Post: #1
Title: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: محمد حيدر المشرف
Date: 05-14-2014, 01:17 PM
أجزم أن أمدرمان أطيب مدينة في العالم .. وحتى معانى الجهوية فيها حميدة .. وأقسم أنها لولا تفاصيل الوطن الشائهة لكانت التمثيل الأمثل للسودان .. وما نقموا منها الا لفرادتها وتميزها وامكاناتها المكتسبة بالتكوين .. ما من جهة في السودان او قبيلة الا وكانت حاضرة في تفاصيل مدهشاتها الكثيرة وحواريها الأليفة وزقاقاتها الداكنة الحنان ..
وسينقم من حديثي هذا الكثيرون .. وهذه النقمة عليها عادت مؤذية جدا .. لذلك عاد أهلها يتحاشون مسببات هذه النقمة .. ولعل حسين خوجلى ودونما شك أكثر الذين يتسببون بالنقمة على أمدرمان .. فالرجل كثير التبجح بامدرمان, والرجل مثير للكراهية ومكانه -في هذا المضمار- المقدمة ..ربما يسبقه بقليل اسحق فضل الله والطيب مصطفى وساء أولئك رفيقا !!..
بالأمس إنتزع من حكايات أمدرمان الكثيرة ذات المضامين الإنسانية الرفيعة حكاية قبيحة المعاني و مفارقة تماما لروح التعايش وأسلوب الحياة الأمدرمانية في وداعتها وبساطة أهلها وتواضعهم الجم وثقافتهم العالية .. والأدهي من ذلك أن الحكاية من سوق أمدرمان .. سوقٌ باطنة الإلفة وظاهره من قبله الجمال .. جمال النفوس وجمال المكان .. من العدني والمحطة الوسطى والبوسته مرورا بسوق الدهب وسوق الجلود والزنكي وسوق العناقريب ويمتد لما بعد ذلك وحتى تخوم حي العرب ..
لم ينتزع حسين خوجلى من الإرث العظيم من حكاوي امدرمان الا حكاية تتبدى فيها الغلظة والكبر والجبروت لاحد التجار وهو ينتهر رجلا فقيرا بأن (يتكلم قدر قروشو) !! أي والله ؟!! .. وأسبغ حسين على هذه الجملة المقيته أوصاف الحكمة الامدرمانية الاصيلة ؟!!! يا الله يا الله !! .. اهذه هي امدرمان يا حسين خوجلي ؟!!
لا نشكك في صدق الحكاية فقد تكون .. فما كانت أمدرمان بدعة في الإنسانية كي تخلو من المتجبرين أصحاب الغلظة والقبح الإنساني والدمامة والدمامل النفسية الشائهة .. الا أن استخلاص مثل هذه الدمامل ومن ثم تنصيبها كأجمل تعبير عن ذلك المحيط العامر بالمودة والالفة والرحمة بين الناس .. ما هو الا تعبير حقيقي عن حسين خوجلى لا أمدرمان .. وأمدرمان بريئة تماما من خيالات حسين حول الحكمة والإنسانية والمعاني الجميلة ..فهي عند الكثير أطهر وأطيب من هذه الخيالات المريعة ..
فحقو يا حسين تتكلم على قدر كوزنتك .. أنت فيها أكثر أصالة بكثير من انتماءك للأمدرمان التي تعد فيها مثل هذه الحكاية سيئة من السيئات, لا أكثر ولا أقل !!
|
Post: #2
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: عبد المجيد محمد
Date: 05-14-2014, 07:11 PM
Parent: #1
| Quote: من العدني والمحطة الوسطى والبوسته مرورا بسوق الدهب وسوق الجلود والزنكي وسوق العناقريب ويمتد لما بعد ذلك وحتى تخوم حي العرب .. |
اثرت في شجونا كنت أكتمها ...... يا سلام يا حبيبنا ياخ والله لمن دمعتى جرت
أما حسين خوجلى دا ف سيبك منو
|
Post: #3
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: ibrahim alnimma
Date: 05-14-2014, 07:38 PM
Parent: #2
ثفافة راس المال يا صديقي اكثر تاثيراً علي خوجلي ........فلا بد ان يستدعي من باطن الجمال ما يناسب ثقافة الاستعلاء المالي وتغليب قدر اتحدث قدر قروشك .......الومك علي حسن الظن علي اناس يفوقون سوء الظن ........
