Post: #1
Title: وبعدين؟!
Author: مريم بنت الحسين
Date: 05-13-2014, 03:47 PM
Parent: #0
كل يوم المعارضة بتطلع دلائل وبراهين انه الحكومة دي فااااااااااااااسدة، لدرجة اننا بقينيا ما بنتعجّب، وناس الحكومة زاتهم بقوا ما بنكروا... اها طيب؟ عرفنا... الحكومة كعبة... فاسدة... أكلت البلد وقسّمته وقاعده تبيع فيه كوم كوم... الحل شنو؟ لعنا الظلام لما قلنا كفى... الحل شنو يا اخوانا؟
|
Post: #2
Title: Re: وبعدين؟!
Author: ismeil abbas
Date: 05-13-2014, 03:54 PM
Parent: #1
السلام عليكم أخت مريم..وأسرتك الكريمة....
ده سؤال دائر فى رأسى له زمن.....مافى حل إذا كان المعارضة مختلفة والشعب كلما مرة تزيد عليه البلاوى......
والمنابر المطروحة أعضاؤها متناحرة.....نسأل الله الحل من فوق....إحترامى وتقديرى.
|
Post: #3
Title: Re: وبعدين؟!
Author: Abu Baker Ahmed Abdel Rahman
Date: 05-13-2014, 03:59 PM
Parent: #1
ولا خلينا حيلة
المعارضة لم ولن تفعل شيئا
بعدين فساد الحكومة مادائر ليهو زول يمرقو براهم ناس غسان بمرقو وناس الطيب مصطفى وسبدرات
| Quote: يمر بتجربة حكم جماعة الهوس الدينى .. وسوف تكون تجربة مفيدة للغاية – إذ إنها بلا شك سوف تكشف مدى زيف شعارات هذه الجماعة ..وسوف تسيطر هذه الجماعة على السودان سياسيا واقتصاديا حتى لو بالوسائل العسكرية – وسوف تزيق الشعب الأمرين . وسوف يدخلون البلاد فى فتنة تحيل نهارها إلي ليل – وسوف تنتهى بهم فيما بينهم – وسوف يقتلعون من ارض السودان إقتلاعاً .) منقول |
قرررررررررررربت: قولى امين
|
Post: #4
Title: Re: وبعدين؟!
Author: ولياب
Date: 05-13-2014, 04:10 PM
Parent: #3
| Quote: الحل شنو يا اخوانا؟ |
مع التحية لك يا أخت مريم
بس ننتظر فرج الله ،
الزول العيان وحالتو لمن تكون ميئوسة بس ينتظر ساعة الأجل ، بس المصيبة تنتهى ساعة الأجل وننتظر بعد سنوات إنتهاء أجل آخر وهكذا تسير بنا الحياة ، اليوم تذهب حكومة وتأتي حكومة جديدة وتظل لعبة الكراسي ونحن نفتح أفواهنا من حدة الدهشة في متابعة اللعبة .
أخير الواحد يريح دماغو ونرتاح من الفقلة الما ليها نهاية .
|
Post: #5
Title: Re: وبعدين؟!
Author: معاوية الزبير
Date: 05-13-2014, 04:42 PM
Parent: #4
إن المحنة التي أدخل الكيزان فيها هذا البلد، وبالرغم من كارثيتها، إلا أنها فرصة للسودانيين
للجلوس في الواطة والتفكير مليا في مسارهم عبر التاريخ الحديث وما الذي أوصلهم إلى هذا الحال
التفكير في عاداتهم الاجتماعية واختلاطها بسلوكهم القيادي سواء مجتمعيا أو سياسيا أو خلافه
لا بد أن يكون لهذه المحنة الوطنية من جذور اجتماعية في التاريخ
إذ لا يمكن أن يحدث ما حدث ويحدث، هكذا من الفراغ
أعني بما يحدث جبروت الحاكمين وعبثيتهم ولا مبالاتهم
وأعني أيضا سلبية الشعب واستسلامه غير المبررين
المسألة أعظم من معارضة عاجزة
السودان لا يحتاج إلى قادة سياسيين (فهؤلاء يمكن أن يحل محلهم شباب مواكبين عند اللزوم)
السودان يحتاج إلى مصلحين اجتماعيين وباحثين في التاريخ لتشخيص حالة الشعب السوداني
ومن ثم وصف العلاج
دمتي بخير يا بت الحسين
|
Post: #6
Title: Re: وبعدين؟!
