ناس سكينة يسوّين في الدلكي..

Post: #1
Title: ناس سكينة يسوّين في الدلكي..
Author: طارق جبريل
Date: 05-11-2014, 04:13 PM

-سكينة: الرسول آآلسُرة بعدين فسراع حصليني... باقي انجارطتة والبت دي عرسها ضومة ضومة حكت في الركاب..
-السرة: وحاتك يا حبيبة قساي بس اللفطر وليداتي واغشى العريبي املأ حُقتي صعوط واجي عليكي
-خادم الله (خدوم): دحين يا سكيني قُداحتك ماهلات شي.. فشان ما نكتر الحجي والشدّدان في القلايا دي
سكينة: خمسة قُداحة كبااار كفايي وحات نضري ماني زايداهن
-حُسنة: هههههههه عاد دايري تضيعي زينب بتك.. ان بقت الدلكي كملت عليها وما تقلت شي هههههه
خدوم: هي سووووود علي نان الدلكي وَحدها البتخليها تتقل... اي الواطة في خشم حنان بتك ان بقت دايري تعرس وسويتيلا الدلكي بس...
حسنة: نان مو ياها الدلكي وشوية ريحي ههههههههههههه
خدوم: سوووووود علي اريتك ام التاباني البنات
سكينة: اها يا السرة نجهزلك شنو
السرة: اعجنن العجين وسون لي كل قدح تلاتة لدايات وولعن الطلح لامن دخاخينو يتلاون ان بكون جيت
مشن علي بيت سكينة وقلعت تيابن ألات الجارات وسون اللدايات للقداحي وجابن العجين لتخنو في القداحة
وجابلهن كوريي فشان يبلن فيها يدينن وكتين يقلبن عجين الدلكي في القداحة وشوية ريحي..
وضوفر ينقرفن ويفسخن فيهو في صينية ألموني وشي محلب وشي شاف تكسر فيهو خدوم صغار صغار
وكانون وعلبة لبن وطوة وكماشة يهبن بيها الفحم الفي الكانون وهبابة ودلاقين لي كفي القداحة في الطلح وختن بنابرن وسون قهوتن ينتظرن في السرة...
حسنة لكزت سكينة وهي تموت من الضحك وتعاين في خدوم وقامت سكينة عاينت لي خدوم وانفقعت ضحك
- خدوم: مالكن يا بنات الهرمة تضاحكن... وفقعتها ضحكة هههههههههههههه اييي عارفاها الجلابييي من ورا راقدة هرود... باقيلي الخيمة ألتي قاعدي في السهلة ههههههههههههه
حسنة: هههههههههههههههههه اي جلابية شنو وحات نضري الخيمي ألتك ذاتها راقدي خل ونصايبك في السهلة الله لا كسبك هههههههههههههههه
- سكينة ههههههههههههههههههه: الرسول أآخدوم انت محمد عبد الكريم دة العاجبه فيكي شنو مسوي رجلينك المكلوجات ديل علي مفرمة الخدرة ههههههههههههههه
- خدوم: نان هن كانن مكلوجات وحات نضري علي (البوص) كلوجن هو وسجمن ومدن هههههههههههههه
- حسنة: ووووووووووووب علينا حاج عبد الله لا يسمعك خاتي كرسيهو عند الباب الله لا تاجرك
دخلت السرة وضحكت معاهن وكفت القداحة في اللدايات ومسكت طرف التوب مسحت وشها وطلعت حُقتها الصغيري من المحفضة وادتها دقة ورمتلها سفة تحت لسانها:
انتن تبارن خدوم.... امبارح وكتين ولعت الطلح لي زينب بتك جات علي ولادها وانا وحومد عثمان نسمع فيها
وقالتلهن العروس دي كفيناها تحت الشملي مافي واحدا فيكم يجي يتحاوم بهنوك باقي عارفاكم يا ولاد خدوم عينكم زايغي ههههههههههههه
حسنة: ووووووووووووووووب علي وووووب علي من الطروقييي
