Post: #1
Title: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 09:36 AM
Parent: #0
في اقسام الشرطة لاتطفاء الانوار ولا المرواح ، لاتوجد اعياد ولا جمع ولا اجازات تعمل الاقسام 24 ساعة في اليوم 365 يوماً في السنة ...... قسم الشرطة خلية نحل ناس داخلين وناس مارقين وبينهم ناس قاعدين .......... يا شغالين في القسم يامتهمين في الحراسات ............ ورديات تنتهي وورديات تبداء ............ الاف القضايا مرت من هنا كلها عبرت فوق طاولة الشاويش النبطشي ...... وعلى ذكر الشاويش النبطشي للبوليس ادبيات لايتنازل عنها فالشاويش النبطشي أو (الجاويش النبطشي) قد لايكون (شاويشا) في الرتبة وان كانت في الاصل رتبة (الشاويش لم تعد موجود) الان ........ لكن هكذا يسمي الشخص المسئول عن مكتب البلاغات ويطلق عليه إختصاراً ( ج ن) اختصار لكلمة (الجاويش النبطشي) ........... جرت محاولات عديدة لاعادة تسمية هذا المسئول (بالرقيب المناوب) ولم تنجح هذه التسمية ابداً وظل تعبير الشاويش النبطشي راسخاً في الاذهان ............ يقال للتدليل على صعوبة التغيير في البوليس ان الحاكم العام الانجليزي فقد مفتاح خزنته في بئر ........ وعليه تم تعيين حراسة على هذا البئر لحين استخراج المفتاح ........ وظلت هذه الحراسة موجودة حتى يومنا هذا !!!! 
|
Post: #2
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 09:43 AM
Parent: #1
في العادة لايتم فتح بلاغ الا بعد مقابلة ضابط البلاغات ويكون عادة من (الملازمين) او مقابلة الضابط النبطشي بعد الساعة 2.30م حيث تبداء مهامه ........... على الضابط الاستماع للشاكي او المبلغ ثم كتابة توجيه او شفاهة يخطر الشاويش النبطشي بفتح بلاغ تحت المادة المعينة ........... الضابط حديث العهد بالخدمة يستعينون بخبرة هولاء الشاويشية كثيراً في التقييم الصحيح للوقائع .......... ليس بالضرورة ان يكون الحل هو فتح بلاغ ........ فكثيراً ما يقوم الضابط بعمل الجودية والصلح او ابتدار الحلول خارج اطار الحل الجنائي ........ وكثيراً ما يحضر اشخاص ببلاغات لاترقي في فهم القانون لدرجة فتح بلاغ وهو مايسمي في القانون بالضرر ال######## ....... من بين كل هذا تمر بك بلاغات غاية في الطرافة واخري ممعنة في الغرابة واخري تراجيديا من الحزن .......
|
Post: #3
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 09:47 AM
Parent: #2
| Quote: وهو مايسمي في القانون بالضرر ال######## ....... |
ده شنو يا (ج ن ) المنبر ......... ده كلام علمي قانوني ما تشختو لينا ساكت
العبارة المشختة هي (الضرر التــــــــــــــــــــــا فـــــــه) للفائدة العامة.
|
Post: #4
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 09:55 AM
Parent: #3
البلاغ رقم (1)
شكلة في حمامة رقاصة
شكلة ليها ضل بين اتنين شباب كل واحد يدعي ملكية هذه الحمامة ......
المشكلة انو الحمامة ليس لديها (سيريل نمبر ولا رقم شاسي) ............
قومة وقعدة وشهود ووفود تدعم ملكية كل واحد للحمامة ...........
طيب مافي واحد منكم عندوا صورة مع الحمامة دي ممكن نستفيد منها كدليل ..........
طيب ياجماعة اقول ليكم حاجة انا عندي ليكم حل .....................
الحمامة دي تقعد مع كل واحد شهر وبعد الشهر يجيبه القسم نعمل تسليم وتسلم بينو وبين الزول التاني ..... موافقين
موافقين جداً ياجنابو ...............
قبل اكتمال الشهر كنت قد نقلت من ذلك القسم ........... ولا ادري ماذا حدث بعد ذلك
|
Post: #5
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 10:07 AM
Parent: #4
البلاغ رقم (2)
ببغاء بت الملحق العسكري
- قاعد في امان ربي في القسم .........
- يجي داخل واحد خواجة منزعج جداً ومعاهو بتو الطفلة الصغيرة بتبكي ......
- لا حول ولاقوة الا بالله ...... الليلة دي شكلها كبة كبيرة خلاس ......... ربنا يستر ....
- الخواجة طلع الملحق العسكري الفرنسي حسب كلام المترجم ..............
- طيب ياعمك القصة شنو ؟ ورأسي يودي ويجيب واقل حاجة جات في ذهني (اغتصاب)
- والله ياجنابو الجماعة ديل قالوا عندهم ببغاء شرد من القفص !!!
- والببغاء حق الشافعة دي وعشان كده هي متأثرة جداً وابت تمشي المدرسة .........
- طبعاً بعد كلام الخير والايمان قلت ليهم انو شرطة السودان لن يغمض لها جفن قبل ان تعثر على هذا الببغاء وتعيده لكم
- مرقوا بي جاي ونسينا الشغلة بي جاي .............
- الصباااااااااااح بدري عربية السفارة ....... تقيف قدام القسم ........ اهاااااا ان شاء الله لقيتو لينا الببغاء ؟؟؟؟؟؟؟؟
- امك الناس دي جادة شديد في الموضوع ده ...... وزادني المترجم من الشعر بيت بانو سعادة السفير شخصياً متابع البلاغ ده
- ربك رب الخير بعد تلاتة يوم وبالصدفة عثر احد افراد المباحث عي الببغاء لدي احد الاشخاص ........ واحضرهم الى القسم
- كم كان المشهد طريف ومؤثر وسعادة الملحق العسكري وابنته يحتضنون الببغاء ويذرفون دموع الفرح ........
- غايتو عمك اللقينا عندوا الببغاء مرق بمكافأة من سعادة الملحق ..... ونحن نابنا خطاب شكر من السفارة الفرنسية
|
Post: #6
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: نادر النور آدم
Date: 07-03-2010, 10:47 AM
Parent: #5
يا سعادتك .. تحياتنا
Quote: طيب مافي واحد منكم عندوا صورة مع الحمامة دي ممكن نستفيد منها كدليل ..........
|
قالو في واحد مسطول عندو قضية بتاعة إثبات ملكية بيت
أها القاضي قال عايز دليل إثبات
قام جاب ليه صورته وهو قاعد يرش في الحوش
___________
متابعين
|
Post: #8
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 10:57 AM
Parent: #6
Quote: قالو في واحد مسطول عندو قضية بتاعة إثبات ملكية بيت
أها القاضي قال عايز دليل إثبات
قام جاب ليه صورته وهو قاعد يرش في الحوش
|
موووووبالغة ياعمك ..........
