بستحم بالجردل و وبمسكل وبرش الحوش وبسقى الشجر وبملى الازيار وساكن الاطراف وفى جيبى 36 ج ومبسوط

جبت معاى البيت عيشتين من الفرن وجبنه بى جنيهين و طعميه حاره وشطه بدره و بيبسى فى قزازه ما فى باغه ... ما ركبت طياره وعندى جنسيه بس و شهاده ميلاد مكتبوب عليها فى الخلف مجانا مركز صحى الهجره... وخاشى الفيس بوك و فى جيبى37 جنيه وما على متأخرات مويه ونفايات وديونى صفر وامى وابوى علمونى الاعتماد على النفس والترفع عن توافه الامور وانك متين ترفع فرامل اليد للدنيا وللناس احيانا وعلمونى الصبر وفهمونى انو الحياه مستمره رغم مافيها من عنت وكل الناس فى حاله قلق الى ان يتوسدو الجابره و مبسوط كدا ميه ميه وبى صحه وعافيه وبنوم قبل شوكه الدقايق تكمل دورتها وبنوم فى المواصلات وفى الكراسى والعناقريب من غير مرتبه ومن غير مخده وبنوم فى المصلايه فى الواطه ...
نايم بدرى وصاحى بدرى ومتعشى و متحنن مع صاحبى فى عرسو و سادى دى بى طينه ودى بى عجينه
ساكن فى بيتى فى الحاره 76 سكن شعبى واقساطه 130 ج شهريا وفيه مويه وكهربه و زير ودجاج و خليه نحل وشجرتين ليمون مثمرات طوال السنه و شجره نخيل مثمره فى الموسم
نايم فى عنقريب وجوارى جك مويه و كيس تمباك والموبايل
رصيدى جنيه وغداى قرع بكسره وكيفى شاى و معجونى اب صفقه وصابونى فنيك وسفنجتى حمراء وطاقيتى بيضاء
شادى اربعه مسامير فى الغرفه واحد شماعه والتانى فاضى والتالت فيه فنيله مكتوب فيها يو اس اى ارمى
الرابع سكين بى جفير
بستحم بالجردل و بسمع لندن بسمع ام كلثوم من الرادى وبرش الحوش وبسقى الشجر وبملى الازيار و برش خشم الباب و بمد الخرطوش للجيران و بصلى فى الزاويه و بسف من جارنا و بفطر فى اخر محطه
بكره الحكومات فى اى مكان فى العالم لانها دايما ظالمه وبكره حكومتنا لان المويه بتقطع والسخانه شديده والناموس قطع جلد الناس فى الحله والضبان حامى الناس النوم والشفع بخلو المدرسه عشان اساعدو ابهاتهم والحراميه بقو كتار وبكره حكومتنا عشان طلب الفول بقى بى سبعه جنيه و كبايه الشاى بقت بالف ونص وكيس التمباك بى جنيه والناس بقت تعمل مس كول والناس بقت جافيه و ما زى زمان و الدنيا بقت خاينه ...
بقرى الجرايد فى الكشك وبشترى جريده رياضيه واحده و بسمع الاخبار بس فى الحافلات و بشارك فى المظاهرات و بطلع اى نفير فى الحله وبدق الخيمه وبحفر القبر وبلز العربات المتعطله الدايرا دفره ...
بمشى الدفن بمشى العقد بمشى المستشفيات بطايب الضعيف بساعد الرهيف بسمع عثمان حسين و خاصه غنيه قصتنا و بحب بخور التميان وعسل النحل الاصلى وعندى جلابتين وشبشب واحد مابقطع فى الناس بضحك بصوت عالى عند الضحك ببكى بصوت عالى عند الحزن
بمشى كدارى وباكل سلطه بطبخ الفول و بزيد ليه الشطه و الشمار
نايم وحايم وقايم بدندن بى قايمى الصباح متكفلتى شايلى الحليلى على المراح
بمسكل وبرسل مسج و بزبل راس البيت واصدقاى من شرطه الاداره العامه للمرور والجوازات و معلمى الكليه الحربيه
باكل بطيخ فى الموسم لمن يكون رخيص با كل طماطم فى الشتاء الكيلو بجنيه بفك قروشى حديد قبل ما اركب الحافله
مطمئن وجاعل الطمأنينه لمن هم حولى بكون لطيف وودود مع النساء والاطفال والعجزه والشحادين بساعد فى السلامه النفسيه للناس وبحب الطيبين منهم
كاظم الغيظ وعافى عن الناس
بفك الريق الصباح بمويه صاقطه سقوط شديد من النقاع
بفك الريق للناس من الصباح بكيف اصبحتو
بمسيهم بى عباره كله فى محله
ذاكرتى محدوده وذكائى متوسط وصحتى ميه ميه ونظرى سته على سته وشعرى خفيف
مافى اى شخشخه
وفى اتم الصحه والعافيه