- السرة: حومد عثمان قالي خاتي ود حضري البيخلي بتو يقفلوها ويدخنوها في بيت خدوم شالت حالها قربت تقولهم دايرين نشيلها اوراكها هههههههههههههههههه
- سكينة: هههههههههههههههههههههه الرسول فيكن لا تكاتلوها زينب قالتلي آآبتدخن إلا عند خدوم باقي قاعدي تريدها من قلبها... تطلع في البنبر وتنط عندها في نص الحوش ههههههههه
- السرة: ههههههههههههههههه يمين خالتها خدوم لي الشايفاهو دة علي توصلها اللكوندة ألت العسل وتقول لللراجل تعال اللوصيك ههههههههههههههههههههههههههه
سكينة اديني كوز الموية الجنبك دة الطلح دة بقة بيحرقلنا العجين دة ههههههه
خدوم شالت القدح من فوق الطلح وغتست يدها في كورية الموية وبقت تقلب في الدلكي وتساويها مع طرف القدح وضحكت: ههههههههههههههههههههههههههههه
نان هو راجل الجن دة ادخنها ليهو وكمان امعطها واسويلها الدلكي واديها خومرتها وكمان اوصي ههههههههه هو راجل دة ولا دِلِق ههههههههههه
سكينة تفسخ في الضوفر وخاتة الصينيي في اوراكها: ههههههههههههههههه غايتو آآبسألك آآخدوم انت باقيلي وكتين عرسوكي الدهسيري كلها تضاحك علي سواتك ههههههههههههههههههه
خدوم: ههههههههههههههههههه كنت جاهلي ي سكيني امي قالتلي بعد تاخدي كبتك صحيني وولعي الفانونس فشان اشيلك الحلاوة....
وانا خايفي من المعيط قمت شلتلي جريدي من الكرقي وقلت اولعها واتشتش الصوفايات من لااااافوق فشان ما يوجعني
ان كان اتشلكم وركي وقمت من تحت الشملي واسكــلـــب في الحوش وامي رحمها قامت مهجومي وتسوي في بسمممممممم الله بسمممممم الله يا ود الكرسني تحصلني
بتي اتمست يا لطيف الطف وانا صاقعالا يمة شويت وركي ود الكرسني طاير هههههههههههههههههه
- السرة: هههههههههههههههههههههههههههه سكينة ناوليني الريحي اللخفج الدلكي دي ان بارينا قشور دي يومنا بيضيع باقي دي مرتا قاهري هههههههههههههههه
- سكينة: ههههههههههههههههه ماها مرتا يعرفوها غايتو ههههههههه
- حسنة: هههههههههه وشن سويتي في وركك المتشوش دة مع الحلا ة الت امك رحمها الله
- خدوم: امي تداعي فيني اليوم كله: الله لا كسبك ان كان دايري تفضحينا مع راجلك توووب تبيتك بي الله منك عروس... ههههههه.. انا لا عرفت اضحك لا عرفت ابكي
اها شلتلي هبوت وكبيتو في ورمي وحات نضري لامن جاء المغرب الشي برد وقعتلي في بنبر وشلخ رجلي في شناط العنقريب وقلت لي امي:
يمة تعالي شيلي حلاوتك الشي باقيلي عارف نفسه ماشيلو عند زولا كتر دحين براهو طاب ههههههههههههه
- السرة: هههههههههههههه وووب علي من أليلك عاد.... ادني الريحي القدح اللخير دا خلاس استوى خلوني اللدردمو
- سكينة: هههههههههههههههههههه هاكي البرطمان يا السرة الخرابة دي بتصحي راجلي يجي يكورك فينا
- خدوم: هو راجلك عنده مُرُوة لامن يكورك.... ههههههههههههه من سكنتي في قفا بيتي دة لمبتو مولعي هههههههه
- حسنة: هي سوووووود علي ههههههههههههه نان جايباهو من الشارع مو راجلها الله يقلعك
- خدوم: نان انا فتر كل تسع تشُر الخرابة دي تلد وأنا اسوي في المدايد ههههههههههههه