البوست مفتوح للجميع ايدك معانا ..................
|
Post: #7
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 10:55 AM
Parent: #5
البلاغ رقم (3)
بلاغ ازعاج
- الساعة 2 م في احد ايام العام 1990م جرس الهاتف يرن في مكتب العقيد رئيس القسم
- الو منو معاي ..........
- معاك المقدم اركان حرب فلان الفلاني من مكتب السيد وزير الداخلية .........
- اهلا مرحبا ياجنابو اى خدمة ...........
- ايوه السيد الوزير سيزور قسمكم اليوم بعد صلاة المغرب مباشرة .....
- جداً جداً .............
- دب حماس كبير في القسم ترتيب ونظافة وحركة نشطة ورفعت حالة الاستعداد في القسم الى 100%
- تم ابلاغ العميد مدير المنطقة ونائبه واصدروا توجيهات فورية باعداد تجهيزات الضيافة وشددوا على ان تكون مواكبة
لفقه المرحلة .... بيبسي لا .. حلاوة لا ......... عرديب وكركدي وتبلدي + بلح وفول مدمس
- صلام المغرب اجتمع كل ضباط القسم ورئيس القسم ومدير المنطقة ونائبه ... وثلة من ضباط رئاسة شرطة الولاية
- وبدأت دقائق الانتظار تمضي بطيئة ...... حتى اذن العشا ... وصلينا ..... وبعضنا وتر وشفع ...... ولم يصل السيد
الوزير ........... الساعة الان 10 م وسعادة الوزير لم يصل.
- نادني رئيس فرع الجنايات ...... عمر امشي جيب (م أ) من بيتم وتعال سريع ..........
- (م أ) زول ود ناس مرتاحين وساكنين في حتة سمحة ..... هو ما صغير ولا كبير شديد ....... انا ما عارف الوصف العلمي ليهو شنو ....... لكن في السودان بنسميهو مجنون ......... وكمان بتاع مقالب .....
- مشيت جبته (م أ) باغته رئيس فرع الجنايات ..... ليه تعمل كده وتضرب تلفون تقلق الناس ......
- استغرق في ضحكة طويلة ............. انشاء الله بس ما تكونوا خستروا كتير ......... ههههههههههههههههههه
- مدير المنطقة الذي شعر بالاهانة امر بالزج ب (م أ) في الحراسة وفتح بلاع ازعاج في مواجهته
|
Post: #9
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 11:07 AM
Parent: #7
البلاغ رقم (4)
بلاغ ازعاج لم يتم
- (م أ) الشليق ده زااااااااااتو
- حرب الخليج الاولي قاعدين حارسين السفارة السعودية .....
- سعادة العقيد قائد القوة ..... قاعد في اللاندكروزر وانا واقف جنبو ........ (عقيد تاني ما داك)
- جاء (م أ) لابس بلدي فل سوت ..... جلابية بيضاء مكوية ..... عمة كبيرة ... ملفحة مطرزة ...... وعكاز
- السلام عليكم ......... وعليكم السلام ياسعادتك هكذا قال له العقيد .......
- الضحك شارطني لكن ابيت اقول للعقيد حاجة .........
- اهااااااا اموركم ماشة كيف ؟ سؤال من (م أ) الى العقيد .... والله تمام سعادتك كل الامور 100%
- قوتك كم ياسعادة العقيد ؟ معاك كم فصيلة ؟ عندكم جهاز اتصال والا لا ........ سيل من الاسئلة والعقيد يجاوب بسرعة البرق
- طيب مع السلامة ياجماعة وشدوا حيلكم البلد دي معتمده عليكم ......
- لا اطمئن تمام ياسعادتك مافي عوجة بتحصل .......
- انا لسعادة العقيد انت ياسعادة بتعرف الزول ده منو ؟ ابداً لكن اكيد واحد من متقاعدي الجيش او البوليس او وزير سابق المهم زول مسئول ....... والناس الزي ديل لازم تتجاوب معاهم وتشعرم بانهم لازالوا مهمين ....
- لكن ياسعادتك الموضوع ده ما كده ......... ده ما (م أ) المجنون !!!!!!!!!
- مجنون .... ياعسكري اقبضوا الزول ده .......... ودوهو القسم ............
- معليش ياسعادتك لكن الزول ده اصلوا بتاع مقالب وعليك الله خليهو ياخي ده زول مسكين ......
- انا بخلي الزول لكن انت الله قال بي قولك .........
- مافي مشكلة ياسعادتك طالما فكيت الزول ...................
|
Post: #10
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: Mohammed Awad
Date: 07-03-2010, 12:11 PM
Parent: #9
مرة ياجنابو ايام بقضٍى فى الالزامية الشاويش (ج ن)
حلق لى صلعة كدا بس مزاج منو...
القصة حرقتنى شديد...
العصرية كدا كبيت زوغة سريعة واقرب تلفون للضابط النبطشى
قلت لى معاك العقيد (ب ع ا) الشاويش النبطشى دا يقعد فى الحبس
لغاية ما انا اجى ... وربك رب الخير ال ملازم اول كان جديد
شيل خُتك الشاويش فى الحبس....
تانى يوم العقيد جا الساعة 12 وطبعآ الملازم اول كان شتت وانا زاتى
المهم نقيب بالصدفة جاب سيرة الشاويش فى الحبس على حسب التعليمات
العقيد قال لى تعليمات منو يازول انا لا اديت تعليمات ولا يحزنون
الزول مرقو من الحبس قعد لغاية الساعة 3 رجا الضباط كلهم مشوا
الساعة 3:30 الدورية جات فى البيت ومعاها 5 عساكر
وحاتك بعد الاجاويد الا بعد 5 يوم حتى شُفت البيت....
والا النقيب عصفور...ههههههههههه
والله دا ياجنابو الا فى الخاص
|
Post: #11
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 12:16 PM
Parent: #10
Quote: مرة ياجنابو ايام بقضٍى فى الالزامية الشاويش (ج ن)
حلق لى صلعة كدا بس مزاج منو...
القصة حرقتنى شديد...
