Post: #1
Title: اشطر مكانيكي سوداني،،عمره بس عشرة سنوات..
Author: عبدالعزيز عثمان
Date: 06-10-2014, 03:55 AM
دي لقيتها في الفيس....
اماني حدو ... تصدقي والله انا ما بفتش علي الاحزان لكن هي براها بتفتشني .... يا خي ذاتها بقت كتييرة لدرجة انك ترفع طوبة تلقي تحت حزن متلتل او تناديك طوبة و تقول ليك تحتي حزن و كدا مفروض تقوم الساعة ..... راكبين مقعد و شكراً في الهايس انا وعيدروس (عبدالله) ..... و المقعد التالت محتل باتنين من الأطفال بس ونستهم ما ونسة أطفال و دا الشداني افتح معاهم الونسة .... فيهم واحد مشتري قميص و فرحان شديد بورقة خمسين جنيه لدرجة انه بعرضها علي ركاب البصات المتخطية بفرح طفولي ضاحاكاً و كاشف عن سنون لم تكتمل او محتاجه لتقويم و التقويم عند رب العباد....اها بديت معاهم الحوار
انا: انتو شغالين وين
الاتنين فيهم واحد شفت و التاني مسكين شوية لكن عم قريب السوق بأدبه و بشفتنه .... اها الشفت رد اصالة عن نفسه و نيابة عن زميله قائلاً:
انا شغال ميكانيكي في الميناء البري و دا شغال اكياس هنا في جاكسون
قلعت عيوني شوية لانو زمن الدهشة ولي و ممكن الطفل دا فعلا يكون ميكانيكي بس الشمار كتلني و سألته: كيف يعني؟
الشفت: انا شغال بغير المصافي في الميناء البري
أنا: طيب ساكنين وين؟
الشفت: ساكنين في كسارة .....
طبعاً انا كزول مثقف و ملم بنواحي الخرطوم ..... و يا الطاهر كرم الله أو اي زول كان دفعتنا في الدفاع الشعبي (كسارة) دي المرخيات بعد معسكرنا الاتظاهرنا منه و نحن عمرنا 19 سنة و جينا لحد ام درمان كداري في 7 ساعات .... و تواصلت الأسئلة يا خي انا ذاتي سأل شديد سألت تاني:
طيب انتو من وين؟
الشفت: انا من الجبلين و دا من نيالا
و بين الجبلين فقدنا انسان و انا هارب من نيالا
و يا حميد دا جاء من الجبلين و دا جاء من الجبل وحدتهم الطفولة المسروقة و تجار الحرب
واصلت اسئلتي: أها الشغل ماشي كيف؟
الشفت يجاوب و المسكين يأمن برأسه: والله كويس لكن بعد دا ح نقيف لانو المرسة فتحت؟
بتقروا في سنة؟
الشفت: انا في سنة سابعة و دا في تامنة
يا الله مفروض يكون فايرين بالمراهقة لكن حكمة الفقر اجسادهم المضمحلة يكفيها كرسي واحد في الهايس ....
مش انا قلت ليكم سأل ايوة سال لكن بقيت أسال بشكل غير ارادي لساني شكله طلق قلت ليهم: أهو بتصحوا الساعة كم عشان تجوا الشغل؟
الشفت: الاذان الاول نحن بنقوم نشرب الشاي و طوالي نركب الحافلة نجي؟
طفولة مبعزقة في المواصلات ... الناس ديل اتلاقينا زي الساعة سبعة مساء و لو نططوا بصلوا عشرة شيل دق شيل دق قول ناموا 11 و بصحوا اربعة عشان يعيدوا الكرة و إعادة انتاج الوجع ... يعني بنوموا كم ساعة؟ و المراهق محتاج في اليوم لكم ساعة نوم؟ احسبوا براكم
محطتنا قربت و الاسئلة ما كملت ..... طهرت نفسي الدنسة بخمسين جنيه قلت ليهم تشتروا بيها كراسات .... و أي تغيير لن يشمل ديل ما لازمني،،،،
اسمو حافظ ،،ما استاذنتو ذاتو...
|
Post: #2
Title: Re: اشطر مكانيكي سوداني،،عمره بس عشرة سنوات..
