Post: #5 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 08:36 AM Parent: #3
ياسلام عليك ياكباشي ياقديم
برغم موضوع البوست مختلف
الا ان المصير تظل من احب
الاغنيات الي القلب خاصة وان
ملحنها هو الصديق العزيز والحبيب
الي القلب ( عبد اللطيف خضر ود الحاوي )
صاحب الروائع في الاغنية السودانية
مثال :
سال من شعرها الذهب
وده ماسلامك
واسمعنا مرة
وحبيب قول ليه راجع
والكثير من الاغنيات الخالدة
شكرا للاضافة وحتما سازورك في قناتك .
تحاياي
Post: #6 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 08:44 AM Parent: #5
وصباحات شوقنا بي خيرن
صباحك طلت الياسمين
متع الله هذه الرائعة روعة بلادي
الفنانة الجميلة حنان النيل
بالصحة والعافية بقدر ماقدمت وابدعت
Post: #7 Title: Re: نماذج من الاغنية السودانية - الصباح ( 1- 10 ) Author: Kabar Date: 05-10-2014, 09:13 AM Parent: #3
صديقي...هارون دياب....حبابك ياخي انتا زول لعنة ، و الله يلعن خاشك ذاتو..!!! فتشت عن اغنيات للجميلة سمية الجوخ ، دي مافي زول بيعرف اثرها الإ عيال الدويم من شاكلة اخونا الحردان الناضر هشام هباني...و ادريس علم الهدى...!! كنت يا صديقي ... ساهديك احبابي ناس كسلا... الصلاح رجال كسلا تهموا لي باجلا..ناس ابراهيم حسين ...و الجميل النادر الرشيد كسلا...وده زول عميق خلاس..!!! ثم ناس سنار...عصام امحمد نور... رابطة سنار الأدبية...امحمد بخيت (مع انو من ناس مدني) .. ازهر ي اب راسين.زبلال موسى...و لكن..!!! ابت النفس الإ ان اعرج على كوستي... دار الجميلة جداوية عبد الله موسي ، و هي شقيقة الليجند السودانية العظيمة عشة عبد الله موسى (فاهم حاجة يا هرون؟؟؟؟؟)...!!!
في حفل في العباسية تقلي ، كان يحيه الليجند عبد العزيز محمد داوؤد و الليجند العظيمة عشة عبد الله موسى (عائشة الفلاتية بي رطانة ناس البندر)... فقام ابو داود ..قال لناس الإعلام..قولوا عشة الفلاتية وزجها ابوداوؤد....و هي اظنها نفس المناسبة القالت فيها عشة حكاية اخوها الكاشف..!!!! هذي حكايا من زمن مضى يا صديقي ...ولا يذكرها الإ القليلون و القليلات.. ناس الزمن الشارد..اياه..!!!
في هذا الصباح..و صباحات اخرى غريبة.. اهديك .. اللعنة... صديقنا الفنان سليمان محمود...و هو من اطيب و اندر الأصوات السودانية التي شكلت وجداننا..!!!!
و يا سليمان محمود... عليك الله كن ما غنيت لي واحدة من اتنين : الأفضل عندي... في بحور من موية بكتب بي حروف حبي المحال... ما اظن في حروفو بتبقى في الرمال...أو رائعة الليجند امبلينا السنوسي.. نحن حافظين لودادك..!!!
هنا يا هرون.. صديقنا الجميل سليمان محمود..و من عجب يغني لسنار..و سنار... دي اسكت ساكت خليها..
استاذنا و اخونا فنان سنار العظيم سليمان محمود..متعك الله بالعافية يا قريبي...و عليك الله يا سليمان كن ما غنيت لينا ..في بحور من موية بكتب بحروف حبي المحال...!!!
سمعتك..1987...و سمعتك في 2014...و نفس الصوت...نفس الوجدان الحارق..و نفس الذكريات... و لمن جمعتني الظروف ببنات سنار و انا طالب في الجامعة..كانت سيرة صوت سليمان محمود هي المدخل... البتعرق صوت سليمان مححمود بنحبها على طول ..و والما بتعرف..بنقوم نجليها زي السلامو عليكم,....والله صحي..!!!
شكرا هرون...و اذكر لك فضل أنك انت اول من دلاني على زولتك السورية التي اختارت ترديد اغنيات العظيم الكاشف....!!!!
لك كل المحبة يا صديقي...ومشاكل افريقيا كلها ممكن تتحل.. لو الأفارقة قعدوا و استمعوا للغنا..!!!
كبر
Post: #8 Title: Re: نماذج من الاغنية السودانية - الصباح ( 1- 10 ) Author: بله محمد الفاضل Date: 05-10-2014, 09:21 AM Parent: #7
فكرة براقة جئنا للسلام عليكم وتعضيدها والنهل
تحياتي واحترامي
Post: #12 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 10:00 AM Parent: #8
مرحبتين يابله
ومنور البوست
ويلا فتش عندك وتعال لينا بالجميل
Post: #9 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 09:37 AM Parent: #7
Kabar
ياكبيييييييييييييير
وبي كده نقول البوست وقع المجري
وجاب حقوا وزيادة ... الناس الجميلين زيك
لامن يجوا بي مزااااااج يمين المكان ده ماببقي
في مكان اجمل منو....!!!!
عارف ياحبيب زي مااستعنت انت بنماذح
انا برضو عندي نماذج كده في حوش بكري ده
لو لقيت الاسم ساااااااااااكت انشاء الله بي فتحة الفيسبوك
اقيف ليهو احترام وتقدير
وانت احد من يجملون هذا المكان ... رضيت ام ابيت
انتظر محمد المرتضي ودكتور بله وهشام هباني لامن يكون رايق
وياوليك كان جاتك تراجي وهي تسترسل في ذكريات بورسودان وديم الشاطي
يمين ترتاح لامن بهناك .... وكان ابو ساندرا لبس النضارة وقام اختار
والله العظيم الزول ده اي حاجة يسمعه او يختاره تلقاها مجنونة عديييييل .
والكثيريييييييييييييييين .... من الجميلين .
اها ياخوي .... خلينا نمسك في عبقرية الزمان والمكان في الاغنية السودانية
يمكن نقدر نرجع الناس الحلوين الهجروا المكان ده مادام السياسة والكورة ماجابو همهم .
فتك عافية يا اجمل الحلوين .
Post: #10 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 09:39 AM Parent: #9
ياخي زولك ده مصيبة عديييييييييييل
ده صوت خرااااااااااااااااافي
نتمني ان نجد منه الجديد دائما
وخليني افتش في الجراب يمكن القي
ليهو حاجات تانية
شكرا سليمان محمود انت فناااااااان
Post: #11 Title: Re: نماذج من الاغنية السودانية - الصباح ( 1- 10 ) Author: Kabar Date: 05-10-2014, 09:46 AM Parent: #7
و بعدين يا هرون..!!! نحن شعوبا اتشكل وجدانها بصعوبة خلاس..!!!
قمنا يا هرون.. على صوت استاذنا نجم الدين الفاضل,..!! اي و الله ، نحن ناس .زقالوا قطعة سكر ، قلنا احلا و انضر...!!! ولكن..!!!
نجم الدين الفاضل..غنى... ليالي الأنس...و هنا .. معه العريبي قريبي استاذنا مجذوب اونسة... و مجذوب هذا.. ان شاء ام رضى.. افضل ما تغني به هو كلمات الشاعر العظيم حسين اونسة,... ثم شاعر اخر خبر كتبو في جواب..!!!
