Post: #1
Title: أما بعد ...
Author: Asma.A.Salih
Date: 04-25-2014, 09:28 PM
بسم الله الرحمن الرحيم
تحية طيبة ... اما بعد ...
لعلكم طيبين , شداد ونصيحين
ياخي من الاخر كدا انا أطالب بتعيين مُدرس خصوصي لاي ( برلوم/ة ) زي حضرتي ( وش بدون ملامح )
نمبر ون ... من يوم سجلت وانا لابسة نظارات القراية ( وش حزين جدا )
نمبر تو ... هي وحدة في الاتنين يا انا بومة يا انا بومة تو ( وش مستهبل ) والسبب أني قدر ماحاولت افهم المشاركات دي شغالة بياتو نظام غلبني ( يعني احيانا ارد لي على شخصا ما , اجي اكتشف ان ردي عليهو ظهر فيما يلي مشاركته وبعديها تظهر مشاركات بتاعة ناس رادين قبالي ( وش محتار )
نمبر ثري ... وروني بس كيف اكبر الخط و كيف الونه عشان اللون الاسود ده تعيس ياخي ( وش حازم جدا )
نمبر فور ... قدر ماحاولت افهم حاجة غلبني
ياخي نمبر فايف ( الوشووووووووووووووش ) القاها وين ؟؟؟
المهم ... نود طمئنتكم نحن بخير ولا نفتقد سوا رؤياكم الغالية
وختاما ... البطان كلللللهم طيبين و العيد ده ناس حبوبتي معيدين معانا و فاطني بت خالتي ولدت وسمايتها كانت امبارح وقالت الا تسمي الولد بكري ( وش مجرب فيتامين واو )
تخريمة شمال ... نسيت اشكر الاستاذ الوافق يسجلني رغم انه حايكتشف اني لم اجتاز اختبار اقتباس المشاركات والرد بالشكل الصحيح ( وش ممتن جدا يا أدمن )
وبقفى الجواب تكملة واضافة ...
ممكن اعرف كيف اشوف المشاركات الجديدة بدون ما اضطر اشوف كل صفحة المنبر العام واقعد افتش
ووين لوحة التحكم ياخي , عايزة احدد طريقة متابعتي للردود والمشاركات
والوصية بالمهلة .. اشترط في المدرس الخوصي ان يشرح لي الصور ( معليش ياخي ذكائي بصري كان ماشفت مابصدق ومابفهم اساسن ) وش بريء براءة ماعادية
|
Post: #2
Title: Re: أما بعد ...
Author: سليمان القرشي
Date: 04-25-2014, 09:35 PM
Parent: #1
مرحب حبابك اسماء
غايتو اسعلتك الكتيرة دي
محولة لخبراء البورد الا
نحن ناس مطايبة ساهي
تسلمي
|
Post: #4
Title: Re: أما بعد ...
Author: Asma.A.Salih
Date: 04-25-2014, 09:53 PM
Parent: #2
يطيب عملك ويطيب خاطرك اخوي سليمان
الا ماقلت لي الخبرا ديل ياهم منو ومنو عشان نمشي عليهم عديييل و نستفسر ؟
|
Post: #3
Title: Re: أما بعد ...
Author: ياسر بيناوي
Date: 04-25-2014, 09:38 PM
Parent: #1
اولن
الف مرحب بيكي في هذا الحوش
وسم سانيا براحة علينا انتي يادوبك اربعة يوم منبر
ونحن خمسة سنة وبرضو في حاجات ما واقعة لينا
وسم سالسا خبراء المنبر هسه بجوا بس اخنقي الصبر
وسم رابعا
سم رابعا شنو ؟
خالص الود
|
Post: #5
Title: Re: أما بعد ...
Author: Asma.A.Salih
Date: 04-25-2014, 10:08 PM
Parent: #3
ههههههههههههههههه ( اها هسي شفت الوشوش كان حاترحمني من القهقة دي )
على كلا ... تقصد تقول اني زولة مشكلجية وجاية من اولها اطالب بالحقوق المسكوت عنها ( اهااااااااااااااا , معناها انفع اقود حزب الانتفاضة ضد استايل المنبر وتكون دي سابقة ) هع هع هع
|
Post: #6
Title: Re: أما بعد ...
Author: سليمان القرشي
Date: 04-25-2014, 10:12 PM
Parent: #3
sudaneseonline.com/cgi-bin/sdb/2bb.cgi?seq=msgandboard=460andmsg=1388198675andpage=0andpb=
هاك راجعي البوست دا
كويس ستجدي كل مايفيدك
تسلمي اختي
|
Post: #7
Title: Re: أما بعد ...
Author: Asma.A.Salih
Date: 04-25-2014, 10:17 PM
Parent: #6
داير الصح و الا الكضب
نسخت الرابط وطلعني الصفحة الرئيسية ( بس )
|
Post: #9
Title: Re: أما بعد ...
