title: Re: أولاد مدني ... أبو بكر عباس نشازاً
Author: عاطف عمر
Date: 07-05-2014, 11:12 AM
Parent: #1

حذفت بعد تكرار التعديل لأخطاء إملائية

Post: #39
Title: Re: أولاد مدني ... أبو بكر عباس نشازاً
Author: عاطف عمر
Date: 07-05-2014, 11:18 AM
Parent: #38

هسع في البوست دا يسلموا على منو ويخلو منو ؟؟
لا حولاااااااا
طيب رمضان كريم ود الزبير والمحتفى به وضيوفهم الكرام
تقبل الله تعالى صيامكم وقيامكم والطاعات

شفت البوست دا أمس ظهراً .....
وتوقفت عند عنوانه ( المتأبط نشازاً )

قلت في سري .... أمااااااااااااااااااك
دا من بوستات ( اللخ ) كما يسميها دكتورنا بلة موسى - رد الله غربته الإسفيرية -
أو من بوستات ( الآكشن ) كما يسميها مهندسنا ود البشرى ..البسمع في كلامنا دا

النصيحة خفت على صيامي

قلت أشرب الموية وأجي أشوف الحاصل وأهو فرصة نشوف ود الزبير ( لاخاً ومؤكشناً ) فطالما تعودنا عليه هادئاً وصاحب رأى حصيف
وما بين التروايح وكورة فرنسا وألمانيا وبرنامج أغاني وأغاني لقيت فرقة وشفت الحاصل .....

ياخ دا إسمو كلام دا ؟؟؟

مراحب عزيونا أبو بكر عباس ود مدني ( عاصمتنا )
مدني التي جاءتنا بـ مامون سيد أحمد وأحمد فضل وعصام الفاضل وعثمان منصور و........................
ومدني الفيها أبناء عمتي بتول .... د. عوض الكريم الهادي ود المقدم وأخوانه.....

Post: #40
Title: Re: أولاد مدني ... أبو بكر عباس نشازاً
Author: محمد ابو شيبة
Date: 07-05-2014, 11:59 AM
Parent: #39

Quote: أسامة عثمان، يمين عشا الضيفان دي كان ختت ناس مدني تاني ما عندها ناس
مرة أيام الجامعة جاي من مصر مطلع التمانينات، وصلت الخرطوم يوم وقفة عيد ضحية
أصريت أسافر كوستي عشان العيد هناك أحضروا، كنا غضين وحديثي عهد بالابتعاد عن الأهل
وصلت مدني المغيرب عن طرق البصات طبعا، ولما جات الساعة تسعة بات واضحا أن من المستحيل العثور على بص ماشي كوستي
مشيت على أول كشك لبيع الخردوات سألت صاحبو عن لكوندا أو فندق قريب ويكون سعرو رخيص
وحكيت ليهو حكايتي. قال لي استنى شوية أقفل الكشك دا وأوديك الفندق بي نفسي
قعدنا يمكن زي ساعة وشوية وقفل الدكان، نادى ولد صغير خالاهو في أضانو الولد جا شال الشنطة وخب قدامنا
ونحن ماشين وراهو من شارع لي زقاق لغاية ما وصلنا بيت عادي، لقينا الولد الشال الشنطة فاتح الباب وواقف قدامو
عمك قال لي "ادخل يا ولدي بلا فندق معاك الدنيا عيد ونحن عندنا ولد واحد ومسافر للقراية برا وما عارفين هسه الحاصل بيهو شنو"
سلمنا وصلينا واتعشينا ونمنا، والصباح صلينا العيد ورجعنا ضبحنا وأصرت الأسرة ما أغادر إلا بعد أضوق لحمة الخروف.
ــــــــــــــــــــــــــــــــــــــــــــــــــــــــــــــ
الأسرة كانت عادية تجدها في أي حتة في السودان، لو قابلتهم اليوم لما عرفتهم والبيت عادي والدنيا زاتا كانت عادية ولم نكن نعرف وقتها
أن الحال دا ما عادي وأن علينا أن نعض عليه بالنواجذ وغير النواجذ ونحاصروا مثل أكتر باك عكلةً مع مهاجم خطير
والحمد لله من قبل ومن بعد


يالله عليك يا معاوية ...
في هذا المنبر انا كثير القراءة ... قليل الكتابة ... إلا اذا استفذني أمر
كتابتك طاعمة ... ومدني أطعم

Post: #41
Title: Re: أولاد مدني ... أبو بكر عباس نشازاً
Author: Sabri Elshareef
Date: 07-05-2014, 12:08 PM
Parent: #40

Quote: طبعا إختارت صديق سرحان، ولي قدام عرفت انو أنا ما بتحبّ لكن بتصاحب.



يا معاوية الزبير
سلام واحترام ورمضان كريم
تعرف بكور ده صاحبي في الدين والدنيا وهو قريب لخالو صاحب حالات
لكنه ذهن متقد وعقل نضيف

اها مراااات ناس يقولوا برضو بكور ما بتصاحب
بالله تجري لمتولي وتخلي صديق سرحان او العكس صحيح
كشفت حال خالك ابو قناية لكن احسن تخت كل الحاجات في الصقيعه

Post: #43
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 12:46 PM
Parent: #41

حمد ع ع لبد
متابع والله لردودك المسيخة بتاعت أهلنا الرباطاب
رطّب الله أيام رمضانك أينما كنت إن شاء الله في سيبيريا
مع المودة

Post: #42
Title: Re: أولاد مدني ... أبو بكر عباس نشازاً
Author: Dr.Mohammed Ali Elmusharaf
Date: 07-05-2014, 12:34 PM
Parent: #39

معاوية سلامات ورمضان كريم

ابكر ود عباس

لازم يكون نشاز
------------------------
حاولت ان اعدد فضائله بعد معرفة 30 سنة لم اقدر على احصائها

ابوبكر كن كما انت يا صديقي

حفطك الله واهل بيتك الطيبين

محبتي التي تعهد

Post: #44
Title: Re: أولاد مدني ... أبو بكر عباس نشازاً
Author: بله محمد الفاضل
Date: 07-05-2014, 12:57 PM
Parent: #42

يا اخي الزول دا ما ظبط معاي أبداً
من لحظة تحول من بابكر
إلى ما ادري شو اسمو
كأنه يريد إعادتنا إلى عهد الخلافة
ويبدو أنه تحول إلى داعشي أخيراً





ــــــــــــــــ
يا معاوية المدير ما تشكر لي الراكوبة في الخريف يا اخي
مين أبو بكر عباس دا؟

Post: #48
Title: Re: أولاد مدني ... أبو بكر عباس نشازاً
Author: ALWALEED ALSHEIKH
Date: 07-05-2014, 01:46 PM
Parent: #44

رجل جميل أجمع عليه معظم رواد الحوش الجميلين فألف مرحب به ونتمنى له طيب المقام
مدني لها مكانة سامية في قلب كل من عرفها حتى و لو لم يكن من أهلها فحبنا لأبوبكر نابع من حبنا لمدني فحباب مدني و أهل مدني
بنظري لقد أبدع المغني الذي يقول ولا أسيبا مدني و أجي أسكن حداكا
فهو إن فعل ما وعد به يكون قد تنازل عن شئ عظيم من أجل رؤية المحبوب.
Quote: أما أبوبكر هذا، فعليه اللعنة إذ جعل سقف الخير عاليا هكذا في سمق قامته