فيما يخص هذا المنبر ، فلقد سمعت ليالي الأنس ..ولكن اصدق من كتب عنها تعريفا هو صديقنا الجميل عزت الماهري... و الذي يكتب في هذا المنبر ..باسم ابنوس...!!!!
نعم يا هرون..هذي الكائنات الجميلة..نجم الدين الفاضل.. مجذوب اونسة... ليالي الأنس..و يا لها من ليالي,,,!!
وقبال نلحق منى الخير.. التجاني مختار.. عبد الحميد يوسف.. اماني مراد...اخير نتخارج يا هرون يا قريبي...!!!
لكم صباحاتكم ياناس..و لينا صباحاتنا....!!
اخونا بدر الدين الأمير..صباحات يا عم..يا قريبي...!!
كبر
Post: #13 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 10:05 AM Parent: #11
عارف ياحبيب
اجمل حاجة في مجذوب اونسة ده
انوا راجل مهذب ومهذب جدا
حصل لي معاهو موقف في زواج احد الاقرباء
جيت متاخر وانا بموت في اغنية (جيت اوادعك ياقماري )
اتاري غناها في بداية الحفلة .... واخوك لابس قميص ( تحرمني منك )
المخطط واخر شياكة وجيت قلته ليهو والله يا استاذ انا لو ماسمعت
جيت اوادعك ياقماري مابرتاح ابدا ..... ضحك وقال لي اظنك جيت متاخر
لاني غنيته قبيييييييييييل بس ولا يهم اغنيها ليك بعد ما استاذن من الناس
وقد كان واهداها لي .... واذكر اني فتحت بيها بوست هنا .
نواصل بدون فواصل
وصابحني دائما وابتسم
Post: #14 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 10:13 AM Parent: #13
رائعة الكاشف
صابحني دائما وابتسم
غناها الفنان الجميل عبد العزيز المبارك
فانتشرت في ذلك الوقت ....
من اجمل الاغنيات السودانية
نستمع اليها في قعدة من قعدات الزمن الجميل
Post: #15 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-10-2014, 10:25 AM Parent: #14
الفنان البغني صابحني دائما وابتسم
انا ماعرفتو ... لكن من بين كمية
من الخيارات عجبني صوتوا لانوا غير مشهور
وبيادي الاغنية من امها .
البعرفوا يكسب فينا ثواب
Post: #16 Title: Re: نماذج من الاغنية السودانية - الصباح ( 1- 10 ) Author: Kabar Date: 05-10-2014, 10:39 AM Parent: #11
عارف يا هرون يا صديقي ...انك زول لايوق... بتقوم تفرض على الزول انو يتنوس ...!!!
حبيبنا و استاذنا محمد المرتضى ممكن نجيبو...و ألأظرط..ممكن نجيب ليك استاذنا احمد القرشي عبد الرحمن..وهو رجل لم ارى مثله احتفالا باغاني الحقيبة....!! نعم يا هرون... نحن نفر..تربي على اغاني محمود علي الحاج... عبد الوهاب الصادق....عبد الله محمد...!!!
هذى كائانت يا صدقي لا يعرف عنها الإ محمد المرتضى و احمد القرشي,....!!! ياخي نحن ولاد حرام...خارج زمن المسغبة هذا....!!
بت ابا سميرة ابراهيم ، و هي عندي افضل من يغني اغاني اللجيند عثمان حسين بعد البليجند حمدان ازرق من جبال النوبة الكاركو..فحمدان ازرق عندي افضل من تغني باغاني عثمان حسين..و اتحدي فيهو اي من كان حتى لو كان عثمان حسن نفسو...!! !..سميرة ابراهيم ، المشهورة بي سميرة دنيا غنت رائعة الليجند عبد الله محمد..لا ما بنقدر نغير في الأيام سجية...و لكني اخترت ان ارفق الأغنية هنا بصوت عبد الله محمد..و لمن لا يذكر فعبد الله محمد هو الذي تغني رائعة عبد العال السيد (زهرة السوسن) ثم غنى رائعة الشاعرة ألكردفانية الأصيلية استاذتنا سمرقندية المحامي (غدر الزمن ، شغل القليب بالشوق على زولا بيحن..)...!! نحن نحتفل بعبد الله محمد ، محمود على الحاح ، عبد الوهاب الصادق...لأنهم فنانين تغنوا باغاني الجكس النضيف من شاكلة سمرقندية و حكمت ياسيتن..قبل اربعين سنة..!!!!
الى استاذنا محمد المرتضى حامد..برضك يا اسناذنا ممكن نجيب ليك اغاني بندر الحداثة من شاكلة بتقولي لا...!!!
كبر
Post: #17 Title: Re: نماذج من الاغنية السودانية - الصباح ( 1- 10 ) Author: Kabar Date: 05-10-2014, 11:14 AM Parent: #16
اخر حاجة يا هرون ، و علي الحلال تاني ما اعتب بي هنا..!!!
تحية لي بت ابا سميرة ابراهيم.. تحية لأستاذنا العظيم... محجوب عثمان ، و لو لقينا عشرة انفار ، رجا ل و نساء في هذا المنبر ، يحسبوا تلاتة اغنيات لمحجوب عثمان... نكون نلنا مكاسب...!!
الي صديقاتي و اصدقائي من الزمن الجميل... اقبال الياس الزبير.. مولانا مدثر العوض... مولانا امتثال الشيخ مختار... دكتورة انتصار احمد ادم... لكم و لي.... لحن الحياة منك..!!! و سيظل لحن الحياة ، دوما منكم يا رفاقي من ذياك الزمن العجيب...!!!
هرون... عليك الله ياخي شوف ليك شغلة تانية يا عم..!!
اليكم جميعا... الى صديقتنا و ابنتنا عبير خيري..!!! والي محبي الصباح...!! لحن الحياة...!!
كبر
Post: #18 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-11-2014, 05:52 AM Parent: #17
الله لايرمينا في ضيقة
لكن الزيك ده سمح عدييييييييييييييل
صباح ناضر .... وصباح ندي
انت الكلام الحلو ده قاعد ترصو كيفن
تجيب ليك غناين يفرتك الفهم
واها الزول جا من الصباح ناسي البوست
يلقي الصوت الفخيم سميرة دنيا
ياخي ماياهو ده الاندياح البقولوا الجماعة
والروقة والسلطنة وقعاد البنبر في العصرية
تعاين لاخواتك وهم قاعدات يغسلن الهدوم
والحاج هنااااااااااااااااك فاتح لندن وماشغال بي زول
يشهد الله والله خير الشاهدين طلعت الجواي بدون ما افكر في اي حاجة .
وصباحك مالو احبابك جفوني ومالو ياليل .
Post: #19 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-11-2014, 05:56 AM Parent: #18
شوف صاحبك فقد راس مالو
مابفرز يمين لاشمالو
Post: #21 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-11-2014, 06:02 AM Parent: #19
جمال النحاس واداء عالي
لاغنية صباحك مالو احبابك جفوني ومالو ياليل
Post: #20 Title: Re: نماذج من الاغنية السودانية - الصباح ( 1- 10 ) Author: صديق الموج Date: 05-11-2014, 06:01 AM Parent: #18
Quote: الفنان البغني صابحني دائما وابتسم
انا ماعرفتو ... لكن من بين كمية
من الخيارات عجبني صوتوا لانوا غير مشهور
وبيادي الاغنية من امها .
