لعناية بورداب واشنطن الكبرى او نيويورك (عشم لا محدود)

الاخوة والاخوات الاكارم بواشنطن الكبرى و نيويورك..تحياتي وتقديري..
احتاج الى مساعدتكم لاستخراج اقرار شرعي من السفارة او البعثة يفيد بسماحي لزوجتي بالسودان بالسفر إلى أمريكا حيث نقيم رفقة ابني وإبنتي القصر والمضافين بجواز والدتهما حيث استشكل عليهم استخراج فيزا خروج إلا بموافتي وعبر اقرار شرعي من السفارة السودانية او البعثة القنصلية بأمريكا..إلا هنا والامر يبدو بسيطا او كما خيل لي ولكن عندما اتصلت بالبعثة وجدت الامر يحتاج الى مراسلات بريدية اولى ثم ثانية و اخذ ورد سيستغرق اكثر من اسبوع ولم يتبقي على موعد السفر سوى اربعة ايام.
وبين رفض اعضاء البعثتين لإستلام الاوراق المطلوبة الكترونيا فأنا بحاجة لمتطوع يوافق على استلام المستندات عبر البريد الالكتروني ثم طباعتها واخذها لاحدى البعثتين ومن ثم مشكورا استلام وارسال الاقرار الشرعي لي عبر بريدي الالكتروني.
الامر ليس بالسهل لانني اقدر قيمة الوقت في امريكا ومن الصعوبة ان يستقطع الانسان بعضا من زمنه لاداء اشياء اخرى نسبة لمشغوليات الحياة..ولكنه عشم بوردابي في بورداب..

التفاصيل وشيطانها عبر التلفون..

شكري وتقديري..

محمد خليل
[email protected]

مونتري
كاليفورنيا

فوق لاهمية الامر
ربنا يوفقك.يامحمد ويسهل
ليك امورك

ألعزيز سليمان

شكرا جزيلا على شعورك الجميل..

دم بخير..

I can do that, just call me at

الغالية عفراء سند,,

يا إلهي إنبريتي حين احجم الاخرون,, لله درك يا بنت بلادي,,

واسفي لاني رايت تجاوبك بعد ان فقدت الامل في مستجيب وأنشغلت بحثا عن حلول اخري حينذاك نبهني احد الاصدقاء إلى ردك بعد ان صار فارق التوقيت حاجزا في الاتصال لكنني حتماسأشغل صباحتك بإلحاح المغروض.فتوقعيني ومعي بضع سويعات لإصلاح ما افسدته البيروقراطية.

وتصبحي على اجمل ما يكون

ما قامت به اليوم عفراء سند يحتاج الي مجلدات للكتابة عنه..


فشكرا ايتها الابنوسة الشامحة..فقد اثبتي بيانا بالعمل ان النساء..مواقف..


اما بورداب فرجينيا ونيويورك..كان يكفي والله نجمة لرفع البوست واكون من الشاكرين لكن لم تفعلوا فكفتكم عفراء..


يكفي ان اقول ان الاقرار الان في السودان بيد ادارة الجوازات اعطونا او منعونا ليبقى ما قمتي به يا عفراء اعلى من مقامات الشكر والثناء.

غايتو يا محمد ظلمت ناس واشنطون ونيويورك ظلم كبير.. وكيف تفترض ياخى الناس قاعدة مبارية النت اليوك كله.. اهو انا لقيت بوستك هسى دى الساعة سبعة وتلت مساء
اليوم. توقيت نيويورك. انت زاتك قلت زول نبهك لمداخلة عفراء..
المهم يا زول حمدالله عسلامة والله يجمعك بيهم

ابو الريش سلامات يا حبيب ومساءاتك فرايحية

Quote: غايتو يا محمد ظلمت ناس واشنطون ونيويورك ظلم كبير.. وكيف تفترض ياخى الناس قاعدة مبارية النت اليوك كله.. اهو انا لقيت بوستك هسى دى الساعة سبعة وتلت مساء اليوم. توقيت نيويورك. انت زاتك قلت زول نبهك لمداخلة عفراء.. المهم يا زول حمدالله عسلامة والله يجمعك بيهم

يا ابو الريش انا عارف انو ما اي زول من المعنيين بكون شاف البوست لكن عتابي موجه للشويونين الشافوهو عتابي لمن رأى ثم طنش وتاني ما بفسر وانت ما تقصر (: وبرضو مبروك عليكم يا ناس الساحل الشرقي امثال عفراء ..لو قلت الفيها ما حيكفيها.

وارقد عافية

يا زول يا جميل
دا كلام شنو ياخي؟
ربنا يجمع شملكم، وتكون استفدت من هذا الدرس المجاني ههههههه
السفرة الجاية نجض الشغل بلا توكيل بلا بتيخ معاك.
وشكراً عفراء سند لمد يد العون والقيام بالواجب.

تحياتي
كسرة:
تلفوناتك كلها اتغيرت وما عندنا خبر!!!!!

Quote: يا زول يا جميل دا كلام شنو ياخي؟ ربنا يجمع شملكم، وتكون استفدت من هذا الدرس المجاني ههههههه السفرة الجاية نجض الشغل بلا توكيل بلا بتيخ معاك. وشكراً عفراء سند لمد يد العون والقيام بالواجب. تحياتي كسرة: تلفوناتك كلها اتغيرت وما عندنا خبر!!!!!

يااااااا عمدة وييييييينك يا راجل

ياخ والله إتعكلتوا معانا عكلتة السنين بيروقراطية ولزاجة إجرائية وسلحفائية...

ياخ أتحداك شوق غايتو تلفوني الجديد حيكون بطرفكم الصباح ولولا انها الثالثة صباحا لتلفناك الان..

التحايا النواضر للاسرة الكريمة وبريكلي وما فوقها وما تحتها,,


ودعواتك فما زلنا نعافر..