المكتوب أعلاه من أجمل ما قرأت منذ أمد بعيد فلكاتبه و لأبوبكر و لمعاوية و كل ضيوف البوست التحية و الاحترام

Post: #69
Title: Re: أولاد مدني ... أبو بكر عباس نشازاً
Author: Yousif A Abusinina
Date: 07-06-2014, 12:10 PM
Parent: #48

خلونا في عنكوليب مدني ... و في سمك كوستي
خلونا في عنكوليب مدني ... و في سمك كوستي

قلت صاحبك يتململ لمن زهج والجلالالالالالالالالالالالالالالالالا ماشى

يا معاوية نشكرك لما ذكرتة عن مدنى الحلوة الجميلة التى لها مكان خاص ومحبة اخص فهى كما يعرفها الجميع السودان المصغر

ات ااااااه زول بدور تخت مدنى فى زولا واحد مدنى دى زولات لللا حد لها ولا عد

لو سمحت ابعدنا من العنكوليب و محاية العنكوليب عندنا فى راى خاصة لو كانت من سيدى الشيخ شيقااااااااااااا راجل البردانة من صعيد مدنى زمان

مودة خاصة لاهل مدنى ولكل من يحب مدنى ولا بارك الله فى من عمل على دماااااااااااااااااااااااااااااار مدنى

عريبى مدنى ود ابوسنينه

من ولاية ابوسنينة ( ايزوناا) التابعة لجمهورية مدنى المستقلة

Post: #78
Title: Re: أولاد مدني ... أبو بكر عباس نشازاً
Author: mohmmed said ahmed
Date: 07-07-2014, 07:09 AM
Parent: #48

الصديق معاوية
سلام ورمضان كريم وسلم لى على ....على بابكر

ابوبكر دا فى موضوع الثقافة والمثقفين اسهمو عالية

دايمين بغيظنى بفكرة انى بعادى مثقف كبير باصرار

مهموم بى اصحابو ودايمين فاتح صدرو للمساعدة وشيل هم الناس

عندو فيلا عا########ى عجب وكل مانكون فى الطريق من العين للشارقة اقول للمدام والله هنا فى واحد صاحبى عندو سكن سمح سماحة

استضافناا بغداء فاخر فى جلسة مع حسن موسى
وبرضو جلسة فى استقبال عادل عبد العاطى

Post: #79
Title: Re: أولاد مدني ... أبو بكر عباس نشازاً
Author: keiga2000
Date: 07-07-2014, 09:40 AM
Parent: #48

مرحب حباب أبوبكـر عباس وبحكم القرب من حي بانت بحثت عنك بكل السبل الا اخيراً عرفتك تب

انك شقيق مدافع الاهلي السابق الانسان الخلوق عادل عباس (عبشين) واخوه النملة التقريبا مشارك معنا في هذا المنبر وخال الاخ محمد الجد النخلي

وقريب الشاعر مدني النخلي وحسوبة رفقاء السكن في حي البان
وزي ما كنت مشهور باسم بابكر في الداخلية سكنا معا في داخلية شمبات كلية البيطره

فمرحبا بك اخي الدكتور أبوبكر عباس ونتمنى لك اقامة سعيدة بين اهلك

وفي الحساب عندي معاك نسب بعمر أحمد الحاج (عمر شقل) من الدباغة وحاليا في البحوث

أبومصطفى

Post: #49
Title: Re: أولاد مدني ... أبو بكر عباس نشازاً
Author: ALWALEED ALSHEIKH
Date: 07-05-2014, 01:46 PM
Parent: #44

رجل جميل أجمع عليه معظم رواد الحوش الجميلين فألف مرحب به ونتمنى له طيب المقام
مدني لها مكانة سامية في قلب كل من عرفها حتى و لو لم يكن من أهلها فحبنا لأبوبكر نابع من حبنا لمدني فحباب مدني و أهل مدني
بنظري لقد أبدع المغني الذي يقول ولا أسيبا مدني و أجي أسكن حداكا
فهو إن فعل ما وعد به يكون قد تنازل عن شئ عظيم من أجل رؤية المحبوب.
Quote: أما أبوبكر هذا، فعليه اللعنة إذ جعل سقف الخير عاليا هكذا في سمق قامته

المكتوب أعلاه من أجمل ما قرأت منذ أمد بعيد فلكاتبه و لأبوبكر و لمعاوية و كل ضيوف البوست التحية و الاحترام

Post: #45
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 01:20 PM
Parent: #42

ها ها ها والله يا عاطف ضحكتني لمّن باقي الريق نشف وحق لنا أن نفطر باقي اليوم الحار دا
لكن قبال كل شئ
Quote: وما بين التروايح وكورة فرنسا وألمانيا وبرنامج أغاني وأغاني لقيت فرقة وشفت الحاصل

تشيل الحل دا وتوديهو لود شيقوق بهناك وتشرح ليهو دي عملتها كيف
تانيا بيني وبينك العنوان خلعني أول مرة لكن قلت لا بد أن في بال الناس "نموذجا" و"مثالا"، دا غير إنو كلمة نشاز دي تشبه شاذ (وما الفرق لولا حمولات الكلمة)
كويس انك اديتنا فرصة نستخدم "حمولات" دي.
تالتا
Quote: هسع في البوست دا يسلموا على منو ويخلو منو ؟؟
لا حولاااااااا
طيب رمضان كريم ود الزبير والمحتفى به وضيوفهم الكرام
المفروض المحتفى به يجئ يرد وقد بدأ فعلا
لكن (مرة أخرى بيني بينك) لقيت مداخلات الناس الحلوين ديل ما بتتفوت وكنت مستمتعا بالرد عليها، مع إنو ردود أبوبكر حتكون مبالغة ودونك مداخلته الأولى.
آخيرا شكرا لهذا الوسام.. رطبّت علينا الجو
Quote: النصيحة خفت على صيامي
قلت أشرب الموية وأجي أشوف الحاصل وأهو فرصة نشوف ود الزبير ( لاخاً ومؤكشناً ) فطالما تعودنا عليه هادئاً وصاحب رأى حصيف

Post: #47
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 01:43 PM
Parent: #45

محمد أبو شيبة
تسلم ياخ
يعني ممكن أطلب من بكري مكتبة (وجه باسم)

Post: #46
Title: Re: أولاد مدني ... أبو بكر عباس نشازاً
Author: الصادق البديري
Date: 07-05-2014, 01:29 PM
Parent: #1

أبو بكر حبابك ألف....
أستاذ معاوية... لي محبوب جفاني .....