البعرفوا يكسب فينا ثواب
هارون كيفك يا صفوة اولاً البغنى ده ابن خالى حسن محجوب التوم وهو صوت واعد وثانيا جاييك بكمية مأهولة من غناء الصباح ده، ومن طرائف غناء الصباح اسماعيل عبد المعين عنده اغنية اسمها قابلته مع البياح، الفنان الظريف ابوداؤود قال ليه يا اخوى القابلته مع البياح ده حبيب واللا سيد لبن؟ رحمهما الله احفظ لى البوست ده فو بس والباقى على انا ، سلمت والمتداخلين حتى البجلوها واقفة ديل،،،
Post: #22 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-11-2014, 06:04 AM Parent: #20
اعتراف كامل باني سعيد الحظ في هذا المكان
ياود قلبا ياخي والله مشتاق ليك لامن بهناك
وزي مابقولوا
الشوق بحور ماليها حد ماليها قيف
واتحدي دربك لو يطول ويطول ويطووووووووووووووووول
موج ياحبيب
لك من الود ماتستحق
Post: #23 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-11-2014, 06:05 AM Parent: #22
لحن الحيـاة ------------- لحن الحياة منك و ما تقول نسينا الماضي و صرنا ناسينك محبوبي الجميل سألوني منك..عرفتهم إيه الصفات عنك ..خبرتهم شافو الجمال منك..أقنعتهم طولت لكنك انا يا حبيب الروح أعفيني من ظنك. .محبوبي الجميل سالمني بإيدو والدمع انهمر ذكرني بريدو في أوقات السمر ساحرني بمحيو و جنني و أسر شاغلني بنورو و كم أخجل القمر بس تنسى كيفنك و إنت الوحيد بالذات الكنا ذاكرينك محبوبي الجميل وفيما الملامة يا روحي وكلي هياما يا روحي ويامن تعامى يا روحي سلاما سلاما يا روحي وذكرى محبي يا روحي تموج بقلبي يا روحي وأنت بقربي يا حبيبي حياتي و حبي يا روحي أأهنأ وانت بعيــد ؟؟ ما كنا ناسينك والحب عليك إزداد غمر النفوس دنك لحن الحياة منك و ما تقول نسينا الماضي و صرنا ناسينك محبوبي الجميل
Post: #24 Title: Re: نماذج من الاغنية السودانية - الصباح ( 1- 10 ) Author: Emad Ahmed Date: 05-11-2014, 10:42 AM Parent: #23
الحبيب هارون لعلكم والأسرة الكريمة بألف خير بالله شوف الشعر الرقيق دا
من أنت يا حلم الصبا كلمات عبدالمنعم يوسف
من أنت يا حلم الصبا** من أنت يا أمل الشــباب من أنت يا من رحت ** أنشده ولكن لا أجــاب أرنو لصورتك الحبيبة ** بين أطيــاف الضـباب في الأرض في الأنهار في الشفق المنور في السحاب ** وأحسها في خاطري ** نورا تدفق في انسياب بالسحر بالآمال بالأنغام بالعــــطر المذاب بالورد بالأزهار بالكأس المتوج بالحــباب ** وأكاد أسمع في دمي ** صوتا تضمخ من شذاك حتى متى أبقى على الدرب الطـويل ولا أراك من أنت يا نفح المنى من أنت يا نور الصـباح ** لمتى أعيش بلوعتي أدعوك لهفان الجـــناح أبدا أسير مخـــيرا بين الروابي والبطـاح ويكاد يحرقني الظمأ وتكاد تسحقني الريــاح ** من وحي أوهامي خلقتك رغــم آلام الحياه يا صورة الحلم الذي قد شع في قلبي سنــاه يا ومضة الأمل الذي قد عشت عمري في ضياه ** شفتاك من ورق الورود وآه من تلك الشـــفاه وخــداك من شــفق المغيب وآه من خديك آه وعيناك يكمل فيهما ليل تسربل مـــن دجــاه ** وأكاد أسمعه يناديني ** أجل هذا نـــداك وأظل أهتف من دمي والوجد يخفق هل أراك يا حبيبي أنا يا روحي أنا هــــل أراك
هارون دياب يا صفوة ... لو لقيت لينا فرقه معاكم هنا ... يا ريت البوست ده سواقته تكون بي مهل ... و اتمني انو لما نجيب اغنية عن الصباح او المساء ... نجيب اسم كاتبها ... و مؤديها الاصلي ... و نموذج بصوته ان امكن ... او بالصوت الذي نحبه ... اما الصباح ( إن لاح ) يا هارون ... فكما قال ود الموج ... فهناك الكثير جداً ... و ممكن نجيب بتسلسل تاريخي لاوائل من كتبوا عن الصباح في شعرهم الغنائي ... هذا ان اردتم ... اما لو تحبوا كمان نجيب الاشياء البنريد سماعها كزهرات من بستان الطرب .. كمان حاضرين ... وده عربون محبه منى ليك :
مسّو نوركم و شوفوا المن جبينا صباح ... الصباح إن لاح ..لا فايده في المصباح ... عمك سيد عبدالعزيز ... و معاهوا كرومة ... وهنا بصوت الكروان الاخر بادي محمد الطيب ...
اها بعد ما عمك سيد عبد العزيز ( طفطف ) انوار الدنيا و قال كفانا ( نورها ) ... جاء ( ود حي العرب ) التاني عمك عبيد عبد الرحمن ... في بكائيته علي الحسناء التي كانت تمر في ( الصباح ) امام دكاني صاحبيه ( نعيم و النور ) ...
صَفوَةْ جَمالك صَافِي ... المَاء عَلى البَلورْ يَا نَعيم صَباحَك خير ... يَسعِد مَساك النُورْ نُور مِنْ جَمالك بَانْ ... لاَ نُور شُموس لا بدُورْ فُقت المَعاك في الجِيل ... فُقت المَعاك في الدُور يَالفي عُلاكَ بَعيدْ ... و سَمـــــــــاك سَابِع دُورْ
عمك عبيد عبد الرحمن ... وعمنا سرور ... وبصوت هاشم ميرغني ...