Author: عاطف عمر
Date: 05-13-2014, 06:55 PM
Parent: #1
تحياتي وسلامات عزيزتنا مريم
| Quote: كل يوم المعارضة بتطلع دلائل وبراهين انه الحكومة دي فااااااااااااااسدة، لدرجة اننا بقينيا ما بنتعجّب، وناس الحكومة زاتهم بقوا ما بنكروا... اها طيب؟ عرفنا... الحكومة كعبة... فاسدة... أكلت البلد وقسّمته وقاعده تبيع فيه كوم كوم... الحل شنو؟ لعنا الظلام لما قلنا كفى... الحل شنو يا اخوانا؟ |
سؤال كبير
بل هو السؤال الحقيقي
لكن كى تتم الإجابة عليه يلزمنا تعريف
ما / من هى المعارضة ؟؟
أهى ( أحزاب الأمة ) ؟؟
سوف نتجاهل ( الفكة ) ونأخذ ( كبير ) أحزاب الأمة الذي يرأسه الإمام الصادق المهدي
إنه مشغول أفقياً في مناطحة الشباب من عضويته ( خالد عويس ولنا مهدي ) وصحبهم ، ومشغول في مناطحة تيار د. إبراهيم الأمين ( أمينه العام المقال ) ومشغول في التوجس والإحتياط لمجيئ ( بلدوزره القديم ) السيد مبارك الفاضل
أهى الأحزاب الإتحادية ؟؟
ومرة أخرى سوف نتجاهل ( الفكة ) ونأخذ ( كبير ) الأحزاب الإتحادية الذي يرأسه مولانا محمد عثمان الميرغني
مولانا ذات نفسو مشغول عن السودان وما ومن فيه فإقامته الدائمة خارجه
نجله عيني باردة عليه قد حير عمك جنس وأرقامه القياسية في إقامة ( مسؤول سيادي ) خارج مكان وظيفته ... ربما يزور المغتربون العاديون السودان أكثر منه
مولانا أيضاً مشغول بتكوين اللجان وإلهائها ثم تجميد قراراتها .. وتكوين لجان أخرى للبحث في....... شنو كدا ما عارف
الشاهد وباختصار أرجوه غير مخل
أنت تتساءلين عن الخطوة الرأسية
وأحبابنا مشغولون أفقياً
|
Post: #9
Title: Re: وبعدين؟!
Author: Khalid Elmahdi
Date: 05-13-2014, 07:56 PM
Parent: #6
العزيزه مريم، تحيتي لك وضيوفك الكرام..
فعلا كما عبر قبلي، هو سؤال كبير والمفروض يكون شغلنا الشاغلن خاصة وقد غيض الله لنا تجارب قريبه، ليبيا، مصر، العراق وسوريا..
لا أعتقد أن هناك بعدين؟ قبل دراسة وتحليل وضعنا الراهن.. نحن في أزمة أخلاق حقيقية، وهي ليست في فساد الكيزان أو الشرائح الطفيليه التي طفحت.. فبدون وقفه عند هذه الظاهرة ومعالجتها، ما في بعدين ولا أبلين - زي ما بيقولو جيرانا - .. وللنظر في هذه الأزمه هي ليست في فلان أو علان بقدر ما في أنا "لا يغير الله ما بقوم حتي يغييروا ما بأنفسهم" يعني المشكله فيني وفيك وفي عاطف وودالزبير وود سيداحمد ، والمعالجة تبدأ من كل منا مراقبه ومحاسبه للسلوك الشخصي .. نشر مثل هذه الثقافه تخلق من المجتمع شريحه كبيرة صالحه، تكون ايجابيه في خلق التغيير المنشود، ومراعاة لحكم القوانيين والدساتير..
