Post: #1
Title: ما تشكى عطشك للبحر
Author: أبوذر بابكر
Date: 05-11-2014, 03:09 PM
العطش المشمر توبو
وواقف ليكا سد
مضمضة النويح
الماليه خشم القيف
وفايته الحد
وهرولة العيون اليابسه من الضو
وحارسه دروبو
فارشات الجروح للريح
مادات الرقاب للسيف
عامتات برعم الفرح الفتح يا دوبو
داساتنو فى ليلات الشتا
اللابسات تياب الصيف
شايلات ذنوبو
وليكا جايبات الخبر
ما تشكى عطشك للبحر
ابقى مارق شوف وعاين
تلقى غنواتك جحيم
فى جنتك منصوب
عجّل مشيك واقيف حداهن
تلقى حسراتك نعيم
فى لوح شقاك مكتوب
مدسوسه فى الليل القديم
محروسه فى الجرح الأليم
ممغوسه فى القلب الكليم
والشاهد على عتمة صباك
ضو القمر
ما تشكى عطشك للبحر
ولامن يحين وقت الوصال
إتوضا بى موية سرابك
وصلى وقت الرجعة حاضر
ركعة لى ميعاد ديارك
وركعة شان خاطر المطر
بِل ريق مسافاتك تعال
قبل الظما يسرق شرابك
ولامن يقوم
جوع روحك الشبع ودارك
دخل ايدك فى جرابك
قوم خت مواجعك جوه فيك
واتسند على الحيل الفتر
وما تشكى عطشك للبحر
عاد تمشى وين من الدرادر
من البشاتن ومن مكازاة السهر
من المحطات المكتفه بالعجاج
بحر البلد عذبُ فرات
طعم السفر ملح اجاج
عنوان شقاك مكتوب
على ظرف السفر
ما تشكى عطشك للبحر
|
Post: #2
Title: Re: ما تشكى عطشك للبحر
Author: عبدالعزيز عثمان
Date: 05-11-2014, 06:27 PM
Parent: #1
عاد تمشى وين من الدرادر
من البشاتن ومن مكازاة السهر
من المحطات المكتفه بالعجاج
بحر البلد عذبُ فرات
طعم السفر ملح اجاج
عنوان شقاك مكتوب
على ظرف السفر
ما تشكى عطشك للبحر
---
ياسلام
بس نشكيهو لي مين العطش
ويازول لهاتنا مع اللسان
لاصقات يباس...
|
Post: #3
Title: Re: ما تشكى عطشك للبحر
Author: أبوذر بابكر
Date: 05-12-2014, 08:19 AM
Parent: #2
عبد العزيز
فى عز وطأة العطش الشديد
البحر بمرق براهو ويحوم على العالمين
ويسقيهم
كدى جرب اشكى عطشك للسحاب
كيف الحال
|
Post: #4
Title: Re: ما تشكى عطشك للبحر
Author: أبوذر بابكر
Date: 05-13-2014, 12:49 PM
Parent: #2
|
Post: #5
Title: Re: ما تشكى عطشك للبحر
Author: أبوذر بابكر
Date: 06-01-2014, 08:45 AM
Parent: #2
|
|
