تـطـبّـز فـي تـلـفـونـا سـااااـكت، وكِـت طـبّـزت تـلـفــونـي فـرّجـت فِـي خـلـق الله...

أهلنا التكاسة قالوا، الرزق ابنصات...

شغال ابنصات وبلقِط في الرزق من شارع الله دا.
أها، أدوني عنوان قدُر بحتنا أنا والـ(جي بي اس) ما عِرِفنالوا
صِرفة. بعد غِبينا حِيلة، طوالي رفعت التلفون وضربت للزبون.
: ألو...
الزبون: ألو...
ردّ علي زول كلآمو غير وآضح، وفجأة وآحد تاني لفح مِنو التلفون.
: يا جماعة ضربتو لتكسي ؟؟؟.
الزبون: نعم .
: طيّب عنوانكم شنو .؟؟؟.
طوالي اداني العنوان. المرا الله لا تريحا ادتني العنوان غلط.
مشيت لقيت حبوبة عمرها علي مشارف الـ90 سنة، ومعاها علي ما يبدو
ولدا في الأربعينيات من العمر. الحبوبة مِتكلة علي الحيطة وشغالة في
التلفون طِبيّظ شديد لدرجة إنها ما شعرت بالعربية لمان وقفت جنبها. ولدا
ساقا من إيدا، وإيدا التانية ماسكة بيها العُكاز تتوكأ عليه. فتح الباب وركبا
في العربية، وقبل ما هو يركب هي كانت خمشت التلفون وإشتغلت طِبيّظ.
الولد قال لي، ماشين السوبر ماركت سريع، وبعد داك البيت. الحاجة شغالة
في النت تش، ماقالت ولا كلمة حتي خلتها عاجزة عن الكلآم بسبب إنها
بلغت من الكِبر عِتيا.
ولدا قال لي، دقايق، ونزل خشّ السوبر ماركت. أنا بركنت العربية، وفضلنا
أنا والحبوبة منتظرين. الحبوبة شغالة تنخِس في النت، وانا متمحِن في عمايلآ.
الولد إتأخّر، وكت لقيتو إتأخّر وما عندي شيتاً أسويها والحبوبة ما فايقا لي، قلت،
انا براي اللدخل النت.
أها، مرقت تلفوني وفتحت النت، قبل ما ابدأ الطبيظ، الحبوبة فجأة تركت تلفونا
وقبلت علي.
قالت لي: بتدور تسويلنا حادث ؟؟؟.
في سري قلت، بِسسسسسسسسم الله، اتاريك بتعرفي تنضمي !!!.
قُتلها: يا حاجة العربية دي وآقفة، حادث شنو كمان ؟؟؟.
قالت لي: وآقفة طايرة، رآكة الحادث بتسويهو وكت مسكت التلفون.
قُتلها: يا حاجة ما تراكي من قبيل ماسكة التلفون، أنا سألتك ؟؟؟.
قالت لي: دا تلفوني، إنت مسكت التلفون بتكسيك دا داير تكتلني ؟؟؟.
قُتلها: لكن يا حاجة التكسي دا ما واقف ؟؟؟.
قالت لي: (F) وإشتغلت مفكات تقيلة. التكسي وآقف دي تاني لا تقولا لي.
قلت، وكت الحكاية جابت لها مفكات اخير لي السُكات. قفلت تلفوني
وختيت الخمسة فوق اللِتنين، وهي رجعت لي طبيزا.
بي قلبي قُتلها، ذكرتيني حبوبتي حفصة بِت أُمحد اللمين، زمان قالوا
كانت تكحِّل عين وتخلي التانية بلا كُحُل، واكان زول سعلآ تكاتلوا.
بعد مسافة الولد جا، ودورنا علي البيت. اوآت العربية إتحركت
قالت لي: أوعك اشوف إيدك دي هبشت التلفون. ورجعت لي طبيزا.
أها، وصلتهم البيت مرّقت محفضتا وادتني عشرين دولآر.
مرقت الفكة عشان ارجعلها الباقي قالت لي، بتسوي في شنو ؟؟؟.
قُتلها: داير ارجع لِك باقي قروشك.
قالت لي: شيلِن امِش اكتلبهن زول. ومرقت فاتت !!!.
بقلبي قتلها: بلا ياخدِك، التقول من دقش !!! المِتلِك دي هناك عندنا
بيقِدولا العنقريب، ودورت مشيت !!!...


