أضبط : استجواب والي الخرطوم مرتين .. واطلاق سراح المتورطين باسم فقه السترة !

كشفت لجنة التحقيق في تجاوزات واستغلال موظفين بمكتب والي الخرطوم عبدالرحمن الخضر عن توصلها لنتائج
واكدت استردادها لمبلغ 17,835,000 مليون جنيه عبارة عن :
9 قطع اراضي
5 عربات
مبلغ نقدي 2,400,000

المستردات تحصل عليها اثنين من موظفي مكتب الخضر
باستغلالهم لمواقعهم في استخراج خطابات باسم الوالي
لعمل تخفيضات في اراضي استثمارية وتخصيصها وحققو منها مكاسب لانفسهم و7 اشخاص اخرين

وكشفت اللجنة عن قيامها باستجواب عبدالرحمن الخضر مرتين جول الواقعة ودونت اقواله في المحضر

Quote: استخراج خطابات باسم الوالي

خالد ازيك

الحتة دي فيها ان ,,

--------------------------------------------
قالوا ما حيذكروا أسماءهم عشان عندهم أسر ! ! !

والشعب السوداني دا حقو وين ؟؟
مش مفروض التشهير بالناس ديل عشان يكونو عبرة لمن يعتبر ..
مش مفروض محاسبة كل من أكل مال الشعب المسكين دا ..
في القانون هناك حق خاص وحق عام ..
لو كان شالو من جيب الوالي يبقى دا حق خاص لكن دا مال الشعب وحق عام ..
لو سقط الحق الخاص اصلا ما بيسقط الحق العام ..

يا جماعة مافي محامي محترم يرفع قضية ضد الناس ديل ..

مرة فقه سترة ومرة فقه تحلل الله لا كسبهم ..

وتداولت الاخبار بان الفاسدين تم اطلاق سراحهم بناء على ما سمي بفقه السترة
الا ان اللجنة اشارت في مؤتمر صحفي ان اطلاق سراح الموظفين المتورطين جاء بعد تحللهم من المال واسترداده منهم
واكد رئيس لجنة التحقيق بالانابة المستشار ياسر احمد صالح
ان اللجنة توصلت الى اقامة بينة كافية في مواجهة المتورطين في الفساد
نافيا وجود ما سماه بفقه السترة
ووصف الجريمة بانها تمت بذكاء من قبل الموظفين المتورطين

Quote: ووصف الجريمة بانها تمت بذكاء من قبل الموظفين المتورطين

جريمة
وتمت بذكاء ..
وبعد دا اطلاق سراحهم؟

الوالي طلع قاعد ام فكو وجماعته حرامية
كدا متورط وكدا متورط

Quote: الحتة دي فيها ان ,,

سلام يا فتحي
الموضوع بي كاملو فيه ان
بداءا من الايدي المتسخة التي قيل عنها متوضئة
وانتهاء باجسادهم النتنة الخائبة
وصدقني ستحاكمهم الجماهير واحد واحد

هو الوالي كان فاضي ما يومي ناطي من ماليزيا لي الهند والصين والعجيبة كمان فيينا واكيد نسا مفاتيح الخزنة وقام واحد من اولاد ال.................. شال المفتاح والباقي انت عارفوا
بعدين قبال سنة الامن الاقتصادي اداهوا خبر لكن طبعا الوالي شغال بي فهم اذا جائكم........................ واكيد بتاع الحركة وكيل عريف بسوق موتر التشريفات يشتري بيت في كافوري بي خمسة مليار ويعزم الناس لي كرامة البيت ومن ضمنهم الوالي وعااااادي الوالي ماشاف حاجة مامنطقية (يمكن لقي عرق دهب ولا كمان يكون اتصل بيهو الاغا من MBC
وما ممكن ناخد الناس بظاهر القول
بعدين منو هو العفيف النظيف البقدر يسال الوالي ماكلهم في الهوا سوا

Quote: يا جماعة مافي محامي محترم يرفع قضية ضد الناس ديل ..

