Post: #1
Title: مرثية لعمى الفنان عثمان اليمنى
Author: عمار محمد ادم
Date: 05-04-2014, 10:19 AM
من بيت ادم خليفة ولى جامع التويماب
ومن شجرة حب وريفة نحن الاصل حجاب
حليلو الفتق احزانا وحليلو الجرحو ما طاب
حليل اليمنى يا دانقوى وحليل اليمنى يا جقلاب
نعزى عكود وود جكوم حليلو البدر كيفن غاب
نودى الصايح البركل...دميعة جدى فى المنجل
وليه يااليمنى تتعجل...
يهز الحزن نخلاتنا....تحت وسبيطها يدلدل
حليل اليمنى يايمه... اكابس وماشى فى الضلمه
مغبى وما وعيت ضمه...اهضرب وبت بالحمى...
تكدر فينى يا زمنى...وتكتر ديمه فى محنى
مهيج وما سكن شجنى...حليل اللمه يا اليمنى
يغنى اليمنى مرفوع راس...حبابك ياجنى الفراس
وباقى العزى ليها اساس...مؤصل ومن كرام الناس
وامانى اليمنى ما حساس...وشوفو اتجلى فى الاعراس
فى نوره تاه غب وطرب...من الجمال عب وشرب
يتشابى فى عز اللعب....وحاتو العمى ماها كضب
فج الخلوق شق الدرب...كاتل كتير ما ليك ذنب
رغم العذاب نسكت نحب..هد الحزن قلبى وتعب
حليل اليمنى والطمبور...يطيب خاطرا مكسور
فى الوجدان يشع النور..وكت شقى بقيت مسرور
الجنيات تلف وتدور...تصفق فوق بنات الحور
حليل الونسه والضحات..بنطرب لى غنى السمحات
ونشرب شاينا والشربات...هو قالى اليمنى حى ما مات
قريتلو البقرة والصافات...وقتلو كفاى وحدى بوحات
ابوى يعزى تبيك....دفين فى القوز هو منى وليك
كل ما القاك اشيل واديك...وما بنساك دوام طاريك
عمار محمد ادم 3مايو2013
|
Post: #2
Title: Re: مرثية لعمى الفنان عثمان اليمنى
Author: ود الباوقة
Date: 05-04-2014, 10:21 AM
Parent: #1
البركة فيكم اخي عمار وللفقيد الغالي الرحمة والمغفرة
ايوة خليك مع الشعر وبلاش كلام في السياسة
بارك الله فيك
|
Post: #3
Title: Re: مرثية لعمى الفنان عثمان اليمنى
Author: مني عمسيب
Date: 05-04-2014, 10:39 AM
Parent: #2
Quote:
ايوة خليك مع الشعر وبلاش كلام في السياسة
بارك الله فيك |
ود الباوقة سيب الحسد الزول قاعد اتحلل بعد 24 سنة عقبالك 
|
|