العصرية كدا كبيت زوغة سريعة واقرب تلفون للضابط النبطشى
قلت لى معاك العقيد (ب ع ا) الشاويش النبطشى دا يقعد فى الحبس
لغاية ما انا اجى ... وربك رب الخير ال ملازم اول كان جديد
شيل خُتك الشاويش فى الحبس....
تانى يوم العقيد جا الساعة 12 وطبعآ الملازم اول كان شتت وانا زاتى
المهم نقيب بالصدفة جاب سيرة الشاويش فى الحبس على حسب التعليمات
العقيد قال لى تعليمات منو يازول انا لا اديت تعليمات ولا يحزنون
الزول مرقو من الحبس قعد لغاية الساعة 3 رجا الضباط كلهم مشوا
الساعة 3:30 الدورية جات فى البيت ومعاها 5 عساكر
وحاتك بعد الاجاويد الا بعد 5 يوم حتى شُفت البيت.... |
ظاهر عليك كارثة يامحمد عوض .............
|
Post: #13
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 12:50 PM
البلاغ رقم (5)
- من طقوس الضابط النبطشي في القسم الاوسط الخرطوم (الجنوبي سابقاً) ان يخرج كرسيه ويقعد امام باب القسم في فترة العصر المتاخر وقبل المغرب ....... وتمتد الجلسة مرات الى المساء حيث يحضر بعض الضابط في مرور على القسم او يحضر بعض الاصدقاء .........
- اثناء تلك الجلسة وفي حوالي الساعة 7 م حضرت امرأة تلبس توب ورغم قلة الضوء في الموقع الا انك بوضوح تري مسحة الجمال على وجهها ........
- وقفت على إستحياء على بعد خطوات وهي تنظر نحوي بنظرات مترددة ....... حيث كنت الوحيد الذي ارتدي الزي الرسمي
- نهضت واتجهت نحوها حيث فهمت انها لاترغب في الحديث امام شخص اخر .......
- ازيك ...... اهلا ........ كيف الحال انشاء الله ....
- صمتت واطرقت نحو الارض ......
- طالت مسافة الصمت ..........
- طيب تعالي خشي جوه القسم نفهم منك الحاصل شنو ؟
- رفعت رأسها ووجدت وجهها مبلل بالدموع .............
- يازولة مالك اى مشكلة ليها حل في شنو ؟؟؟؟
- الا مشكلتي دي ياجنابو ما اظنها تتحله .....
- ياخي ده كلام شنو انا بحل ليك مشكلتك دي بس اعرفه هي شنو ؟؟؟؟؟
- والله ياجنابو انا ما عارف اقول شنو ؟ والا اقوله كيف ؟؟
- ياخي اعتبريني زي اخوك او زول قريبك انا اساساً قاعد هنا عشان اسمع مشاكل الناس
- المشكلة ياجنابو انا حتى اخوي مابقدر احكي ليهو المشكلة دي وانا ما عارفه اعمل شنو ولمن حار بي الدليل قلته اجي القسم
يشوفوا لي حل ........
- طيب ما نحن عاوزين نشوف ليك حل لكن ما فاهمين المشكلة شنو ؟
- طلبت ليها كرسي وكباية موية حيث رفضت ان تدخل القسم واكتفت بالجلوس في الظلام خارج القسم ......
- ياجنابو باختصار انا مشكلتي ............
تابعونا ....................... لنعرف ماهي مشكلة تلك المراة وهل كان بالامكان حلها ؟
|
Post: #16
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: Mohammed Awad
Date: 07-03-2010, 01:44 PM
| Quote: ظاهر عليك كارثة يامحمد عوض |
يازول...
الحبسة البعديها فى الرئاسة
بقيت المجند اللواء طوالى
وعينك ماتشوف الا النور
|
Post: #12
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: فيصل عثمان الحسن
Date: 07-03-2010, 12:29 PM
Parent: #9
Quote: - ربك رب الخير بعد تلاتة يوم وبالصدفة عثر احد افراد المباحث
عي الببغاء لدي احد الاشخاص ........ واحضرهم الى القسم |
أنا خايفك ياعمر تكون اشتريت الببغاء زى ما عمل عمنا الرانكر , قال ليك
فى واحد من كمندانات الشرطة ديل قبل وقفة عيد الاضحى بيوم واحد الخروف الجابو
للعيد هرب , عمنا الرانكر بتاع المباحث مشهور بأنو أفضل من يتصرف فى هذه الحالات
ليتقرب للكمندانات عندما سمع بخبر الخروف الهرب , طوالى عمك دور بيت الكمندان وبدأ
يسأل فى زوجة الكمندان , كدى وصفى لى الخروف الحاجة ما صدقت طلعت ليك الخروف عجل عديل
سمين , طويل , ابيض وعندو غرة سوداء فى جبهته وفى رجليه الاماميتين , قربت تقول عندو شنب
عمنا الرانكر طوالى دور الزريبة وبدأ يفتش فى المواصفات القالتها زوجة الكمندان , أكيد ما
وجدها , لكن اختار الاقرب لتلك المواصفات واشترى الخروف وحمله لبيت الكمندان , وعندما حضر الكمندان للمنزل أخبرته زوجته بأن الضابط فلان هو من أحضر الخروف , وقال لقاهو بعد شارعين من شارعنا , أسع يا عمر اعترف اشتريت الببغاء بكم.