سلام يا هشام
جرائم النهب والفساد التي برع فيها الاخوان المسلمين لن تسقط بالتقادم
كذلك جرائم القتل التي نفذوها على طول البلاد وعرضها وزهقوا ارواح الابرياء
كلها سيحاسبوا فيها فردا فردا .. وقريييب

وبعد دا اطلاق سراحهم؟
-----------------
في ظل حكومة الفاسدين اتوقع اي شئ يخطر على البال
هذه عينة من الكذبة الذين جاءوا تحت اسم القوي الامين
يا لها من قوة
يا لها من امانة

كنت متاكد ان خيابى المؤتمر الوطني في هذا المنبر
اضافة الى فقهاء الحيض والنفاس من الاخوان المسلمين والسلفيين هنا
سيفرون من هذا البوست فرار الصحيح من الاجرب

Quote: وأن اللجنه توصلت إلي أنه ليس كل ما بحوزتهما جاء عن طريق الحرام ..وهنالك ممتلكات تملكاها قبل دخولهما للوظيفه العامه في حكومة الولايه وبعضها جاء عبر إجراءات سليمه ..وتقول اللجنه لكنها وجدت أملاكا لم يستطيعا تبريرها وهي مثار الشك ..

الوالي طلع قاعد ام فكو وجماعته حرامية
كدا متورط وكدا متورط
------------------
باسط يا مكي
صدقت يا عزيزي
لكنهم ينهبون ولا يستحون

الأخ خالد العبيد سلام مربع
أخبارك منقطعة النظير.. بس تظهر مع الفساد ..
قلت الجرائم دي ما بتسقط بالتقادم يعني شنو؟
هل تقصد لمن حيكومة سيدي تجي ممكن نفتح الملفات بتاعت السرقات دي كووووووووولها ونفتح بلاغات ونقبض الناس ديل ونعملهم سلطة عشان خاطر الشعب؟
كان الكلام دا صحي شيلوا الصبر .. لما حيكومة سيدي تجي تاني عوجة بتجيكم مافي.
تحياتي.

كبـّاشي الصـّـافي
(العوج راي والعديل راي)

Hussein Musa · الأكثر تعليقا · University of Pune
.سجل..احفظ..دون..يوم الحساب قرب..ستكون هنا جهنم..وهناك جهنم..
رد · أعجبني· منذ ‏7‏ ساعات

.

هو الوالي كان فاضي ما يومي ناطي من ماليزيا
--------------------------------
الاخ صادق
الاخوان المسلمين لصوص المؤتمر الوطني هربوا اموال الشعب السوداني الى ما ليزيا فعلا
لكن ثق تماما ان هذه الاموال ستعود الى خزينة الدولة طال الزمن ام قصر
ديل حرامية مكانهم الطبيعي السجن

حتى الاسلامي حسين خوجلي
يلمح باشتراك والي الخرطوم في اكبر فضيحة فساد مالي في السودان ويقول: مكتب الوالي عبارة عن شلة وعصابة من الحرامية
التحقيقات والايام القادمة ستكشف المزيد .. لسان حال الفاسد يقول علي وعلى اعدائي

ناصر المحسي
التحقيق في فساد الوالي وطاقم مكتبو لسه في بدايتو
ويا ما تظهر ارقام وذمم لم تكن في الحسبان ... والاخبار تقول:
تتضارب الأرقام حول سرقة عشرات المليارات من الجنيهات في جرائم فساد وإستغلال سلطات منظمة من قبل طاقم إدارة مكتب والي الخرطوم
والقضية التي تشغل الرأي العام السوداني يجري فيها تحقيق واسع من قبل جهاز الأمن والمخابرات عبر إدارة الأمن الإقتصادي
وننتظر!