Post: #31 Title: Re: نماذج من الاغنية السودانية - الصباح ( 1- 10 ) Author: يحي قباني Date: 05-12-2014, 03:13 AM Parent: #30
تحياتي يا موسيقار ... مافي شك يا صباح يا زاكي من اجمل الاغنيات عن الصباح ... اعتقد انها كانت مجاراه لاغنية لمحمد عبد الوهاب لا اذكرها ... ولكن في نظري اكثر اغنية شهرة و رواجاً لن تفوت باي حال من الاحوال فلق الصباح للخليل ... و الحان الكروان كرومه ... هنا تسجيل مكتمل فيه ابيات لم يتداولها الاخرين كثيراً ... مع اللحو وشيخنا بادي
Post: #32 Title: Re: نماذج من الاغنية السودانية - الصباح ( 1- 10 ) Author: Zakaria Fadel Date: 05-12-2014, 07:06 AM Parent: #31
دائما ما ارتبط غناء الصباح عندي بأغنيتين.... الاولى جلبها الاستاذ الموصلي..والثانية للاستاذ عثمان الشفيع (رحمه الله) :- داك الصباح ..اهو لاح يا حبيب ..والبلبل الصداح ...جا قريب...جاك يشكو ليك من شوقو ليك ..صاح
لا اذكر انني سمعتهما من الاذاعة في فترة غير الفترة الصباحية... وقتها كانت برامج الاذاعة تكاد تكون محفوظة بالنسبة لنا...فإذا استيقظت من النوم ..وسمعت صوت محمد عبد الكريم تعلم ان الساعة السادسة و نصف لم تحن بعد (كان برنامجه ديني ينتهى مع نشرة ستة ونصف) بعد النشرة وعندما يأتي نفحات الصباح تأتي احيانا اغاني الصباح..فإذا لم تسمع الاغنية من الشفيع او ابراهيم عوض كاملة ..تعلم اذا ان برنامج ليلى المغربي لم ينته ..وقطعا سوف تحصل جرس الطابور في المدرسة اما اذا سمعت الاغنية كاملة ..عندها تتيقن ان هذه هي الاغان التي تأتي بعد الساعة ثمانية إلا ربع ..عندها يتملك الخوف ان يفوتك جرس الطابور و ربما جزء من الحصة الاولى ..فتهيئ نفسك (للجلد)
اغنية الشفيع كنت احبها جدا خاصةالمقطع الذي يقول (لو اسعفتني الذاكرة) (( الكون بديع ..وربيع جميل ..في خفة ساير...ومن الخميل اشجان كتير ..تحمل بشاير))....او كما قال الشاعر ... هذا المقطع و الموسيقى التي تليه كانت تعجبني جدا جدا اما اغنية ابراهيم عوض فكان صوته في الاغنية يأسرني جدا..خاصة عندما يردد بعد الكورس النسائي (يا زاكي العبير......عليهم كثير))) صوت ملائكي بمعنى الكلمة
Post: #33 Title: Re: نماذج من الاغنية السودانية - الصباح ( 1- 10 ) Author: Elmosley Date: 05-12-2014, 11:04 AM Parent: #31
فعلا حبيبنا يحي فلق الصباح اغنيه من اروع اغنيات الصباح وفيها مضامين وطنيه اجتماعيه عميقه لكن اذكر في طفولتي ان ياصباح يازاكي كانت تذاع يوميا في الراديو مثل السلام الجمهوري كل الود
وكلام كتييييييييييييييييييييير قلناهو اخر الليل سوا
موصلي ... وموج وقباني وخليل وعمده
وابو الجعافر وعاطف عمر وعزيز وزكريا فضل
ومن الفيسبوك جوك الحلوين
يسري كامي وحسين قاضي
وطبعا السواقة الاولي لي حبيبنا كبر
العاوز اقولوا :
المكان ده لو باريت جمالو بوديك الفردوس عديييييييييييييييييييل
وكان كمان ... يبقي الرماد كال حماد هههههههه
تحاياي ياحلوين راجع ليكم واحد واحد
وراجع للبوست بمزااااااااااااااااااااااج
Post: #36 Title: Re: نماذج من الاغنية السودانية - الصباح ( 1- 10 ) Author: Mohamed El Sheik Date: 05-12-2014, 02:45 PM Parent: #1
مساء الخير يا شباب ..
كيف ننسى ( حنان النيل ) وهي ( تغرد ) ...
ذاك الصباح اهو لاح يا حبيب و البلبل الصداح جاك يا قريب جاك يحكي ليك..جاك يشكي ليك من شوقو ليك..صاح يا حبيب
جاتك طيور تحمل زهور فوق الندى جاتك تزور حاديها نور فى الكون بدا و الفجر لاح يعلن صباح و الطير شدا جاك يحكي ليك..جاك يشكي ليك من شوقو ليك...صاح يا حبيب..
الكون جميل و نسيم عليل فى خفه ساير و من الخميل اصوات هديل تحمل بشاير.. و حديث طويل من فم خليل فى همس داير جاك يحكي ليك..جاك يشكي ليك من شوقو ليك..صاح ياحبيب
Post: #40 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-12-2014, 03:19 PM Parent: #36
Quote: هارون دياب يا صفوة ... لو لقيت لينا فرقه معاكم هنا ... يا ريت البوست ده سواقته تكون بي مهل ... و اتمني انو لما نجيب اغنية عن الصباح او المساء ... نجيب اسم كاتبها ... و مؤديها الاصلي ... و نموذج بصوته ان امكن ... او بالصوت الذي نحبه ... اما الصباح ( إن لاح ) يا هارون ... فكما قال ود الموج ... فهناك الكثير جداً ... و ممكن نجيب بتسلسل تاريخي لاوائل من كتبوا عن الصباح في شعرهم الغنائي ... هذا ان اردتم ... اما لو تحبوا كمان نجيب الاشياء البنريد سماعها كزهرات من بستان الطرب .. كمان حاضرين ... وده عربون محبه منى ليك :
مسّو نوركم و شوفوا المن جبينا صباح ... الصباح إن لاح ..لا فايده في المصباح ... عمك سيد عبدالعزيز ... و معاهوا كرومة ... وهنا بصوت الكروان الاخر بادي محمد الطيب ...
صباحكم نور مع اني وقعت عيني في هذا الجمال المساء لكن موضوعكم مازال صباح الأخ الفاضل دياب زي ما قال الجميل قباني السواقة براحة حلوة وبتدي البوست طعم خذ بنظرية العلامة البروف عليه رحمة الله ( ان تشطح وتتبحر في الهوامش وارجع للأصل والمتون لربط الموضوع ببعضه ) أغنية مسو نوركم فيها الكثير من ابداع البديع سيد عبد العزيز وقد قيل وفي ذمة الراوي أن الشاعر كان مسافر في لوري أو قطار ( مامهم المقصد وقت السفر ) قاصد موطنه ليلاً وسمع صوت الفتاة تناضم أمها أثر فيه الصوت وحنَّ لرؤيته وديل عالم بتبشتنوا لما يشوف جمال خلق الرحمن صبية صبية العِطر يشتهيها أمذنب إذا أنا أشتهيتُ او هو اشتهى أو قباني إشتهى لا والله الجمال سلاحه في العيون والصوت ومن هنا تطلق القذائف التي ترمي وتصرع ذا اللب حتى لا حِراك له وهنَّ أضف خلق الله إنسانَ المهم يا سيدي الركوبة تسرع وسيد يعجل بشروق طلة شعاع الشمس ليرى ذاك الوجه وفعلاً كان دفر الصباح الظلام أمامة وتبين الخيط الأبيض من الأسود وشاف القمر يجلس قرب أمها وتسلك البطن الجابتا الفي جبل عرفات وضعتا دي ترباية حبوبتا وكان مولد القصيدة والله أعلم لو رجعنا لكلمة ( مسَّو نوركم قال لي شخص ضليع في العامية السودانية يستخدمها بعض اهلنا في السودان لكنها كلمة فارسية قديمة استهوي الموضوع عقلي المحب لمثل هذه الاشياء في فترة دراستي في دولة المجر كان لي زميل ايراني سألته عن كلمة مسَّو ماتعني في لغتهم الفارسية القديمة قال لي ليت مسَّو بل مِسْو وتعني اطفي ما كان متقد ( يعني أطفوا نوركم ) لكن يا ترى هل كان يقصد سيد عبد العزيز هذه الكلمة بمعناها الفارسي القديم أم ماذا يستوي المعنى لو قصد مسّو بمعنى اطفو لكن لو كان يقصد بها معنى اخر فما أصل الكلمة وما معناها والسؤال موجه لقباني والعملاق صديق الموج وود القرشي لو نزل من عُلاهو الفوق ( لانو مزنوق دراسة الايام دي ) ونظر البوست ولحين ميسرة بنرجع تحياتي دياب وضيوفه
الأغنية بصوت البنا عاصم
Post: #39 Title: Re: نماذج من الاغنية السودانية - الصباح ( 1- 10 ) Author: Mohamed El Sheik Date: 05-12-2014, 03:14 PM Parent: #1
يا سلام .. ( الجابري ) .. والزهور بسمت لينا ..
تفرد .. لا يقارن ..
غايتو ( زول براهو ) .. كده ..