|
Post: #14
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-03-2010, 01:01 PM
Parent: #12
Quote: أنا خايفك ياعمر تكون اشتريت الببغاء زى ما عمل عمنا الرانكر , قال ليك
فى واحد من كمندانات الشرطة ديل قبل وقفة عيد الاضحى بيوم واحد الخروف الجابو
للعيد هرب , عمنا الرانكر بتاع المباحث مشهور بأنو أفضل من يتصرف فى هذه الحالات
ليتقرب للكمندانات عندما سمع بخبر الخروف الهرب , طوالى عمك دور بيت الكمندان وبدأ
يسأل فى زوجة الكمندان , كدى وصفى لى الخروف الحاجة ما صدقت طلعت ليك الخروف عجل عديل
سمين , طويل , ابيض وعندو غرة سوداء فى جبهته وفى رجليه الاماميتين , قربت تقول عندو شنب
عمنا الرانكر طوالى دور الزريبة وبدأ يفتش فى المواصفات القالتها زوجة الكمندان , أكيد ما
وجدها , لكن اختار الاقرب لتلك المواصفات واشترى الخروف وحمله لبيت الكمندان , وعندما حضر الكمندان للمنزل أخبرته زوجته بأن الضابط فلان هو من أحضر الخروف , وقال لقاهو بعد شارعين من شارعنا , أسع يا عمر اعترف اشتريت الببغاء بكم. |
مووووووبالغة ياسعادتك ....... غايتو بيني وبينك لو السفير ده عصر علينا شوية كان اشترينا ليهو ببغاء بس المشكلة ببغاء الجن ده زاتو يلقوهو وين
بالمناسبة صديقي رئيس احد الاقسام حكي لي قبل ايام عن سرقة جهاز ريسيفر من بيت احد اللواءات القدامي ....... صديقي لمن سعادة اللواء زنقو ما كان امامه غير يشتري ريسيفر مستعمل
ويسلمه لسعادة اللواء ................ عمك مشت فيهو الحكاية ...... لكن اولاده لاحظوا انو الريسيفر ماحقهم ..... صديقي استحلفهم بالله ان لايخبروا سعادة اللواء وقال لهم نحن لانفعل ذلك خوفاً
منه بل إرضاًء له وحتى لايخيب ظنه في الشرطة التى افني زهرة شبابه فيها ....... واعتبروه هدية ....... تفهموا الامر وعدت القضية بسلام ........ قلت ليهو غايتو عمك ده كان سرقوا منو شاشة بلازما
كان الضحك شرطك .................
|
Post: #15
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: عبد الرحيم محمد عبد الرحيم
Date: 07-03-2010, 01:12 PM
Parent: #12
عزبزى / عمر
طوال كتاباتناعن بعض من وقائع الاحداث التى وقعت ابان عملنا بالشرطة كان موضوع ج/ن يدور بخلدنا وبل وتفاكرنا مع الصديق المشترك الطيب عثمان يوسف على فتح بوست للكتابة عن الافذاذ من ج/ن الذبن نهلنا منهم الكثير بالاضافة للطرف التى مررنا بهابصحبتهم . الا ان ذلك الوعد تاخر . وكنت سباقا كما عهدناك دوما للتطرف لهذا الموضوع والذى امل ان تكون نسخة منه بحوش اخونا على سرالختم لخصوصية الموضوع - نامل ذلك .
سوف ابداء بالاشارة ل ج/ن -- عمك المرحوم عمر بمكتب بلاغات الخرطوم شمال والذى اكن اليه بكل ماتعلمته من العمل الشرطى فى بدايات عملنا بالشرطة (رحمه الله رحمة واسعة )وسوف نحكى عن الاخرين ايضا .
ولك مودتى وللاسرة
عبدالرحيم
ودبرى
|
Post: #17
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 06:38 AM
Parent: #15
Quote: عزبزى / عمر
طوال كتاباتناعن بعض من وقائع الاحداث التى وقعت ابان عملنا بالشرطة كان موضوع ج/ن يدور بخلدنا وبل وتفاكرنا مع الصديق المشترك الطيب عثمان يوسف على فتح بوست للكتابة عن الافذاذ من ج/ن الذبن نهلنا منهم الكثير بالاضافة للطرف التى مررنا بهابصحبتهم . الا ان ذلك الوعد تاخر . وكنت سباقا كما عهدناك دوما للتطرف لهذا الموضوع والذى امل ان تكون نسخة منه بحوش اخونا على سرالختم لخصوصية الموضوع - نامل ذلك .
سوف ابداء بالاشارة ل ج/ن -- عمك المرحوم عمر بمكتب بلاغات الخرطوم شمال والذى اكن اليه بكل ماتعلمته من العمل الشرطى فى بدايات عملنا بالشرطة (رحمه الله رحمة واسعة )وسوف نحكى عن الاخرين ايضا .
ولك مودتى وللاسرة
عبدالرحيم
ودبرى |
سيادتو عبدالرحيم ...... حبابك الف ........ اكتب ياخي البوليس يستحق ان يكتب عنه عن جنوده المجهولين من ناس المباحث ومكاتب البلاغات وحرس الزنازين اكتب عن قصصهم وطرائفهم
التى لا تنتهي ........... والبوست مفتوح لمشاركة كل الزملاء بالمنبر او خارجه عن طريق الايميل .............. [email protected]
|
Post: #18
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: نور الدين عثمان
Date: 07-04-2010, 07:46 AM
Parent: #17
ياجنابو ياخى ماكملت لينا قصة الاجنبية الاكتلت فى نمرة 2 ؟؟؟
فى دورة حماة السودان الاولى كنت موظف فى البنك الاسلامى القضارف ورشحونى للتجنيد وكان المعسكر فى الفاو المهم مشيت المعسكر بعد بدايهالمعسكر بى اربعة ايام ودخلت المعسكر وكنت قاشر وشاكى وشايل شنطة سومسنايت صغيرة كده المهم لمن وصلت لقيت الضابط وباقى الادارين قاعدين يفطروا وعلى طول قالوا اتفضل اتفضل بى حرارة كدة المهم ماصدقت خبر وبى بساطة قعدت معاهم وختيت شنطتى جنبى اقرب واحد لى كان ملازم بى دبورة فبدا يسالنى من وين :
انا من القضارف
الضابط لا انت تبع وين ( بهمس كده )
- انا اصلا موظف فى البنك وجاى ادرب فى .... وقبل ما اكمل الجملة
الضابط يعنى انت مجند وجاى تتدرب
انا ااىىى
الضابط قوم جاتك قنبلة
وحاتك من اللحظة ديك خلونى الف حول شجرة جنبهم ساعتين
|
Post: #19
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد عبد الماجد الصايم
Date: 07-04-2010, 07:50 AM
Parent: #18
يا جنابو
عندي تعليق حامض خارج المعيار!!
تستلمو sms ولا نديكـ ليهو شلوخ؟
|
Post: #20
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد عبد الماجد الصايم
Date: 07-04-2010, 07:53 AM
Parent: #19
التعليق دا طبعا بعد ما وصلت الحتة دي
Quote: تابعونا ....................... لنعرف ماهي
مشكلة تلك المراة وهل كان بالامكان حلها ؟ |
|
Post: #21
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: نادر النور آدم
Date: 07-04-2010, 08:23 AM
Parent: #20
Quote: تابعونا ....................... لنعرف ماهي
مشكلة تلك المراة وهل كان بالامكان حلها ؟ |
والله دي يا عمكـ أنا مشرور فيها من امبارح
|
Post: #22
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد عبد الماجد الصايم
Date: 07-04-2010, 08:26 AM
Parent: #21
نادر يا عمكـ .. مالكـ داير تخليني أفكها حامضة!
|
Post: #23
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: نادر النور آدم
Date: 07-04-2010, 08:29 AM
Parent: #22
انت طالما أديت الزول خيارات يبقى لازم تصبر
معليش أنا عارف انو الصبر صعب عليك.. لكن طوّل بالكـ
|
Post: #24
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 08:43 AM
Parent: #23
يانادر انت مشرور من امبارح ...... وودالصايم عندوا تعليق حامض عاوز يرميهو ومتردد ........
