حِمِدّتِي

بالله المِنبر كُلُّو حِمدِّتي قال .. حِمدِّتي عَمل
حِمدّتي ضرب .. حِمدِّتي نهب
الدّعم السّريع جانا .. ووووب ... وااااي ... وااااااااك

يعني لمّا كانوا شراذِم وفلول ومُرْتزقة الحركات المُشلّحة (بالشّين) شغّالة تضرب وتنهب ما صحيتو مالكم؟
بقيتو زي حالة الصّادِق المهدي

حالتكُم تحنِّن
ويا حِمدِّتي إضرب بيدٍ مِن حديد ورُش الخونة والعُملاء وخلِّي المُنْدسّين

صفحتي الشخصيّة على الفيس بوك

حسابي على تويتر

الاخ علاء مع التحية ..
يا أخي لي يومين أسأل عن حميدتي ده اي معلومة او نبذه عنه
نريد أن نعرف عن هذا الشخص ..
شكراً علاء

ألأخ /علاء الدين السلام عليكم.....أهو فرصة نسلم عليكم قبل البوست ده ما يتكابلوا عليهو ألأعضاء.....حمدتى ده هو منو و كان وين ومالو ماظاهر...ومالو لو سعى فى حماية البلاد؟؟؟؟مش سودانى؟؟؟بس ما يكون مرتزقة...تقديرى وسلامى.

ووووب ... وااااي ... وااااااااك
حالتكُم تحنِّن

الأخ العزيز د اسماعيل عباس ..

تحياتي واحتراماتي ..

Quote: بس ما يكون مرتزقة...تقديرى وسلامى.

لا ابدآ ما مرتزق بس ارهابي اسلامي اصيل تابع للحيكومة !!!!!!

ههههههههههههههههههههههه

وانت يا مراسلة النظام الجابك شنوفي وقت الذروة دي تشمشم !!؟؟

ههههههههههههههههههههههههههههههههههههههههههههههههههههههه

اقتباس :

الدّعم السّريع جانا .. ووووب ... وااااي ... وااااااااك

غايتو الله يكفينا شر ال ك لا ب والشايليين الحراب !!!

ألأخت/الكريمة....منى عمسيب.....

Quote: الأخ العزيز د اسماعيل عباس .. تحياتي واحتراماتي .. Quote: بس ما يكون مرتزقة...تقديرى وسلامى. لا ابدآ ما مرتزق بس ارهابي اسلامي اصيل تابع للحيكومة !!!!!!

شكراً بتكرمك على ألأجابة....... ال..د..التى سبقت إسمى ......أنا لست بحاملها وأتمنى ذلك....تقديرى وإحترامى..

الدعك السريع بدون صابون ..اقلق منام المتمردين وازيالهم في المنبر..

لذلك عييك وعاك وكذلك ثم لو ...وكتالونيا وكتلونا بالكالونيا

ارمي قدام ياشيخ حميدتي...

استخدام نفس اسلوب المتمردين ...تاتشرات تواجه تاتشرات والحشاش حميدتي شبكتو مليانه..

الخرخرة ودك اللعب ما معانا ...والبمرق للدواس ما بقول عوقتني..
_______

تحياتي ياعلاء..

Quote: شكراً بتكرمك على ألأجابة....... ال..د..التى سبقت إسمى ......أنا لست بحاملها وأتمنى ذلك....تقديرى وإحترامى..

الأخ العزيز اسماعيل معذرة علي كتابة حرف الدال لانو قريب للداش .
لكن اقسم ليك الدكترة ما بعيدة عنك هي البتشبهك يا رجل يا دكتور الحياة والانسانية
ويشرفني انك دكتور في الأهم لو قسناها بالدرجات العلمية الانسانية والحياتية .
تسلم يا رجل يا مقدار دومآ . احترامي وتقديري ..

ولي قدام ..

المحترم بشير احمد أمس انت ما دكيت اللعب هههههه

المحترم بشير احمد أمس انت ما دكيت اللعب هههههه

الاخت/اخلاص عبدالرحمن
تحياتي؛؛؛

Quote: أمس انت ما دكيت اللعب هههههه

دك المنبر هين ..ينتهي بإغلاق الكمبيوتر...
وبكرة نجي نوزعها من جديد ...هو نحنا دافعين حاجة في منبر بكري ده...