ود المدير...

ود المدير صاحبي .. تحية عطرة .

Quote: قالت لي: بتدور تسويلنا حادث ؟؟؟. في سري قلت، بِسسسسسسسسم الله، اتاريك بتعرفي تنضمي !!!. قُتلها: يا حاجة العربية دي وآقفة، حادث شنو كمان ؟؟؟. قالت لي: وآقفة طايرة،رآكة الحادث بتسويهو وكت مسكت التلفون.

والله يا ود المدير ضحكت ضحك واتخيلت منظرها تماسخ فيك تصدق المساخة دي تشبه
مساخة كبار الشايقيات والله يا ود المدير وبالمناسبة صدقآ لي كلامك تصدق النسوان بذات
لما يكبرن ببقن مسيخاااااااااات ما عارفة السر في كدا شنو غايتو نسأل الله يكفينا شر مساخة
الكبر بما انه اسه بدينا نحسه بيها ههههههههههههههههههههه . لكن بيني وبينك عجبني ليك وتستاهل
لانو شئ طبيعي انت جنب الدركسون شن ها الموبايل ليك هههههههههههههه. يا زول شغل العافية ورزقآ
ما يفارقك ود امي ولي قدام .

عافي منها...
خجيجة الضكريه...
هرشتك ..
والله صحي...
بجيك يوم لي عمايل العجائز القاهرات...

العجوز دي ما شيلة ليها مظلة تنتحك بيها في نص صلعتك دي

Quote: Awad H. Abdalla آ ود المدير يا صاحبي ، قلت لي قالت لك شيل الباقي tip؟ كان تقول لها "تباً لك" بالإنقليزي -- هههه -- بالله كمان شوف العجوز ولماضتا ، والله صحي

تُب عليها.

عوض يا صديق،
كيف أخبارك؟.

علي اليمين يا عوض العجوز أمسخ من الورر،
خلي بالك نوع دي ما بيجيها سُكري.

ذكرتني،
نسيت انوّه إلي الذي قام بالترجمة
هو معاوية المدير...

Quote: نسيت انوّه إلي الذي قام بالترجمة

ههههه ـ شايفين الرجفي ..
أمانه ما الكضب حبلو قصير.

Quote: والله يا ود المدير ضحكت ضحك واتخيلت منظرها تماسخ فيك تصدق المساخة دي تشبه مساخة كبار الشايقيات والله يا ود المدير وبالمناسبة صدقآ لي كلامك تصدق النسوان بذات لما يكبرن ببقن مسيخاااااااااات ما عارفة السر في كدا شنو غايتو نسأل الله يكفينا شر مساخة الكبر بما انه اسه بدينا نحسه بيها ههههههههههههههههههههه . لكن بيني وبينك عجبني ليك وتستاهل لانو شئ طبيعي انت جنب الدركسون شن ها الموبايل ليك هههههههههههههه. يا زول شغل العافية ورزقآ ما يفارقك ود امي ولي قدام .

بت عمسيب يا صديقة.

النسوان وكت يكبرن بيخافن من الموت عشان كدي بيكونن
رويحتن محرقاهن، ثمّ يمتهن المساخة. لكن نفر مساخة دي
أصِلا ما لاقتني...

Quote: عافي منها... خجيجة الضكريه... هرشتك .. والله صحي... بجيك يوم لي عمايل العجائز القاهرات...

نان هي هرشة نصاح !!!.
هرشة بمفكاتا يا قريبي. الحاجة عمرها ناهز
الـ90 فتحت فيني مفكات في نيويورك اللتكم
دي ما سمعتها !!!...