ربّنا يديم عليك الصحّة و العافية ..

ويزيدك أمن و طمأنينة وقناعة ..

سيد الاسم محمد محمود سلامى ومودتى ليك

السعادة كنت أسمع عنها

الحمدلله اليوم قريتها عدييييل بعيوني ديل

أسأل الله أن أعيشها كمان

شكراً ليك جداً لأني من خلال خلال سطورك

دي يافرح شفت شوف العين عديييييييييييل

ولو ما أخاف الكضب سمعت النشرة من الرادي

حبيبنا معتصم سلامى والسعاده فى الرضا و اشكر ليك كل احاسيسك الطيبه و اتمنى ليك عيشه جميله حيث ما كنت وتحياتى لاسرتك

ات كدا يا فرح تانى ما فضلت ليك حاجة..
بقيت من الحداشر المبّشرين بالجنه..

ونحن بيتنا في الناصية
وبقدس الحياة الزوجية
وعندي خالي في حرس الصيد رفدوهو
لانو ليقوهو بشطف القرد . وعندي خالتي عوّافة
والعوّاف ربا عيالو

فرح
الله يفرحك دنيا واخرى بجاه سيدى النبى صلى الله عليه وسلم

يا فرح كيفك ..

قدام منك في طريق المواصلات الحارة 97 محطة الصهريج

واحد صحبي مرة عزمني غدا هناك ..

أنا من بعد الصلاة ما طلعت منو الا عشرة بالليل ..


شعرت بي راحة ما طبيعية ..

زي ما قلت رافع فرملة اليد للدنيا ..

عنقريبين برة .. والحوش حدادي مدادي .. وبرضو عندو كم شدرة كدة جوة الحوش وكم واحدة برة ..

اتغدينا غدا لطيف واتكينا في راكوبة عاملا براو وزوجتو الله يديها العافية رشت لينا الحوش بردت لينا الجو ..

بعد الغدا شاي بالنعناع .. بعديها مسامرة بالعود وخصصنا اليوم بس لي مصطفي سيد أحمد والشعرا بتاعين غناهو ..

غنينا الممشى العريض .. وكتبت ليك .. ومع الطيور .. وحاج تلب .. وإييييييييييييييييييك ...

وكت العشا جانا الشاي بي اللبن المقنن بي اللقيمات ..

ما لبن بدرة ولا لبن مصانع ... لبن غنم طااازج حالباهو جماعتو من غنم حوشو ..

والبيت انزحم .. اصحابو وجيرانو مع نقرشة العود جو يشاركو .. وكل واحد قال رايو في مصطفى وفي اللحن وفي الغنا ..

وناس غنت .. والجو بارد ولطيف ما زي جو نص البلد عندنا ..

الساعة بقت تسعة وانا مشواري بعيد وماشي ..

واحد من الجيران حلف طلاق ما امشي لأنو مرتو بتحضر في العشا ...

وجار تاني قال لي اصبر العشا جاي !!

صبرت واتصبرنا تاني بي كم اغنية ...

وجات كم صينية داخلة والرجال داخلة ومارقة ...



















ما في شي تاني أقولو ...!!