Author: عبدالعزيز عثمان
Date: 06-10-2014, 04:22 AM
Parent: #1
afiusein يا سفيان و عزيز ما قلت ليكم صحي السياسي النزق الجواي و سألتهم من الكشة و السؤال تحديد لبائع الاكياس و مخرب البيئة ... سألته عن الكشة و هل قاعدين يقبضوكم ... كله قلت القي لي حتة احملها المسئولية زي (و نحمل الحكومة كامل المسئولية لما يحدث في جبال النوبة) ..... لكن كسروا الدش في يدي بطفولتهم الممحقوقة حين ردوا ساخرين.... يا عمو ديل بقبضو الفارات و الناس البفرشوا في الظلط و الي متي يا ابني تستمر بائع اكياس
|
Post: #3
Title: Re: اشطر مكانيكي سوداني،،عمره بس عشرة سنوات..
Author: عبدالعزيز عثمان
Date: 06-10-2014, 05:05 AM
Parent: #2
مشغولون نحن بالاحداث الكبار...
والناس الكبار،،مبهرجين ومعظمين
اما انتم،،،
فمن يهتم انكم في عمر النضار تحتاجون دعما
خبزا وحليب...
اخشي ان يدركنا زمن،،،تمتلئ شوارعنا بهؤلاء الطيبين
ولا يراهم احدا...
ولايهتم بهم احدا...
فمن يهتم بطفل غارق حتي اذنيه في الزيت والغبار
ومشغول الفؤاد بتوفير لقمة خبز لام ياكلها السل
واب تعب فترجل...
طفل لا زال يحلم
بكراريس واقلام
ليكتب خطابا لامه لاخيها
ويرسم اشجارا وعصافيرا
لاخته الصغيره..
|
Post: #4
Title: Re: اشطر مكانيكي سوداني،،عمره بس عشرة سنوات..
Author: Asim Fageary
Date: 06-10-2014, 05:10 AM
Parent: #3
فوق .. لعل الذين قست قلوبهم فصارت كالحجارة أو أشد قسوة يرجعون عن غيهم ولعل التفكير في الحلل الفردية يتغير لدى البعض
|
Post: #5
Title: Re: اشطر مكانيكي سوداني،،عمره بس عشرة سنوات..
Author: قصي محمد عبدالله
Date: 06-10-2014, 05:28 AM
Parent: #1
سلام أخي عبدالعزيز
نعتبرك صاحب القصة الحقيقي، وعلى ذلك نعلق،وإن شاء الله الأجر واصل للجميع.
| Quote: طهرت نفسي الدنسة بخمسين جنيه قلت ليهم تشتروا بيها كراسات |
رفع الله من مقامك في الدارين وفرج جميع كربك وأزاح عنك كل الهموم،
نقتدي بك إن شاء الله - وما التوفيق إلا من عند الله - في تزكية الأنفس في المواقف المشابهة.
مخرج:
قبل فترة مريت على خياط لخياطة شئ ما،
أها جات سيرة التبرعات والصدقات،
فقال لي أنا دائما أتصدق ولو بالقليل جدا لأن الصدقات - بحسب كلامه - تريح النفس وتخرج بخلها وشحها وتسمو بالروح لأعلى درجات الطمأنينة.
ناهيك عن فضلها الأخروي.
تحياتي وتقديري
|
Post: #6
Title: Re: اشطر مكانيكي سوداني،،عمره بس عشرة سنوات..
Author: عبدالعزيز عثمان
Date: 06-11-2014, 01:19 AM
Parent: #5
عزيزي عاصم
المساكين لا يابه لهم احد...
حتي في لحظات الموت حين ياتي الفخيم ويصرخ بفاتحته الجوفاء
تضج كل الفجاج...
صاحبي ود حاج المكي
فلسان حمارو مكادي
وبيتو عادم فرطاقة بصلة
عندو حواشة ماهلة عطشانة
اسلمته للفقر
صار ياتي للعزاء
ويقرا الفاتحه بعيدا من الناس
لا يشيلها
قال لي كلهن كضابين
لا يهتمون الا بالممسحين الغلاد.
|
Post: #7
Title: Re: اشطر مكانيكي سوداني،،عمره بس عشرة سنوات..
Author: عبدالعزيز عثمان
Date: 06-11-2014, 01:25 AM
Parent: #6
صديقي قصي
لك التحايا
للحق اخي لم اكتبها ولكنها عبرت عني...
اتمني ان يتغمد الرحيم الناس برحمته
وان يترك الحكام ظلم شعوبهم
نحيا جميعا حين نحس باوجاع المحرومين
توضع الخطط والبرامج لهم لينتجو ويعيشوا بكرامة
لك مودة وشكر
|
|