Author: Asma.A.Salih
Date: 04-25-2014, 10:23 PM
Parent: #8
ياسلااااااااااام عليك ياذوق
كدا انت اديتني ( كتاب التأسيسي )
قريبا باذن الله ترى ( مشاركة افضل من هذه )
|
Post: #10
Title: Re: أما بعد ...
Author: أسامة العوض
Date: 04-26-2014, 02:23 AM
Parent: #9
مرحباً أسماء .. حبابك عشرة بلا كشرة
|
Post: #11
Title: Re: أما بعد ...
Author: Tragie Mustafa
Date: 04-26-2014, 02:31 AM
Parent: #10
اسماء حبابك
ولما تفهمي فهمينا معاك.
منوره يا شابه.
|
Post: #12
Title: Re: أما بعد ...
Author: محمد كابيلا
Date: 04-26-2014, 07:03 AM
Parent: #11
مرحبتين ...
حبابكــ وأكيد إضافة للمنبر العام
|
Post: #15
Title: Re: أما بعد ...
Author: Asma.A.Salih
Date: 04-26-2014, 10:08 AM
Parent: #12
الف شكر لك محمد
واتمنى ان افيد واستفيد
|
Post: #14
Title: Re: أما بعد ...
Author: Asma.A.Salih
Date: 04-26-2014, 10:03 AM
Parent: #11
نهارك سعيد واكيد بعد افهم حاجة حااشتغل مدرس خصوصي هههههههههههه
لكن ليك باذن الله الدرس مجان
|
Post: #13
Title: Re: أما بعد ...
Author: Asma.A.Salih
Date: 04-26-2014, 10:00 AM
Parent: #10
تسلم كتييييير
وشكرا على الترحيب
|
Post: #16
Title: Re: أما بعد ...
Author: Kabar
Date: 04-26-2014, 10:27 AM
Parent: #13
نمبر ..ون..اخطي المسنجر..لأنو ماح يخليك تقولي ذاتك..
نمبر تو..اخطي اكوام الرباطة..بشاشا..تراجي..دينق...الخ الخ..
نمبر ثري...العبارة اصدق من الأشكال (يعني اخطي حكاية الوشوش والمؤثراات الضوئية والرمزية..ما هو يا تقولي ذاتك و الناس تعرفك وتتفاهم معك..يا تخلي الكمبيوتر يعبر عنك..وبرضو الناس تعرفك وتجليك).ز!!!
نمبر فور.. ان كنت من ناس الأدب..الرواية..الشعر...الخ..تابعي ناس مصطفي مدثر..ابراهيم فضل الله...بله الفاضل...ابوذكر بابكر..طه جعفر ، ابوجهينة..عبد الله الشقليني...اسامة الخواض..مها عبد المنعم..!!
دايرة حقيبة...وفن..وحاجات بهجة..عليك بناس احمد القرشي...محمد المرتضى حامد..يحي قباني...!
دايرة كتابة انسانية خالص..عليك بي عمك واحد اسمو عبد الحفيظ ابوسن (يكفي انو يكتب من السودان)..
دايرة بقارة..عليك باخينا..بريمة ..الهلباوي..!!
دايرة مجوعرة في الفارغة و المليانة.. عندك ناس السياسة كلهم جملة..وما اكثرهم..
دايرة المزاج..حب المزيكا النادرة والشكلة وطبة الكربون عند اللزوم..ديل ناس عمك كبر..والله اعلم ياااااااخ..!!
اسماء..حبابك يا صديق..
كوني نفسك وبس..والحبة ما بتجيك..فهذا منبر عبس وتولي..!!!
مرحب بيك...
كبر
|
Post: #17
Title: Re: أما بعد ...
Author: مني عمسيب
Date: 04-26-2014, 10:35 AM
Parent: #16
حبابك يا اسماء بت صالح
جيدن جيتي .. ونتمني ليك اقامة مريحة .
ولي قدام ...
|
Post: #19
Title: Re: أما بعد ...
Author: Asma.A.Salih
Date: 04-26-2014, 10:41 AM
Parent: #17
الجميلة منى
ترحيبك الراقي غالي على قلبي
ويكيفي ان اكون في وسط يمتاز اعضائه بالفهم العالي ورقي الحرف
كوني بمليون خير عزيزتي
|
Post: #18
Title: Re: أما بعد ...
Author: Asma.A.Salih
Date: 04-26-2014, 10:38 AM
Parent: #16
ياسلاااام عليك ياكبر
جبتها من قصيرة واخرها
على كلا الفين وستمية شكر على الترحيب الراقي والمشاركة الوافية
اكتر جملة عجبتني (دايرة مجوعة في الفارغة و المليانة.. عندك ناس السياسة كلهم جملة..وما اكثرهم..) ههههههههههههههههههههههههه
دي بالذات ماحااستلف ليها اي وش لكن للضمان كدا ( وش شمتان في زول صاحبي جدا وسياسي جدا ) هيهيهيهيهيهي
غايتو للضمان كدا اظنك اعطيتني ملخص مناسب جدا عشان اختار توجهي , وباذن الله كلهم حانزور بوستاتهم و كلهم بنماشيهم ونشوف اخرتهم مع الكيبوردات دي
ومرة اخرى الفين شكر للترحيب الانيق
|
Post: #20
Title: Re: أما بعد ...