---------------------------
انا كان باريت خدوم دي البوست دة بيمشي الخور
هههههههههههههههههههههه

Post: #2
Title: Re: ناس سكينة يسوّين في الدلكي..
Author: سيف اليزل سعد عمر
Date: 05-11-2014, 05:48 PM
Parent: #1

Quote: - حسنة: ووووووووووووب علينا حاج عبد الله لا يسمعك خاتي كرسيهو عند الباب الله لا تاجرك
دخلت السرة وضحكت معاهن وكفت القداحة في اللدايات ومسكت طرف التوب مسحت وشها وطلعت حُقتها الصغيري من المحفضة وادتها دقة ورمتلها سفة تحت لسانها:
انتن تبارن خدوم.... امبارح وكتين ولعت الطلح لي زينب بتك جات علي ولادها وانا وحومد عثمان نسمع فيها
وقالتلهن العروس دي كفيناها تحت الشملي مافي واحدا فيكم يجي يتحاوم بهنوك باقي عارفاكم يا ولاد خدوم عينكم زايغي ههههههههههههه

لوحة سودانية قمة في الروعة.. تصوير عجيييب
لغة لا تنفصل عن التصوير بكل تفاصيله الدقيقة..

خور شنو اازول البتمشيلو الدلكي دي!!! قصدي البوست ده

عجيب يا طارق جبريل

Post: #3
Title: Re: ناس سكينة يسوّين في الدلكي..
Author: ABUHUSSEIN
Date: 05-11-2014, 05:55 PM
Parent: #2

Quote: اتا كان باريت خدوم دي البوست دة بيمشي الخور
هههههههههههههههههههههه

خدوم هينة الخوف منك انت ........

Post: #4
Title: Re: ناس سكينة يسوّين في الدلكي..
Author: عبدالعزيز عثمان
Date: 05-11-2014, 06:40 PM
Parent: #3

ود جبريل ،،شديتك فوق حيا لا نام ولا اكل الطعام....
ده شنو ده،،،ات مريقاك بت مجذوب...
اها ارح زيد،،،علها ماتنت السايبي...
بكري هين ...
الكلام في الابكار..

Post: #5
Title: Re: ناس سكينة يسوّين في الدلكي..
Author: خالد علي محجوب المنسي
Date: 05-11-2014, 06:48 PM
Parent: #4

الله يجازي محنك يا ود جبرين
والله سرحت وأنا أطالع هذه اللوحة
وأتخيلت اني راقد في ضُل الححي هسجة
وأسمع في نضمي ناس سكينة وخدوم ( وبي عيني شفتا خدوم لما كتحت السفة تحت لسانا )
من حقتها الصفيح البيضاء دق السمكري ودعباس وفيها زخرفة على جنباتها
وقاعدة في البنبر المهتوق مترامية حبالو وتلم في هِديماتا ما تتكشف
يا سلااام يا ود حبرين ربي يخدر ضراعكيا نسمة فرح في المنبر

تحياتي ومودتي

Post: #10
Title: Re: ناس سكينة يسوّين في الدلكي..
Author: طارق جبريل
Date: 05-12-2014, 03:13 PM
Parent: #5

Quote: الله يجازي محنك يا ود جبرين
والله سرحت وأنا أطالع هذه اللوحة
وأتخيلت اني راقد في ضُل الححي هسجة
وأسمع في نضمي ناس سكينة وخدوم ( وبي عيني شفتا خدوم لما كتحت السفة تحت لسانا )
من حقتها الصفيح البيضاء دق السمكري ودعباس وفيها زخرفة على جنباتها
وقاعدة في البنبر المهتوق مترامية حبالو وتلم في هِديماتا ما تتكشف
يا سلااام يا ود حبرين ربي يخدر ضراعكيا نسمة فرح في المنبر

تحياتي ومودتي

حبيبنا ود المنسي
ياخ داك عالم جميل جدا جدا
زمن ياخ

Post: #11
Title: Re: ناس سكينة يسوّين في الدلكي..
Author: طارق جبريل
Date: 05-12-2014, 03:15 PM
Parent: #10

Quote:
Abazer Deshab
ود جبرين يا حبيب .. حضور ومتابعة

يا عزيزي حضورك يسعدني حقيقة

Post: #8
Title: Re: ناس سكينة يسوّين في الدلكي..
Author: طارق جبريل
Date: 05-12-2014, 11:19 AM
Parent: #4

Quote: ود جبريل ،،شديتك فوق حيا لا نام ولا اكل الطعام....
ده شنو ده،،،ات مريقاك بت مجذوب...
اها ارح زيد،،،علها ماتنت السايبي...
بكري هين ...
الكلام في الابكار..