عزيزي الفاضل كباشي
سلامات
بالتاكيد قضايا السرقة ونهب المال العام لا تسقط بالتقادم
أي حكومة ديمقراطية قادمة يمكنها ان تعيد الاموال المنهوبة الى خزائن الدولة
شكرا لك يا صديق

تجار الدين
كرهتونا الدين

هل تنفذ دولة الشريعة الكاذبة حد السرقة على حرامية مكتب الوالي
ام تقام الحدود على الضعفاء المساكين

اهتم الإسلام بالأموال اهتمامًا عظيمًا وحماها حتى جعل المال شقيق الروح ومساويا لها في الحرمة
فقد ثبت عنه صلى الله عليه وسلم أنه قال: كل المسلم على المسلم حرام ؛ دمه وماله وعرضه .
وقال أيضًا في خطبته المشهورة:
إن دماءكم وأموالكم وأعراضكم عليكم حرام ، كحرمة يومكم هذا ، في بلدكم هذا ، في شهركم هذا رواه البخاري .

قصة قصيرة
_________

كوز لصاحبو: ياخي تعال نسرق لينا عشرة مليار
و بعدين يا طلعنا منها ب " فقه السترة" او قانون " التحلل من الثراء الحرام"
سرق الكوزين مبلغ العشرة مليار..
و اشتروا بها عقارات في وسط الخرطوم..
و بعد اربع سنوات باعوا العقارات بتلاتين مليار..
و عندها تم اكتشاف سرقتهم..
و لم تنجح كل محاولاتهم لسترهم ب" فقه السترة"
اتصلوا بكل الكيزان الكبار..و ذكروهم بالهدايا التي اعطوها ليهم
من خراف و سيارات و مصاحف هذا غير تبرعهم للحزب و لبناء اربعة مساجد
في محافظة شرق النيل..
المهم في النهاية تمت احالتهم لقانون " التحلل"
موظف الثراء الحرام: يا " اخواني" لازم ترجعوا مبلغ العشرة مليار الشلتوها
من المال العام، و بعد داك نطلق سراحكم..موافقين ولا موافقين..
احد الحرامية الكيزان: موافقين يا سيادتك..بس ادونا فرصة شوية انت عارف
احوالنا بقت صعبة شوية و انشاء الله بعد سنة سنتين تكون عندك العشرة مليار
موظف الثراء الحرام: سنة واحدة يا " اخواني"، ولا ح نسجنكم...
الحرامي الكوز التاني: خلاص ..خلاص يا زول سنة..سنة..هسع خلاص فكنا ورانا صلاة
و صايمين بكرة...
موظف الثراء الحرام:خلاص ح نطلق سراحكم هسع..بس توقعوا على التعهد دا..بارجاع المال الحرام
احد الحرامية الكيزان: جيبوا يا سيادتك..نوقعو هسي.. و نتخارج..و ما تنسى تدينا رقم حسابك البنكي
موظف الثراء الحرام: و دا داير كلام..انا مجهز ليكم رقم حسابي و تلفوني..تلقو في الظرف الابيض الهناك دا..

----------------------
الاستاذ سعد مدني
في بوست مجاور

القوي الامين الدكتور عبدالرحمن الخضر
يتراس الاجتماع قبل الاخير في مكتب الولاية

.
واللهِ يا ود العبيد حسين خوجلي دا إنتيكه بشكل !
يعني قبل يومين تلاته كِده إقترح إنو يكون في صندوق ولا ماعون ، بعدين أيِّ
واحِد سرق حاجة من مال الشعب يجيبها ويختها براحة كِده ويتخارج ، عشان يبرَّيء
ذِمته !! ويخصص ذلك المال الذي كان منهوباً وعاد، لمساعدة المساكين !!

أمس جاب حكاية ( أولاد مكتب الوالي ) وإنهم رجَّعوا المال المنهوب ،
وقال المال دا طوالي يوضع في الصندوق الذي اقترحه !!