Quote: العجوز دي ما شيلة ليها مظلة تنتحك بيها في نص صلعتك دي

بعد السغالة اللِساغلتا علي اكان كترتو معاها
كانت بتنتحني بالعكاز الشايلا تتوكأ عليه،
وياهو الفضلها بس...

Quote: ههههه ـ شايفين الرجفي .. أمانه ما الكضب حبلو قصير.

يا ملك يا اخي لكن الحاجة قرررربت تمُوّص
لي الفِطيرية.


بتعرف موّض الفِطيريّة ؟؟؟...

Quote: ذكرتيني حبوبتي حفصة بِت أُمحد اللمين، زمان قالوا كانت تكحِّل عين وتخلي التانية بلا كُحُل، واكان زول سعلآ تكاتلو

ذكرتيني حبوبتي حفصة بِت أُمحد اللمين، زمان قالوا
كانت تكحِّل عين وتخلي التانية بلا كُحُل، واكان زول سعلآ تكاتلو
ود المدير سلااااام ومعزة
دي ذكرتني جد بروفسير عبدالله .....
البمسح رجيلو بي الزيت وبمشي يقيف في دوداب الورود!
كان غشاهو سيد معيز والله غنم والدُّك ملأ كرعينو بشيل حالو

Quote: المِتلِك دي هناك عندنا بيقِدولا العنقريب، ودورت مشيت!!

إنت عارف...
بقدوليها العنقريب .... وببنوا ليها بيت مطرِّف...
ومخروقة بعيد ...! أها زولتك إنت أخير معاها النت تتب(.........) وتشخِّر المتلك...!
لكن زولتنا نحنا بدل النت معاها الكدووووووووس!
إنت عارف العجائز ديل أمانا ماعندهن قصص....
مع "الشَّيوم"، وكمان مُخباط طويل للطرَّاد وطارق اللَّيل...!
مرَّة نحنحة ، ومرّة كشكت صريف، ومرّة ....
بتعرف أخطر العجائز، في سرقة "الطهور"....!
البال متَّركشْ ، بس قلت ننرد التحية، ونسايل علي الحبَّان
محبتي

Quote: ود المدير سلااااام ومعزة دي ذكرتني جد بروفسير عبدالله ..... البمسح رجيلو بي الزيت وبمشي يقيف في دوداب الورود! كان غشاهو سيد معيز والله غنم والدُّك ملأ كرعينو بشيل حالو إنت عارف... بقدوليها العنقريب .... وببنوا ليها بيت مطرِّف... ومخروقة بعيد ...! أها زولتك إنت أخير معاها النت تتب(.........) وتشخِّر المتلك...! لكن زولتنا نحنا بدل النت معاها الكدووووووووس! إنت عارف العجائز ديل أمانا ماعندهن قصص.... مع "الشَّيوم"، وكمان مُخباط طويل للطرَّاد وطارق اللَّيل...! مرَّة نحنحة ، ومرّة كشكت صريف، ومرّة .... بتعرف أخطر العجائز، في سرقة "الطهور"....! البال متَّركشْ ، بس قلت ننرد التحية، ونسايل علي الحبَّان محبتي

في اللوّل،
مشتاقين بالحيل يا ود المقدم.

دِيّمة العجايز متلقين حِجج يا ود المقدم، وحِججُن لا تخلو من
الطُرفة، وكمان بتاعين هوايل. سِت الكدوس دي ذكرتني
حبوبتي بت ميدوب الله يرحمها كانت تعمل فيها مرضانة
وتقول، أمشو نادوا لي بِت السايح التسوي لي نقرسان.
النقرسان تست عشان تحدد يدقولا ظار واللآ لا.

يا ود المقدم ما تشوفوا لي طريقة اقضي لي سنة معاكم
في البادية كان لساني دا ينطلق. إن شاء الله أكان إتكتبلنا
عُمُر وجيت السودان كان فرِد إسبوع، يا ود المقدم ما
تبخلو علي.
تسعل مِنّك العافية،
وابادلك المحبة سائلاً المولى
يديمها بين الناس...