وانا ذاتي محتار ما عارف اكتب مشكلته دي كيف
تعرف الا الواحد يعمل زي الوقوف تحت الدش في الشتاء ...... تعد واحد اتنين تلاتة وتوش ........
|
Post: #25
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد عبد الماجد الصايم
Date: 07-04-2010, 08:53 AM
Parent: #24
جنابو .. بطّل لــ (ولوة) وخلّصنا!!
_
*
|
Post: #26
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 10:00 AM
Parent: #25
Quote: - طيب ما نحن عاوزين نشوف ليك حل لكن ما فاهمين المشكلة شنو ؟
- طلبت ليها كرسي وكباية موية حيث رفضت ان تدخل القسم واكتفت بالجلوس في الظلام خارج القسم ......
- ياجنابو باختصار انا مشكلتي ............
تابعونا ....................... لنعرف ماهي مشكلة تلك المراة وهل كان بالامكان حلها ؟ |
بالامس توقفنا عند هذه النقطة .......... وبعدها قالت ياجنابو انا مشكلتي مع زوجي .......
- قبل ان تواصل طلبت منها التوقف ... لكن المشاكل الزوجية دي ما من اختصاصنا الا اذا ارتبطت بواقعة ضرب او أذي
- او اى حاجة جنائية .........
- ياجنابو انا عاوزة زول يسمعني او زول اقدر اتكلم معاهو انا عندي مشكلة حقيقية ياجماعة ......
- طيب خلاص خلاص احكي انا ح اسمعك وربنا يقدرنا نقدر نساعد .....
- زوجك مالو بدقكك .... بشتمك ....... بجي البيت سكران ..... بتاع بنقو ..... بتاع قمار .... مالو يعني
- ولا واحدة من ديل ياجنابو .............
- في سري (ياجماعة دي مصيبة شنو )
- طيب مالو ؟
- تعرف ياجنابو انا من بعد الساعة 8 م تاني ما بضوق طعم للنوم او الراحة .....
- ليه ؟؟؟؟
- ليه دي ما ياها المشكلة زاته !!!!!!!!
- ياخي انا داير اقول ليك حاجة قبل ما تمكلي كلامك ده ...... خليك واضحة وسرك في بير ...... اها اتكلمي
- زوجي ياجنابو زول لا بكل لا بمل من الشغلانة دي ......
- ياخي قلنا ليك خليك واضحة عشان انا اقدر افهم واقييم التقييم الصحيح ... شغلانة شنو ؟
- حقو الشرعي ياجنابو زي ما هو بقول ....... يعني داير ينوم معاي الوكت كلو وكل يوم خمسة وستة مرات في اليوم
- يازولة ده كلام شنو ؟ ده كلام ما منطقي وما بخش العقل انتي كان ما دايرة الزول ده شوف ليك اى كلام تاني
- بعد ان بكت لفترة .... انا عارفه مافي زول ح يصدقني وممكن يقولوا على كلام بطال ....
- طيب اوكي صدقناك ..... انتي زعلانة في شنو او مالك زعلانة ......
- ياجنابو انا عايشة في الجحيم ده لي سنتين ودي حاجة لاتحتمل ..... انا خلاص فترته من القصة دي ......
- الحكاية دي بقت ظاهرة في صحتي ونفسياتي ..... مافي زول بستحمل كلام زي ده .....
- طيب هو فهمو شنو للقصة دي ؟
- ياجنابو هو كان عندوا فهم كان بعمل كده ....... معليش لكن ده زول عبارة عن حمار .....
- والله شوفي قصة مؤثرة ومشكلة حقيقية عاوزة حل لكن الحل ده ما عندنا هنا وانتي ما عندك طريقة غير تحاولي تتفاهمي مع الزول ده وتصلوا لاتفاق انو يقلل من الشغلانة دي .....
- حصل ياجنابو اتفقنا تلاتة اربعة مرات وكل مرة ينط من كلامو ......
- طيب اقول ليك حاجة خليهو يعرس تاني .....
- قلت ليهو الكلام ده ....... قال ما مستطيع مادياً ..... لكنو مستطيع يكتلني انا ...... الله يهدو .........
- طيب ما طلبتي الطلاق .......
- طلبتو لكن قدام اهلي واهلو ما قدرت اقول السبب الحقيقي ........
- انا غايتو ما عندي ليك حل الا اقول ليك الله يعينك ويهدي الراجل ده ويشفيهو الزول ده مريض ....
- ودعتني وشكرتني وحسيت في نظراتها انها قد ارتاحت كون هذا السر اصبح هناك من يشاركها فيها ويحمل همها وربما يكون بداية لطرحه مع اهلها او اهله .......
- لا ادري ماذا حل بها وهل انتهت مشكلتها تلك ام لا .........
|
Post: #27
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: سارة كرودى
Date: 07-04-2010, 10:16 AM
Parent: #26
جنابو اتاريك ما استغلته من هينه
|
Post: #28
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 10:28 AM
Parent: #27
Quote: جنابو اتاريك ما استغلته من هينه
|
ياخي الواحد سمع قصص لمن فهم حاجة ........
بس طبعا انتي عارفة القصص البحكيها للشفع في البيت نصها خيال .......
بالذات لمن يقولوا لي احكي لينا لمن (كنت شرطي قبضت على الاشرار كيف) او يقولوا ليك احكي لينا قصة لمن (لاقاك الاسد في الغابة)
ياخي انا كان لاقاني اسد في غابة كان اكون بكتب في سودانيز اونلاين اسه .........
الجماعة اظنهم قايلين ابوهم كان بمثل في مسلسل اطفال .......
|
Post: #29
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: Mohammed Awad
Date: 07-04-2010, 10:50 AM
Parent: #28
المعايير ياجنابو...
حتشمٍت فيك ود الصائم بالطريقة دى
|
Post: #31
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 11:04 AM
Parent: #29
Quote: المعايير ياجنابو...