Post: #50
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 01:58 PM
Parent: #46

Quote: Salma Salama · الأكثر تعليقا · Cedar Crest College
يا معاوية انت بتعرف الدحيم ؟ اخو عثمان النو ؟ من الليلة انت صحبى تب ، ياخ احمد دا نكتة متحركة زول من اجمل وانبل الخلايق العرفتهم فى حياتى ،
ما القاهو الا وينفتح نهر ولا اقول ليك بحر من الضجك ، يا سلام عليك ياخ ،
وحلفتك لو عندك اى وسيلة اتصال تديهو عنوانى فى الفيس بوك دا خسيمك النمل ياخ مشتاقة للزول دا لمن غلط .. لكما المودة
كيف ياخ، أحمد النو دا كارثة تمشي على قدمين
سخرية وفلهمة وفهم وفأر قراية، عشنا التسعينيات الفاتت دي في الإمارات بسهلها ووعرها، للأسف آخر مرة مشيت عجمان قبال سنة ما قدرت ألاقيهو، قال ايه: متزوج حديثا !
سأوافيك بعنوانو إن شاء الله

Post: #51
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-05-2014, 02:40 PM
Parent: #1

يا معاوية، يا أخي، عليك الله، شففني، كيف أرد على الناس الضيفتني دي؟ أرد بالصف، ولّ أجملن كلهم بمداخلة واحدة من نوع: ترحيبكم أثلج صدورنا،
ولّ أسيبا مدني وأجي أسكن في البوست دا؟!
المهم، زي ما بقول تبارك، أنا في سودانيز دي ما جديد، ومن زمن بعيد متابع متابعة دقيقة، وتقريبا بعرف معظم الأعضاء وحاولت من زمن الإنضمام وكنت برسل لبكري رسالة لطلب العضوية بكتب فوقها:
السيد بكري أبوبكر
أنا بابكر عباس، كاتب كبير، أرجو منحي عضوية بمنبركم
وشكرا
وظل بكري يجليني، وأنا مواظب على طلب العضوية دون تزكية من أحد، لحدي ما شهر تلاتة دا، منّ عليّ بالعضوية، ورجعت يكون السبب انو أنا في المرّة الأخيرة أضفت في العنوان:
مقيم بين الأمارات ونورث كارولينا
وأظن انو بكري بحب المحلات النضيفة!!

Post: #52
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-05-2014, 03:01 PM
Parent: #1

مدني نشاز:
الناس الإتعرفت على ناس مدني في السبعينات والتمانينات وبداية التسعينات بالجامعات والمعاهد العليا كان في السودان ولّ بالخارج، إتنقلت ليهم رسالة عن وجه مدني الحنكوش فقط، بلد الكورة والموسيقى والسياسة والظرافة الإجتماعية، لكن ظل هناك وجه خفي عن الناس يميّز مدني وأمتداداتها دون باقي مدن السودان وهو الجانب الروحي وهي تعتبر عند الصوفية المدينة الروحية الأولى ولا أبالغ لو قلت انها تشبه قُم عن الشيعة.
سنة سبعة وتسعين كنت أزور المرحوم سعيد شايب زعيم الجمهوريين بإنتظام كلما ذهبت لمدني لحضور لجلسات إنشاد الجمهوريين، خلال الزيارات دي، تعرفت على مُحي الدين عبد الستار، بعد مٌدّة قلت ليهو يا محي الدين، يا أخي، أنا ماشي الخليج، تغيرت ملامحه وقال لي: ماشي تسوي شنو؟ يا أخي زول يكون عندو فرصة يعيش في مدني دي ويسافر يخليها؟! مدني دي مدينة روحية...

Post: #53
Title: Re: أولاد مدني ... أبو بكر عباس نشازاً
Author: بدرالدين الطائف
Date: 07-05-2014, 03:19 PM
Parent: #52

Quote: يا معاوية، يا أخي، عليك الله، شففني،


يا بكور يا شفيف عاوز ودالمدير ده يعمل ليك شنو أكتر من إنه يتيح فرصه تكتب فيها عن نفسك من خلال علاقتك المميزة بمدني
وإرتباطك الروحي بيها .

الاهلي مدني وصديق سرحان كانوا فى قمة مجدهم الكروي والفني فى التمانينات .
فى الفترة دى إنت كنت فى ياتو مرحلة دراسيه :)

ودالمدير ده بوست الموسم أمسك قوي .

Post: #54
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 06:56 PM
Parent: #53

Quote: يا معاوية الزبير
سلام واحترام ورمضان كريم
تعرف بكور ده صاحبي في الدين والدنيا وهو قريب لخالو صاحب حالات
لكنه ذهن متقد وعقل نضيف

غايتو يا صبري في الدنيا دي مقبولة لكن الدين ماااا بضمنو ليك
ثم مشتاقين ياخ بعد ذلك اللقاء اليتيم عند أم اليتامى
مودتي

Post: #55
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 07:05 PM
Parent: #54

Quote:
ابكر ود عباس

لازم يكون نشاز
------------------------
حاولت ان اعدد فضائله بعد معرفة 30 سنة لم اقدر على احصائها

ابوبكر كن كما انت يا صديقي
د. محمد علي المشرف، أبكر سيكون كما هو حتما، ح يتغير كيف بعد العمر دا كله،
الحاجات السمحة دي بتتصبغ في الزول ولا فكاك
تحياتي

Post: #56
Title: Re: أولاد مدني ... أبو بكر عباس نشازاً
Author: عبدالحفيظ ابوسن
Date: 07-05-2014, 07:42 PM
Parent: #55

ابتسم انت في مدني الجمال
وعلاقتنا بمدني قديمة ,, فبها اعمامي احمد علي جلي الشهير ب احمد بيه محافظ الجزيرة ,, وعمي مهدي سويس حي القلعة والدباغة ,, وجدي عبدالرحمن جلي النشيشيبه ,,, ثم صارت مستقرا لشقيقتي نجوي وشقيقي احمد
ف كنت بركب تاكسي طرحه من الدباغة للسوق ,, ومخصوص بعزل تكسي الفنان المبدع الخير عثمان ,, واتونس بعد داك غير مصدق
ولي بها ابن عمي علي الحبشي المريخابي المهووس ,, عندو بقالة في شارع الدباغة حي زورو لامن يغلب المريخ بخسر هو , ببسي وزفه
ولي بها ذكريات زي حقت يحي قباني لا تحكي
مرحبا ابوبكر قريبي متشعبط فيك
بالمناسبة لا علاقة لي بأبوسن ناظر البطانة
نحن من آل جلي ثم فرعا ابوسن
سلام للصديق
مامون سيد احمد
الرجل النسمه

Post: #57
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 08:06 PM
Parent: #56

أنا عارف يا أبو بكر انت زول فيك البركة
والبوست دا شكلو ح يطوف ببستان مدني شتلة شتلة وزهرة زهرة
عشان كدا خليني اقوم بالواجب في الرد على باقي الشباب ديل وبعدين نديك الزمام
Quote: يا معاوية، يا أخي، عليك الله، شففني، كيف أرد على الناس الضيفتني دي؟ أرد بالصف، ولّ أجملن كلهم بمداخلة واحدة من نوع: ترحيبكم أثلج صدورنا،
ولّ أسيبا مدني وأجي أسكن في البوست دا؟!
لا تجمِل لا تسيبا مدني، علييييي مهلك، شرّق وغرّب مع كل مداخلة (انداح يعني) بس ما تنسى ليك زول
ودي طريقة بتنفع معاك، أصلك ما بتعرف تواصل ليك في موضوع واحد: لأنك بتكون سابق الناس في التفكير (الناس ديل نحن وشلة الشارقة) عشان كدا كنا بنشوفك
زي الما معانا في النقاش بينما انت بتكون تجاوزتو لآفاق أوسع
فـــ شنو خليني أرد على الناس القيافة ديل اللي هم ناسك وبالضرورة ناسنا