أما اذا كان رأي كل منا أن الآخر هو سبب المشكله وعاطف عمر يشب في رقبة خالد، واخر يهاجم الوالي والبشير وكبر، فسنظل في هذه المتاهه لفترة أطول من يهود سيدنا موسى.. وعندنا رصيد في الثورة والتغيير أكتوبر وأبريل، لكن وبسرعه يتم التراجع وتعود حليمه لي قديمها..
مشكلتنا مشكلة أخلاق، وليس لها غير طريق النبي الكريم بوعي لاعادة صياغتها ..
|
Post: #7
Title: Re: وبعدين؟!
Author: نعمات عماد
Date: 05-13-2014, 07:40 PM
Parent: #1
| Quote: . الحل شنو؟ لعنا الظلام لما قلنا كفى... الحل شنو يا اخوانا؟ |
بما اننا كلنا خاتين يدنا خدنا ومتمحنيين وكمان لسه ما بدينا فى تطبيق
اقتراح استاذ معاوية الزبير ، الواجب تطبيقه ، اقترح نبدأ نبحث
ماذا نريد فى المستقبل ؟ و كيف نمنع الفساد ؟ حل مشاكل الاقتصاد
والتعليم و الصحة و العلاقات الخارجية والزراعة وغيره....
ربما فى وسط البحث قد تأتينا قناعات لحل واضح تهربنا منه كثيرا...
|
Post: #8
Title: Re: وبعدين؟!
Author: نعمات عماد
Date: 05-13-2014, 07:41 PM
Parent: #1
| Quote: . الحل شنو؟ لعنا الظلام لما قلنا كفى... الحل شنو يا اخوانا؟ |
بما اننا كلنا خاتين يدنا على خدنا ومتمحنيين وكمان لسه ما بدينا فى تطبيق
اقتراح استاذ معاوية الزبير ، الواجب تطبيقه ، اقترح نبدأ نبحث
ماذا نريد فى المستقبل ؟ و كيف نمنع الفساد ؟ حل مشاكل الاقتصاد
والتعليم و الصحة و العلاقات الخارجية والزراعة وغيره....
ربما فى وسط البحث قد تأتينا قناعات لحل واضح تهربنا منه كثيرا...
|
Post: #10
Title: Re: وبعدين؟!
Author: حسن الطيب يس
Date: 05-13-2014, 08:12 PM
Parent: #8
الحل شنو
نخلي الكلام و و يبدا العمل
|
Post: #11
Title: Re: وبعدين؟!
Author: Alshafea Ibrahim
Date: 05-13-2014, 08:33 PM
Parent: #10
الحل نشوف وننتظر الجماعة ديل بعد التحلل عندهم شنو ومن ثم (تدوير) نفس الأيادي المتضوية الراكعين الساجدين أصحاب المشروع الحضاري (من أجل استكمال التنمية) وهناك قرن آخر في الانتظار وربنا يكضب الشينة يامريم وضيوفها
الشفيع
|
Post: #12
Title: Re: وبعدين؟!
Author: يحي قباني
Date: 05-14-2014, 00:06 AM
Parent: #11
عارفه وين المشكله يا مريم ؟
بدايةً بسؤالك ( وبعدين ؟ )
زمان لما نحتار كنا نرد و نقول : ( كُراع جادين !!! )
حسي الناس بقت تقول ( الحاضر احسن من الدين )
و( البوسة الفي الخد احلي من العين ...)
بالمختصر المفيد ... لازم نلقي هويتنا الرايحة دي بالاول ...
|
Post: #13
Title: Re: وبعدين؟!
Author: عبدالحفيظ ابوسن
Date: 05-14-2014, 06:06 AM
Parent: #12
تحية مريم وضيوفها
فعلا وبعدين
كل حل يأتي بمعزل عن حركة الجماهير هو مؤامرة ضد الوطن
الحل بيد الناس ,, الناس العاديين ما السياسين
الناس الغالبها تعيش
الناس الحياتها بقت معاناة يومية
|
Post: #14
Title: Re: وبعدين؟!
