10 دراهم على كل معاملة فى السفارة

السفارة السودانية فى ابوظبى والقنصلية فى دبى
يتحصلون مبلغ 10 دراهم على كل معاملة فى السفارة
تجديد او استخراج جواز او اضافة او جنسية او توكيل او توثيق شهادة

منذ فترة قصيرة عندما جددت جواز سفرى فى السفارة ابوظبى تم استقطاع مبلغ 10 دراهم
سالت المحاسب
واجاب هذا المبلغ لدعم النادى
العام الماضى فى جمعية نادى العين العمومية لم ترد حصيلة هذا المبلغ فى الميزانية وقالوا ان المبلغ يخصص لدعم حالات انسانية

حسب قانون النفع العام يمنع تدخل السفارة فى الاندية السودانية ويمنع جمع اى مبالغ مالية

هذه الاموال تجمع ولا تعرف لها اى اوجه صرف
الخشية ان تستخدم هذه الاموال فى تمويل انشطة سرية
او انشطة حزب المؤتمر الوطنى

الحبيب محمد


امس القريبه دي انا استغربت من الدعم للنادي ووقفت وقلت ليهم نادي العين ولا دبي ولا الفجيره ولا عجمان ولا ياتو نادي البتشيلو ليه القروش ده


الموظفين بقو يعاينو فيني وما قادرين يردو


الزول المعاي قال لي ياخ ارح نمشي ديل ما عارفين اي شيء ولحدي ما طلعت من السفاره مافي زول فتح خشمو

سلام عبس
ما عارفين كيف والعارف منو

اصلو نوع الجغمسة دى البتفح الباب للمأكلة
او اسوا منها بان تسستخدم هذه الاموال فى انشطة مريبة

سلام يا محمد
قصة أنو أي جهة تقوم تفرض ليها رسوم من راسها دي حاجة بقت كتيرة جداً وبايخة جداً جداً

- كان في حاجة اسمها دفتر الضرائب - دفتر سغيروني كده - كان في المغتربين فرضوهو على كل زول عايز يعمل اجراءات الضرائب في سنة من السنين

الموظفة قالت لي تدفع 30 جنيه حق الدفتر عشان نتم ليك الاجراءات
- دفتر شنو؟
. دفتر الضرايب ... بيكتبوا ليك فيهو الضرايب الدفعتها عشان ما تنساها
- أنا ما عايز أكتبها ... عندي الايصالات كفاية !
. لا والله لازم تشتري الدفتر
- يعني اجباري الدفتر ده
. أيوه اجباري
- طيب ما مشكلة .. خلينا نخلص الموضوع ... ودفعنا الرسوم .
أها الدفتر أستلمو من وين؟
. والله الدفتر مفروض تستلمو من موظفة هناك - واشارت لشباك خاوي من موظفته - لكنها اليوم ما جات
قسماً بالله ده حصل معاي شخصياً ... دفعت الرسوم ولليوم ما أدوني الدفتر وما طالبوني بيهو

الزميل : محمد : تحياتي :
ملخص تجربتنا في الدوحة :
- استقطاع 5 ريال رسوم
- جالية المستشار عبد المنعم ابو تفه2006 -2008 ناقشت المسالة وتمخض اتفاق بتخصيص 3.5 ريال لانشطة الجالية والمتبقي لمواجهة حالات اجتماعية
- منذ 2006 والاتفاق ساري، ووقتها كان راي البعض اللجؤ الى النائب العام لكن تم هذا الاتفاق.
- المبلع لا يدخل خزينة الدولة بايصال، وانما يتحصل بورقة صغير ( خدمات).
........
استعينوا بهذه التجربة.

سلام فيصل

حسب قوانيين دولة الامارات يحظر على الاندية استلام اى دعم او اموال
بعض الاندية اداراتها تعمل بتنسيق كامل مع السفارة
ادارة نادى العين عندما سالناهم لماذا لا تظهر هذه الاموال فى مبزانية النادى اجابوا انها تخصص للمساعدة
وليس هناك اى معلومات متوفرة

المبلغ يورد فى ايصال تجديد الجواز تخت بند دعم النادى

[B]** ود سيد أحمد..
** سلام ومساءك خير..
## أساساً كان يُقتطع مُنذ التمانينيات مبلغ 30 - واصبحت 40 درهم لبناء السفاره ولم تكن هنالك قنصليه ...
** تلى قيام القنصليه إقتطاع نفس المبلغ لبنائها..
** (ولاندرى أين ذهبت تلك المبالغ المُستقطعه؟؟؟؟)

** بقرار من المجلس الأعلى للجاليه والتى من المُفترض أن تُمثل مصلحة المُغترب قررت إضافة مبلغ 100 درهم لكل مُعامله فى القنصليه بدبى (لا علم لى بالسفاره فى ابو ظبى) لبناء القنصليه والنادى الأُم بدبى ..
** تم بناء القنصليه وفرشها من هذه الأموال المُستقطعه وصيانة النادى .. (وبناء بيت القنصل خلف القنصليه ولا علم لى هل تم الإستعانه بهذه المبالغ المُستقطعه أم تم بنائه من أموال حكومة السودان؟؟ )
** المبالغ القديمه المتبقيه من هذا المبلغ (تفوق المليوني درهم) وخوفاً من التصرف فيها وضعت فى حساب بإسم السيد كمال حمزه وهنالك إقرار منه بذلك فى حساب خاص وذلك لبناء النادى..
** مُنذ أكثر من ثلاث سنوات لايُعرف عن المبالغ التى تم تحصيلها إى شئ ولاتظهر فى إى ميزانيه ,, ومثلك تسألنا ولم نجد إجابه ؟؟؟!!

## ولايزال السؤال قائماً :-
** كم المبالغ التى تم تحصيلها لبناء النادى والقنصليه من الجاليه السودانيه بالإمارات والموجوده بحوزة القنصليه والسفاره ؟؟ (................ مافى معلوم)
** وإذا تم صرف إى مبالغ منها فيما صُرف ؟؟؟ ومستندات الصرف ؟؟ (................ مافى معلوم)
** ولماذا لاتحول هذه المبالغ شهرياً من القنصليه \ السفاره فى حساب النادى السودانى الأُم بدبى ؟؟؟ (................ مافى معلوم)
** وإذا سالنا عنها ؟؟ (................ مافى معلوم)
** ( الخوف تكون تستعمل للضيافه ) ( بحكم أنها مال سايب )
(ودام الود بيننا)

شكرا خى عبد الكريم على المعلومات

لسنوات طويلة كنا ندفع لبناء القنصلية فى دبى والان ندفع لدعم النادى فى ابوظبى
فى ايصال السفارة البند يكتب
دعم النادى
هل هو نادى ابوظبى
هل هو نادى العين

الاخوة فى ادارة النادى فى ابوظبى
هل تورد لكم هذه المبالغ

اخى عبد الكريم بخبراتك القانونية
كيف يمكن التعامل مع هذا الامر
وهل من سبيل لمعرفة اين تصرف اموالنا