Post: #58
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 08:16 PM
Parent: #57

بله الفاضل جدا
Quote: ما تشكر لي الراكوبة في الخريف يا اخي
مين أبو بكر عباس دا؟
وانت ما تشكر لي الخريف يمين بكري دا مِرِق، ريح صرصر ما تهزو.
بمناسبة الاسم، نحن كنا سبعة عزابة ساكنين في بيت في الشارقة، كل واحد فينا كان بنادي الزول دا بي اسم مختلف
أها منها: أبوبكر، بكري، بكوري، بابكر، أبكر (والاخير دا هو المحبب لصديقنا الرائع بابكر علي خطيب)
فاختر صديقك بينهم
أحييك

Post: #59
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-05-2014, 08:44 PM
Parent: #1

بعد أبو سن قريبي ح أرد على سلمى الشيخ سلامة وأحقق ليها أمنيتها وأجيب ليها تلفون الدحيم الكارثة أخو عثمان النو وهو:
00971505959301

Post: #60
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 08:49 PM
Parent: #59

وانت العجيمي اتصل هسه بسأل عن تلفوناتكم انت وهاشم

Post: #62
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 09:03 PM
Parent: #60

Quote: رجل جميل أجمع عليه معظم رواد الحوش الجميلين فألف مرحب به ونتمنى له طيب المقام
وهو كذلك يا الوليد الشيخ
ولكنها مسؤولية عظيمة، الله يقدّرو عليها
أشكرك ورمضان كريم

Post: #61
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-05-2014, 08:58 PM
Parent: #1

ما دام أديتوني المكرفون ح أعمل ليكم فيها مثقف كبير وأدخل نفسي ضمن أحداث كبيرة ومثقفين كبار.
يا بدر الطائف (بدر دا، اول زول رحب بي هنا): بداية التمانينات دخلت السني شاهدت وحضرت مقتل طه يوسف عبيد برصاص مايو وكنت دفعة أخوهو أسامة، وحضرت التأبين الألقى فيهو محمد محيي الدين قصيدته المشهورة:
عشرة لوحات للمدينة و هي تخرج من النهر
الى روح الشهيد طه يوسف عبيد
(الشاعر:محمد محيي الدين)
واحد
لوحة صباحية:
شجر البان استعاد الريح
وارتاح على رقصته نسوة
يغسلن الجلاليب،
الثياب الخضر..

أركان البيوت إنتفضت
بالارجل الراكضة
الطير إنتشى..
صفقت الزونيا
وضجت ساحة الجميز بالطير الصباحي..

الحمامات تبرجن
ورجرجن على الابراج ريشا ابيضا
والنهر أخفى لونه العادي..

أجيال من الاسماك ترمي ظلها المائي
تخضر و تحمر علي الشاطئ
عمال المجاري
بائعات الكسرة
الشماسة
النسوة
ارباب المعاشات اشتروا ظلا جديدا
في انتظار السفر
الباصات ملّت

جسد الأسفلت
ألقت
راكبيها
وتخلت
عن مواعيد لعشاق يعيشون الجوى فيها
كراسي الخشب المكسورة الايدي زمانا في مقاهي السوق
تشتاق لرواد يضئون الزوايا
والدراويش استفاقوا من نشيج الرعشة الاولي
على ايقاع بوب مارلي استفاقوا
لحظة أخري
من الظل الذي جاور جدران المراحيض العمومية
والنسوة يدخلن تباعا
والضريح انفتحت منه الشبابيك
يلملمن الزوارات
وأرداف التجار المرحليين على باب المديرية تهتز
وآلاف من الطير الصباحي على بوابة النيل تحيي
حمد النيل
ورايات الضياء الخضر شوشن إذاعات جنود الشعب
في الحامية الباسلة الطير انتشى
شجر البان استعاد
القبعات
الموسميات
استراحت
غابة النيم
علي وقع خطى الجند
رجال الأمن يوفون
نذور الحب
للتجار
والسادة
والقادة
والاطفال يوفون يذور الحب للأرض

البيوت انتفضت
بالأرجل الراكضة
الأردية الخضراء و الزرقاء
والكتب الحكايات
المجلات
الطباشير
المناديل
الزهور النور
والنسوة نشرن الجلاليب على الجدران
جهزن الملاءات
الحنوط
الكسرة الصامتة /الصامدة
الشايا
وعبَّأن الأناشيد
المواعيد
وأقلام الرصاص
الجرس الاول دقّ
الجرس الثاني دقّ
(الجرس الثالث ..
دقت الاجراس دقّ
جرس جرس
النحاسى
الاساسي
الخلاسي
الخلاصي
الرصاصي
الرصاص

هذه القصيدة قيلت في تأبين المرحوم المناضل طه يوسف عبيد
وقد قمت بكتابتها من شريط قديم وأنزلتها سابقا بمنتدى سودانيات كاملة

Post: #63
Title: Re: أولاد مدني ... أبو بكر عباس نشازاً
Author: عبدالحفيظ ابوسن
Date: 07-05-2014, 09:09 PM
Parent: #61

ياااااااه
محمد محي الدين
لا إله سوي البندقية
والحاكمية للشرطة العسكرية
اين ذلك الشاعر
شاعر ود مدني
كم امتعنا

Post: #64
Title: Re: أولاد مدني ... أبو بكر عباس نشازاً
Author: خالد زين العابدين حاج نور
Date: 07-05-2014, 09:47 PM
Parent: #63

تحياتى واحترامى لصاحب البوست
والمحتفى به ولكل من مر من هنا
يا معاوية حرام عليكم نحنا عايشين فى
السودان درجة حرارة الف وموية قاطعة
وكهرباء مافى ومتنفسنا الوحيد سودانيز
اوبلاين وكلماتكم التى تنتزع البسمة من
شفاهنا انتزاعا تجى تقول لينا معتكف اربعين
يوم قبل رمضان يعنى نحنا نقع وين مخلننا لى
ناس عاك عيك وساس يسوس
اما دكتونا المحتفى به فاكاد اجزم بانى تلصصت
على كل مداخلاته من اول يوم له فى سودانيز
لما لحظته من اناقة الكلمة والزكاء البين
وعلى بالطلاق قلتا الزول دا بكون من مدنى
وصراحة شلت الهم بعد قبول عضويتى ان كان
بامكانى ان اكتب حرفا فى وجودكم
فلذلك غير مسموح لك ولضيفك بالغياب
والا رائتم ما لا يسر من ورجغتنا

Post: #65
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 10:12 PM
Parent: #64