حتشمٍت فيك ود الصائم بالطريقة دى |
ياعمك ياخي عشان نراعي المعايير تعبنا تعب المكوجي في صياغة القصة دي .......
|
Post: #32
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: Mohammed Awad
Date: 07-04-2010, 11:11 AM
Parent: #31
| Quote: ياعمك ياخي عشان نراعي المعايير تعبنا تعب المكوجي في صياغة القصة دي ....... |
|
Post: #33
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 11:12 AM
Parent: #29
Quote: ياجنابو ياخى ماكملت لينا قصة الاجنبية الاكتلت فى نمرة 2 ؟؟؟
فى دورة حماة السودان الاولى كنت موظف فى البنك الاسلامى القضارف ورشحونى للتجنيد وكان المعسكر فى الفاو المهم مشيت المعسكر بعد بدايهالمعسكر بى اربعة ايام ودخلت المعسكر وكنت قاشر وشاكى وشايل شنطة سومسنايت صغيرة كده المهم لمن وصلت لقيت الضابط وباقى الادارين قاعدين يفطروا وعلى طول قالوا اتفضل اتفضل بى حرارة كدة المهم ماصدقت خبر وبى بساطة قعدت معاهم وختيت شنطتى جنبى اقرب واحد لى كان ملازم بى دبورة فبدا يسالنى من وين :
انا من القضارف
الضابط لا انت تبع وين ( بهمس كده )
- انا اصلا موظف فى البنك وجاى ادرب فى .... وقبل ما اكمل الجملة
الضابط يعنى انت مجند وجاى تتدرب
انا ااىىى
الضابط قوم جاتك قنبلة
وحاتك من اللحظة ديك خلونى الف حول شجرة جنبهم ساعتين |
اشتغلت فترة في تدريب الدفاع الشعبي معسكر القطينة ........
واحد من المستجدين بعد ما تخرج قال لي والله ياجنابو لمن تجو لافين فينا في طابور الصباح ...... من شدة ما نحنا جعانين وانتو شبعانين نشم فيكم ريحة اللقيمات
|
Post: #30
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد عبد الماجد الصايم
Date: 07-04-2010, 11:04 AM
Parent: #28
| Quote: جنابو اتاريك ما استغلته من هينه |
يضحكـ يومكـ كلو يا سارة ياخ!
إنتو جنابو دا استقال بعد العرس ولّ قبلو؟
|
Post: #34
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: سارة كرودى
Date: 07-04-2010, 11:18 AM
Parent: #30
Quote: إنتو جنابو دا استقال بعد العرس ولّ قبلو؟
|
قبلو
|
Post: #35
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 11:49 AM
Parent: #34
البلاغ رقم (6)
- اليوم جمعة ...... نبطشية طويلة ومملة ....... مافي اى موضوع .......
- الدنيا حر والكهرباء قاطعة ........ زهج ######انة الف ..........
- وانا قاعد في مكتب الضابط النبطشي بالقسم الشرقي .....
- بعاين من شباك المكتب لي باب القسم ............
- راجل كبير بتاع 60 سنة كده ....... معاهو مرتو (شكلها كده) اصغر منو شوية ........
- عربيتم سمحة وهم شكلهم زاتم مرطبين ............
- قلته ياعمك ده بلاغ سرقة جاهز ...... كمية دهب وقروش ........ الخ
- والله ده لا حر سرقة ولاحاجة مالم الناس ديل عاوزين يعذبونا في السخانة دي .......
- دخل الراجل والمرة المكتب ........ بعد السلام والتحية ...... اتفضلوا اتفضلوا ...
- تراجع الراجل الى الوراء قليلاً واصبح خلف المرة بحيث لا تراه ...... واشار بيده نحو راسه بحركة نفهم منها في السودان
- ان الشخص المقصود مجنون او على الاقل رأسو ما تمام ....
- فهمت الاشارة سريع ...... وسالتها اهااااا انشاء الله خير ياخالة ........
- انا عاوزاك تطلقني من الراجل ده اسه ......
- ليه ياخالة عمنا ده ما زول ظاهر عليهو انو زول كويس
- ابداً انت ما بتعرفو ده مجرم ........
- لالا ياخالة الكلام ده ما صاح منك وانتو في النهاية عشرة عمر ياخي كدي ارجعي البيت واخدي راحتك ولحدي بكرة ربنا كريم .........
- لالا الزول ده ياجنابو لازم يتأدب ويقعد في السجن شوية .....
- جداً دي بسيطة اسه انا ادخلو ليك السجن ....... تعال ياحرس الزنازين سوقو الزول ده ودوهو الحراسة ......
- خلاص انتي خليك مرتاح في المكتب انا امشي عشان اتاكد انو دخلوهو الحراسة ........
- طبعا حرس الزنازين ما كضب خبر وقشط الراجل جوه الحراسة ......
- يازول انت مجنون والا شنو طلع الراجل ده ....... سقتو معاي مكتب تاني ........
- حكي لي القصة وانو المرة بقت عندها حالات زي دي كتيرة ومشوا لي دكاترة كتار لكن ما في علاج بتكون كويسة فترة وتاني تقوم عليها الحالة ......... واسه لو ما جيت معاها القسم قالت عاوزه تقع من البلكونة .....
- خلاص انته خليك هنا شوية ...........
- رجعت المكتب وتشاغلت عنها بمراجعة في اوراق امامي ......
- بعد فترة قالت لي ........ هو مرات كويس كفاهو لحدي هنا ياجنابو خلاص انا عفيتو .....
- جداً ياخالة نفكو بس عشان خاطرك واذا حصلت منو اى حاجة تاني تعالي كلميني طوالي ......
- مع السلامة مع السلامة ...............
|
Post: #36
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: ابراهيم الرشيد عبدالرحمن وراق
Date: 07-04-2010, 12:10 PM
Parent: #34
عمر يا صاحب
Quote: جنابو .. بطّل لــ (ولوة) وخلّصنا!!
|
تعرف عمك من زمن قصة لتل جونى وورنيش وموية نار انت معذبه
والله لو ما كنت خلصته كان عرقه طق من الزعل.
تحياتى
|
Post: #37
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد عبد الماجد الصايم
Date: 07-04-2010, 12:14 PM
Parent: #36
كلام سليم يا جنابو الرشيد .. لحدي هسي
منتظرين قصة الورنيش وموية النار!
