أعطني حرية أعطك وطن

الحلول الاقتصادية أسهل ما يكون
أحكم بالعدل بين الناس
مافي خيار وفقوس، الناس كلهم واحد
القضاء ما ليه علاقة بأي شيء تانية
لا جهاز أمن لا رئاسة جمهورية يقدروا يأثروا فيه
أقض على الفساد، أوقف اللصوص، من النشال لي الوالي الفاسد
كتروا جداً ولابد من قانون رادع لإيقافهم عند حدهم
سنة سنتين بعدين تفتش على حرامي واحد ما بتلقاهو
كن صارماً مع المسئولين، الأقربين أولى بهذه الصرامة

حقق العدل والأمن أولاً
وبعد دا دربك مرق

أمنح الناس حرية (حدها السماء)
أنطلق عريان، بس خلي الناس يفرزوك من البهايم،
قول ما شئت بس ما تتعدى على زول
أفعل ما شئت بس ما تتفلت فوق الناس، ما عندك شغلة بي زول
الوطن ببقى أحسن مكان في الدنيا ،
مثلما كان في السابق

الحلول الاقتصادية أبسط ما يكون، جدنا كرداش - يكاد يكون أمي - خلق مجتمع منتج ومكتفي اقتصادياً لا يحتاج المدينة، إلا في حالة أرسلوا ولادهم للجامعة
خلي الناس يكون همهم العمل ، مش الشمارات وقعاد الضللة ومساككة البنوت في الشوارع
لو كل زول لقى مصدر دخل قابل للنمو تاني ما بشتغل بالفارغة
ولا بتكون في حرب وكتال
بالعكس الزول المستفيد اقتصادياً سوف يكون أحرص الناس على الاستقرار
افتح للناس نافذة للتصدير
البجيك شايلو بيضة جدادة داير يصدرا، مفروض المسئولين كلهم يقيفوا على عنقرة كــلــب حتى تجد هذه البيضة طريقها للسوق الخارجي
باتفاقيات ثنائية مع البلاد المجاورة يمكنك أن تدر على البلاد عملة حرة تكفيك شر الفاقة وسؤال القطريين
أعمل على السياحة
أيوا، الدولار البجيك من السياحة بجيك بارد
بنية تحتية بتعملا مرة واحدة في العمر وبعد داك بتبدأ البقرة تحلب تنتج
وقربة العسل تنقد قبل حلقك

الأوضاع الحالية كلها تؤدي إلى نفق، النفق ذاتو ضيق ومسدود من قدام
أن تعمل أوووب
أن تقعد عاطل أوووبين
تتزوج وقعت وقعة فيل
تطلق الرماد كالك كيلة حماد الشهيرة

عبدالحافظ شاب في حلتنا، شفاه الله، أظنه تعافى الآن
جاء من السعودية، قعد في الحلة، إتفن في الواطة دي مع أهلو
عمل بزنس يحسد عليه
ببساطة، عمل دكان كبير وفر فيه كل ما يحتاج إليه أهله من زيت وسكر وشاي وبن ودواء بن
شوية عدس وبقوليات وهكذا
لو عندك أرض ما قدرت تزرعا للأسباب الكتيرة ديك ، بجي يأجر منك الأرض الفدان بمبلغ معلوم في السنة، إنت لو داير تزرع شيل طوريتك وواسوقك واندلى على التحتانية، وأكرب جريدتك، كل مزارع عندو دفتر جرورة في الدكان
كل ما يحتاج إليه أولادك أمش شيلو، ما بسألك من قروش
لامن يجي الحصاد أحصد
لك الخيار أن تبيع محصولك له بسعر السوق، أو توديه السوق تبيعه وتمشي تشوف دفترك فيه كم وتسدد
إن بقى ديونك كانت أكتر من قيمة حصادك، مافي مشكلة
أمش أزرع تاني والله بوفقك تحل ديونك وتوفر
وبالطريقة دي الناس استفادوا وهو استفاد والمجتمع والسوق ذاتو استفاد بدخول إنتاج يساهم في تخفيف الأسعار على الناس..
التجربة دي ممكن تعمم على القرى، فيها دافع للإنتاج وفيها طمأنينة للمزارعين وراحة بال واستقرار للناس وللسوق

عمنا العوض ود العطا
مثال للنزاهة والشفافية
مسك جمعية قوز الحلق التعاونية وهي جمعية فقيرة، الآن هذه الجمعية ميزانيتها ماشاء الله
أعطوه ثلث الأرباح
استطاع تنمية أصول ورأسمال الجمعية بطريقة مذهلة، وشغال بنفس استراتيجية عبدالحافظ أو الحقيقة عبدالحافظ هو الأخد منه الفكرة
وصل مرحلة إنه قال لي ناس الحلة: الثلث دا كتير علي، جيبوا لي ولدين يشتغلوا معاي يساعدوني، ويدخلوا معاي في التلت دا
ناس الحلة قالوا ليه انت اختار الشباب البنفعوا معاك
اختار ولدين من الحلة
شغالين معاه الآن، ولم يكلف الجمعية دفع رواتبهم بل قاسمهم في نصيبه
واستطاع أن يصرف شئون الحلة بكفاءة ونزاهة وعدالة مبالغ فيها، ما عندو خيار وفقوس وما بتخذ قرار بدون ما يشاور الناس ولكن قراراته كلها صائبة، ومبتكرة، حتى قرار الزراعة، يعني نزرع شنو السنة دي
ماشاء الله الراجل ما متعلم تعليماً يقولوا عليه، لكنه ذكي وشجاع ومبادر

Quote: ياناس اقسم انو السودان ده لو ادارو زول اغبش ساي،،، حساب وفالح وصدوق والعالم كلو سواهو صديق اكنا علي باب خير... بلد فيها ملايين الافدنة عالية الخصوبة وانهارا وامطارا ومياه جوفيه ناكل في العيش من بيت النمل والفاو دي عطشانة ويركبون عربات مليارية وقطعة ارض بمليارات الناس ديل الا شغالين دجل وتنزيل بلد واقفة تج غنيانة تب بي رحمة الله وصرمانة بايد حكامها وساداتها ويا رحيم الطف باطفالها ومرضاها وجياعها فلا احد يهتم لالمهم...

مداخلة عبدالعزيز في بوسته