ياااااه

فرح بي ذاتو جا راجع

ياخي إنتا كنتا وين؟؟

تحياتي

ياسر

كل الحبان والاصدقاء مودتى وشكرى ليكم وانعم الله عليكم بالاستقرار والهدوء

اختنا نور سلامى ومودتى وشكرى على مرورك

Quote: ساكن فى بيتى فى الحاره 76 سكن شعبى واقساطه 130 ج شهريا وفيه مويه وكهربه و زير ودجاج و خليه نحل وشجرتين ليمون مثمرات طوال السنه و شجره نخيل مثمره فى الموسم

الله قادر علي كل شيء ...
ما عندنا اعتراض ...
لكن لو كان اداك حافله مرخصه و رقشه ....
عشان محصول اليمون و البلح تحصل بيهم السوق
يكون ما قصر معاك تب

فرح يا زول يا جميل
إنت مش قلت رجعت أمريكا
حيرتنا معاك :)

الأخ / فرح
أعجبني سردك الجميل وفرحك بالسودان الذي مهما كان يبقى جميلا
رزقك الله الغنى والقناعة

الفاتح علي التوم

Quote: الله قادر علي كل شيء ... ما عندنا اعتراض ... لكن لو كان اداك حافله مرخصه و رقشه .... عشان محصول اليمون و البلح تحصل بيهم السوق يكون ما قصر معاك تب

لا يليق قول مثل هذا الكلام في حق الله تعالى - ولو بالمزاح-
يجب التأدب مع الذات الإلهية .. جعلنا الله وإياك من المتقين المقبولين

Quote: لا يليق قول مثل هذا الكلام في حق الله تعالى - ولو بالمزاح- يجب التأدب مع الذات الإلهية .. جعلنا الله وإياك من المتقين المقبولين

ربنا يديم عليك الانبساط يا فرح ويبعد عنك ازمات الموية والسكر والزيت ومشاكل ارتفاع الاسعار وتذبذبها وموجة غلاء جديدة لاحت قبل دخول رمضان ويبعد عنك كذلك مآسي سوء الخدمات
الصحية ومساككة المواصلات في هذا الحر القائظ ... في السعودية قالوا رمضان دا هو الاسخن منذ ثُلث قرن ... انتا دايما في حالة تنقل وكل شوية في قارة ... عادي ممكن تجهجهو بالسفر

فرح يتكلم عن الماضي
جني

حبيبنا فرح
عندنا واحد قال نص كلامك دا .... وزا د عليهو ( وداخل في صندوق .. وصرفتي الأخيرة )..

ادام الله البسط والبساطة




الشغيل

مبروك
أيوا يا فرح
أيوا كدا
زمان الناس لمان كان عايشين زي عيشتك ما كان عندهم شغلة بي حكومة تنقلب
ولا بي دولار يرتفع
ولا بي حرامية تتقبض
ولا بي عيشة اتباقصت
والله الدنيا دي تسكها ما تخلي ليك صفحة تنقلب عليها
القناعة مكسب دنيا وآخرة
نحن عقدنا حياتنا برانا وأهو لا بقينا حنضل لا بتيخ
ولادنا نأكلهم كسرة بي موية علا توديهم الحوادث
ينوموا في الحر ؟؟؟ دي مستحيلة
أمسك في نظامك دا وحبة عوجة ما بتجيك

القناعة كنز لا يفنى .... و من رضى بقدر الله أدخل السعادة على حياته و إن كان داخل السجن ....

و من أدخل نفسه في حرز الله كفاه همه و كشف غمه و أمّنه في حياته ....

شـــكراً جـميلاً عـلى الـســـرد الجميل ...

أدام الله الفرحة عندك يا فرح - انت الزيك منو - و الله اسعد من كل الناس البقولو ليك نحنا في كندا و استراليا و امريكا و لندن


أي مغترب يقرأ سردك ده علي اليمين يندم لليوم الخلاهو يغادر السودان.

ياخ الحاجات الذكرتها دي الناس في المغترب كايسنها بقروشهم وما لاقينها ...