يعني المسألة هي معروفة بالنسبه لحسين قبل ما يقترح، وكان بعمل تمهيد عشان يبرر حكاية (فقه السُترة )
..يعني يتم إرجاع المال ، ولا يتم التشهير بالحرامية !!

(لكن دي كِده ما واضحه يا حسين ) !!

اهلين محمد فضل الله
حسين خوجلي واحد من اتفه كوادر الكيزان
اكتر من تلاتين سنة شايل دلوكة الاخوان يطبل ويشتم في الاحزاب
بعد فضيحة الوالي قال لوالي الخرطوم:
(شنو بثق فيهم ،نحن كان ما متنا شقينا المقابر)
ملمحاً بذالك لإحتمال مشاركة أو علم والي الخرطوم عبد الرحمن الخضر بفساد منسوبيه
والكلام ده مذكور في موقع مجاور
يا حسين اركز وارجل مع الكيزان حتى نهاية الشوط... خلاص بديت تنفنس؟

توقيعات اللص المتوضئ على اوراق الاختلاسات
ماذا تعني ؟!!

بنقولكم يا مفسدين ..
العندو دين ..
ما بسرق البلد العبادها موحدين ..

اهلين دكتور المشرف
الكيزان لا دين لا اخلاق لا سمعة
عينهم مكسورة وهم عارفين ليه !

شكرا لك

كون وزير العدل بالانابة لجنة للتحقيق برئاسة مستشارين بوزارة العدل وعضوية ممثلين للشرطة وجهاز الامن والمخابرات الوطني وولاية الخرطوم وذلك بتاريخ 25 مارس 2014م وأشارت اللجنة الى أنه بعد التحقيقات الواسعة التى طالت أشخاص لا صلة لهم بالولاية فإن الوقائع التى توفرت تجعل القانون الواجب التطبيق هو قانون الثراء الحرام والمشبوه لسنة 1989م نظراً للذكاء والحيل الشديدة التي إستخدمها المتهمون بتسجيل الاراضي والعربات والاموال تحت أسماء وهمية فاذا ذهبت للمحكمة يصعب إثباتها ضدهم مشيراً الى ان الاجهزة الامنية قامت بمجهود كبير في التوصل الى خيوط هذه القضية الشائكة وبناءً على ذلك تمت التحريات بموجب قانون الثراء الحرام والمشبوه وتم قبول التحلل من المشتبه بهم عن الاموال التى تحصلوا عليها بدون وجه حق وفقاً لاحكام المادة (13) من القانون المذكور حيث تم إسترداد مبلغ 17,835 مليون جنيه هي قيمة (9) قطع أراضي سكنية و5 عربات و 2,4 مليون جنيه نقداً تم ارجاع الاراضي للدولة والاموال الى خزينة الدولة واكد نائب رئيس اللجنة انه في حال رفض المتهمين من التحلل من المال الحرام فان خيار اللجنة الثاني هو اللجوء للمحكمة وفقاً للقانون .

سفوا وتحلّلوا!! عطاف محمد مختار

[email protected]

