محجوب سراج يا السموأل

رسالة ومناشدة وتمنى ورجاء

لأخينا وصديقنا
الأستاذ السموأل خلف الله القريش

بصفته الإنسانية أول شى
وأنا بعرف مدى حبه للإبداع والمبدعين فى كل الضروب الإبداعية

ثم بصفته الرسمية فى منظمة أروقة

وحقيقة كل الناس ال مع وال ضد الجهات الرسمية وشبه الرسمية
كل الناس فرحو وسعدو بمبادرات تكريم مبدعى السودان، وتحديدا فى مجال الفن الغنائى
وبقت سنة حميدة وجميلة ومفيدة

وكل المبدعين التم تكريمهم بستحقو ويستاهلو اكتر من كده
وما اعتقد الشعب السودانى بقدر يوفيهم حقهم وجميلهم علينا

الشاعر الجميل محجوب سراج يا أستاذ السموأل
واحد من أجمل مبدعى بلدنا وواحد من الناس الرتبو وزينو وجدان الناس

وبدون تفصيل عطاء ومنح ومتح محجوب سراج
وكله معروف ومبذول ومتاح ومتوفر

نتمنى، ولو على هامش تكريم أى واحد من المبدعين، نرجو ونتعشم ونتمنى
يتم تكريم الزول السمح ده

تكريم معنوى قبل التكريم المادى

وهو واسرتة فى اشد الحاجة للنوعين

وقبل كل شى

لأنه فعلا بستاهل وبستحق

Quote: تكريم معنوى قبل التكريم المادى وهو واسرتة فى اشد الحاجة للنوعين وقبل كل شى لأنه فعلا بستاهل وبستحق

نبصم

يا يعرف الواجب والجمال الا اصحاب الضمير

شكرا اباذر

محجوب ده يا محمد
واحد من اسمح الناس

مبدع وخلاق

مشكلته انه زول عفيف ونضيف وحساس

عانى كل صنوف التعب فى الدنيا

دنيتنا اللون لينا معانيها
وجمل دروبها

يستاهل احسن من كده كتير والله

محجوب لو كان فقط اهدى لينا

الجرح الأبيض مع بن البادية
و
حبة شوق والماضى والحاضر
مع صلاح مصطفى

كان بكون كفايه علينا

ده غير ابداعاته لإبراهيم عوض

ليه بتسأل عنى تان

مين قساك من قسى قلبك

قاصدنى ما مخلينى

وأحبك أحبك الى ما نهاية

مع عثمان حسين

لا أملك سوى أن أرفع البوست بعد ذهب للصفحة الثانية .
تحية لمبتدر البوست هذا الوفاء النادر .
أما لمحجوب سراج الذى طرب السودان كله لدرره على حناجر
إبراهيم عوض ، صلاح مصطفى ، ود البادية وعثمان حسين وكفى
فلا أقل سوى أنت خسارة كبيرة جدا أن تنتمى لوطننا الجاحد السودان .
ولا نستحق كشعب ودولة يتسمان بالفوضى والهرجلة والجحود والجوطة
أن تكن أنت بهذا الإبداع الثر والكبرياء الإنسانى جزء منا .
نحن لا نستاهل شاعرا راقى مثلك يامحجوب سراج
ويكفى :
لو بتفتكر الليالى بداوى جُرحى
لا لا لا ولا تانى ترجع الأفراح لقلبى
لا لالا
أنت واهم ياحبيبى
دى الليالى امر ليا
من دموعى الفى عينيا..
أجمل مقال عن محجوب سراج كتبه الشاعر الراقى جدا المهاجر يحيى فضل الله منشور تسعين القرن الماضى
فى أكثر من صحيفة إعترف فيه يحى أنه إلتقاه لأول مرة فى قهوة بموقف السبيل القديم (جنوب البوستة ) أم درمان أعتاد يحى أن يشرب فيها
عند الضحى (جبنة بالجنزبيل ) وقد تحدث لبرهة مع محجوب سراج الذى كان هائما فى دنيا من الخيال
وقد ختم محجوب سراج حواره العفوى السريع مع يحى حين حاول يحيى فضل الله جرجرته للونسة بجملة بالإنجليزى
وصف فيها هذا الزمن انه زمن ممل !!!
فعلا يامحجوب هذا زمن ممل جدا وأنت تعانى رغم أنك منحتنا فرح وجمال عبر حناجر ناس عثمان حسين .
مجددا تحية لصاحب البوست ويابكرى مثل هذا البوست مكانه أعلى المنبر لربع كامل .