دقيقة يا بكور، عندي اتنين تاني
حبيبنا الصادق البديري الزول الراقي، وهديتو بتاعت صديق متولي مقبولة
لكن أنا صراحة كدا ورجوعا إلى صاحبة المنقة المشوكشة ديك
أفضِّل أهلي مدني والجمهوريين
يديك العافية يا بديري

Post: #66
Title: Re: أولاد مدني ... أبو بكر عباس نشازاً
Author: معاوية الزبير
Date: 07-05-2014, 11:06 PM
Parent: #65

خالد زين العابدين، ازيك ياخ
Quote: نحنا عايشين فى السودان درجة حرارة الف وموية قاطعة
وكهرباء مافى ومتنفسنا الوحيد سودانيز

انت سمعت قصة الكاثوليكي القال لصاحبه المسلم إنو عايز يدخل الإسلام عشان يطلق زوجته (النكدية) بما إنو الطلاق محرم عند الكاثوليك؟
صاحبو قال ليهو مافي مشكلة، لكن في الإسلام دا عندنا حاجة اسمها رمضان، أخير ليك زوجتك دي!
فيا أخوي سودانيز دا أخير منو رمضانكم الحااار

يشهد الله قلوبنا معاكم وكل يوم بنتصل بالأهل نسألهم: الليلة كيف
واحد صاحبي ضربت ليهو نهار الخميس داير اقول ليهو مرسّل ليك قروش، قبل ما أكمّل كلامي قال لي لاهثا:
بعدين بعدين، باقي ريقي دا داير أكمّل بيهو اليوم.
شكرا على كلامك الجميل يا خالد، وربنا يضاعف أجركم أضعاف أضعاف، وبرضو يجعل الحر دا بردا ودعاشا عليكم

Post: #67
Title: Re: أولاد مدني ... أبو بكر عباس نشازاً
Author: اخلاص عبدالرحمن المشرف
Date: 07-05-2014, 11:15 PM
Parent: #66

صاحب صاحبك -صاحبك = معاويه الزبير لا انسي =الدعم الكامل والرقيق = الذي تلقيته منك لك ودي واحترامي وتعيش يا ملك .

Post: #68
Title: Re: أولاد مدني ... أبو بكر عباس نشازاً
Author: بدرالدين الطائف
Date: 07-05-2014, 11:28 PM
Parent: #67

ود الزبير يا جميل :)
رمضان كريم ياخ.
عارف المقام ما مقام إعتذارات وإكيد إنت مستوعب سبب الخلط لتشابة الاسماء وكده .
وبالتاكيد أنت ووالمدير أعزاء وقريبين الى القلب .
بس ما بوعدك إنو الخطاء ده ما يتكرر لانه الحكاية دى قاعده تعلق معاي :).

Post: #70
Title: Re: أولاد مدني ... أبو بكر عباس نشازاً
Author: معاوية الزبير
Date: 07-06-2014, 01:20 PM
Parent: #68

Quote: صاحب صاحبك -صاحبك = معاويه الزبير لا انسي =الدعم الكامل والرقيق = الذي تلقيته منك لك ودي واحترامي وتعيش يا ملك .
يعيشك يا اخلاص، يا قول التوانسة.
يا أختاه نحن جبنا حاجة من عندنا، أتابعك منذ نافذة الفيسبوك وقد سررت لنيلك العضوية الرسمية، بعدين صاحبي دا بيناتنا نسب كمان، بيد أن شوفتو غالية خلاص لاختلاف مواقيت العمل
دمتِ ودامت صحبتك

Post: #71
Title: Re: أولاد مدني ... أبو بكر عباس نشازاً
Author: معاوية الزبير
Date: 07-06-2014, 03:06 PM
Parent: #68

بدر الدين الطائف .. اسم فنانين شباب، تبيع! الاسم والشباب معا

Post: #72
Title: Re: أولاد مدني ... أبو بكر عباس نشازاً
Author: معاوية الزبير
Date: 07-06-2014, 09:21 PM
Parent: #71

Quote: يا معاوية نشكرك لما ذكرتة عن مدنى الحلوة الجميلة التى لها مكان خاص ومحبة اخص فهى كما يعرفها الجميع السودان المصغر
ات ااااااه زول بدور تخت مدنى فى زولا واحد مدنى دى زولات لللا حد لها ولا عد
لا طبعا يا أبو سنينه
لكن انت عارف الزول بكتب منطلقا من ملاحظة قد لا تكون دقيقة 100% لكنها ملاحظة على كل حال، فيضخمها وينداح
ودا الحصل مع صاحبنا بكوري دا
وأهو فرصة للجميع للاندياح

Post: #73
Title: Re: أولاد مدني ... أبو بكر عباس نشازاً
Author: معاوية الزبير
Date: 07-07-2014, 00:27 AM
Parent: #72

Mohamed Elrazi · City University of New York Graduate School
هل يعلم المتداخلين ان والدي رحمه الله مولانا الشيخ الطيب ابوقنايه الذي كان من اعلام المدينه كانت له ابنه محببه الي نفسه هي والدة صاحب البوست؟
رد · · منذ ‏7‏ ساعات
ـــــــــــــــــــــــــــــــــــــــــــ
نِعم الأولاد والوالدة والوالد
بالجد جد يا محمد
وتحياتنا لبقية الأسرة الكريمة

Post: #74
Title: Re: أولاد مدني ... أبو بكر عباس نشازاً
Author: صديق الموج
Date: 07-07-2014, 03:26 AM
Parent: #73

معاويه الزبير يا صديقى رمضان كريم
امانة ما ذكرت رجل، ود عباس سيد الناس مافوقو كلمة تب لكن انت
ما ملاحظ مرات ناس مدنى بزودها حبتين وبحاولو يقارنو مدنى بامدرمان
ويقولو ليك ام سويقو زى سوق الشجرة فى امدرمان والعشير بتشبه ابوروف
هى المدن زى العيون كبيره وصغيره كلها ترى ولكن العيون الكبيره من علامات الحسن
نحن نرضى كان قالو مدنى بت امدرمان الصغيرة لكن ما يخلوهن ندده وكده
او ممكن يقولو لو ماقدرت تقعد فى امدرمان ممكن تختار مدنى سكن
لانه فيها حاجت تقرب تشبه حاجات امدرمان وكده ، الانصاف واجب يا الحبايب
معاويه التحيه لك ولود عباس وضيوفك الكرام حتى المسنوح ود شيقوق
وزى ما بقولو ناس الرادى على مستمعينا فى الاقاليم مراعاة فارق التوقيت
وامدرمان جميله خلاس يا معاويه وود عباس ويبقى الود،،،

Post: #75
Title: Re: أولاد مدني ... أبو بكر عباس نشازاً
Author: عبدالعزيز عثمان
Date: 07-07-2014, 04:45 AM
Parent: #74

ياسيد البوست ليك ياسمح ولي ناسك السمحين ولي مدني السمحة سلام...
يكون كلامي فيها مجروحا...
قريت بحنتوبها...
وعملت ببركاتها...اتسوق بسوقها،احن لفول ابظريفة وقهاوي المدينة القديمة
وعينت معلما بمدرستها زماااااان.
ولكن طمع الدنيا خلاني ابيعها بغربة بدات منذ التمانينات
وانتهت اخيرا بديار جديدة...
وكل مايجئ ذكرها،،،امسك قلبي ان لايسقط..
لمدني ساكنيها ومحبيها كل الحب..