تحياتي يا دكتور
|
Post: #4
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: محمد البشرى الخضر
Date: 05-14-2014, 07:49 PM
Parent: #3
يا دكتور ما تليّسها في كوزنته, دا كود أولاد قلبها :)
|
Post: #5
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: محمد حيدر المشرف
Date: 05-14-2014, 08:17 PM
Parent: #1
ياااا عبدالمجيد ..
بإمدرمان تنزل الوحي باشراقة على التجاني يوسف البشير .. وكتب خليل فرح ماهو عارف قدمو المفارق .. وأبدع شعراء الحقيبة حقيبتهم من لدن ابوصلاح "يا بدور القلعة" لي الغصن الرطيب للبنا .. وبعيدا عنها كتب العبادي يا عازة الفراق بي ..وفي حواريها أنشد كرومة يا جوهر صدر المحافل ... والى آخر تلك المشاهد العظيمة .. لينتقي حسين خوجلي من دون ذلك الجمال الإنساني النادر عبارة ( أتكلم على قدر قروشك)!!
شفت ليك فداحة كهذه يا مجيد ؟!!
مودتي
|
Post: #6
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: نصر الدين عثمان
Date: 05-14-2014, 09:06 PM
Parent: #5
دكتور المشرف تحياتي ومشتاقون،
كنت قد تداخلت معك في بوست سابق كان يدور حول قابلية برنامج (مع حسين) للمشاهدة..
قلت فيها انا - وقتها-انه برغم كوزنة حسين وإسهاماته الباذخة وصحيفته ( ألوان) في وأد تجربة ديمقراطيتنا الثالثة ( الخديجة).. الا انني أصدقه في هبته الأخيرة تلك!؟
و.....
وها انت تتيح لي تلك السانحة ثانية لأعلن هنا بأنني وقتها قد كنت غريراً وساذجاً وفي شهادتي تلك..
......
حاشية:
تصدق - حسب ظني بالطبع - منافحاتك المريخية الأخيرة ما لايقة عليك!؟
|
Post: #7
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: سيف اليزل الماحي
Date: 05-15-2014, 08:20 AM
Parent: #6
.
اولاد امدرمان مشكلتكم مع حسين خوجلي مشكلة كبيرة، شابكنا نحنا ناس امدرمان .. نحنا ناس امدرمان بالله تقول حفر ليكم خور ابوعنجة!
طبعا الخرطوم دي ما بقدر يندرع فيها اصلا، لاعرفناهو في سان جيمس ولا شفناهو طالع كبري الحرية.
.
|
Post: #8
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: ياسر منصور عثمان
Date: 05-15-2014, 08:32 AM
Parent: #1
يا المشرف ود المشرف
امثال حسين خوجلي يمكنهم تشويه كل جميل وجعله قبيحا فما بالك بحبيبتنا امدرمان.؟؟
لم اسمع هذا الحسين يستدل بشخص حي او معلوم..
فهو دائماً ما يستدل بالموتى او بحدثني (واحد صاحبنا)
دعك منه ودعه يتمرغ في وحل ادعاءاته..
مع ودي
|
Post: #9
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: Salah Musa
Date: 05-15-2014, 08:47 AM
Parent: #8
ابو الزمل دكتور المشرف
أمثال حسين خوجلي هذا لا يستحق ان تهدر فيهو مداد قلمك فهو زول موهوم عليك الله شفت ليك زول امدرماني كوز لا وكلا
لك ودي
|
Post: #10
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: El-Saddig Abdalla Abbas
Date: 05-15-2014, 09:55 AM
Parent: #1
يا ود المشرف
سلام وتحية طيبة
صدقت في ما قلت بأن أم درمان رغم أنف الكثيرين والزمن تمثل لوحة جميلة لسودان خالي من الجهوية والقبلية السالبة لما عاشته وتعيشه أحياءها التي نشأنا وترعرعنا فيها وسمعنا حكاويها من كبارنا.
وبالذات حكاية مثل التي أوردها حسين خوجلي كحكمة أم درمانية، حاشا وكلا أن تكون كذلك، والشواهد على مجانبتها الحقيقة كثيرة ولا تعد ومن واقع معاش ومشاهد.
