عشمانة بت شيخنا النصيح( يوميات التنازع بين الكف والرف)

عشمانة بت شيخنا النصيح

عشمانة بت شيخنا النصيح
فتحت شبابيك النهار
الشافا من جهة الشرق قال تستريح
والشافا من جهة الغرب قال هابة ريح
وجها يطل من طاقة الوكت المودر في الغلاط
تقراهو حيره معلقة ومنسية في جدل الشراط
وتلقاه في النجمة المدسدسة تحت أباط
عشمانة من شباكا داسا الكلمة من تحت البلاط
مكتوله في أسر المكان مجروحة تسأل عن حريح
ضاق النهار بي نظرة من شباك معلق
بين جدار جواني بين سقف الوطن
يوم رجت الشمس الحليب الراضع العرق البذوب في كأس زمن
اترتعت خطواتها في شارع يودي وما بجيب
اتجرعت جقمة زمن .. شافت وطن عالي وفسيح ..
عشمانة ما سكرانة ... لكن السكات دردح عصب كان المسيكين في عشا الغنماية ...
في صوت المغنى وكت يلعلع
بالغنا الجافي القبيح
تالى الليالي ... عقاب صباح
تالى الليالي مصب نهر مجدوع على السكك القديمة ومستباح
أحلم بحر ... وانضم مطر إن كنت تحلم بي صحيح
وحبيبتي من طرف البحر جابت محارة وعنقريب
شفتك قريب .. وبديت أحسب كم تغيب
الجية ما شرط الفراق ... واللقيا ما ذنب البغيب
عشمانة من زمن التساب ... مشرورة في السعدة انتظار
مفروره توب غطى الرواكيب ... ماها ضل ..
الضل بيرمي وينسحب
ولا هي فل ... الورد حرفو بينكتب
تتهامس الحته اللقتنا مصورين في إلبوم الغابة ورياح المتعبين
يوم شفنا في المقرن طبنجة ومرفعين
من همسة أم در لي التواريخ ... تستريح عشمانة في النظره وتتوه
في ملتقى الأسف العميق بي منتهى الوعد الجديد
مرقت على الكنتين .. ولادها مطعمين بي لفحة الشباك
وبالزمن البضادي صغارو .. ايدا قصيرا من رف الحلاوة البسكويت
والصلصة والماجي .. ورغيف العيش
وما بتقدر تقول .. بكرة !! وما بتقدر تقول معليش
جناح أولادا ناقصو الريش
جناحا هي قصو عسس الليل وتمو عليهو بالتفتيش
مصاقرة الحاله ناقصة مرايا .. لا طفلا ولادتو سماية
قدر الشوف فراغ العين
قدر الطوف غرق حفيان .. وملوة عيش
وقدر القمحة سنبلة طالعة من شدة يباس وعويش
وقدرها مرتين الديش
وقدر أم قيردون .. الكودي .. لو طعم الشرك كشكيش
وتتذكر غناها الربا في قلب الوطن دعوات
وتكسر ضلفة الشباك .. تطير عين الشمس من بالا زي ميلين
ترك آخر السطر جيلين .. وتكتب بي قلم ما بتبرا إلا الحال
ونخطف من نواحي سؤالا كم شبال
ونردف فوق حصانا اللاهي عصفورين
وننسى زوادة السفره ودعا الوالدين
ولسه الجية فوق جيات
وطاشه لغتنا في البكيات
وما قرشتنا بين فكين .. سوى العاصفة الملبكة بالصمغ والحزن والمنديل
لسه بطانا شايلين في عيونم فرحه ما بانت
تعضعض اصبع الافق الطوى المشهد
أبت عشمانه تابى نهار وطن ممسوك
وسلت من حيط سيد المروه الباب
وشدت خيلا في رحلة مدن مسواكا لي سن الصباح اشجار
عتامير الزمن وحلانه في رمل الفريق اسرار
مداميك البنا المهدوم .. بتبني بيوت .. تخت شباك أمل مهزوم
لكن النهار صحيان على ضفة شمس بيحوم
وديك عشمانه من رقراق حياتنا المستحيلة تطل
مشربكة في غصن من شوق م######شة (م ك ل ب ش ة) قي ثواني الضلْ
وموحله في الطمي العجلان .. وشايلة على الكتف هم كلْ
أريتا حبيبتي بت وادي الرياح .. والعُشْب .. والقندول
بت النخلة .. فاتحة خير وفارعة طول
بت مسك الوطن فواحه في ساحاتو خاتية قول
نخب طول الطريق ماشين
نبعد ونستعد راجعين
وديك عشمانه تحلب ضرْع يوم غايب
توبا بقى الخريطة مشتتة العالم ..
جرينا معاها .. ما خالين خطى وأنفاس ..
وفي كل خطوة وَلْدَة يوم ... وفي كل يوم وقوع لي فاس
وفي فاسك عشق مكتول .. وفي المكتول حياة الناس
وفي الناس رغبة ما مطفية ... لي السفر البجيب الطاش
والطاش في مطار مستني فوق حَرْ الجَمُرْ .. طاشين
والطاشين هناك .. يقروك في يافطة محلات الدهب خاتم
والخاتم في اصبع من إيدين منسية في جيب اليتيم
منسية من زمن الغنا الخواف .. ومن زمن المدينة تعبي بكريها
وتقسم في تلوت الليل جواريها
وتلبس توب مرتق بي عصب بردان .. يشق الليل يعريها
وتلعن في عميق السر ... سلاليكا وطواريها
ومزازيكا وبواريها
مدينة تحب .. لى حد الموت حراميها
مدينة بتفتح الأحضان ... تزيد النار مطافيها
مدينة بلا تعب تنشاف .. على كل الجهات .. أسواق
مدينة تصفي عِرقْ الحُرْ تقسمو في كواريها
وتقطع من جذور اللهفة طاريها
مدينة الفيها .. ما ليها
مدينة الليها ما فيها
مدينة بتكتب الحجبات .. مدينة .. تدين لشاريها
مدينة تدين لكاريها
مدينة وكت يجينا جواب تدسو وَسُط مخاليها
مدينة تضيع العنوان
مدينة توقف الإنسان على حد الحَجَرْ والزيف ..
ولو وصلت نَهَرْ ألحان .. تقيف زي ليل تضاريها
ويا عشمانة .. في شباكك المقلوع نبت عصفور
وجنب المنجل المشروم نطق طمبور
وجنب الجدول المفطوم بموية الدونكي .. خير مصرور
وجنب المسطرين .. طوبتين .. واحده وسادة للميتين
وواحدة حجر أساس الجايي بكره قريب
وطولي من نظر تنشافي بيهو هناك
وطولي من وتر تتباهي بيهو هنا.