Post: #41 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-12-2014, 03:45 PM Parent: #39
في هذا الفيديو يروي الشاعر السر قدور قصة أخرى للأغنية أنها زواج عبيد عبدالرحمن أهدى هذه الأغنية سيد عبد العزيز للشاعر عبيد عبدالرحمن أنا صرت لا أثق في حديث الشاعر السر قدور الذي الأحيان يتقول على من مضوا وصار مثل الصحفي محمد حسين هيكل ( في يوم كدا الساعة 5 مساء كنت مع الرئيس جمال عبدالناصر وقال لي وقلت لي ) المهم برضو السؤال موجه للفطاحلة أو من له علم في هذا ما القصة الصحيحة التي سمعناها ورويتها في المداخلة السابقة أم قصة الشاعر السر قدور ؟؟؟؟
انتوا البوست ده سايقني واديني ويييييييييييييييييين.....؟
Post: #45 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-12-2014, 06:54 PM Parent: #44
Quote: الله .... الله ياخالد يامنسي
ينساك الموت والمرض قول آمييييييييييييييييييييين
ياخي انت جميل والجابك ليه ملاك وجميل
متعنا .....
متعك الله بالصحة والعافية
هارون دياب ماتشوف شر يا أبوي ولك مثال ما دعوت لنا به ( عوتك حلوة ربنا يحفظنا جميعا ) نحن بنهبش حفيظة الفطاحلة نحرك فيهم مشاعر البوح والقول الغريبة هم بخلاء وأهلهم أرابيب الندى ( القرشي .. قباني .. صديق الموج ) وها أنا منتظر أجابتهم على سؤالي
وسؤال أخر بكتبه بالاحمر عشان ما يمروا عليه مرور الكرام وهم كرام سمعت رواية هذه الأغنية عند كثير من الفنانين لكن أول مرة اسمعها يغنيها بادي ( ماوقع في عيني الفيديو دا ) كنت اقف عند بيت غير مستوي فيها ( غير صحيح ) لكن اليوم عرفت أنهم حفظوا هذا البيت خطأ واغرب شئ ( عاصم البنا نفسه يخطئ في هذا البيت وهو عند منهل هذا الشعر كيف استغربت أن يقول هذا استغربت ) الرواية التي يستوي معها المعنى كما جاءت على لسان الفنان بادي محمد الطيب
يقول فيها بادي
يا ليالي أحبابي ما شفيتي جِراح كان شفيتي فؤادي بمدية الجراح صرتَّ أتلّو حديثك في الوجود بصراح لو تليتبّو كتابي سميت بالشراح وهنا يستوي البيت
وعندما انزل نصها قباني يقول يسألوني أحبابي ما شفيتي جراح بل شفيتي فؤادي بمدية الجراح وهنا ايضا يستقيم المعنى
أنظروا كيف يرويها عاصم ورفاقه
يا ليالي أحبابي ماشفيتي جِراح بل شفيتي فؤادي بمدية الجراح وهنا لا يستوي المعنى وفيه ربكة لما توجع رأسك لو تمعنته ودققت فيما قال وتتسائل كيف وكيف كلمة من حرفين حولت معنى البيت مفروض ينتبه من يؤدون أغاني غيرهم لهذا لينهلوا من المنبع الصحيح وهناك الكثير والمشين في مطربي اليوم
لك الشكر اخي هارون على هذه المساحة من الجمال لكن يبقى السؤال ما النص الصحيح في هذا المقطع رواية بادي لا تتفق مع النص لكن ماقال مستقيم معنى النص مستقيم معنى رواية عاصم ورفاقه لايستوي فيها المعنى أغثني يا قباني
Post: #46 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-12-2014, 08:45 PM Parent: #45
Quote: انتوا البوست ده سايقني واديني ويييييييييييييييييين.....؟
إنتَّ السايق يا أخوي هارون دياب وامسك قوي في الدركسون ما تضيعنا امسك المجرى وأبقى عشرة سُواقة الرملا بتقدر عليها ؟؟؟ اصلو يا أخوي سُواقة الرملة زي الزواج من أوروبية لو مشكتَّ المجرى بتوحل
تنويه ما عارف صباحكم كمل ولا باقي فيهو شئ لكن انا صحيت بدري ويومي عصّر لكن لي عودة للصبح بعدما يصحى ود الوج صديق
بريدني شديد البي العصر مرورو من أغاني البنات أو لو صحت التسمية فن وغنا السباتة كما كانت معروفة به وهذا كان في زمان فيه ترى البنت حبيبها في مرته بالعصر كانت عادة الشباب القشرة علي سنقة عشرة والمرور قرب دار البريدو القلب والبنات تتاوق من فوق الحيطة شوفتو بس تكفيها إلى أن يجمع اللهبنهم في الحلال كان زمان والناس مستورة
الليلة وين أنا يا البي عصر مرورو
كلمتَّ ناس أمو دا عفوهم بِهمو جفاني دا الغالي وأوحى ما بهمّو الليلة وين أنا البي العصر مرورو
فرع البان يمايل وجوز عينيا يخايل وما خصاني في القايل أموت .. بس اشوفو الفيهو الرسمي خايل بلالي وين أنا البي العصر مرورو
خليهم يقولوا زي ما الناس يقولوا دا حبيبي البدورو بغرق في بحورو حبيبي بحر السماحة وإجو العُشاق يزورو بريدو شديد البي العصر مرورو
حبيبي جافاني ومشى ماجاني تاني ماقدر عشاني وما راعى إنساني تعال قدر عشاني والناس ما مريحاني بريدو شديد أنا البي العصر مرورو
أقوقي قِمرية وأمثل ليك حمامة قِدام الطيارة أبقى ليك علامة يوم رفع الكِسكتّا ياجنابو مع السلامة بلالي وين أنا البي العصر مرورو
خلوني خلوني دا مكتوب في عيوني تلات تسعات كُحلية ومارة بي الدورية حبيبي نور عينيا في الشرطة العسكرية الليلة وين أنا يا البي العصر مرورو
أسويك مرايا وأعاين ليك برايا شوف جني وغبايا من جني وغبايا فارقت حبيب قسايا بريدو شديد أنا البي العصر مرورو
إتمتع يمينك وإتمتع شمالك ويا المعدوم جمالك أدي الكورة دفرا أنا واقفا منتظرا يا قسيم ريدي لو تدرّى الليلة وين أنا يا البي العصر مرورو
لي مين إشتكيكا وفي عيني بشيلك القلب الظلمتو والقلب الحرمتو أنا سلمتو لي غيرك بلالي وين انا يا البي العصر مرورو
يا أخواني بامانة مرضي القديم جاني مافاكرا من تاني يعاود حناني يعاود حناني لي الزول الأولاني بريدني شديد أنا البي العصر مرورو
يا أخواني بامانة دا طولو طول البانة نفحتو السِيسبانة البعاند هوانا نرشو بي الجبخانة أحسد سجن كوبر وأجي أعبد الزنزانة
Post: #48 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-13-2014, 05:48 AM Parent: #47
ملهم كردفان ياملهمنا
عارف ياحبيب انا كردفان دي حكايتي معاها حكاية
لاشفتها لازرتها لا مشيته
لكن لو سالتني عن اي حاجة فيها برد عليك رد العارف
اجمل حاجة الاخوة في ملتقي ابناء كردفان بالدوحة
معتبرني كردافي عدييييييييييييييييل كده
حتي انوا حبيبنا قابل رئيس الملتقي السابق دائما مايمازحني
باني اخاف من الدنقلاوية عشان كده ماعاوز ادبل بالكردفانية هههههههه
محمد عوض الكريم القرشي الشاعر المجيد
ورفيق دربه الراحل الشفيع اوجدوا فيني مكانا لمحبة كردفان
والكابلي حكي عن بادية ام بادر فذادني تعلقا بذلك المكان .