Quote: دك المنبر هين ..ينتهي بإغلاق الكمبيوتر... وبكرة نجي نوزعها من جديد ...هو نحنا دافعين حاجة في منبر بكري ده...

التحية لحميدتي والعار والبشتنة لاعداء السودان

الأستاذ اسماعيل

حمدتي هو قائد قبلي من عرب دارفور، استقدمته الحكومة بمليشاته القبلية بعد أن فشل الجيش فشلاً ذريعاً في حربه ضد الحركات المسلحة.

بعد تحرك الإسلاميين داخل الجيش لعمل إنقلاب (ود ابراهيم) تم (ترويض) الجيش ووضعه تحت أوامر جهاز الأمن للخوف من حركة أخرى، وتمّ استئجار حمدتي ومليشاياته للقيام بمهام الجيش.

ولأنها مليشيات لا تخضع للحكومة تم تعيين حمدتي برتبة عميد في جهاز الأمن وتسمية القوات بقوات الدعم السريع (لإعطائها شرعية مثل عملية غسل الأموال).

القوات فشلت في كردفان وتم قتل الكثير من أفرادها، والحكومة تبطأت في دفع مستحقات افرادها مما جعل اقرادها يلجأون لنهب المواطنين وقتلهم للحصول على المال، مما حدا بالمواطنيين في كردفان للتظاهر ضدهم، وقد اعترف الوالي احمد هرون بتجاوزاتهم وطرد\هم خارج الولاية.

في اعترافات الشيخ موسى هلال أكد أن قوات حمدتي هي من أسس المليشيا الإسلامية التى ساعدت في إنقلاب أفريقيا الوسطي وقتلت المسيحيين الأمر الذي أدى لردة فعل بتكوين مليشيا مسيحية قامت بدورها بقتل المسلمين.

وحسب السيد يوسف الكودة (الإسلاموي المعروف)، فحميدتي هو من أعطى الحكومة تعليمات لقبض السيد الصادق المهدي.

تتكون القوات من عدد كبير من المرتزقة السودانيين والأفارقة، وتقوم بالمهام التى عجز عنها الجيش أو التى تتضمن قتل للمدنيين، ولا تريد الحكومة للجيش أن يقوم بها (بسبب مسألة المحكمة الجنائية).

حمدتي هو الوريث لموسى هلال والذي كان يقوم بنفس هذا الدور.

في الرابط أدناه تجد اعترافت موسى هلال والتى يشير فيها لدور حمدتي ومليشياته فيما حدث في أفريقيا الوسطى.
http://www.sudanjem.com/Musa%20Hilal.m4a
(اقطع الرابط وضعه في خانة العنوان في وسيفتح معك الملف الصوتي)

شكراً أخى الصادق....لا عليك أخت منى وتسلمى.......يعنى هم نفسهم الجنجويد...؟

اسمو ت..افه جداً بصراحة
مفروض آمو او مرتو بس ينادوه بيهو هههههه
سلامات يا علاء الدين

اسمو ت..افه جداً بصراحة
مفروض آمو او مرتو بس ينادوه بيهو هههههه
سلامات يا علاء الدين

وينك يا علاء

يعني خلاس في حماك ربنا في سبيل ديننا

سلمتوها لحمدتي بعقد من الباطن وانتو بقيتو ناس وجاهات ساي ؟

صدقني حيقلب عليكم وبعدين واااااااااااااي دي بتقولوها انتو

Quote: وينك يا علاء يعني خلاس في حماك ربنا في سبيل ديننا سلمتوها لحمدتي بعقد من الباطن وانتو بقيتو ناس وجاهات ساي ؟ صدقني حيقلب عليكم وبعدين واااااااااااااي دي بتقولوها انتو

بالضبط يا حمد
لو أنهم قرأوا التاريخ
أو أستهدوا بمقدمة بن خلدون
فقد سبقهم كثيرون
(ممالك إسلامية بائدة)
لذات المصير:
يقلعوا السلطة بشعارات الجهاد وتطهير الارض من الفساد
يجوا السلطة ناشفين و(مسخنين)
ثم يتمرغوا في نعميها (وفسادها)
تتورد الخدود وتنعم الجلود
ويخافون الدواس وحرب الناس
فيصعب عليهم حمايتها
فيقلعوها منهم القادرين علي ذلك
ثم يتمرغوا هم أيضا في نعيمها
وتدور الدورة
وتدور الدوائر