Post: #76
Title: Re: أولاد مدني ... أبو بكر عباس نشازاً
Author: يحي قباني
Date: 07-07-2014, 05:02 AM
Parent: #75

Quote: وعينت معلما بمدرستها زماااااان.
ولكن طمع الدنيا خلاني ابيعها بغربة بدات منذ التمانينات

عبد العزيز شكلو طلع دفعة ( ود النَـقِـــل ) في التدريس !!!

Post: #77
Title: Re: أولاد مدني ... أبو بكر عباس نشازاً
Author: عبدالعزيز عثمان
Date: 07-07-2014, 06:07 AM
Parent: #76

ياقباني ياخوي ان جيت لي الحق والله نحن قدمنا خلاس..
والله الواحد اكان ماخوف ماتصدقوني لقلت باني قد جيت مع نوح بسفينته...
لكن الشئ المؤكد اني سكنت بداخلية عطبرة حين كنت انت ساكنا بها...
بس النصيحة لي الله كنت انت شابا نضرا...
وكنت انا قد التحقت بالجامعه بعد خرف..
فماذا تبقي غير الحنين..

Post: #80
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-07-2014, 11:12 AM
Parent: #1

مجموعة الأمارات:
باسط المكي، ود البشرى، عباس، عمر محمّد الحسن الشهير بالقرضابي، الزميل محمّد المُشرف (زمالة مهنة) والزميل محمّد سيد أحمد (زمالة يسار) مشكورين يا شباب على الحفاوة والكلام السمح في حقي، واضح انكم كترتم المحلبية، لكن كويس خلينا نقشر على العرب بتاعين سودانيز ديل...

يا قرضابي،
بالله السنة دي، فطور رمضان بتاع البورداب أعملوهو بفندق يليق بمقامي السامي،
بالنادي السوداني ما ح أجي، وانتو الخسرانين

Post: #81
Title: Re: أولاد مدني ... أبو بكر عباس نشازاً
Author: علاء الدين صلاح محمد
Date: 07-07-2014, 12:18 PM
Parent: #80

بكري فوق كل الكلام الاتقال هنا وحياة صيامي
هنالك نقطة لم يتطرق لها احد
وهي التفوق الادكايمي لبكري
الزول ده شاطر جدا ويعلم هذا كل من زامله .
تفوق في الكلية واعترف بتفوقه الالمان واختاروه باحثا
متفرقا وذلك ضمن برنامج الالمان لدعم السودان
ولاننا منكوبين وما لنا نصيب في الحلو حُرم ابل السودان من علم بكور
بكري كما ذكرت في بوست سابق قرات واقر كل مداخلاته
ومعلم اسمو بالاحمر لسهولة العثور على مداخلاته

Post: #82
Title: Re: أولاد مدني ... أبو بكر عباس نشازاً
Author: معاوية الزبير
Date: 07-07-2014, 12:48 PM
Parent: #81

Quote: امانة ما ذكرت رجل، ود عباس سيد الناس مافوقو كلمة تب لكن انت
ما ملاحظ مرات ناس مدنى بزودها حبتين وبحاولو يقارنو مدنى بامدرمان
ويقولو ليك ام سويقو زى سوق الشجرة فى امدرمان والعشير بتشبه ابوروف

ود الموج يا صديق، قلت لي أمدرمان عديييل وكمان بالتفاصيل
ياخي كل ولد بأمه معجب، المافي شنو، بالمناسبة وين الزول الجميل دا ولا زلة قلم حتى !
لكم كل المحبة

Post: #83
Title: Re: أولاد مدني ... أبو بكر عباس نشازاً
Author: Yahya Osman
Date: 07-07-2014, 01:13 PM
Parent: #1


أبو سليم وهبه الله صوتا جميلا ... امام المسجد تنبه لهذا الصوت لكنه عرف ان ابو سليم زول شربه مما تمغرب
وفي الصواحي وطرف المداين والليل ما بنوموا انا الحارس نجوما
لكن امام المسجد اصر ان يقوم ابو سليم بالاذان والباقي بين ابو سليم وربو
والله غفور رحيم
المهم ظل ابو سليم على هذا المنوال والناس الما عارفاهو بسيو باللليل شنو مستحسنين
هذا الصوت الرائع الذي يرف الاذان ويتغلغل بين ازقة ام درمان
اقرباء ابو سليم ساكنين ام درمان الثورة بالنص واليوم داك عندهم سمايه وناقصة الفنان و المكرفون
لم يفكروا طويلا ابو سليم موجود وحتي مافي داعي للمكرفون فالصوت قوي وجميل
المهم ابو سليم ما داير ليهو تحانيس شال الرق وبدأ في الغني ..
وفي الضواحي اولا ومن ثم تتابعت الاغاني والحقله ربت ..
واحده من نسوان امدرمان كانت معزومه وسامعه الغني والصوت ما غريب عليها ...
قالت كدي الاتاكد وتاوقت وياهو ابو سليم ... وياهو صوت حي على الصلاة .....
اقتربت اكثر قاكثر ....
سجم خشمي ابو سليم ؟؟؟؟؟ في ام درمان آذان وفي الثورة قنان ؟؟؟
رد عليها ابو سليم ..
وكمان سكران ...
اها حبيبنا د. بكه ده موش ياهو بتاع سودانيات

Post: #84
Title: Re: أولاد مدني ... أبو بكر عباس نشازاً
Author: Yahya Osman
Date: 07-07-2014, 01:30 PM
Parent: #1

الحبيب معاوية الزبير والاحباب جميعا
غذرا ...لكم الود الذي لا ينتهي ورمضان كريم

Post: #85
Title: Re: أولاد مدني ... أبو بكر عباس نشازاً
Author: معاوية الزبير
Date: 07-07-2014, 02:08 PM
Parent: #84

ياهو زاتو يا يحيى
لكن بالله أحلى مؤذنا أم فنانا ؟ النصيحة لله


---------
برجع للباقين

Post: #86
Title: Re: أولاد مدني ... أبو بكر عباس نشازاً
Author: Yahya Osman
Date: 07-07-2014, 02:34 PM
Parent: #1

كلاهما احلي بس ما يكون سكران

Post: #87
Title: Re: أولاد مدني ... أبو بكر عباس نشازاً
Author: معاوية الزبير
Date: 07-07-2014, 03:16 PM
Parent: #86

من الناحية دي خليك مطمئن يا يحيى

ورمضان كريم عليك

Post: #88
Title: Re: أولاد مدني ... أبو بكر عباس نشازاً
Author: معاوية الزبير
Date: 07-07-2014, 03:22 PM
Parent: #87

Quote: قريت بحنتوبها... وعملت ببركاتها...اتسوق بسوقها،احن لفول ابظريفة وقهاوي المدينة القديمة
وعينت معلما بمدرستها زماااااان. ولكن طمع الدنيا خلاني ابيعها بغربة
يا زول كفاك عشت شبابك
وأرض الله دي واسعة مخصوص عشان الناس تبحت فيها لي رزق الأهل
كتابتك ممتعة يا أستاذ عبد العزيز
الله يديك العافية