وانت تمر بنا صباحا فتجمل صباحاتنا
واصفيك اقصي الود غير مقلل ان كان اقصي الود عندك ينفع
كن بالف خير
Post: #49 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-13-2014, 05:58 AM Parent: #48
وابدع الرائع الحبيب ازهري محمد علي
ولم يتخطاه ( سوق الصباح ) في الاغاني السودانية
فكانت ( وضاحة ) قمة في الروعة
اجاد تلحينها واداءها الراحل المقيم الاستاذ مصطفي سيد احمد
وبالمناسبة :
عندما اطلت امنية للدنيا بعد اسبوع من الرحيل المر لمصطفي
عاتبني اخي وصديقي خالد محي الدين باني لم اسمي ابنتي
( وضاحة او نوره او اي رمز من رموز اغنيات مصطفي )
وهو لايعلم بانها ولدت وسميت في غيابي
لكنا تيمنا اطلقنا عليها اسم نواره .
الرحمة والمغفرة للراحل المقيم
ولكل من انضم الينا في بوست الصباح
نهدي ---- وضاحة
والصباح الباهي لونك
Post: #50 Title: Re: نماذج من الاغنية السودانية - الصباح ( 1- 10 ) Author: حاتم محمد عثمان Date: 05-13-2014, 06:56 AM Parent: #49
الرجل الانيق / haroon diyab
دائمآ ننتظر جميل عطاءك لتنسج بحرفك الوضاء أشراق شمس من الابداع , لتنير وطن افتراضي يقيم فينا و قدغصنا معك في بحار متعددة من الفن السودانى الاصيل , وننتظر منك المزيد في لهفة وشوق لما يجود به قلمك من استمتاع , شكرآ جزيلآ بعدد نجوم السماء.
....
Post: #51 Title: Re: نماذج من الاغنية السودانية - الصباح ( 1- 10 ) Author: Zakaria Fadel Date: 05-13-2014, 08:23 AM Parent: #50
للاستاذ الراحل العاقب محمد حسن أغنية قديمة يقول مطلعها (نوّرت الكون ..يا صباح يا جميل ) يصاحبه فيها كورس نسائي قد لا ترقى لروائع الاستاذ ...ولكنها جميلة في إعتقادي
ولا ادري ان كنتم تعتبرون اغنية الفنان الرائع ..الاستاذ صلاح مصطفى (ضربت اقول ..صباح الخير ....واشوفك كيفن اصبحت) من اغاني الصباح ام لا ولكنها كانت من مقررات الاذاعة ايضا في الصباح أكثر ما اعجبني فيها...هو عزف الة معينة تصاحب الاستاذ صلاح عندما يقفل كل كوبليه بالمقدمة الاساسية (ضربت اقول صباح الخير ....واشوفك كيفن اصبحت) هناك عازف معين (بيعمل كسرة خفيفة) عندما ينطق الاستاذ بكلمة ( اشوفك ) ...بتجنن عديل كدة
Post: #52 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-13-2014, 01:52 PM Parent: #51
أغنية في الضواحي للشاعر خليل فرح
وهي أغنية تغنى بها كل فناني الحقيبة وكما تغنى بها بصحبة الموسيقى عثمان الشفيع ومن بعد تغنى بها مصطفى سيد أحمد والنور الجيلاني ونانسي عجاج وغيرهم كُثر وهي من الأغاني الخالدة فيها الدعوة لتمجيد البادية وسلامة الطبيعة فيها وفطرتة كل شئ هناك خليل فرح أبدع في هذه الأغنية
في الضواحي وطرف المدائن يلا ننظر شفق الصباح
والصباح لاح بهل الوشاح
وعودنا للصباح يا هارون بعد ما مرينا بي العصر (وبي العصر مرورو )
يا سلااااام هذا ولعمري اروع بوست نفتتح به الارضفة لهذا العام ولاعوام قادمات باذن الله ... التحية لك اخي فاروق دياب على هذه الروعة والتحية عبرك لكل الأباطرة الذين مرو من هنا ، يحيى قباني والضليع صديق الموج والمايسترو عزيز والشفيف خالد المنسي وكل الذين مرو بدون فرز والمعزرة لمن فاتني ذكر اسمه فكل الذين اثرو هذا البوست بمشاركاتهم كانو افذاذ وعمالقة ,, وبالله ابدا لينا من صباحك مالو احبابك جفوني ومالي يا ليل ألى ان تصل الصباح الباهي لونك وضاحة يا فجر المشارق ... واها انا من البوست ده ما زاحي لاجل غير مسمى ..
تحياتي : ياسر العيلفون
Post: #55 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-13-2014, 02:31 PM Parent: #54
كلمات قصيدة في الضواحي الشاعر / خليل فرح بك القصيد طبعا طويلة وهذا الجزء الملحن فقط
في الضواحي وطرف المدائن يَلا ننظر شفق الصباح
قوموا خلّو الضيق في الجنايّن شوفوا عز الصيد في العسائن يَلا نطرد نقنص نعاين النهار من حَر الكمائن كلـ بي يا جَمجوم أصلو خائن شوفو كيفن يبرّى الملايّن هبَّ شالا وكشح المُراح
للقنيص الخيل خفَّ راسّن نحن ما بنخاف من ميراسن المكارم غرقنا ساسّن والمجاهل من غيرناساساً وإن عطشنا نَمز مُر واسّن وإن عشقنا بنعشق محاسن وفي محاسن كفى يومنا راح
في الخميلة إنجلت المحاسن عيني حايرة وكيف قلبو قاسن البلاد حين قدميك قاسن الزهور حين شفتيك باسم وطاب حسنك هو يا محاسن الغصون زاد طرباً مياسن والنسيم فاح بسق الملاح
يا الطبيعة والواديك ساكن مافي مِتلك قط في الأماكن يا حلات النال في ثراكَّن ويا جمال البرعّن أركّن بي قفاهن تور قرنو ماكن لا غِشن لا شافن مساكن في الخُزام والشيح والبراح
مال نسيم الليل بي برودك نامت الأزهار فوق خُدودك غرد العصفور فوق عودّك النفوس ما إتعدّت حدودك ما عِرفنا عدوك مِن ودودّك بس أنا المقسوم لي صدودك يا حياتي وأملي اللراح ( اللـ ي راح )
شوف صباح الوادي وجمالو شوف خدارو وصيدو ورِمالو شوف يمينو وعاين شمالو وشوف فريعو الشال من امالو وشوف نسيم الليل صاحي مالّو البدر خجلان من كمالّو والصباح لاح بهل الوشاح
يا أم لساناً لسة معجّن كِلمة كِلمة وحروفو ضجّن ديل دموعك من نظرة سقَّن وخدودك غير داعي وجَّن دا دلالّي دا دلال معجّن ومحن الامات يا رداح ...
Post: #58 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-14-2014, 05:23 AM Parent: #57
واسعد الله صباحكم جميعا
شكرا للحبيب يسري كامي من نافذة الفيسبوك
وهو يقدم لنا هذه الوجبة الصباحية الشهية
في الضواحي وطرف المدائن
بالصوت الجميل للراحل مبارك حسن بركات
Post: #59 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-14-2014, 05:30 AM Parent: #58
وعودة للصباح الجميل
صباح الاشراق والامل
ونتذكر نفحات الصباح
وهي تاتينا ممزوجة بالتفاؤل والفرح
والامل بيوم جديد وجميل لكل السودان
كلمات لازلت اتذكرها وهي تتردد من جنبات الراديو
بصوت الراحلة المقيمة الاستاذة ليلي المغربي ورفيقة دربها
العملاقة يسرية محمد الحسن والكثير من مبدعي ذلك الزمن الجميل
لكل من نقل حرفا جميلا ورسم بسمة في وجه الصباح
وزرع املا ... وجدد يوما بكل جميل
لك الشكر كل الشكر فقد متعتنا وامتعتنا .