أخانا أحمد الأمين

تحايا وتقدير ليك
ومشكور ياخ على المؤازرة
والوقفة معانا عشان محجوب

محجوب عمره ما اشتكى ولا تذمر على الرغم من المعاناة فى كل شى تقريبا فى حياته
معاناة كتيرة عليه، زى ما هو كتير علينا
وفعلا فى احيان كتيرة بنحس نحن السودانيين بانه فى اشياء ما كنا بنستحقها ونستكترها على روحنا
لأننا ما حافظنا عليها ولا اديناها قيمتها ومعناها الحقيقى

عرفت برضو انه ناس اروقة حيكرمو الأستاذ الفنان والملحن السنى الضوى
النصف التانى من ثنائى العاصمة بعد وفاة المرحوم إبراهيم أبودية، او التلت التالت من ثلاثى العاصمة
ايام ما كان معاهم المرحوم المطرب الجميل محمد الحويج

ومن الصدف يكون السنى الضوى واحد من اوائل الناس اللحنو نصوص شعرية لمحجوب
السنى هو ملحن الجرح الأبيض، وكان هو ومحجوب زملاء عمل فى شركة النور او الإدارة المركزية زى بقى اسمها لاحقا

فيا ريت وبحكم المصادفة المناسبة دى، نشوف تكريم زى ما قلت، ولو على هامش تكريم السنى الضوى
وإن كان محجوب يستحق يكرم لوحده وفى وعلى افضل المستويات
لكن من غرائب ناسنا المحزنة برضو، عدم الاهتمام الحقيقى بالشعراء وبالملحنين برضو، والتركيز فقط على المغنى المؤدى
وتجاهل او انقاص قدر وقيمة الشاعر والملحن مع انه ديل فى نظرى هم اساس اى عمل فنى غنائى، او لو جينا للإنصاف، فعلى الأقل مفروض يتساوى التلاتة فى الحقوق

احيك مجددا يا أحمد الأمين

وعشمنا كبير اننا نشوف ونسعد ونفرح بتكريم محجوب سراج

على أمل العون والمساعدة

فى إيصال المناشدة للقائمين على أمر أروقة

وللأستاذ السموأل على وجه الخصوص

هذا خيط غريب... اجتمعت فيه اساطين الغربة ..وطوبى للغرباء في هذا الزمن العنيد..
سيدنا محجوب سراج..
و اصدقائي..الهايفين ولاد اللزينا ، من تقتلهم الرهافة...ولا يكتمل ميزها عندهم الإ بالمعراج في سموات كلمات محجوب سراج..
اساتذتي و اصدقائي... السمحين..
استاذي احمد الأمين..
صديقي ابوذر..
صديقي عبد الله حرسم..
وصديقي محجوب سراج..رجل ارتل كلماته الشجية في سموات و افاق ، لو علم مداها لنهض اليوم ، مثل الفينق..و غنا مرات و مرات...!!
عجبت لهذا التوافق العجيب الحزين يا احمد و ابوذر و حرسم... سنوات تفوق العشر من حياتي..و انا انام ، بعد منتصف الليل على اناجيل كلمات محجوب سراج..!!.. ليه بتسأل عني تاني...!!!
تحية لمحجوب..و الشاعر اكثر ما يفرحه ان تنتشر كلماته عبر المدى (زمان و مسافة) و انا اسمع محجوب في حوافي جبال الروكي في الغرب من نورث امريكا.. فهل هذا وحده يكفي؟..
اخونا سمؤأل خلف الله القريش.. ياخي بحق ميضنة جامع ابهل ، وبحق حاجات كثيرة لا تعرفها ، و ستندهش لو عرفتها.. اعمل حاجة يا صديق..!!!



التحية للشاعر القامة محجوب سراج...!!

كبر

بعض من تراتيل الليجند السوداني العظيم... استاذنا محجوب سراج..
هذى تراتيل ، كنت من حماقة ، يوما ، سأقتل فيها بت عمي...
التحية لها اينما كانت ، وكيفما كانت.. فهي لن تصدق ..و التحية لمحجوب سراج..و التحية لصلاح مصطفى ، و هو الأهر ليجند..لسمع حكاوي معجبيه و معجباته لم انتهي به الحال مجرد مؤذن في جامعة الحركة بام درمان...و كلو نعمة بالله..!!





كبر

عشنا..زماننا الملعون..على (لمسة)...و (طريق جنة)..
و من عجب ، أن المواطن السوداني عمر البشير ، فنانو المفضل هو استاذنا عثمان حسين.. أي و الله عثمان حسين الذي تغني بترايل سيدنا محجوب سراج..و عمر البشير لا يدري..و لن يدري..!!



كبر

و قبل ال البيت,,قبل اولاد البيت... قبل معاذ و طه سليمان ، طه الضرس,,, كان صلاح ابن البادية..و قبله كان محمجوب سراج...!!

الجرح الأبيض,,, و لم يكن الجرح ابيضا الإ في خيال محجوب سراج..!!!



لو نعيم الدنيا عندك..
احرميني..
او
جحيم الآخرة مللك... عذبيني...!!!

