البشــــــــــــــــــــاااارة

يابنية جات
دخلت علي زي برق البشارة
كان المحل بين قلبي
و ضفة النيل البعيد
وكنت في حالة جفاف
حسيت ملامح السعد هلت زي اشارة
جريت عليك
شايل معاي احساس غريب
فيه الترقب
واندهاش
زولا موسم بالجسارة
يانت وصوفك قبل الحق
ليك و اجيك
كانت بروق اللقيا تشهد
انفعالات الاجنة في
مسامات الحروف
عبر المدى
كان انتثارها
شيئ من العشق الجميل
وحكاية الزول العشق
فارق عذابات الرصيف
لملم مصابيح النجوم
قبل ما تعلن
على الصبح انحسارها
تعالي نرقص
والغمام بعلن هيام
والزهور نديانة بي كل انشراح
وانا وانت
والايقاع رخيم
زخات مطر تعلن بدايات القبول
والمفردات بيك ازدهت
زادت نضار
قلبي ارتشح من نور سناك
قبل ما يعلن جهار
انو استسلم
واعلن
قدام عيونك
اهزام
كان بطعم الانتصار
كان احتلاللك للمواقع
بعد ما شلتي الموانع
ختيتي في جوة الفؤاد مهجة
وملامح بهجة
احساسا موشح ازدهار
بناتنا صار
التزام
روعة الشارع
رغم صيف هذا الزمان
ايقاع خطاوي الناس تجادل في النهار
بيناتنا
اتكوم عشم
انو القماري غدا تعود
شكل الدعاش الغاب
عن الاحساس زمن
لابد يجود
بي خريف العينة
بالمطر العهود
والحزن يعلن طواعية انحسار
يازول فيك حاجات
من الزمن السعد
وقت الماحسيس النقاء
زحلاوة الزول الصفاء
حرية جد حد السماء
وانا وانت والليل المنعم
بالندى
ويرجع من الافاق صدى
كلماتنا كانت
جاية من عمق المدى
وحديث دقاق
قلناه
قبال الشمس تمرق
وتسرق
مننا القول الجها ر
ما نحن واقفين من زمن
قبال نوافذ الفجر لا تعبت خطانا
ولا هزمنا الانتظار
اديني ايدك يابنية
اديني من عينيك قوة احتمال
اديك من جواي ليك
كل الاماني حين بقت
صعبة منال
لكن وحاتك يا صبية
بكرة تكبر دي الشرارة
وينفجر
شارعنا بالغضب الجميل
ويفيض علينا بالحنية نيل
ويثور عليهم
يا بنية نيل
والضفاف يرجع خضارها
الفراشات المهاجرة
كانت بتدي زي ضليلا للدليب
باكر بترجع
تدي للازهار تفاريح اللقاح
ويزدهي اللون الصباح
والبيوت الواهنة تتنفس
اريج الإرتياح
وانا
وانت والزمن البعيد
للروح نضارها
وبس

البشارة

اتدلت النجمة
وكانت هي الاشارة