خرجت علينا لجنة التحقيق في قضية (التربح الحرام واستغلال الموظفين للنفوذ بمكتب والي الخرطوم)، التي فجرتها (السوداني) وصارت قضية رأي عام؛ خرجت علينا اللجنة بتقرير يثير الحيرة والتعجب والدهشة في آن واحد. فاللجنة الموقرة التي شكلتها وزارة العدل برئاسة مستشارين وعضوية ممثلين للشرطة وجهاز الأمن والمخابرات الوطني وولاية الخرطوم، اكتشفت في تحرياتها مع الموظفين، أن ثرواتهم من نهب أموال الشعب وصلت إلى (17.835.000) جنيه، وهي عبارة عن أراضٍ وعربات وأموال نقدية.
اللجنة الموقرة حللت المال فقط من المشتبه بهم، وهم يحومون (معززين مكرمين) في الخرطوم، يمدون ألسنتهم للشعب السوداني، ولسان حالهم يقول: (أعلى ما في خيلكم اركبوه).
حسناً فعلت اللجنة بإعلان حيثيات التحقيقات على الإعلام في المؤتمر الصحفي الذي عقدته. ولكن كيف للجنة أن تطلق سراح المشتبه بهم دون عقاب، يتنفسون هواء الحرية الطلق وكأنهم لم يرتكبوا أيَّ فعل يرتقي إلى مستوى الجرم. ألا يكفي أنهم تربّحوا بالحرام، وأكلوا الأموال دون وجه حق، وتاجروا بها في سوق الله أكبر (وقلبوا بالقروش) عشرات المرات؟.
اللعبة التي كان يلعبها موظفا مكتب الوالي كالآتي: يقومان باستخراج خطابات باسم الوالي، لعمل تخفيضات في الأراضي الاستثمارية، لأشخاص آخرين - لأنه يحق للوالي إعطاء تخفيض قد يصل إلى (50%) من قيمة الأرض مع التقسيط - ويستفيدان من فرق السعر الحكومي والسعر التجاري (في جيوبهما)، بينما يستفيد الأشخاص الآخرون من التقسيط.
موظفا مكتب الوالي قاما بإدخال "قروش" الأراضي في صفقات وتجارة بيع السيارات، حتى تنصرف عنهما الأعين، وهاك يا قلب في القروش، حتى وصلت ثروتهما إلى المليارات.. إلا أن منزل الضابط بمكتب الوالي، أثار الشبهات حوله من قبل الأمن؛ فكيف لضابط صغير أن يمتلك مثل هذا المنزل.. دقسة الضابط الصغير أوقعت معه الموظف الكبير الذي كان "حويطاً" جداً، ولم يثِرْ حوله الشبهات بإظهار أيٍّ من مظاهر الثراء حوله، وكان يقول إنه يمتلك (محل حلاقة) فقط كمصدر دخل آخر.
القضية المطروحة الآن، والتي لا بدَّ أن تجيبنا عليها وزارة العدل ولجنتها الموقرة: لماذا تمت محاسبة المشتبه بهم بقانون الثراء الحرام فقط؟.. حيث يتم التحلل من الثراء الحرام والمشبوه، (حسب المادة 13-(1) يجوز لكل شخص أثرى ثراءً حراماً أو مشبوهاً أو ساعد في الحصول عليه أن يحلل نفسه هو أو زوجه أو أولاده القصر في أي مرحلة قبل توجيه الاتهام إليه، (2) لأغراض البند (1) يتم التحلل برد المال موضوع الثراء الحرام أو المشبوه وبيان الكيفية التي تم بها الإثراء).
ولماذا لم تقمْ اللجنة بتوجيه تهمة الغش والتلاعب في الخطابات الرسمية، التي حررها المشتبه بهما باسم الوالي؟ ألا يعتبر ما قاما به ضمن "الغش والتلاعب والتزوير"؟.
معاقبة المشتبه بهم فقط بقانون الثراء الحرام، تترك الباب مفتوحاً على مصراعيه لكل من تسوِّل له نفسه السرقة والتلاعب بأموال وممتلكات الشعب، فالرادع غير موجود، لأن من سبق وطالته يد العدالة، يقدل حراً طليقاً خارج أسوار السجن.
يجب أن يجد كل اللصوص وآكلو السحت من أموال الشعب العقاب الذي يجعل أصحاب النفوس الضعيفة يراجعون حساباتهم ألف مرة قبل أن يقدموا على السرقة.
بغير ذلك، سيصبح الأمر (سداحي مداحي)، أي موظف مفتح يستغل نفوذه ينهب ويقلب بالمال السايب سنوات عددا، وإذا انكشف أمره بعد (السف) يقوم بعملية (التحلل) فقط.
لاحول ولا قوة إلا بالله
------------------------------------
مقال ممتاز واسئلة في الصميم
شكرا للاستاذ عطاف مختار على المتابعة النبيهة