يعني شنو طماطم غير صالحة للاستعمال الآدمى ؟

انتو قايلين كان ما اكلنا طماطم حا نموت ولأ شنو ؟ وهو انتو قايلين نحن بنبطلا مع اعلانكم الفطير ده ؟

لما الكيلو يتجاوز خانة الآحاد الي خانة العشرات نحن عن نفسنا بنعتبرو مسرطن ولما يرجع خانة الآحاد بنعتبرو فاسد ونزلت السوق كمية تاني صالحة -دي نظرية غاية فى الايجابية - زمان في الجامعة درسونا تكلفة السلعة وتكلفة الفرصة البديلة . اديكم مثال عندك جنيه لا غير وانت فى الجامعة ونفسك فى بيبسى باااارد وتكلفته جنيه وتكلفة الفرصة البديلة رجعتك البيت كداري أو أنك ما تشربها وتكلفتها حا تقعد تتمطق وتكلفة الفرصه البديلة حا ترجع البيت راكب أحلى حافلة وكمان مكتوب فيها ''دايره صبر'' . يعني لو نفسنا في سلطة دكوه واكلانها اكلنا نيم وقابلنا رب كريم ، ما اكلناها وفرنا تكلفة الفرصة البديلة واللي هي احتمال كبير تكون سلطة خضراء بدون طماطم مسرطنة بس شويه جرجير وعجور وبصله من أبو تقاوي وسماد كان بالغت حدها الفشل الكلوي .

عزيزي الوطن : أحشد كل آلياتك .. مواصفات ،، مقاييس ،، جودة ،، حماية مستهلك ،، حماية حياة برية انشاء الله تجيب قوات التدخل السريع زاتو بس أبقى لينا على الفول ده عشرة ده خطنا الأحمر لا تقول لى طماطم مسرطن لا تقول عيش بروميد البوتاسيوم . الفول ده حدنا الأخير وشعرة معاوية البيناتنا . والبلد لو دخلا فول مسرطن حا نعمل فته بي عيش بروميد البوتاسيوم ونرشو بي موية فول فاسد ونقطع طماطم من إياها على زيت السمسم الما خمج وتاكل ماتدي الجنبك ...


انتو كنتو قايلني داير اعمل شنو ؟؟؟