فلك التحية والاحترام
وأنا كنت في البدء مثل الأخ نصر الدين عثمان (مخموم) في ود خوجلي دا و (حسبتها) وثبة منه يداري بها سوءاته القديمة (انتصاره للإنقاذ في اغتصابها للسلطة وكونه شيطاناً أخرس عن قول الحق طوال حكمها الجائر للبلد)، ولكن شيئاً فشيئاً تبين لي أن برنامجه هذا ينطوي على حيلة شيطانية أخرى يراد بها إيصال رسائل كثيرة بغطاء المكاشفة وهو ليس كذلك وإنما دس للسم في الدسم كما يقال، وبالذات في شهاداته للتاريخ تجده يسرد الكثير من الحقائق ولكن يورد في وسطها أكاذيب مضللة ورسائل سامة قد لا ينتبه لها الكثيرون.
عذراً للإطالة ولكن الموضوع (حارقني) شديد
|
Post: #11
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: ismeil abbas
Date: 05-15-2014, 10:38 AM
Parent: #10
يا سلام يا ود المشرف ...رغم حبى لحلقات حسين خوجلى لكن الحق حق...أم درمان لا نقبل فيها....
| Quote: من العدني والمحطة الوسطى والبوسته مرورا بسوق الدهب وسوق الجلود والزنكي وسوق العناقريب ويمتد لما بعد ذلك وحتى تخوم حي العرب .. |
الملجة يا جماعة..نسيتوها....أبومرين...حاجات كثيرة تثير الشجون وتتعب القلب المحب...
|
Post: #12
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: اخلاص عبدالرحمن المشرف
Date: 05-15-2014, 11:26 AM
Parent: #11
محمد الحسن السلام لك ولجميع المتداخلين تجربة الاخوان في الحكم فشلت في مصر والسودان وكان لا بد من محاولة = اصلاح للمواصله في حكم البقرة الحلوب = وما دروا ان الخطأ في الفكر والمنهاج ويكفي ما فاله المرحوم يس عمر الامام . المشكلة هي غياب الاليات اللازمه لازالة حكمهم = النقابات كسروها واقاموا اجسام موازيه الخدمة المدنيه كلها عملوا لها احلال وابدال المجتمع المدني حتي الهلال والمريخ استولوا عليه = وبقي نحن وشطارتنا في الكفاح وانجاح الثورة ولم البلد علي اسس جديدة
|
Post: #13
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: الزبير بشير
Date: 05-15-2014, 11:36 AM
Parent: #12
هو السودان ده كلو ما امدرمان ، اذا كانت الحكايه تباين و اعراق
لاخمننا ام درمان ام درمان
بعدين هي ام درمان دي بت متين كلها مسميه علي ناس المهديه و البقيه ثوره اكتوبر و ثوره مايو
تصدق لما اشوف ناس بتكلمو عن ام درمان في التلفزيون ، طوالي بحول القناه ، و بالع لي حبه ضغط
بلا ام درمان بلا وهم معاكم
هي بتنتج قطن وله صمغ عربي و له بلح و مواشي
ما طمباره مع الصعاليك و المغنوتيه
فكونا من وهم ام درمان
|
Post: #15
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: اخلاص عبدالرحمن المشرف
Date: 05-15-2014, 11:59 AM
Parent: #13
يا الزبير تاريخ الخرطوم قديم قبل سيدنا موسي = مقرن البحرين = وظلت محتفظه باسم المقرن وما في مقرن غيره , ناس العراق عندهم القرنه , والحفريات في منطقه مستشفي الخرطوم وسوبا تدل علي حضارة فديمه , كرهنا لفخر بعض اولاد ام درمان بمدينتهم ما يعمينا عن عراقة بلدنا
|
Post: #14
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: ياسر منصور عثمان
Date: 05-15-2014, 11:47 AM
Parent: #1
الزبير بشير
ما هكذا تورد الابل..
ولو كان لك رأي في امدرمان واهلها فلا تستخدم هذه الالفاظ السوقية...
مع ودي
|
Post: #16
Title: Re: شهادة إبراء ذمة لأمدرمان .. او اتكلم قدر كوزنتك يا حسين خوجلي !!
Author: ismeil abbas
Date: 05-15-2014, 12:08 PM
Parent: #14
[QUOTE]تصدق لما اشوف ناس بتكلمو عن ام درمان في التلفزيون ، طوالي بحول القناه ، و بالع لي حبه ضغط
بلا ام درمان بلا وهم معاكم |
ألأخ/الزبير السلام عليكم........أنا غايتو بصدقك طوالى ما دام قلت أم درمان وهم.......
ألأماكن تشكل فينا الكثير وحبها مربوط بالعزة والفخر وكل يعتز بمكانه...إحترامى وتقديرى
|