يا زول .. داير بوستيكـ تعال انطق
أي لولوة منكـ بفكـ ليكـ أي معيار هنا!
|
Post: #38
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: عبدالعزيز حسين عبدالرحيم
Date: 07-04-2010, 12:35 PM
Parent: #37
قصص البوليس ما بتنتهي وجميلة وطريفه
مره في رئاسة بحري الشهيد عبدالباسط جبارة وكان عميد الزمن داك اكتشف هروب عساكر الخدمة للسينما ودخلهم الحبس حتى اليوم التاني واليوم التاني كانت مباراة الهلال والمريخ مقامة في مدني والسودان كله مستنيها
وكان مسؤول من الحراسات الرقيب عم عبدالله وهو هلالابي موت عمك عبدالله ظهر الصباح وقال للجماعة خلي العميد يمشي نفككم ومشى الضهر ما ظهر العصر ما ظهر وما يقدروا يكسروا الحراسة لانو ما بتنكسر إلا بي إجراءات طويلة المهم الزملاء جابو تلفزيون قدام باب الحراسة وشغلوا ليهم الكورة والجماعة متكدسين في الباب يتفرجو ومنتظرين عمك عبدالله يظهر أي لحظة الهلال جاب قون وفجاءة الكاميرا تجيب ليك عمك عبدالله في مدني بصفق فرحان بي قون الهلال الجماعة قعدو يجعروا
|
Post: #40
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 01:00 PM
Parent: #38
| Quote: مره في رئاسة بحري الشهيد عبدالباسط جبارة |
ياسلام يا عبدالعزيز ياخي ...... ذكرتنا زولاً سمح بالحيل ....... الف رحمة ونور تغشاهو وتوسع قبره .........
عبدالباسط سعد جبارة علمنا معنا اللتزام الشرطي بان يخصص كل وقته للعمل 24 ساعة في اليوم .........
علمنا ابجديات الاحساس بالمسئولية والحماس والجدية في العمل ..............................
ياسلام ياخي ايام لها ايقاع ايامنا مع الشهيد عبدالباسط ايام الباب الغربي والمظاهرات والاستعداد والتغطيات والكورة في الاستاد
وضباط البوليس اولاد الاشلاق ناس صلاح بابكر وصلاح الزبير وامين نورالدائم وامير حسن وباقي الشلة كرودي ومعاوية جعفر وعلاءالدين محمد الحسن
|
Post: #39
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: غباشي
Date: 07-04-2010, 01:00 PM
Parent: #37
Quote: قال ما مستطيع مادياً ..... لكنو مستطيع يكتلني انا ...... الله يهدو
|
والله يا جنابو الله يستر .... البوست ده قرَّب للخور
ود الصايم دافرو بس راجيك ترفع رجلك من الكلتش
|
Post: #41
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 01:05 PM
Parent: #39
Quote: والله يا جنابو الله يستر .... البوست ده قرَّب للخور
ود الصايم دافرو بس راجيك ترفع رجلك من الكلتش |
ياغباشي ...... لو بنكتب هنا زي ما سمعنا ......... خور شنو ؟ كان ودونا النظام العام
|
Post: #42
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: محمد البشرى الخضر
Date: 07-04-2010, 01:38 PM
Parent: #41
| Quote: ويهدي الراجل ده ويشفيهو الزول ده مريض .... |
ههههههه
يا مريخابي يا حاقد
|
Post: #43
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: omer osman
Date: 07-04-2010, 01:44 PM
Parent: #42
Quote: ههههههه
يا مريخابي يا حاقد |
بالمناسبة عمك ده بطريقتو دي ممكن يلعب في منتخب المانيا عااااااادي
|
Post: #44
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: أيمن الطيب
Date: 07-04-2010, 02:09 PM
Parent: #43
Quote: من شدة ما نحنا جعانين وانتو شبعانين نشم فيكم ريحة اللقيمات  |
الزول دا بالميت كان مفروض تخلى يلف القطينة زاتا سبعة مرات لمن الفيهو تكمل!! أنا كلامى خليهو إنت شن قولك
|
Post: #45
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: عبد الرحيم محمد عبد الرحيم
Date: 07-04-2010, 08:03 PM
Parent: #44
| Quote: ياغباشي ...... لو بنكتب هنا زي ما سمعنا ......... خور شنو ؟ كان ودونا النظام العام |
عزيزى / عمر
الف رحمة ونور على قبر الشهيد اللوء عبدالباسط سعد جبارة الذى عملنا تحت امرته بالخرطوم شمال ومنطقة الخرطوم .
اما ايام الباب الغربى مقر استعداد القوات .. فتلك ايام ازاهر جمعتنا وفى معيتنا صفوة من الاخوة الزملاء فكان هنالك دائما سعادة الرائد حينها عمر عبدالعزير والسادة النقباء المرحوم عبدالرحيم الطيب وعمر شين والملازمين اوائل الساخر محمد عبدالفتاح وحاتم حسن عبيد والسنى محمد ابراهيم وحسن عبدالكريم مرورا بمجدى الطيب وعبدالمنعم مكى وصالحة عبدالماجد والصديق الرقيق احمد ادريس الى جيل مجدى منصور وخالد عبدالمنعم والى جيلكم يقيادة مبشر واولاد القشلاق . وذى ماقال اخونا عصام العمدة (الكسرة مابتبقى رغيف وود الاشقلاق ماببقى ظريف ) بالاضافة الى شياب الاحتياطى الذيت ياتوؤن بصحبة فصتلتهم .والساقطين من الذاكرة . وعموما ذكريات من الباب الغربى .
والرحمة والنور على المرحوم المساعد دفع الله امين مخزن السلاح وظباخ حلة الاستعداد الشهيرة
والى الملتقى
ودبرى
|
Post: #46
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: عبدالعزيز حسين عبدالرحيم
Date: 07-04-2010, 10:31 PM
Parent: #45
الأخ عمر عثمان
Quote: ياسلام يا عبدالعزيز ياخي ...... ذكرتنا زولاً سمح بالحيل ....... الف رحمة ونور تغشاهو وتوسع قبره .........
عبدالباسط سعد جبارة علمنا معنا اللتزام الشرطي بان يخصص كل وقته للعمل 24 ساعة في اليوم .........
علمنا ابجديات الاحساس بالمسئولية والحماس والجدية في العمل ..............................