واجمل صباح زاد قلبي شوق
ما انت الحياة وانت بيك عشوق
Post: #64 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-14-2014, 02:59 PM Parent: #59
في الضواحي وطرف المدائن يَلا ننظر شفق الصباح
ويقصد الشاعر الخليل بالضواحي البادية خارج البنادر ويلّا ننظر شفق الصباح وما أحلاه الصباح شروقاً في البادية والأقاليم نِعم لا يعرفها إلا أهل الاقاليم والضواحي والبادية القمر والرمال والنيل والشروق والغروب والخضرة والوجه الحسن ( مع ديل كلهن )
[green]قوموا خلّو الضيق في الجنايّن
وكانت دعوة للخروج من ضيق البندر وزحمته وأيضاً كانت مجاراة لمن كتبوا قصائد مجدوا فيها المدين والحضر وكان ديدن الشعراء في ذلك العصر المجاراة في موضوع القصيدة والضواحي كانت أحدى قصائد تبارى فيها بعض من شعراء وقد أجاد وأبع الخليل فيها وشاع وصات قدرها ومشت بين الناس ترنموا بها في أسفارهم وحلهم وترحالهم وسكونهم ومازالت قوية متينة متى ما تسمعها تحن لها وتطربك وتهزك هزاً لان كل مفردة فيها تداعب المشاعر تحركها تفورها تهيجها بركانا ماتغنى مطرب بالضواحي إلا وجدت نفسك بدون ما تشعر تفاعلت حركة معها
دعوة في شكل أمر قوموا وهي فعل موجه لجمع من فعل الامر ( قم ) قوموا خلوا الضيق في الجنايّن والجنايّن والحدئق هي متنفس أهل البندر في أيام عطلتهم وتجد لك المناطق مذدحمة بهم ما من فج يومها تجلس فيه مع أسرتك أو أصدقائك يدعوهم أن يتركوا التزاحم في الجناين والحدائق لتفريغ تعب اسبوع مضى وتوتر أن يخرجوا ليروا أبداع الخالق في البادية ذاك الجمال الطبيعي الذي يدعوا من تلقاء نفسه ( وشفوني أنا ) تعالوا شوفوا عز الصيد في العسائن نعم .. تعالوا شوفوا جمال الغزلان ترتع في خضرة ممتدة ومياه جارية من حسن الخالق البديع والعسايّن : هي التلال المرتفعة او اي مكان عالي
يَلا نطرد نقنص نعاين
نطرد ونقنص : هي طرق الصيد طرد وقنيص وهي هواية يماسها من أحب تلك الحياة في البادية
النهار من حَر الكمائن تعالوا نقتل ذلك النهار الموقد بُقُل جمرو حي بالخروج للقنيص في البادية وحر الكماين : كان تشبيه دقيق للحر في البنادر والمدن شمس وزحمة تزيد الطين بلة كأنها تلك النار المتقدة في كماين حرق الطوب
كلـ بي يا جَمجوم أصلو خائن
جمجوم قد يكون يعني بها أسم كلـ به وقد يكون يعني بها أسم صديق ورفيق كان معه في القنيص يومها وجرت عادة الشعراء ان يشهدوا على ما حصل في قصيدتهم بذكر اسم أحد أو بعض اصدقائهم
ويقصدبكلمة خائن اي انه من الذكاء والمكر في القنيص ما يجعله أن يكون مثل الخائن بالنسبة لعدوه وهي ( الغزلان أو ما يراد صيده من بقية خلق الله يعشق الناس صيدها ) ويستخدم الكـ لب في الصيد وتستخدم من الكـ لاب نوع معين ( السلوقي ) وسميت باسم منشأها وهو موضع في اليمن الصديق يسمى سلوق ومن ما يميز الكـ لب السلوقي السرعة ... الذكاء .. طول الساقين .. ضخامة الصدر .. نحيف في منطقة البطن ( يعني مخصر ) شكله جميل جداً وقد تكون هناك صفات دقيقة له ونحن لانعرفها ويعرفها اهل الصيد واهل القنيص
شوفو كيفن يبرّى الملايّن هبَّ شالا وكشح المُراح
لو حملنا أنه يقصد بجمجوم ( اسم صديقه ) نراه يدعوا صديقه أن ينظر ويشوف ذلك الكلـ ب كيف يباري ويتبع القطيع من الغزلان بي الجنبة لا يطردها من الخلف إنما يسرع محازاة لها جرياً إلى أن يحدد صيده ويقفز فيها ( جب ) يجيبها الواطا صريعة تحته ويلحق به القناص ليمسكوا بالصيد وهبَّ شالا وكشح المراح والمراح : هو القطيع نعم ذلك منظر فيه الكثير من الجمال عندما يطارد الكـ لب القطيع ويظر بواحدة ويرميها فترى بعد سقوط الفريسة أن القطيع يتشتت بعد أن كان يجري مع بعض وفي أتجاه واحد وهي فطرة الخوف
Post: #66 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-14-2014, 06:27 PM Parent: #65
Quote: منسي ياصاحب
الله يزيدك جمال علي جمالك
نجضت الضواحي نجاااااااااااااض
وفرتكت فهم المدائن فرتيك الصح
تعرف يا هارون هناك الكثير من القصائد البديعة لابد من وقفة تأمل في مفردتها وانا بالذات عندي أغاني بتخليني معلق بين السماء والارض ( عارف الطيب شيقوق لو قرأ كلمي هذا بجيب مسجل ويشغلها لي ويخليني معلق ههههههه ) وهذه القصيدة بالذات توجب الوقفة فيها لان الماهر الحاذق الخليل مزج فيها وصف الطبيعة ويخرم مرة مرة يلقي لنا شئ عن محبوبة عشقها واسمها ( محاسن ) وأجمل شئ أنه كان يخبئ هذا ( الحب ) بين الأسطر أما أن تجيد قراءة ما تحت السطور أو تطلع من المولد معضيك كلــ ب ههههههههه يعني قصيدة شاملة وصف طبيعة البادية والضواحي ... غزل وشوق في للحبيبة ويحكي الهجر والبعاد... فخر والغريب والأهم انه دمج في بعض الاحيان في المقطع الواحد بين عزل ووصف وبين غزل وفخر بديع ورائع هذا الشاعر الخليل عليه رحمة الله
Post: #67 Title: Re: نماذج من الاغنية السودانية - الصباح ( 1- 10 ) Author: Emad Ahmed Date: 05-15-2014, 10:03 AM Parent: #66
Quote: و الجميل النادر الرشيد كسلا...وده زول عميق خلاس..!!!
الفنان الجميل الرشيد كسلا
Post: #68 Title: Re: نماذج من الاغنية السودانية - الصباح ( 1- 10 ) Author: Emad Ahmed Date: 05-15-2014, 10:16 AM Parent: #67
من اجمل أغاني الصباح أغنية لاح الصباح
في الفيديو أعلاه موسيقى
شعر عبد المنعم عبد الحي - لحن برعي محمد دفع الله - غنا : عثمان الشفيع
Quote: أبو دياب يا رشاشة أول مبروك ليكم إنت وعمو صديق الموج التعادل ... تصدق قبل كم سنة في منزل أخونا لقمان همام في بن عمران هذا الإسمه مجذوب أؤنسة ظبط ليك واحد جيت أوادعك يا قماري بالعود إنا لله وإنا إليه راجعون خلي ليك نص الحضور يبكي ... ما عارفها كان زول سجل السهرة دي ولا لا ... بالله ركز لينا مع السلطان أبو داوود
حاضرين ياحبيب وابو داؤود جاهز
ومن غيره دوزن الحقيبة .