كبر

ان ما تصرفه دولة جمهورية ام سودان.. ربع ما تصرفه تلك الدويلة العجيبة الغريبة في اعتقال الصادق المهدي.. ان ربع ما تصرفه تلك الدويلة الغريبة الحزينة في اعتقال فر، هو يكفي لحياة فرد اخر..!!
محجوب سراج اهم ، عند الطيبين و الطيبات من سيدنا الإمام الصادق المهدي...!!
لأن السياسي واقع عابر ، و الشاعر وجدان ، والوجدان هو ما يبقي..الأمة ستذكر شاعر ليه بتسأل عني تاني .. اكتر من تذكر الصادق المهدي..!!!!




كبر

راس الدولة في جمهورية السودان ، عمر البشير ـ يسمع عثمان حسين...و عثمان حسين غني احبك احبك الى ما لانهاية..وهي غنية سمعتها في ضواحي بعيدة خلاص...هي غنية من كلمات سيدنا الشاعر محجوب سراج....!!!



يا ريس ، تجيب زحل ولا تجيب منو كده ما عارف..محجوب هو الأصل.ز هو الوجدان الحزين.. هو التأريخ الذي نهرب منه..و تهرب منه انتا شخصيا...!!

تكلفة اعتقال الوهم الصادق المهدي.. ربعها فقط يكفي لخلاص حياة شاعر مثل محجوب سراج..!!!!


كبر

(*)

كتر خيرك يا البلال

اروى معانا حوض كوراكنا
واسقى يباس الحس الناشف

لعل وعسى يسمعونا

صديقي المطر...
كل حزن و انت بخير...!!
لا يهم يا صديقي... كلو لا يهم.. فقط المهم... ان تكون انت بخير و طيب..!!

سلامات يا زول يا طيب...
صدقني هو الحزن ، ذلك المتوارب الغافل ، الذي يأتينا بغتة..!!
خارج المنطق و التبرير ، يا صديقي اهديك ، بشرى سليمان ... كائن كان يمشى بيننا في هذ ي الدروب ثم اختفى,...!!!
لك و لصديقنا محجوب سليمان..هدية.. غريبة..و ستمصضى غريبة...!!

دمت طيب يا ابا ذر يا مطر نادر..و كأنه مطر الكبريت الأحمر... و الكبريت الأحمر روح لايعرف معانيها الإقلة..ليتنا نكون منهم... ليتنا نكون منهم...!!!

كبر

التحية لأستاذنا و صديقنا.. دكتور بشرى سليمان ، و كان عضو في هذا المنتدى..!!!

كبر

محجوب يا محمد النور
كان بلز فى الناس على نعيم الدنيا
ويقعد هو ويصنقر فى الجحيم

وزى ما بقول اهلنا

البكا للزول شن فرجو ؟

نحن ما دايرين ننوح ونبكى ونصيح
ونقعد نصقع فى جدرة الاحزان

اهم شى كوراكنا ده يصل للناس

الناس القادرين الهميمين
الناس الليدن طايله
الناس الماسكين القلم وممكن يكتبو قولة هاك

ون شاء الله كمان نلقى النوع البعد ما يقول هاك

يقول

اقيف النزيدك

دايرين حسنا يسمع اخانا السموأل

والسموأل والله يا كبر كان عرف ما بسكت ولا بقيف

اسالنى منه أنا

يمين بالله من حقو بدى ويناول

بس كيف نصل ليهو ؟

عثمان حسين ؟

لما تقول عثمان حسين يا كبر
مباشرة بجى قدامك بازرعة

ثنائية ادهشت الزمان واطربت المكان وخدرت الوجدان

وبالرغم من كده
بازرعة برضو يعانى الأمرين

سنين العمر دخلت فى العضم
ووحشة الخلان وجفوة الحبان ببقو رفاق دائمين فى الحالات دى

سيدنا الرئيس ما سمع ب عيا بازرعة ؟

لكن الحمد لى سيد الحمد
بازرعة على الأقل عنده البسنده
ويدعم وقوفه فى وش الريح وزمهرير شتاء الوحدة والمرض المرير

إلا محجوب المسكين

ما ليه غير الله

والله كريم ورحيم

كبر الكبير

ويا بِكر اخوانو فى السماحة

طعم ونكهة وريحة محجوب الطاقه بتملأ الفجه نداوة وشجن
تلقاها فايحه فى كل فجه هناك فى البلد

زول متلبب الراديو فى أمسية صيفية هادئه وصديقة
ويسمع ويشرب فى كلام محجوب

ما بغيرنى صدودك عنى

يتأوه ويتوجع مع المغنى
وبى تحت تحت بشكر فى الزول ال عبر نيابة عنه

وما عارف انه زوله ده راقد فى مكان ما
يعاين ببصر روحه للسماء ويتم ليه الكلام وهو بسأل