Post: #89
Title: Re: أولاد مدني ... أبو بكر عباس نشازاً
Author: معاوية الزبير
Date: 07-08-2014, 04:47 AM
Parent: #88

Quote: دايمين بغيظنى بفكرة انى بعادى مثقف كبير بإصرار
محمد سيد أحمد، ازيك يا حبيب، لكن انت كمان عملتها ظاهرة، أظنو (ع تكعيب) بكون واضعك في الحساب كلما هم بكتابة مقال جديد
Quote: مهموم بى اصحابو ودايمين فاتح صدرو للمساعدة وشيل هم الناس
نو كومينت طبعا
Quote: عندو فيلا عاجبـاني عجب وكل مانكون فى الطريق من العين للشارقة اقول للمدام والله هنا فى واحد صاحبى عندو سكن سمح سماحة
يا زول ما تنجهو ساكت، دا سكن حكومي، لا يلبث أن ينتقل منه إلى المناقل أو الحوش

Post: #90
Title: Re: أولاد مدني ... أبو بكر عباس نشازاً
Author: احمد التجانى احمد
Date: 07-08-2014, 04:26 PM
Parent: #89

بابكر او أبكر ود جيرانا في بانت ذات صبا ، كان حريف في ألدا فوري مثله مثل اخوه عبشين. وأخوه عمر النملة واقاربهم عمر وإبراهيم سعيد، حكمة ربنا كانوا شاطرين كلهم في المدرسة وكذلك لديهم حس الظرافة والسخرية واكبر كان أكثرهم بروزاً حينما يلتقي مع غازي يوسف وآخرون من مساخيت بانت ، الغريبة كان يتهمني بالضحك والابتسامة الدائمة مع انه الآخرون يجدونني متجهما عبوثا قليل الكلام ، لم اخبر له اي ميول يسارية او جمهورية إبان معرفتي له عيبه الوحيد كان ليه تفه
رمضان مبارك عليكم جميعا

Post: #91
Title: Re: أولاد مدني ... أبو بكر عباس نشازاً
Author: معاوية الزبير
Date: 07-08-2014, 06:35 PM
Parent: #90

رمضان كريم يا أبو حميد
Quote: لم اخبر له اي ميول يسارية او جمهورية إبان معرفتي له عيبه الوحيد كان ليه تفه
والله التفه ما عيب، عيب ما يكون عندو ميول يسارية أو جمهورية

Post: #92
Title: Re: أولاد مدني ... أبو بكر عباس نشازاً
Author: معاوية الزبير
Date: 07-09-2014, 04:17 AM
Parent: #91

Quote: مرحب حباب أبوبكـر عباس وبحكم القرب من حي بانت بحثت عنك بكل السبل الا اخيراً عرفتك تب
انك شقيق مدافع الاهلي السابق الانسان الخلوق عادل عباس (عبشين) واخوه النملة التقريبا مشارك معنا في هذا المنبر وخال الاخ محمد الجد النخلي
وقريب الشاعر مدني النخلي وحسوبة رفقاء السكن في حي البان
وزي ما كنت مشهور باسم بابكر في الداخلية سكنا معا في داخلية شمبات كلية البيطره
فمرحبا بك اخي الدكتور أبوبكر عباس ونتمنى لك اقامة سعيدة بين اهلك
وفي الحساب عندي معاك نسب بعمر أحمد الحاج (عمر شقل) من الدباغة وحاليا في البحوث
أبومصطفى

والله يا أبو مصطفى جبت أتره تب
أها يا بكور: كيف سترد ؟! على قول التعيس فيصل القاسم

Post: #93
Title: Re: أولاد مدني ... أبو بكر عباس نشازاً
Author: احمد التجانى احمد
Date: 07-09-2014, 07:07 AM
Parent: #92

الله اكرم يا ابو الزبير ، وتصوم وتفطر علي خير
بالتأكيد لا يعيب الانسان ان يتجه لليمين او لليسار او يحايد بينهما ولكن ما قصدته عن أبكر انه لم يكن متفرغا لهكذا أشياء فكل وقته كان مبذول في الضحك والفكاهة والسخرية كمعظم أهل مدني وكانت شلته من اولاد الحي علي نفس الشاكلة بس الزعامة عند أبكر ، يمكن في الجامعة لم نلتق كثيرا وقد يكون بدا تكوين رويشاته اليسارية والجمهورية عندها ، ما أتذكره جيدا ان معظم من وجدانهم قدامنا في الجامعة كانوا معجبين جداً وداعمين للفكر الجمهوري وليس بالضرورة انتماؤهم له ودلك بسبب تأثير أركان دالي والقراي علي طلاب الجامعة في تلك الفترة التي سبقت مقتل زعيم الفكر الجمهوري محمود محمد طه

Post: #94
Title: Re: أولاد مدني ... أبو بكر عباس نشازاً
Author: معاوية الزبير
Date: 07-09-2014, 04:25 PM
Parent: #93

Quote: بكري فوق كل الكلام الاتقال هنا وحياة صيامي هنالك نقطة لم يتطرق لها احد
وهي التفوق الادكايمي لبكري، الزول ده شاطر جدا ويعلم هذا كل من زامله .
تفوق في الكلية واعترف بتفوقه الالمان واختاروه باحثا
متفرقا وذلك ضمن برنامج الالمان لدعم السودان
يا علاء الدين صلاح، شطارة أبو بكر ما بننكرها لكن صيامك دا شوف ليهو فدية إطعام مسكين
كتبناها من أول مداخلة. هاك:
Quote: بقي شئ أخير، وهو أن هذا البوست كتب للترحيب بانضمام (حكيم المعوز النابغة، الأولتان منه والثالثة تقرير حال)

وصاحبك دا خليهو يجئ يواجب الضيوف ديل، مباري ألبل وحلالي، ليل نهار الحكاية شنو !

Post: #96
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-13-2014, 08:14 AM
Parent: #1

الصادق سلمان وأسامة عثمان السيد،
مشكورين على الترحيب ومشكور يا أسامة على رفع مشاركة الجميلة سلمى الشيخ سلامة، ويا أخي لو أمكن تعمل تعديل توضح فيهو انو المداخلة لسلمى.