يا حبيب هههههههههههههه
خايفين بكري يودينا الخور ياخ
هههههههههههههه

Post: #7
Title: Re: ناس سكينة يسوّين في الدلكي..
Author: طارق جبريل
Date: 05-11-2014, 09:00 PM
Parent: #3

Quote: خدوم هينة الخوف منك انت ........

هههههههههههه
انت جيت يا الحبيب هههههههه

Post: #6
Title: Re: ناس سكينة يسوّين في الدلكي..
Author: طارق جبريل
Date: 05-11-2014, 08:51 PM
Parent: #2

Quote: لوحة سودانية قمة في الروعة.. تصوير عجيييب
لغة لا تنفصل عن التصوير بكل تفاصيله الدقيقة..

خور شنو اازول البتمشيلو الدلكي دي!!! قصدي البوست ده

عجيب يا طارق جبريل

سيف كيفنك ياخ
امهاتنا ديل عندهن المحن ياخ
عجيبات مرة واحد

Post: #9
Title: Re: ناس سكينة يسوّين في الدلكي..
Author: يوسف محمود
Date: 05-12-2014, 11:30 AM
Parent: #1

غايتو بوست (جبخانه برا الشاشة!!!)
زمان الجماعة لمن يتكيفو من الفلم الحربى يقولو (والله فلم ائجيب جبخانة برا الشاشة)دلالة على الاثارة والعنف
برضو خدوم مدور جبخانة برا الشاشة في دلة زينب

تعرف انا من كترة ما طشمت مع اللوحة دى لامن اتخيلت اشكالهن دى خديرا مدقدقة مع الواطا
ودى قمحية
ودى صفيرا
ههههههههههههههههههههههاهاهاهههههههههههها

Post: #12
Title: Re: ناس سكينة يسوّين في الدلكي..
Author: ولياب
Date: 05-12-2014, 03:27 PM
Parent: #9

يا ود جبريل نضمك حلو إلا نحن الناطقين بغيرها بنجلي بعضها ، بس أبشرك أخوي الأصغر مني (مزواج) عندو حلفاويتين ، تخيل في الأسبوع الماضي تلت بالشايقية ، يلا كدن نشوف ناس سكيني بيسون شنو .

Post: #14
Title: Re: ناس سكينة يسوّين في الدلكي..
Author: طارق جبريل
Date: 05-13-2014, 08:56 AM
Parent: #12

Quote: يا ود جبريل نضمك حلو إلا نحن الناطقين بغيرها بنجلي بعضها ، بس أبشرك أخوي الأصغر مني (مزواج) عندو حلفاويتين ، تخيل في الأسبوع الماضي تلت بالشايقية ، يلا كدن نشوف ناس سكيني بيسون شنو .

يا حبيبنا
قريبتي دي غايتو بتنجموا ليكم هههههههههههههههههههههههههههههههههههههههههههههه

Post: #13
Title: Re: ناس سكينة يسوّين في الدلكي..
Author: طارق جبريل
Date: 05-12-2014, 09:00 PM
Parent: #9

Quote: غايتو بوست (جبخانه برا الشاشة!!!)
زمان الجماعة لمن يتكيفو من الفلم الحربى يقولو (والله فلم ائجيب جبخانة برا الشاشة)دلالة على الاثارة والعنف
برضو خدوم مدور جبخانة برا الشاشة في دلة زينب

تعرف انا من كترة ما طشمت مع اللوحة دى لامن اتخيلت اشكالهن دى خديرا مدقدقة مع الواطا
ودى قمحية
ودى صفيرا
ههههههههههههههههههههههاهاهاهههههههههههها

يا حبيب دي دبابات ما جبخانة بس
ههههههههههههههههههههههههه

Post: #15
Title: Re: ناس سكينة يسوّين في الدلكي..
Author: طارق جبريل
Date: 05-13-2014, 06:12 PM
Parent: #13

Quote:

قرحطب فور برنقا · طب الفاشر
ود جبرين يا حبيب ..