Author: مريم بنت الحسين
Date: 05-14-2014, 02:41 PM
الإخوة والأخوات...
اسماعيل عباس
أبوبكر أحمد عبدالرحمن
ولياب
معاوية الزبير
عاطف عمر
خالد المهدي
نعمات عماد
حسن الطيب يس
الشفيع ابراهيم
يحي قباني
عبدالحفيظ أبوسن
عجبني انه عدد كبير من الناس وصلوا لنفس السؤال... واعتقد انه معظمكم وصل لنفس المرحلة من الملل بي أخبار الفساد... بالجد بقى ممل... كأنه بقى عادي وطبيعي ومتوقّع!
الحاصل انه مجموعات الواتساب كلها بتتناقل الفضايح أشكال وألوان... صديق للأسرة عنده مزرعة في السودان، قال لينا انه جيرانه من كل الجهات ملاّك أراضي من غير السودانيين... يعني أقصى أنواع الفساد وصلت لدرجة بيع البلد... لكن الحل شنو؟ بتكلم مع أولاد أهلي في السودان، الإحنا بنفتكر انهم متضايقين وقابضين الجمر، كل زول فيهم عايز يحل مشكلته براه... حل جذري بالاغتراب، او تخدير مؤقت بالتحويلات من الاغتربو! ...
تعريف المعارضة هنا بشمل اي زول بفتكر انه الانقاذ دي مصدر مشكلة ومفروض ما تستمر.. وده بشمل حتى الحركات داخل المؤتمر الوطني البتطالب بي إصلاحات.. وشملت الناس كلهم هنا لانه ما منطقي الفكرة بتاعت ابادة الآخر الطالعة موضه في البلد الأيام دي... أي حل مستقبلي مفروض انه يتضمّن الإنقاذ زاتها... ننقذها من روحها دي!
الشعب السوداني وصل لقناعة من زماااااان انه الناس دي ما ناس دين، ولا عندهم علاقة بيهم... من الحكاوي المتداولة بي سيناريوهات كتيره انه الزول لو قال سبحان الله ساي، الناس تحمّر ليه... الإنقاذ/الإخوان المسلمين كرّهو الناس في الدين... واعتقد انه الشعب السوداني وعى الدرس تماما...
انا مع الراي البقول ننتظر الفرج من الله بعد ده... وصلت للقناعة دي لأنه أصحاب الوجعة زاتهم ما موجوعين قدر وجعنا ده! الناس شغاله بي "الله كريم"، والبقدروا يطلعوا بطلعوا... والناس بتتشايل... والحياة ماشه...
مشكلة الشعب السوداني ما في الإنقاذ، مشكلته في الشخصية السودانية المحتاجة تتعلم انها تتحرك.. وتبطّل الإتكالية على الحلول الجاهزة... انا غايته غسلت يدّي... وبقت علينا قصة "حتى إذا استيأس الرسل"....
الحل في يد الغلابة فعلا... واي زول زار السودان في الفترة الفاتت دي ممكن يصل لنفس الإحباط الحاصل ده.... بعد ده إلا الأمر يتحلّ من عنده... لكن للشايفاه ده... الحكومة مطمئنة ونايمة قفا ... والشعب ما شغال بالموضوع الشغله كأنه ما بهمّه... الوحيدين الغايظهم الحاصل ده احنا...
انا بقترح انه الشعب السوداني الجوّه السودان ده كله يطلع يخلي البلد... وده فيه أكتر من فايدة... أهمها انه الإنقاذ بعداك تقدر تاخد راحتها... ثانياً الشعب السوداني يشوف العالم الحوله عايش كيف، وانه دور الحكومة خدمة الشعب... ويشوف الحكومات بتخدم شعوبها كيف... ما لم يعرفوا حقوقهم، مافي أمل.. وحنكون احنا بنغلي كده لما الواحد يطق ليه عِرِق!
|
|