Post: #97
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-13-2014, 08:17 AM
Parent: #1

Quote: مدينه متجانسه واحلى مافيها بدون تميييز ونبذ تام للقبليه والعنصريه

سلام يا حامد،
كلامك صاح، مدني الحديثة نبذت العنصرية الإثنية، لكنها مارست عنصرية جديدة على من كانوا سبباً في إزدهارها؟؟
ح أوضح العنصرية دي في ردي على أبو سنينة لاحقاً

الأخت نعمات
شكرا على الترحيب

Post: #98
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-13-2014, 11:38 AM
Parent: #1

كتب ود جيرانا أجمد التجاني:
Quote: لم اخبر له اي ميول يسارية او جمهورية إبان معرفتي له عيبه الوحيد كان ليه تفه
سلام يا باش مهندس، يا زول نحن إتفارقنا من زمن طويل جداً ونحن دخلنا الجامعة قبلكم، كدي خليني أجيب ليك الخاطرة القديمة دي كتبتها ساخرا قبل سنين عن بداية حياتي الجامعية والمفارقات البتحدث نتيجة النقلة الكبيرة في ذلك الزمان:

"أول مرة أصوت في حياتي في إنتخابات، كانت الإنتخابات الجابت إتحاد الإنتفاضة بجامعة الخرطوم (إتحاد التحالف)، صوت لكل لستة المجلس الأربعيني ما عدا أعضاء الجبهة الديمقراطية (ناهد جبر الله ورفاقها في اللستة).
السبب الخلاني أعمل كدا شنو؟
قبل الإنتخابات جونا الكيزان في الغرفة وهرشونا ليك بانو صوتك أمانة في عنقك، ولازم تديهو للقوي الأمين، ولا يحق لك ان تعطيهو لكافر!!!
حاججتهم قلت ليهم: الناس ديل ما كفار
قالوا لي: يوم واحد شفتهم في الجامع؟
قلت ليهم لا
قالوا لي: تارك الصلاة كااافر
بسري قلت: ديل نتفكى منهم كيف؟
جاتني فكرة خطيرة قلت ليهم: خلاص أنا بصوت لناس التحالف ما عدا الشيوعيين..

و جري مشيت سينما النيل الأزرق

النصيحة كدا يا أخوانا، الكيزان كانوا بهرشونا بقصة رفض الشريعة والتكفير ديل، هرش شديد..
يقولوا ليك: يعني انت رافض حكم الله؟
تقول ليهم بلولوة ونحنحا: لا لا أنا ما رافضو، لكن التطبيق لازم يكون مثالي...
يقولوا ليك: يعني نحن متفقين، خلاص خلينا نشتغل سوا عشان نجيب التطبيق المثالي...
بي كدا بيكون ما عندك طريقة غير تشرد السينما...

الواحد كان واقع بين نارين:
ناس الجبهة الديمقراطية لو شافوك وقفت مع للكيزان جنب كشك الشاي بعد الصلاة، بوصوفوك بالتخلف!!
تميل للأحزاب التقليدية يصفوك بالرجعية!!
الكيزان يشوفوك مع الشيوعيين يقروا ليك سورة الكافرون

نسوي شنو؟
أنا زول من مدني كل الكنت بعرفو قبل الجامعة، حفلات صديق سرحان وصديق متولي، الدافوري، كورة أهلي مدني والافلام الامريكية بسينما الخواجة؟؟؟
تقوم نتيجة الشهادة السودانية تنزعك من شلتك، وتوديك للمجتمع الكارثة دا!
كفار ومسلمين وجكس وجمهوريين وجنوبيين غاضبين ....
و تكون رغبتك الحقيقية، تتعرف على البنات، وداير تبقى مسلم، وداير تكون زول كويس، وما داير يقولوا عليك رجعي ولا متخلف...
نسوي شنو يا أخوانا مع الكارثة الجديدة دي؟

قلت يا ولد الحل: تثقف

من باكر تسك أركان النقاش

Post: #99
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-13-2014, 11:47 AM
Parent: #98

أول ركن نقاش احضرو في رحلتي الثقافية التنويرية الجديدة كان ركن نقاش إسلامي، لقيت ليك واحد برلوم من دفعتنا واقف وشايل ليهو ورقة يدوّن في ملاحظاتو!!
بسري قلت الزول دا بيكون بدأ يتثقف قبلي...

تم فتح الفرص للحوار، وادوا صاحبي فرصة، قام بعد حمد الله وصلى على الرسول سأل المتحدث عن العدالة الإجتماعية وحقوق المرأة؟؟

المتحدث قال ليهو: انت تبع ياتو تنظيم؟
صاحبي قال ليهو: ما عندي
المتحدث: يعني فلوتر
صاحبي نطط اضنينو!
المتحدث قال لصاحبي: بتعرف العاديات ضبحا تعني شنو؟
قال ليهو: لا
و الحضور يفقعا ليك ضحك

و الله أنا المتثقف الجديد دا، خفت خوف..
و جري للسينما

Post: #100
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-27-2014, 10:07 AM
Parent: #1

يا كيقا،
يا أخي، أسم كيقا دا ما ظنيت في أسرة تانية في السودان بتحملو!!
سكنت مع بدر بدبي مدّة من الزمن، جنني فيها وجننتو وما خلينا زول في بانت وحي البان وجبرونا ما تونسنا عنو
شكرا يا صديق

Post: #101
Title: Re: أولاد مدني ... أبو بكر عباس نشازاً
Author: أبوبكر عباس
Date: 07-27-2014, 10:29 AM
Parent: #1

Quote: عريبى مدنى ود ابوسنينه

من ولاية ابوسنينة ( ايزوناا) التابعة لجمهورية مدنى المستقلة

سلام يا يوسف،
أبو سنينة من أقرب القرى لمدني ولأسرتنا علاقة خاصة بها.
لفت إنتباهي يا يوسف توقيعك: "عريبي مدني ود أبو سنينة"
واحدة من أكبر مساوي مدني زمان هي تعاليها عن قرى الجزيرة التي أنجبتها بعد أن كانت قبل قيام مشروع مجرد قرية مغمورة؟؟ شوف المورخ رتشارد هيل كيف وصفها على لسان زائر إيطالي (بتصرف مني) قبل قيام مشروع الجزيرة:
- تقع في منخفض شبة جزيرة سنار على الضفة الغربية للنيل الأزرق، معظم بيوت الأهالي من الطين والقش، تظل مياه الأمطار متجمعة في برك آسنة لمدة طويلة بعد موسم الأمطار (لسؤ التصريف الطبيعي) مما يؤدي لتكاثر البعوض وانتشار الأمراض المعدية، يقوم معظم الأهالي بقضاء حاجتهم على ضفاف النيل...
عشان كدة، القعاد على الشاطئ بيكون صعب خلاص وخاصة بالليل، المدينة بصفة عامة قذرة الي حد البشاعة"

ثم جاء المشروع وجعلها العاصمة الخدمية للمشروع، جاء خريجو التعليم الإنجليزي لإدارة المشروع والمشاريع الخدمية التابعة له، وجينا نحن الجلابة لخدمة قرى المشروع وخدمة المتعلمين وهاجر إليها بسبب النمو الإقتصادي بشر كثيرين للمشاركة في الصناعات التحويلية والخدمية للمشروع، صارت المدينة عاصمة حضارية بالمنطقة وكأول مدينة تقوم بالسودان وفق جدوى إقتصادية، إفتتن الجيل المولود في زمن الرخاء الإقتصادي للمدينة بأم درمان وصار هواهم خرطومي ونافسوها وإنتصروا عليها وإنتصرت عليهم، وتنكروا وإستبرأوا من أبناء قرى الجزيرة وإستهزأوا بهم....
أمشي يا عربي الجزيرة
أمشي بالله، إتّا قايلين جاي من المعليق