ياسلام ياخي ايام لها ايقاع ايامنا مع الشهيد عبدالباسط ايام الباب الغربي والمظاهرات والاستعداد والتغطيات والكورة في الاستاد
وضباط البوليس اولاد الاشلاق ناس صلاح بابكر وصلاح الزبير وامين نورالدائم وامير حسن وباقي الشلة كرودي ومعاوية جعفر وعلاءالدين محمد الحسن |
الله يرحم الشهيد عبدالباسط جبارة كان راجل كامل وأصيل
عبدالباسط جبارة بعرفه لمن كنت طالب في جمال عبدالناصر وكان برتبة رائد في القسم الغربي وكنا طلبة مشاغبين وبنقوم المظاهرات وكنا نلاقيه ونحييه ويحيينا وطلاب جمال عبدالناصر كانو بقوموا المظاهرات المظاهرة تبدا من المدرسة وتنتقل لي جامعةالفرع مره قومنا مظاهرة والبوليس اتحرك مع المظاهرة نحنا زغنا دخلنا القسم الغربي وكان فاضي مافيه شويه عساكر عيانين وشلنا كمية كبيرة من البمبان ودسيناهم في سطوح المدرسة الهي جامعة النيلين حاليا وبقينا نفك البمبان في البوليس وحصلت ربكة شديدة عبدالباسط مشى قلع الكاكي وجا بي نفسه وقابلنا وطلب مننا نرجع البمبان لانو العساكر حا يترفدوا لو الموضوع كبر ولي احترامنا وحبنا ليه رجعنا البمبان
وعبدالباسط ليه مواقف حلوة كتيرة معانا كم مره مرقنا من باب الحراسة بسبب الشغب ومره من محكمة النظام العام
رجعت أشتغلت معاه فترة قصيرة في رئاسة شرطة بحري وعلاقتي بيه كانت وطيدة وكان كأخ كبير ندعوا ليه بالرحمة ونشهد ليه بالنزاهة والخلق والامانة وحسن التعامل اللهم تقبله واحشره مع خير عبادك
اشلاق الغربي والمدرسة الانجلية ايام حلوة وذكريات ياريت الموصلي يجي هنا يحكي لينا عنها وعن اولاد الزبير وعن مركز غرب وبص الجبل الشهير بجرادة العشر
أولاد الاشلاق شفوت ومفتحين وعارفين اي حاجه
( واحد من أولاد الاشلاق ابوه صول ملتزم قاطعها معاهم شديد وصاحبنا مصاحب ليه حناكيش كدا مره في راس السنة واحد من الحناكيش قاليه الليله راس السنة جيب اخواتك مع اخواتي نعمل حفلة ود الاشلاق قال حفلة يازول نحنا كــلبــتنا حملت وتمت قعدت اربعة شهور ما ولدت شردت عشان تلد وما جات تاني خايفة من ابوي تقول لي اخواتك)
|
Post: #47
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: مزمل خيرى
Date: 07-04-2010, 10:46 PM
Parent: #45
بوست ممتع ...
ياجنابو الله يجازى محنك ياخ ... خليتنى اضحك فى انصاص الليالى زى المجنون...
|
Post: #48
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: مزمل خيرى
Date: 07-04-2010, 11:04 PM
Parent: #47
قضيت الخدمة الوطنية فى قسم بوليس منذ سنوات وكان فى جامع ملحق بالقسم.. فى صلاة ظهر وكيل النيابة جزمتو اتسرقت رجع المكتب حفيان.. وفتح بلاغ سرقة وهو داير يموت بالغيظ لانو جزمتو كانت جدييدة والايام ديك حرامية الجزم كانوا متلحين الجامع دا تليح شديد .. كل يوم سارقين جزمة وجزمتين ..
وكيل النيابة كلم ناس المباحث قال ليهم تجيبوا لى الزول دا .. وكلم العقيد ..
بقوا ناس المباحث كل يوم على زول يعمل تغطية فى الجامع .. ماقدروا يقبضوا الحرامى ..
بعد حوالى 10 ايام مولانا جاء مرور على الحراسات لقى ليك واحد نائم فى الحراسة وخاتى جزمتو تحت راسو
بعد شوية مولانا قعد يكورك ... جزمتى ... جزمتى ..
اتضح انو دا حرامى الجزم مقبوض فى يلاغ سكر ...
مولانا دا زول شاب وظريف ، قلت ليهو يامولانا عرفتها جزمتك كيف ...
قال لى الجزمة دى جبتها معاى من لندن ... بتغبانى ..
|
Post: #49
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: قمر الانبياء عبد الحي
Date: 07-05-2010, 10:32 AM
Parent: #48
اخونا عمر لك التحية
بتعرف ضابط اسمه عبد الرازق سالم صالح اخر عمل ليهو كان في الشرطة الامنية وهسي في امريكا
يقتلنا الحنين والشوق لهذا الرجل
|
Post: #50
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: أسامه الكرور
Date: 07-05-2010, 07:51 PM
Parent: #49
ياسلام عليك ياعمر
هذا البوست مرشح للإنطلاق بسرعة الصاروخ
كل ضباط البوليس يمتلكون ذخيره وافيه من قصص ج ن
وأشهر من عملنا معهم عمنا فى مكتب الجاويش النوبتجى عمنا عمر عليه رحمة الله - فهو كما ذكر الأخ عبدالرحيم من علمنا
شغل مكتب البلاغات وله من الطرائف كميات يحفظها ضباط الخرطوم شمال حينها ..
| Quote: بتعرف ضابط اسمه عبد الرازق سالم صالح اخر عمل ليهو كان في الشرطة الامنية وهسي في امريكا |
الأخ قمر الأنبياء
سعادتو عبدالرازق رجل معروف ومحبوب جدا
وهو أحد أفراد الدفعه 45 ( الآن هم برتبة اللواء)
له التحايا ولأسرته الكريمه
سنعود بحكاوى الجاويش النوبتجى لاحقاً
|
Post: #51
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: أسامه الكرور
Date: 07-07-2010, 10:11 AM
Parent: #50
عمر محمد عثمان
إنت مشيت وين ؟؟؟؟؟؟؟؟
دال ملحوقه .. تعال بى جاى
|
Post: #52
Title: Re: اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Author: عبد الرحيم محمد عبد الرحيم
Date: 07-07-2010, 04:10 PM
Parent: #51
[QUOTE]أولاد الاشلاق شفوت ومفتحين وعارفين اي حاجه |
اه الكلام جاب الكلام
وهم بقيادة العقيد عبدالرحيم عثمان النوروالعقيد امير حسن وهو من تبقى منهم فى الخدمة اما الاخرين فىالمنافى البعيدة
وفى اثين تخرجوا بدروس خصوصية والمغالطبن منهم سوف اذكر اسمائهم
عوما ايام الباب الغربى ايام تستحق اجترار الذكريات
ودبرى
|