تحياتي
Post: #70 Title: Re: نماذج من الاغنية السودانية - الصباح ( 1- 10 ) Author: Emad Ahmed Date: 05-15-2014, 04:52 PM Parent: #69
Quote: صدق قبل كم سنة في منزل أخونا لقمان همام في بن عمران هذا الإسمه مجذوب أؤنسة ظبط ليك واحد جيت أوادعك يا قماري بالعود إنا لله وإنا إليه راجعون خلي ليك نص الحضور يبكي ... ما عارفها كان زول سجل السهرة دي ولا لا ...
الفنان مجذوب أونسة
Post: #71 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-17-2014, 06:12 AM Parent: #70
Post: #72 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-18-2014, 06:20 AM Parent: #71
ومن اجمل اغنيات الراحل الكاشف
المقرت في الصباح
ياحبيبي قوماك ننفرد
اداها بكل الق وجمال الفنان الرائع
عباس تلودي
الاهداء لاجمل ناس واحلي اصحاب
Post: #73 Title: Re: نماذج من الاغنية السودانية - الصباح ( 1- 10 ) Author: عزالدين عباس الفحل Date: 05-18-2014, 11:13 AM Parent: #72
Post: #74 Title: Re: نماذج من الاغنية السودانية - الصباح ( 1- 10 ) Author: خالد علي محجوب المنسي Date: 05-18-2014, 01:53 PM Parent: #73
يا حليل يا هارون دياب ايام اللمة من الصباح جنب الأم تكب في الشاي من براد صيني وفي حلة مغطية علي الطقطاقة توجد اللِقيمات ( الزلابية ) أو بسكويت مخبوز في البيت شربوا شاهيهم ( كما يحلو لي أن اسمية بذاك النطق الطفولي ) قاموا إتلمو حول الأب منتظرين المصروف للمدراس القصيدة تعجبني ومرتبطة بذكريات حلوة وجميلة في ذهني ذلك الصباح الذي تغير طعمه الآن
وشوفوا الحلوين بصوت الفنان اللذي غنى هذه الاغنية واختفى عن وسائل الإعلام ولم يتمتع بصوته الجميل إلا ناس مدني الفنان محمد سيد أحمد
Post: #75 Title: Re: نماذج من الاغنية السودانية - الصباح ( 1- 10 ) Author: عبد المنعم سيد احمد Date: 05-18-2014, 02:57 PM Parent: #74
Post: #80 Title: Re: نماذج من الاغنية السودانية - الصباح ( 1- 10 ) Author: عبد الله شم Date: 05-21-2014, 05:49 PM Parent: #79
بوست جميل وسيدو جميل ياخي بوست شحمان زي دا ما نلقى زول يقول لينا في بوست بغادي امش عليهو ود حلال ساهي يدينا لكزة كوع مافي لمن لقيناهو روح وعمل صفحتين زمان يا هارون يا صديقي ونحن صغار كل جمعة بنتجمع في الديوان وبجيبوا الغداء جماعي ودي فرصة ياخي الزول يغير بكون حفظ اكل امو اغرب شئ لمن تجي تغير وتلقى نفس غداكم فيي الصينية القلت تغير بيها المفتح هو البوصي صاحبو الجنبو ياخي لو لقيت ملاح كدي وكدي في الصينية ادني لكزة كمان ياخي بوست جمع كل الناس الجميلة من محمد نور كبر والمنسي والموج وقباني وبقية الناس الحلوة ويفوت مننا حتى صديقي اللدود يسري الكومي من نافذة الفيس تحدث بلساني قال النضال لقيناهو ما جايب حقو مافي احسن غنانا وشعرنا نحن لم ننجح في شئ مثلما نجحنا في صناعة الكلمة بشقيها الشعري والغنائي الغناء السوداني شئ اشبه بالسحر الاسود والفودو ممن يغيرك 180 درجة زي احلام سمعتا باحلام . ويا بت يا احلام كدي قلَبي صاروخ صدام بتفجري والطالع الجبل بتنزلي والصائم رجب بتفطري ....
لم يترك لنا افذاذ شعراء هذا الوطن بابا والا طرقوه وبعنف .. الصباح والمساء نموذج اخترته انت وقطعا حالي كحال كبر وربماء اشد سوءا مما الم به حتى جعله يفارق البوست فراق المحب لمن عشق ... ياخي معليش ان ظهرنا وسط الجمال وكنا دونه بس حضرنا قلنا نحاول نتذكر معاك ونتالم برانا . . . وقطع شك بنجيك رائع تحياتي ومحبتي استاذي الجميل هارون دياب
Post: #81 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-22-2014, 06:21 AM Parent: #80
اسعد الله صباحك الحبيب عبد الله شم
وطبعا اجمل الصباحات كانت صباح الجمعة
بالنسبة لينا في بورسودان كنا ننتظر الجمعة
بفارغ الصبر لانها تجمع جميع الاهل خاصة العزابة
في البيت الكبير مع قراريص الملوحة والويكة
وطبعا في جماعة بتكون ( بايته معاهم من الخميس ) ههههههه
طبعا ديل اهم حاجة عندهم الشطوط والبصل .
المهم ....
بالنسبةلينا كان حضورهم يعني زيادة الدخل الاسبوعي
لانوا البيرسلك تجيب سجائر تنوم بالباقي
والداير بيبسي كولا يهضم برضو تنوم بالباقي
وهو عارفك انت نمت بالباقي بس عمل مجنون
يعني ماتعمل فيها تفتيحة .....
في وسط هذه اللمة انفرد الخال عباس امد الله في عمره
بانوا كان مابجي يدو فاضية من المطايب والهدايا واهم حاجة
Post: #82 Title: Re: نماذج من الاغنية السودانية - الصباح ( 1- 10 ) Author: haroon diyab Date: 05-22-2014, 06:26 AM Parent: #81
ورحل الله الفنان الجميل خوجلي عثمان
والذي غادرنا فجاة قبل ان نكتفي من سماعه
ومن اغنيات الصباح الجميلة
ياغالية ياصبح الهناء يانور حياتي الماونه
انساكي كيف واقدر انا ... الشوق معاي عده السنة
Post: #83 Title: Re: نماذج من الاغنية السودانية - الصباح ( 1- 10 ) Author: عبد الله شم Date: 05-22-2014, 06:37 AM Parent: #81
سلامات من جديد يا هارون كان لابد من ان نمرر على ابو عفان وبازرعه وان كان الصباح هنا عبارة عن مرسال فقط متمثلا في نسيم الصباح المعتق الرائع وناخذ اغنية زكرتني التي تقول
زكرتني حبيبي زكرتني زكرتني عهد الغرام واعدت لي ماضي الهوى يا ليتني القى المرام ونعيش سوى بعد النوى زكرتني ...
سميري يا خير الانام حيرت فكري بالدلال هيجت في قلبي الغرام وهجرتني بعد الوصال زكرتني ...
بالله يا ريح الصباح بلغها اشواق الحبيب زكرها بي عهد الصبا وعهد الوفاء واطفي اللهيب زكرتني ...
زكرها ليلات السمر ولنعود للعهد الجميل نصغي لانغام الوتر وتحت القمر بين الخميل زكرتني