Post: #1
Title: أخ يا راسيييييي ..
Author: محمد على طه الملك
Date: 05-22-2014, 11:57 PM
قالوا لينا حصلو حاميها حراميها المحكّمين باعو قضية الاقطان ..
قبال نستطلع جوانب الموضوع قالو قبضنا سفينة جايبا مخدرات ..
قبال نعرف الشحنة جابا منو قالو حصلوا فساد مدير الأراض ..
قبال نعرفه هو منو ذاتو دقوا الكوراك فساد في مكتب الوالي..
قبال نعرف فسدوا كيف قالوا خلاص اتحللو ..
قبال نعرف اتحللو من شنو قالو قبضنا الملازم الحرامي وحبسناه ..
قبال نعرف حبسو وين ومتين قالو الزول شرد من الحبس ..
قبال نقص اترو قالو الريس في المستشفى ..
قبال نعرف مالو قالوا فتحنا بلاغ ضد الصادق المهدي ..
قبال نعرف البلاغ في شنو قالو قبضنا الصادق وحبسناه ..
قبال نعرف حبسو وين قالو عوووك في واحده إرتدت وحاكموها ..
قبال نفتح خشمنا قالو نفير في الشرطة استعداد 100% ..
قبال نتلفت نشوف الشرطة استعدت ولّ لا قالو قوات الدعم تحيط العاصمة ..
قبال نمرق نشوفم حاوطوها بى وين قالو هاكم كلمو حميتي ..
قبال نستوعب كلام مجمجته ..
قالو لينا سفرناهم لنصرة إخوانا...
قبال نعرف إخوانم منو قالو الريس بح ..
قبال نلف عممنا ونصل قالو هاكم الريس بكلمكم ..
قبال نملص ونقعد عشان نسمع قالو حصلو احجزو النائب ..
قبال نصلهم قالو حصلو تاني واحد ارتد ..
أخ يا راسييييييي. .
وفجأة اذكرت أنا مصنقر قدام المنبر العام .
|
Post: #2
Title: Re: أخ يا راسيييييي ..
Author: معاوية المدير
Date: 05-23-2014, 00:11 AM
Parent: #1
معاك مصنقرين يا ملك.
أغرب حاجة حكاية محاكمة المرتدين بالقوانين الإسلآمية !!!.
ما قام علي باطل فهو باطل. والله صحي.
إزيّك يا زول...
|
Post: #3
Title: Re: أخ يا راسيييييي ..
Author: محمد على طه الملك
Date: 05-23-2014, 07:55 AM
Parent: #2
مرحبتين ود المدير ..
مشتاقين والصحة والأسرة ..
واخد بالك الوثبات دي كيف ؟
يعني هم ناوين باقي الستة شهور وشوية ديل يوقفو الشعب السوداني على فد كراع ..
الله في.
|
|