حبابك الف ياخ

Post: #16
Title: Re: ناس سكينة يسوّين في الدلكي..
Author: طارق جبريل
Date: 05-14-2014, 06:37 PM
Parent: #15

Quote: Yousif Idris ·
جاي مفحط في البورد .. شميت الريحة قلت ادخل من الشباك أشوف الحاصل، يبدو أنه مافيه نظام عام !!

ههههههههههههههههههههه
حبابك الف ياخ

Post: #17
Title: Re: ناس سكينة يسوّين في الدلكي..
Author: سيد محمد احمد سيدنا
Date: 05-18-2014, 10:32 AM
Parent: #16

اخونا العزيز الاستاذ طارق جبريل

اولا سلامااااااااااااااااااااااااااااااااااااااااااااااااااااااااااااااااااااااااااااات بقدر قامات اهل الامتداد

وسلام كبييييييييييييييييييييييييييييييييييييييير للسرد الجميل والصوره المتحركه لتراث الجدات والامهات

اتمنى ان تتحرك هذه الصوره فى شابات اليوم المتعففات من تراث الحبوبات وليأخذن من جمال الطبيعة

التى ساهمت فى طول اعمارهن وأن يتقشفن من كلونيات ودهانات الشركات التى اصبحت تحمل كثير

من الامراض ( ما لو الكركار وزيت السمسم والدخان ) اكيد هو الجمال وتميز عروس السودان

عافاك الله اخى وصديقى طارق جبريل لهذه الونسه المنقوله مباشرةا

تحياتى

سيد سيدنا

Post: #19
Title: Re: ناس سكينة يسوّين في الدلكي..
Author: طارق جبريل
Date: 05-25-2014, 08:19 AM
Parent: #17

Quote: اخونا العزيز الاستاذ طارق جبريل

اولا سلامااااااااااااااااااااااااااااااااااااااااااااااااااااااااااااااااااااااااااااات بقدر قامات اهل الامتداد

وسلام كبييييييييييييييييييييييييييييييييييييييير للسرد الجميل والصوره المتحركه لتراث الجدات والامهات

اتمنى ان تتحرك هذه الصوره فى شابات اليوم المتعففات من تراث الحبوبات وليأخذن من جمال الطبيعة

التى ساهمت فى طول اعمارهن وأن يتقشفن من كلونيات ودهانات الشركات التى اصبحت تحمل كثير

من الامراض ( ما لو الكركار وزيت السمسم والدخان ) اكيد هو الجمال وتميز عروس السودان

عافاك الله اخى وصديقى طارق جبريل لهذه الونسه المنقوله مباشرةا

تحياتى

سيد سيدنا

اوووووووووووووه حبيبنا الو السيد ياخ
يا حبيب يعلم الله اشتهينا ونستك ياخ
حبوباتنا ديل كانن سمحات ياخي

Post: #18
Title: Re: ناس سكينة يسوّين في الدلكي..
Author: منتصر كبلى
Date: 05-18-2014, 11:03 AM
Parent: #1

ود جبريل سئيلى الله موش قمة الابداع ياخى دا نضم حلووووو بس انا اتخيلتك قاعد مع ناس سكينة فى دقة الوصف وتراتيب عمل الدلكة طبعا منتظر مسالة حفرة الدخان والشملة بعد الشيل الحرق خدوم وطبعا فى فنيات فى الحتة دى كااختيار اكثر النساء خبرة وعمر (حبوبة) للاشراف على الاستواء فى الحفروالنجيض والمسالة دى هههههههههههههههههههههههههههه النبى فوقك كان تقيف واصل قنب عافية ياصاحب

Post: #20
Title: Re: ناس سكينة يسوّين في الدلكي..
Author: عبدالحافظ سعد الطيب
Date: 05-25-2014, 11:49 AM
Parent: #18

ود جبرين الله يقلعك والله انت المحن ماشى بى كرعينا

لى خمستاشر سنة ماضحكت وخاشى فى شخصية زول رسمى رابط لى دلق فوق رقبتى

الليلة فرجت فينى الخلق الهنود والفلبينين والسودانيين والمصريين إفقعت ضحك بصوت عالى لامن دموعى جرن

