وجه الشبه بين لصوص المال العام ونكتة كمسارى الحافلة

لا حديث هذه الايام يعلو على حديث السرقات والهبر المليارى لاصحاب الايادى المتوضئة التى قال شيخهم انها لا تسرق وقد كذب فى دعواه ،
ما علينا خلونا نشوف نكتة الكمسارى

Quote: لاصحاب الايادى المتوضئة التى

الاخ يوسف الخليفة المبارك سلام أظن هؤلاء كانوا علي نجاسة

تنظيم كامل على نجاسة؟

طيب ماشين معاهم ليه؟

الكمسارى جديد ما ناقش حاجة اول يوم سلّم الايراد كامل لصاحب الحافلة وقدره اربعون جنيها
تانى يوم قابل الكماسرة فى الموقف وعلموه حاجة اسمها ( الكُرُبْ )
تالت يوم شال 35وجاب لى سيد الحافلة 5 جنيه قال ليه وين باقى الايراد ؟ قال ليه : كرب يا عمك ! قال ليه لكن يا ولدى ما بسووها كدى شيل انت الخمسة وجيب الباقى .

Quote: الاخ يوسف الخليفة المبارك سلام أظن هؤلاء كانوا علي نجاسة

مرحبا اخى محمد
الطهارة الظاهرة لا بد ان تصحبها طهارة باطنة : لكن الجماعة ديل نظفوا العمم والشالات والجوانى خراب ووســـاخة شديدة .

Quote: تنظيم كامل على نجاسة؟ طيب ماشين معاهم ليه؟

د. محمد
ما عرفتك قاصد منو بى ميم الجمع دى

الجماعة البنهبوا فى البلد ديل نقول ليهم بالله عليكم ما تعملوا زى الكمسارى
دا وتسفوا الحاجة كلها اكلوا الشوية وخلوا الكتير لى باقى المساكين .

وهذه طرفة اخرى فى نفس السياق ولكنها حقيقية وقد حدثت فى قريتنا ومع ذلك فان لصوص المال العام طبقوها بحذافيرها ومعاها هوادة كمان ، الفرق الوحيد ان الذى حدث فى قريتنا تضرر منه شخص واحد ولكن الذى حدث جراء نهب المال العام تضرر منه كل الشعب السودانى .

قريبنا عنده لورى مشغل فيه سواق وجلابى والاتنين تماسيح وكرُبّاتهم كبيرة شديد ، وفى ساعة صفاء نفسى عاتب السائق رفيقه الجلابى بأنهم استاثروا بعائد الثروة كله فماذا تبقى لصاحب اللورى ؟ فما كان من الجلابى الا ان انتهره قائلا : يا زول كفاية عليه عضم اللورى دا ، فالكيزان اشتغلوا معانا بنظرية كفاية على الشعب ارض السودان دى ، ولكنهم للاسف حتى الارض لن يردوها سالمة كاملة بعد ان قسموا البلد واضرموا جميع اطرافه نارا.

حاشية : -
كرب - بضم الكاف والراء - تعنى ما يختلسه المؤتمن او البائع من ايراد البضاعة او الاجارة
جلابى : تعنى عند اهل الشاحنات والميكانيكية مدير الشاحنة الذى يكون رفقة السائق والمساعدى