سيندم طبعا من يسلم دولته للمليشيات
سيندم من يسلم أطفاله للغول

Quote: Taj M Ibrahim · الاهلية الخيرية حميدتي اسمه ما ######## فكل منطقة من مناطق السودان لها ثقفافتها وتسمساتها فمثلا الشاعر محمد الحسن سالم حميد عليه الرحمة يسمى حميد وما بين حميد وحميدتي خيط رقيق بالاختلاف الاثني والقبلي- وأهلنا القارة قالوا امة ناس بي لغوتوم( اي كل امة لها لغتها او لهجتها اذا كانت لغتها الام واحدة) الامالة تظهر كثيرا عند عرب دارفور والبرتي أهل كبر والقبائل المجاورة- يبجو ان كثير من أهل شمال ووسط السودان النيلي يجهلون الكثير عن دارفور واصقاع السودان الجنوبية والغربية- يا سيف النصر الله يهدينا ويهديك المعايرة شينة ولاتنتج الا الدواس التتعيس ونرجو ان لاتكون النية غبشة والنية زاملة سيدا رد · أعجبني · متابعة المنشور · منذ حوالي ساعة

يعني كونو حميدتي شغل الناس و اصبح حديث المجالس ، خلاص هذا معناه انو هو زول عظيم ؟!!!
منطق غريب و عجيب و بائس
ما ياهو بتاع بوكو حرام داك برضو شاغل الناس ، و كل العالم مشغول بيهو
ما الفرق ؟

من المدهش والمؤسف ان يكتب علاء الدين هذا الكلام !!
وهو يعلم علم اليقين ان الأمر يتعلق بسيادة وكيان الدولة التي يحكمها للأسف هؤلاء الذي ينتمي إليهم .. اليس من العار ان توكل القوات المسلحة "الجيش السوداني الوااااحد داك" مهامها لمليشيا ؟!!
هل هي عدم القدرة على القتال يا علاء الدين ؟!!
قلة العتاد والرجال ؟!
أم ماذا بالتحديد ؟!

ان تلجأ الدولة لمليشيا للقتال نيابة عن الجيش السوداني وفي ارض الوطن وضد أبناء الوطن .. فذلك طامة كبرى والله !!
لا يفوقها شيء الا عدم الإحساس بها !!

تحياتي

بعدين والقسم العظيم يا علاء ..
الكلام البقولو ليكم (لي ناسهم) بتاع حميدتي ده مغفل نافع وقاعد يخدمنا ويحارب فوق ناسو واهلو ..
والقسم العظيم الكلام ده ..
لا يسوى بصلة في سوق أمدرمان ..
ده ما كلام يقولوا رجالات دولة بحترمو دولتهم يا علاء ..

الكلام ده عندو تصور واحد ينطلق من افق واحد شديد الضيق والجهوية ..
ده كلام ناس فقدو احساسهم بالوطن واستبدلوه بي قبيلة او قبيلتين ..
وهذا و الخسران الوطني المبين ..

والردود من قبيل انتو خاتين يدكم في الموية وهسع الحرابة كان قامت ولا حتفكرو تجوا تدافعو عن اهلكم ..
الردود من هذه الشاكلة .. هي ردود تنطق بلسان الازمة التي كرست لها دولة الإنقاذ ..
لسان العنصرية والجهوية والتي للأسف صارت المظهر الأبرز للدولة ..

يا تاج و الله النية ماها غبشة، انا بس افتكرتو اسم دلع يا عملات ناس الخرطوم :)
اما الرجل نفسه فهو لا يلقى مني الا كل احتقار بغض النظر عن اسمه، ما ظنك يا تاج برجل يقتل أهله ؟

مرحب بكُل مَن مر

والتّحية عبركم للقائد حِمِدِّتي وقُوّات الدّعم السّريع
والتّور إنْ وقع كُتْر بالتابِت عيب

صفحتي الشخصيّة على الفيس بوك

حسابي على تويتر

لن يكون هناك حل لمشاكل السودان الا سياسياً
ستستمر الحروب ويستمر مسلسل انهيار الإقتصاد
وتفتيت وحدته وإضعافه ..

من أجل السودان الوطن .. يجب على الجميع التعقل والترفع عن مثل هذه الإمور
فنحن ذاهبون والوطن باق ...