المكاشفي محمد بخيت

لك التحية مكاشفي وراجع واتمنى أن يكون النص كامل كما أرسلته لي.

أبو قصي

التصحيح:-
وديك عشمانة من طاقة حياتنا المستحيلة تطل
مشربكة فى غصن من سوق م ك ل ب شة بى ثوانى الضل*


ايضا بدلا من ( شايلى) الصحيح..شايلة على الكتف هم كل..
تحياتى وتقديرى
مكاشفى

شكرا ابوقصى ...فى حاجة بسيطة محتاجة تصحيح
فى ...(م######شة فى ثوانى الصل)
و(شايلة) هم الكل
تحياتى

مكاشفى

مكاشفي حاول تسحب البوست التاني لانه عامل بلبلة.
أبو قصي

ياسلااااااام...
الف الف تحية محبة...
وراجع والله تاني لعشمانة...
وياصاحب الحرف الندي..
ممكن نوزع علي الاصدقاء ...

عبدالعزيز ..شكرا على المداخلة ولك مطلق الحرية فى التوزيع
تحياتى

فوق بعد إدخال كل التعديلات ولك التحية استاذ مكاشفي

أبو قصي

شكرا ابوقصى ..تمام كدا ..بس عدل :-( بت ألنخلة فاتحة خير وفارعة طول)
فارعة مكتوبة فاعة...
تحياتى

تم