المضحك قاعد اترجم للسودانين

بس طلب خسمتك بسدى الحسن رجل كسلا

خدوم لاتفق دربه انشاالله يودنا بعشر ويختونا القيد

Post: #21
Title: Re: ناس سكينة يسوّين في الدلكي..
Author: عبدالحليم حامد النعيم
Date: 05-25-2014, 02:37 PM
Parent: #20

....
يا دكتور والله سرد وحكي غاية في المتعة ... وضحكنا لمن انشرقنا ... الله يجازي محنك ... وتفكنا عكس الهواء ... زي صاحبك عوض
..

Post: #25
Title: Re: ناس سكينة يسوّين في الدلكي..
Author: طارق جبريل
Date: 05-26-2014, 08:29 AM
Parent: #21

Quote: ....
يا دكتور والله سرد وحكي غاية في المتعة ... وضحكنا لمن انشرقنا ... الله يجازي محنك ... وتفكنا عكس الهواء ... زي صاحبك عوض
..

اووووووووووووه حبيبنا ود حامد ياخ
كيفنك ابوي

Post: #24
Title: Re: ناس سكينة يسوّين في الدلكي..
Author: طارق جبريل
Date: 05-26-2014, 08:28 AM
Parent: #20

Quote: ود جبرين الله يقلعك والله انت المحن ماشى بى كرعينا

لى خمستاشر سنة ماضحكت وخاشى فى شخصية زول رسمى رابط لى دلق فوق رقبتى

الليلة فرجت فينى الخلق الهنود والفلبينين والسودانيين والمصريين إفقعت ضحك بصوت عالى لامن دموعى جرن

المضحك قاعد اترجم للسودانين

بس طلب خسمتك بسدى الحسن رجل كسلا

خدوم لاتفق دربه انشاالله يودنا بعشر ويختونا القيد

يا حبيب خدوم دي كان باريتها بكري ببلكني
هههههههههههههههههههههههههههه
اضحك ياخ آخرها كوم تراب

Post: #23
Title: Re: ناس سكينة يسوّين في الدلكي..
Author: طارق جبريل
Date: 05-26-2014, 08:26 AM
Parent: #18

Quote: ود جبريل سئيلى الله موش قمة الابداع ياخى دا نضم حلووووو بس انا اتخيلتك قاعد مع ناس سكينة فى دقة الوصف وتراتيب عمل الدلكة طبعا منتظر مسالة حفرة الدخان والشملة بعد الشيل الحرق خدوم وطبعا فى فنيات فى الحتة دى كااختيار اكثر النساء خبرة وعمر (حبوبة) للاشراف على الاستواء فى الحفروالنجيض والمسالة دى هههههههههههههههههههههههههههه النبى فوقك كان تقيف واصل قنب عافية ياصاحب

انت يا منتصر كنت بتاوق بي فوق الحيطة ولا شنو
دة كلام زول خبرة ياخ
هههههههههههههههههههههههههههههههههههههههههه

Post: #22
Title: Re: ناس سكينة يسوّين في الدلكي..
Author: Mohamed Osman Zooalnoon
Date: 05-25-2014, 03:33 PM
Parent: #1

ههههههههههههههههههههههههههههههههه
ههههههههههههههههههههههههههههههههه

وحات الله ماك نصيح ياود جبرين

دمتم سالمين

Post: #26
Title: Re: ناس سكينة يسوّين في الدلكي..
Author: طارق جبريل
Date: 05-27-2014, 10:02 AM
Parent: #22

Quote: ههههههههههههههههههههههههههههههههه
ههههههههههههههههههههههههههههههههه

وحات الله ماك نصيح ياود جبرين

دمتم سالمين

وابقى نصيح لي شنو يا حبيب
هههههههههههههههههههههههههه

Post: #27
Title: Re: ناس سكينة يسوّين في الدلكي..
Author: طارق جبريل
Date: 05-31-2014, 11:17 PM
Parent: #26

Quote: Elsadig Agabna Elhadi ·
سرد ممتع

تسلم يا حبيب