اسعد الله ايامك

فنااااااااااااان انت يافرح قريتها اكتر من مرة

والله ياشباب انا ممتن ليكم كتير المسافر رد الله غربته والقاعد الله ابسطو
مودتى

لكن أظنك ما عرست لحد الآن
وماعندك أطفال
يعني لو مرض ليك واحد من الأطفال نص الليل ال 36 دي ما بتوصلك العيادة
واقل طبيب اطفال تذكرته بـ 50 الف
لو عندك واحدة في الروضة وطردوها ليك اليوم التاني الـ 36 دي ماتعرف تدفع بيها حق الترحيل
ام تدفع رسوم الروضة ؟؟؟
عادي يمكن تمسكل
وترش الحوش
وتملأ الأزيار
وتستحم بالجردل
لكن لو المدام حامل فان الـ 36 دي حا تجهجهك انت والمدام
ماتعرف توديها الدكتور وللا توديها الداية ؟؟؟
وين الآبري
وين فطور رمضان
وين ملابس العيد
وين أحذية الأطفال 00 فهؤلاء لايعرفون فرملة اليد
حياتك جميلة ومليئة بالسعادة ولكنها مفصلة على مقاس عزابي !!!

ربنا يستر حالك وحالنا

وفي الحديث الشريف ( أَخْبَرَنَا عَبْدُ اللَّهِ بْنُ مُحَمَّدِ بْنِ عُمَرَ بْنِ عَبْدِ اللَّهِ بْنِ الْحَسَنِ بْنِ حَفْصٍ الْقَاضِي ، ثنا إِبْرَاهِيمُ بْنُ مُحَمَّدِ بْنِ الْحَسَنِ ، ثنا عَبْدُ اللَّهِ بْنُ هَانِئِ بْنِ عَبْدِ الرَّحْمَنِ الْمَقْدِسِيُّ ، ثنا أَبِي ، عَنْ إِبْرَاهِيمَ بْنِ أَبِي عَبْلَةَ ، عَنْ أُمِّ الدَّرْدَاءِ ، عَنْ أَبِي الدَّرْدَاءِ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : مَنْ أَصْبَحَ مُعَافَى فِي بَدَنِهِ آمِنًا فِي سِرْبِهِ عِنْدَهُ قُوتُ يَوْمِهِ فَكَأَنَّمَا حِيزَتْ لَهُ الدُّنْيَا ، يَا ابْنَ جُعْشُمٍ يَكْفِيكَ مِنْهَا مَا سَدَّ جَوْعَتَكَ ، وَمَا وَارَى عَوْرَتَكَ ، وَإِنْ كَانَ بَيْتًا يُوَارِيكَ فَذَاكَ ، وَإِنْ كَانَتْ دَابَّةً تَرْكَبُهَا فَبَخٍ , فلقُ الْخُبْزِ وَمَاءُ الْجَرِّ ، وَمَا فَوْقَ الإِزَارِ فَحِسَابٌ عَلَيْكَ ) منقول من قوقل .

ههههههههههههههه

قريت مكتوبك ..

وانا بقرأ فيه ..

جاتنى صورتك وشخصك قدامى ..

والله العظيم يا مزمل ود الخال ..

ياهو ده حالك من ما عرفتك ...










تصدق يا فرح مزمل وات واحد ....

شكرا على الجمال ...

