يا جماعة جاتنا دعوة لحضور تلات مباريات كاس عالم،،،سريع ورونا..

يا جماعة جاتنا دعوة لحضور تلات مباريات كاس عالم،،،سريع ورونا..
لو ما الكسل حق السودانيين ،،كنا حضرنا الافتتاح...
هسع عندنا تلات مباريات،،بس في تلاتة يوم...
عزومتنا خمسة يوم،،،يومين فسحة
و3 كورة،،،او 3 مباريات اني تاتي
فورونا البتستاهل ياتا...
مش نعمة بالله..
اخر كورة حضرتها بين حلتنا
وحلة ام ضريسه
كانت متعه...

ياخي ديك كانت كورة ممتعة بشكل،،اسبوع قبلها،واسبوع بعدها،،لم يكن للناس حديث الا هي،،حتي انها ارخت لعلاقات حميمة بين الحلتين،،نتج عنها تصاهر وتداخل لم تشهد له الحلال مثيل..
كان فريق ام ضريسة فريقا مخضرما،،يقف في حراسة مرامه عمك ود اب ضرس،،طياني من جهات السافل ،جاءت به ايام عز مشروع الجزيرة،يخت السريقه مثل ما يختها بناء القصر الفخيمة،تيدع له المونة يتناولها بي فد ايد مغمض العينين،،يستطيع ان يصطاد ايما عصفور ان ظفر به في براح مسدود،،وكاذب من يقول انه يخطئ في الامساك في شئ،،ولو لم يكن سوء الحظ الذي ساقه ليركب لوري ابحريقه المحمل بالحطب فينغلب اللوري وتنطفئ احدي عينيه،،لما عرف سبت دود احد..
نتابع بي مهلة ..

اتو الناس قنعت تب من الكورة وله شنو،،زول بصير بي دروبا ساي ما يجي انورنا شان مانتمغلب،،،جيناكم من الاخر وقلنا ليكم علاقتنا بي الكورة ذي علاقة حبوبتي بالنت،،واستعنا بكم عشان ما تبقي علينا حكاية اخونا المشي قعد في مصاطب الخصم اشجع فريقو ،،الكورة طلعت درون،،بس هو طلع مفلق ،،خيتو لي راسو ذي كفارة زمان....ياجماعة سؤال دحين السودان ده،،دحين مرة ما شارك في تصفيات مونديال كاس العالم،،غايتو اكنا جهله صغار،،،كان سيد الفرن عندو رادي بحضر بيهو الكور...
ياجماعة ما طالبني حليفه،،وزع لينا رغيف مجان ،قال عشان السودان جا الاول...
بالله طيب وكتين ابيتو توصفو لينا،،ورونا السودان زمان جا الاول في شنو...
دائما ما اصحو من حلم اراه جا الاول تاني ..

يا عربي قنِب قبلك، وشجع معاي
التِنقِليز البرازيليين ديل هايجين.
والله صحي...

شكينيبه عليه الرحمة،،كان فلاحا ذو همة،ورغم نحافته البائنة،فانه كان قوي البنية ،كالفولاذ،،تدق فيه وتسقط مجندلا،،واذ صدف واخطئت رجله الكوره،،فقل علي رجلك السلام،،وان صادفت الكرة،،فيمكن ان يسجل منها هدفا قويا وهو شايت من خط ستة مرماه..
كان ود الموية وحده الذي ينتمي من فريق حلتنا لمدرسة كروية منتظمة،،يجئ وهو الضابط العظيم بالجيش تسبقه نياشينه،،ولبسه الزاهي،وحركات مدربي المدينة من احماء وجمع....
ولكن فريق ام ضريسه جاء بمفاجاة لم تكن متوقعة...

مشكور يا حبيب...
الجماعة الفي سودانيزونلاين غيرك واخ اخر لبدو
خالد طلعت · جامعة السودان
يا عبد العزيز اختار مباريات دور الاربعه والمباراة النهائية . .
دور الاربعه مباراتين + المياراة النهائية .

يا صديق الحال والمقال
بن عتمان

هذه ثلاثة ليالي من ألف ليلة وليلة
مش مباريات كاس عالم ياخ وأنت العالم

شد سرجك ووافينا بالصور لاحقاً سواء في الخاص أو العام أيهما أصلح

أصلح الله بالك

والله أيامك باسطة يا صاحبي
البرازيل وكأس العالم وتلاتة مباريات
وبي مناسبة شنو جاتك الدعوة
ومن متين إنت مهتم بالكورة قدر دا
حرم دي لو جاتني أنا الليلة أكون بايت معاهم تااااااب
خمسة يوم ؟؟؟ ياخي لامن حسدتك
أثني اقتراح مباريات نصف النهائي والمباراة النهائية

ذكرتني مباراة لا أنساها
في دوري قرى نهر عطبرة
كانت عقدتنا الأساسية فريق الدبورة، بجونا بي تلاتة تنفار يغلبونا ويروحو
مرة ناسنا مشوا ليهم لي مباراة لقوهم ما عندهم خبر
قابلهم واحد قال ليهم مافي زول كلمنا لكن على الطلاق ما بترجعوا ساكت
أمش يا ولد نادي ميدوب، عبدالله، عيسى، معاذ، فيصل
جمعوا ليهم الناس، الكان عندو موية، الكان سارح بي بهايمو
اتلموا وجوهم، طقطقوهم زي الما حصل شي
جمعت المباراة في الدورة ديك في التسعينات والناس كلهم مقتنعين بي فوز الدبورة
نحن كنا شباب صغار ناس جامعات وثانوية
هم كانوا ماشاء الله كبار معظمهم أساتذة في مدرسة الدبورة
وحرفاء حرفنة مبالغ فيها
المهم دخلنا قون في نفسنا في البداية كدي
الزول الدخل القون (ودالموج) اتقطع ومعطهم بي قون من النص
المهم المباراة مع المغيرب كدي عندنا شافع كدي إسمو إلياس نزلناها
وفرحانين بالتعادل رجعنا كلنا وراء قلنا نحافظ على التعادل الثمين دا
ألياس دا لما ليهو في مدافع كابسو قلع منو الكورة
وظووووط حشر فيهم قون الغلب
والله الحلة اليوم داك تقول فيها عرس جماعي
زغاريد وصراخ، بعضهم يبكي وبعضهم يصرخ بصورة هستيرية
ومن اليوم داك ناس الدبورة جبارتهم فكت، بقينا كل ما نقابلهم نمرمطهم
الجدير بالذكر إن حارسنا المنصوري مطلع ليهو 12 قون مضمون من انفراد كامل لي شوت في التمانيات
يعني النتيجة مفروض تكون 13/2 لصالحهم هههههه


تحياتي مثنى وثلاث ورباع