صيحة لكل من له قلب حي وضمير .. أن يجلس ابناء الوطن الواحد لحلحلة المشاكل وتقديم التنازلات مهما عظمت.
لا المؤتمر الوطني باق ولا غيره من الاحزاب ... ففيقوا ايها الناس .. فالوطن غاااالي.

وعيييييب كبير هذا الذي يحدث ... أبناء السودان يتقاتلون ..

كما ذكرنا كثيراً عبر هذا المنبر وغيره، أنه ليس هناك شئ اسمه جيش وطني، أو قوات شعب مسلحة

الوطن أصبح تحت رحمة مليشيات مسلحة تقوم بأعمال جنائية ضد المواطنين، ويجب أن يكون هؤلاء الأشخاص جنود في القوات المسلحة وفقاً لقانون القوات المسلحة ولدستور السودان وهذا هو الوضع الأمثل، لكن أن يتم تحجيم الجيش (بصرف النظر عن رأينا في الجيش)، وتجنيد مليشيات مرتزقة فهذا سيؤدي حتماً لنفس المشكلة من إبادة جماعية وقتل للمدنيين.

طبعاً القوات المسلحة المتبقية (بعد سياسة التمكين) والخوف من (انقلابها على السلطة) تمّ تقصيص أجنحتها، وتحويل ميزانيتها لمباني فخمة (كلفت مليارات حسب البرلمان الإنقاذي)، وتم الإستعانة بقوات مرتزقة لتقوم بدورها.

مايشيات حميدتي فشلت في المهمة الموكلو لها في الدخول لـ (كاودا) وهي الآن تقوم بدور آخر (حماية النظام في الخرطوم) وهو ما سيؤدي لفوضى ولمشاكل اتوقعها (مع ما تبقى من الجيش)، وأيضاً ستؤدي لمشاكل في مناطق العمليات في النيل الأزرق وكردفان ودارفور، حيث الجيش لا يستطيع أن يحارب والمرتزقة تم سحبهم لحماية الخرطوم.

بالله بقيتو ما قادرين علي حماية الخرتوم الا بالمرتزقة ؟
خليكم قاعدين مكنكشين وضاربين الطرطيبة والـ واي نشوفا في الاخر البقولا منو

على ما يبدو لي يا الصادق إنه كيزان السودان اتعصروا دولياً على خلفية حصار اخوان الشياطين ..
وحركة جلب مليشيات مرتزقة للمشاركة في حكم البلد وهم عارفين انه اكتير من المواليين ليهم حا يرفضوهو ..
دا تهديد وجر شكل منهم لصوملة وسورنة السودان للتنفيس عن اخوان مصر وبقية مجارمة الاسلام السياسي..

بالله اخرتها يا علاء الدين ناسكم بقو علي المرتزقة ؟

مشكور يا دكتور بشير
الجّماعة ديل حِمِدِّتي بِقا ليهم زي ود أُم دُمبُعلُّو

Quote: مشكور يا دكتور بشير الجّماعة ديل حِمِدِّتي بِقا ليهم زي ود أُم دُمبُعلُّو

لما قريت الكلام دا ما عارف ليه

اتذكرت ناس ندى راسطة وود الحافظ ومن شاكلهم

Quote: على ما يبدو لي يا الصادق إنه كيزان السودان اتعصروا دولياً على خلفية حصار اخوان الشياطين .. وحركة جلب مليشيات مرتزقة للمشاركة في حكم البلد وهم عارفين انه اكتير من المواليين ليهم حا يرفضوهو .. دا تهديد وجر شكل منهم لصوملة وسورنة السودان للتنفيس عن اخوان مصر وبقية مجارمة الاسلام السياسي.. بالله اخرتها يا علاء الدين ناسكم بقو علي المرتزقة ؟

العصرة الداخلية ذاتها ما هينة يا حيدر

البشير داير يرجع الموضوع للجيش، والجيش مجهجهة، والمحكمة الدولية، وعدم القدرة على تحقيق نصر كبير على الحركة الشعبية، والـ soft landing وكلو كوم وقروش الديّانة كوم تاني (وديل القالوا على مسألة الإصلاح السياسي). المهم موضوع الحماية للنظام تم إيكاله حالياً للمرتزقة، والجيش تحت المراقبة (سلاح الجيش تحديداً في الخرطوم)، وتصفية الحسابات بتسريب ملفات الفساد.