يا سلام عليكم وعلى مزمل وعلى كل الشباب

Quote: جبت معاى البيت عيشتين من الفرن وجبنه بى جنيهين و طعميه حاره وشطه بدره و بيبسى فى قزازه ما فى باغه ... ما ركبت طياره وعندى جنسيه بس و شهاده ميلاد مكتبوب عليها فى الخلف مجانا مركز صحى الهجره... وخاشى الفيس بوك و فى جيبى37 جنيه وما على متأخرات مويه ونفايات وديونى صفر وامى وابوى علمونى الاعتماد على النفس والترفع عن توافه الامور وانك متين ترفع فرامل اليد للدنيا وللناس احيانا وعلمونى الصبر وفهمونى انو الحياه مستمره رغم مافيها من عنت وكل الناس فى حاله قلق الى ان يتوسدو الجابره و مبسوط كدا ميه ميه وبى صحه وعافيه وبنوم قبل شوكه الدقايق تكمل دورتها وبنوم فى المواصلات وفى الكراسى والعناقريب من غير مرتبه ومن غير مخده وبنوم فى المصلايه فى الواطه ... نايم بدرى وصاحى بدرى ومتعشى و متحنن مع صاحبى فى عرسو و سادى دى بى طينه ودى بى عجينه ساكن فى بيتى فى الحاره 76 سكن شعبى واقساطه 130 ج شهريا وفيه مويه وكهربه و زير ودجاج و خليه نحل وشجرتين ليمون مثمرات طوال السنه و شجره نخيل مثمره فى الموسم نايم فى عنقريب وجوارى جك مويه و كيس تمباك والموبايل رصيدى جنيه وغداى قرع بكسره وكيفى شاى و معجونى اب صفقه وصابونى فنيك وسفنجتى حمراء وطاقيتى بيضاء شادى اربعه مسامير فى الغرفه واحد شماعه والتانى فاضى والتالت فيه فنيله مكتوب فيها يو اس اى ارمى الرابع سكين بى جفير بستحم بالجردل و بسمع لندن بسمع ام كلثوم من الرادى وبرش الحوش وبسقى الشجر وبملى الازيار و برش خشم الباب و بمد الخرطوش للجيران و بصلى فى الزاويه و بسف من جارنا و بفطر فى اخر محطه بكره الحكومات فى اى مكان فى العالم لانها دايما ظالمه وبكره حكومتنا لان المويه بتقطع والسخانه شديده والناموس قطع جلد الناس فى الحله والضبان حامى الناس النوم والشفع بخلو المدرسه عشان اساعدو ابهاتهم والحراميه بقو كتار وبكره حكومتنا عشان طلب الفول بقى بى سبعه جنيه و كبايه الشاى بقت بالف ونص وكيس التمباك بى جنيه والناس بقت تعمل مس كول والناس بقت جافيه و ما زى زمان و الدنيا بقت خاينه ... بقرى الجرايد فى الكشك وبشترى جريده رياضيه واحده و بسمع الاخبار بس فى الحافلات و بشارك فى المظاهرات و بطلع اى نفير فى الحله وبدق الخيمه وبحفر القبر وبلز العربات المتعطله الدايرا دفره ... بمشى الدفن بمشى العقد بمشى المستشفيات بطايب الضعيف بساعد الرهيف بسمع عثمان حسين و خاصه غنيه قصتنا و بحب بخور التميان وعسل النحل الاصلى وعندى جلابتين وشبشب واحد مابقطع فى الناس ب ضحك بصوت عالى عند الضحك ببكى بصوت عالى عند الحزن بمشى كدارى وباكل سلطه بطبخ الفول و بزيد ليه الشطه و الشمار نايم وحايم وقايم بدندن بى قايمى الصباح متكفلتى شايلى الحليلى على المراح بمسكل وبرسل مسج و بزبل راس البيت واصدقاى من شرطه الاداره العامه للمرور والجوازات و معلمى الكليه الحربيه باكل بطيخ فى الموسم لمن يكون رخيص با كل طماطم فى الشتاء الكيلو بجنيه بفك قروشى حديد قبل ما اركب الحافله مطمئن وجاعل الطمأنينه لمن هم حولى بكون لطيف وودود مع النساء والاطفال والعجزه والشحادين بساعد فى السلامه النفسيه للناس وبحب الطيبين منهم كاظم الغيظ وعافى عن الناس بفك الريق الصباح بمويه صاقطه سقوط شديد من النقاع بفك الريق للناس من الصباح بكيف اصبحتو بمسيهم بى عباره كله فى محله ذاكرتى محدوده وذكائى متوسط وصحتى ميه ميه ونظرى سته على سته وشعرى خفيف مافى اى شخشخه وفى اتم الصحه والعافي

قربيت كلامك دا حتة حتة....ولأنو كتير وفيه تفاصيل بحلم بيها حلم
ما قريت التعليقات:

ولكن: لو مافي زول قبلي قال ليك....الحالا الوصفتها دي. الا توصفها وانت علي الارائك متكيء... يكون في غلط في حتة ما
الدنيا دي صعب تلاقي فيها حياة ودودة وحالمة وحلوة زي دي.....

وبعدين معليش...اتلخبط علي الفرح...طلع صاحبنا بناع كهرباء السد اسمو محمد فرح

يلا سلام عليكم انا ممتن للكل الكلمات التى كتبتها هى تمنايت و تماهى يا شباب