بايظة ..بايظة.... ارشكم بي دي

والقاه وين حالي المنام
انا من فقدت عبير ضفاف النيل
بقيت متشهي للنوم الامان
وفقدت جيت حالي المنام
يازولة
خليني النقول
كانت قواعد الريدة خطوات للامام
ايه اللي خلا السكة تتباقص
وترجع لي ورا
قبل ما نبدا الكلام
خليني احكيك عن حكاية زول
نذر دم الكتابة
ولون السحب الغمام
شال عزة النيل في الوريد
شال الشموخ الفي النخيل
شال الحنين الفي السواقي
الساهرة طول الليل تئن .
عارفتي ليه جافى المنام ؟
في يوم مشبع بالرذاذ
مطرا بغازل في السهر
لاقى العيون
واتوجست كل الظنون
واتنشط السهر الخزاز
وهتف منادي الالفة قال
يا زول تمام
وفرخت
فرحت بالبشارة معاي
حروف الابجديات الجديدة
وهمست لي طيفك بشيش
اسرا ر قواعد العشق
والحالة الغرام
وكيف ياجميلة
انو الريدة ما بس اتجاه
لي عيون حبيبة
او مغازلة
او بكاء عز التشوق والهيام
الريدة يا غالية بتشق
دربا جديد في المجرات
المسارات
المدارات
والعوالم الراقية
تفتح في الوريد كمين مسام
ورهنت كل احساسا موجع بالجمال
والالفة الحالة الدلال
والابتعاد رغم التقارب
والتقارب رغم العناد
والسكون رغم ارتعاشات الظلال
والصخب
رغم السكون الفي الليال ..
واني لمن التقيك
واعلن تمرد حرفي ليك
وانو اللي بينا
كان حقيقة
وجد صارخ مستهام
انة الدوائر كل يوم تضيق
وانو الرسايل
ما بتتكتب بي مفردات
او بتاخد شكل الحروف الناعمات
اصل الرسايل
خيط شعاع من العيون
او نسمة من الروح سلام
وبس

ومعاها دي


عايز اغنيك
مرة اكتب بهجة صارخة
فيها افرح بيها امرح
ومرة اكتب مهجة دافية
والتزم جانبك غرام
انت عارفة
اصلي من يوم كان شهقتك
وابتدا بينا الكلام
كنت عارف انو حرفي
ساقني ليك
وكنت خايف من ملام
الا يا نور العيون
كنت لي اجمل وطن
وكنت ليك شاعر بموسق في اكلام
عايز احكيك
عن حكاية زول مرق والنيل
صبي
وجواهو كنا الانفعال
احساس موشح بالهيام
خليت وراي
في بيتنا في الركن اليمين
بذرة وجودي هناك بيان
ومشيت على الشمس الحقيقة
ما مغتية بالعتام
سافرت
كان سفرا
طويل
اتصبغت كل الظنون بالاغتراب
اوان من البشر البتمشي وديما ترجع
الا قلبي
عايز يرجع
والحنين الضاجي في كل المسام .
واتمد في افق الخيال
ليك من جواي وتر
مشدود مدوزن
بالانين
وجع المسافر في الزمن
والامكنة
اتشابهت كل الطرق والارصفة
لون السواد الفي الشوارع والزفت
لون المهاجرين في الشمس
تحت الهجير راجين غمام
خليني من قول النضم
الفيه احساسا مرير
خليني احكيك
وارسم الكلمة الحرير
خليني اتغزل واقول
يا بهجتي
ويالوعتي
ويا كل اماني الجاية
ياروعة الهمس الجميل
والناس نيام
وانا ليك بغني
( هجد الانام
وانا بيكي مسهر
النحول على جسمي يا حبيب ظاهر )
ويحلو معاك قول الشعر
والكلمة والاحساس غرام
واضحك معاك
لمن تجيني حروفك الضواية
طربانة وبهيجة
واتكوم الشجن القديم
جواي
يتفرهد ربيع العمر
تتبدل حروف الحزن الوان من زهور
والاندياح جمل فواصل الكلمة
جهرا ثم باح
بي كل معاني الشوق
وجدا مستهام
برق الهوى
من تالاك شلع
في تالاي اوجد قرحتين
واحد مفصد في القليب
واحد قرح تمرة فؤادي اليك
جوى
وبينا كم عز المقام
عصافير الكلام ركت على فرع الغنا النديان
شجت بي صوت مرق
من جوف عميق الوجد
ناير باللحون رقة في اجمل
سلالم الريدة
والشجن الوئام
دناقر الرجعة ما دقت
شان ياغالية اتحزم
واجيك ولهان
انمق في الاحاسيس
تصاويرا تفوق وصاف
وارسم بالحروف وصفك
وانت تقولي يامريودي
ما تنضام
وانا الضيم عشته من
يوم اعلنت من النيل صيام
وفطرت بي حالى الاحاسيس الهوى
رغم السفر
وقوافل الرهق الجسام
كلت زكايب صبري من طول الرحيل
وبديت افتش في رواكيب الاماسي
يمكن الاقي حداك مكان
نقعد نداعب في النجوم
ونمازح القمر الوحيد
ونبقى في حالة انسجام
وقعدت جمبك
ضميت حنينك
اتكرفك
كل النشوغ جواي والشوق الشديد
ولقيتا حسايسي عليك
تمعن التصاق
عينيك مرافي الهجعة لي
رمشك دثاري
بلقى في عينيك احشاسا جميل
واشتهي حالي المنام
وبس