القصة بقت (مدغمسة) شديدن محتاجة لمعلومات حقيقية ودي صعب توفرها. لكن "الصراع" شديد بين كل الأطراف، والغنيمة (خلافة الرئيس)، والكل خايف على (ملياراته).

وأول الخايفين (علاء صاحب البوست دا)

في ذِمّتك يا الصّادِق إسْماعيل الخايف مِنو؟

أمانا يا حِمِدِّتي ما جرّستا ليك ناس

و حميدتي ناوي يحرر حلايب و يقيف الف احمر مع العبيد بتاعين الجنوب
و التحالف المعدل مع ايران بتوقيع خامنئي و حميدتي راس
و الجابنا اطراف الخرطوم دي .. كدي يفتح خشمو و يقول ارجعو
_______________
مقتبس من تاريخ الاندلس
فترة ملوك الطوائف

Meet the Janjaweed par sudanewsmedia

بالإنابة عن العميد أركانحرب محمد حمدان دقلو المشهور بحميدتي قائد قوات الدعم السريع –قدس- في رواية أخرى الجنجويد أقول لكم: (شيلوا الصبر .. أمباكر يوم أم كركنجي تخبِّر أم بتيخ .. وألمي يخنق القنطور.. أم كورو بتنقلب علي ضنبّا). أنا ما بفسِّر وإنت ما تقصِّر.

الأخ تاج إبراهيم ما تترجم الكلام دا .. إذا الناس ما بتعرف لغات أجنبية تبقى دي مشكلتها. هههههه

قناتي في اليوتيوب
http://www.youtube.com/user/KabbashiSudan
تحياتي.

كبـّاشي الصافي

(العوج راي والعديل راي)

سلامات ياعلاء الدين ..
هل هذا الرجل هو نفسو في اللقاء الصحفي مع الصحفيه الفوق دي باللغه الانجليزيه؟؟؟
إذا كان هو نفسو ،،يبقا الحكايه واضحه إنو الزول ده مرتزق ..لانو في الفيديو قال نحن كنا مع الحكومه وتركناهم والآن نقاتلهم ..
وفي مقطع آخر وهو يخطب في انصاره قال بندي الحكومه 36 ساعه تنفذ طلباتنا ..
وبعد داك عرفنا إنو الطلبات تم تنفيذها ..
والان يظهر هذا الشخص برتبة عميد أمن ويدافع عن الحكومه .
يعني مسيرة هذا الرجل حسب فهمي البسيط تتمثل في إنو تدفع كتير ..إشتغل معاك ..معناتو زول مرتزق..يعني بي بساطه بوجود قواته في الخرطوم ممكن يستلم البلد..
لايكمن أن يكون هذا قائد ويصرح مثل هذه التصريحات الرعناء ..
...(الرتبه بتاعتو دي ذكرتني أيام الخدمه الالذاميه في واو ،كان في قوات اسمها قوات السلام ..مشينا للقائد بتاعهم في القطيه وقلنا ليهو عاوزين سلاح..قال لازم تكون معانا ..قلنا ليهو موافقين ..قال لي عاوز ياتوا رتبه..وقبل ما أفتح خشمي قال لي شكلك رائد...وفتح الدرج وطلع إشارات رائد وقال تمشي للاستوديو الوحيد في السوق وتعمل صوره وترجع ..أها بعد ساعتين بقيت رائد ..زي صاحبي ودفعتي حمدتي ده..)

(الراجل ما ببقة في حمى راجل زيو)
وضعكم شين اكتر مما كنا نتمناه ليكم زاتو
يا لبؤسكم

عندما تتحول الإنقاذ لمليشيا!
هذا سقوط مريع!
ونُذُر واضحة لما نخشاه!







لكن أليس فينا أمة رشيدة، تسعى لإنقاذ السفينة الغارقة!
لأنها سفينة الوطن،
وليست سفينة الإنقاذ!

Quote: الجّماعة ديل حِمِدِّتي بِقا ليهم زي ود أُم دُمبُعلُّو

حمدتي مات ، علي أقوي الروايات وأقربها للحقيقة

Quote: عندما تتحول الإنقاذ لمليشيا! هذا سقوط مريع! ونُذُر واضحة لما نخشاه! لكن أليس فينا أمة رشيدة، تسعى لإنقاذ السفينة الغارقة! لأنها سفينة الوطن، وليست سفينة الإنقاذ!

ما طار طائر وارتفع .. إلا كما طار وقع