كيف اتحمل
ليل وهجير ؟

ليل من ليل يفرق
وهجير من هجير بختلف

وزول تانى يتملى جسارة وشجاعة وجرأة
ويناضم النسوهو

ليه بتسأل عنى تانى
بعد ما شلت الأمانى وخنتها وسليت روحها

وبرضو فى سره بكون ممتن وشاكر للشاعر

والشاعر المسكين هناك

ما عنده امنيه غير انه يضمن كسرة باكر

سمعنا والله يا كبر
سمعنا وشفنا كتير ضنك الناس ومكابدة ضيق ذات اليد وذات الروح
ومعافرة شظف الأمنيات والأحلام، وقسوة الواقع

لكن زى العند محجوب كتير وشديد

شديد لدرجة انك تقنع من خيرا فى هذه الدنيا الغريبة

الزى محجوب مفروض يكون هسه مدلع ومدلل ومنعم

وبطران فى عديله

وأى زول بكون عنده سهم فى واجب الدلع والتدليل ده

لأنه محجوب عنده سهم طرب وتعبير فى روح أى زول

إلا نقول شنو ؟

والله ما بنخليه براهو تانى

عشان ما بستاهل يكون براهو

والله كان نقسم طرقة الكسرة معاهو

ما بنخليهو

لا أملك سوى رفع البوست
ويابكرى محجوب سراج وزنه فى ذاكرة التأريخ والحضارة والوجدان
أثقل من كل ساسة السودان المعارضين والحاكمين
ثق غدا حين تراكم السيول فى مجرى واحد ويتم تدوين
التأريخ سوف يكون كل ساسة هذا العصر أنهم عاشوا فى عصر محجوب سراج
مثلما عاش سيف الدولة فى عصر المتنبى وعاشت إليزابيث فى عصر شكسبير
الذى أعترف شرشل نفسه أن كل مستعمرات وطنه لاتعادل سطرا من مسرحياته
هل يتكرم بكرى أبوبكر (رغم أن العصر عصر سياسة ومحاكم تفتيش وفضائح )
ان يرفع هذا البوست ولو برهة قليلة ( حسب مصطلح عبيد عبدالرحمن )
ونتحدى أى سودانى قدديم إن لم يكن رقص وثمل حين سمع نبض محجوب سراج
عند إبى خليل و ود البادية و صلاح مصطفى وعثمان حسين و ثنائى العاصمة
مع التنبيه أن موهبة سنى الضوى اللحنية فجرها شعر محجوب سراج (حسب شهادته)
محجوب سراج غالى جدا فى ميزان التأريخ حين يتم تدوينه غدا
وسيننسى كل الساسة لكن نذكر محجوب سراج الذى جمعنا على :
لو نعيم الدنيا عندك احرمينى
و
راخصنى ما مغلينى
و
أحبك احبك
وجل درر صلاح مصطفى ..
تحية لمبتدر البوست مجددا
وتحية للأخ المحترم كبر وقد شهد علنا لمحجوب سراج عبر أكثر من مداخلة حرى بكل منها ان تكون بوستا منفصلا
مجددا لا أملك سوى رفع البوست .

يا أحمد الأمين

والله ماك مشحود

وكلنا زيك تماما

والكلام بمرق من بين الغبينة والفرحة

مدفور بى الدين الفى رقبانا ومحقوقين بيه لى محجوب
وقبل ده وبعده
نابع من سرف ريدتنا ليه
وجارى مع رهد تقديرنا واعزازنا

وفخرنا الشديد كمان بالمحجوب

كتر خيرك ياخ
انت ومعاك حبيبنا محمد النور الكبير

كلنا نشيل حمل المحبة ونحوم بيه فرقان الناس الطيبين
البعرفو قيمة الشى ومعناه العالى

ومحجوب أعلى مننا كلنا

وبقدرة واحد احد ما نقيف
لغاية ما نصل بابه

وندخل عليهو بكراع الروح اليمين

قول آمين

تقاسى لهيبك يا محجوب

ومهما يصيبك

عارفنك صامد وصابر

برغم كل القسوة الفى دنيتنا

وعارفنك مظلوم

الله كريم عليك

محجوب سراج يستحق ويستحق ويستحق

لا نقول اكثر من كثيرين كرموا ..

ولكنه مبدع مبدع مبدع

قدم الكثير

ويعاني في صمت

معا لتكريم الاستاذ محجوب سراج

شكرا أخانا ياسر

على دعمك ووقفتك معانا من أجل المحجوب السراج

وعشمنا فى الله قوى

يا ريت أى زول عنده صله ب أروقه أو اتصال بأخينا السموؤال على وجه الخصوص
يوصل مناشدتنا وتمنينا ليهم