Author: sadig mirghani
Date: 04-26-2014, 10:54 AM
Parent: #1
حبابك بت صالح يا بتي مدام الفهم في الباقي دا كلوا هين ويوم يومين بقع ليك كعب الماعندهم فهوووووووووووووووووووووووووووووووووم
|
Post: #21
Title: Re: أما بعد ...
Author: Asma.A.Salih
Date: 04-26-2014, 11:32 AM
Parent: #20
ههههههههههه
مادام قلت المسالة مسالة وقت نستنى
المهم في الاخير نفهم مانطلع مديسين ساكت
الفين شكر على الترحيب صادق
|
Post: #22
Title: Re: أما بعد ...
Author: Asma.A.Salih
Date: 04-26-2014, 01:09 PM
Parent: #1
غايتو للضمان كدا , ولطمئنت اساتذتي الخصوصين انا ابتديت افهم بعض الاشياء , واحتمال كبير بعد شوية اعمل الماستر والدكتورا وابقى مستشارة البرالمة والسناير زاتهم في فنون التعامل مع البورد هع هعه هع
|
Post: #23
Title: Re: أما بعد ...
Author: اميرة السيد
Date: 04-27-2014, 03:05 AM
Parent: #22
عزيزتي اسماء
اولا اهلين وسهلين ويا مرحبا بين اهلك واحبابك
ثانيا والله اسئلتك دي كلها لمن جيت برليمة جديدة قبال سنتين كانت محيراني حيرة شديدة.. ولقيت خبراء ساعدوني لفهم ألغاز المنبر العام... وكل سؤال من اسئلتك دي عندها خبير في البورد.. وطبعا انا بصراحة نسيتها كلها وخجلانة أسأل ثاني , ويقوم يجي واحد ناطي ويعبرني بعدم الفهم والمذاكرة( وجه ضاحك)( شوف هسه الوجه الضاحك ما قادر ارسمه عشان ما عارفة كيفن)... وطبعا انا منتظرة الخبراء يردوا عليك ونحن من جاه الملوك نلوك... ونستقيد من وراك..
والله يديك العافية والصحة
|
Post: #24
Title: Re: أما بعد ...
Author: منصوري
Date: 04-27-2014, 07:16 AM
Parent: #23
دا عنوان بوست قصيير خلاص يا البرولوم الجديد ( وش محتار)
.........
أما بعد... بس كدا عنوان البوست؟ دا أصغر عنوان بوست يمر عليا مما اشتركت في المنبر دا قبل 15 سنة
..................
لكن الجوابات زمان ما كانت كدي!
كانت
بسم الله الرحمن الرحيم
إن شاء الله تكونوا على خير كما نحن الحمد لله على ما يرام لانفقد سوى مشاهدتكم الغالية..
نهدي اليك سلاما يصلك من السكك الحديدية.. والنسائم الربانية والملائكة الرحمانية..
وبعد
إن سألت من البلد بخير.. حليمة نفست جابت ليها وليد ميييت سبّلناه .. ربنا يعظم شفاعتو لى والديه.. وأم الحسن جابت ليها بت.. سمتا على خالتك مريم.. وسليمان ود حمدين واقع من الساقية من فوق لفخو الجخس.. رماهو في القّوِّتي.. تحت.. إلا ما جاتو عوجة.. بس كراعو اليمين اتكسرت.. وأصبع أيدو الكبير إتفكا.. حمارة لى عاشة بت الحسن طرحت جابت ليها دحيش ميت يا حلاتو..
لكن حمارة عمتك ضو المدينة جابت ليها دحش حي الحمد لله...
اشتهيناك يا ولدي.. عايزنك تجي تحضر معانا لحمة السوق الجاي..
الجامعة لما تقفل ما تتأخر في الخرتوم.أوعك من بنات الخرتوم.. أبوك بي يكتلك... تعال لى أمك جري.. أبوك راجيك تسوق معاهو بوغة الصيف..
كان سألت من ناس بت سليمان الحمد لله جات من الحج..
أقبل سلام أخوانك وأبوك وأخواتك..
نورة قالت ليك لما تجي جيب ليها معاك قلم تصحيح فيهو اربعة ألوان مع بعض..
والسلام عليكم ورحمة الله
الكتب الجواب
حسن أخوك الحمد لله بقينا نكتب جواباتنا برانا في بيتنا والدايرنو نقولوا بلا شيل حال
الجواب من طرف
والدتك سليمة بت حوووماد الحسن
الرد... الرد... الرد... السرعة ... السرعة..
|
Post: #28
Title: Re: أما بعد ...
Author: Asma.A.Salih
Date: 04-27-2014, 10:37 AM
Parent: #24
هههههههههههههههههههههههههه
الله يجازيك
تعرف انا ( كان قلبتلك شايقي وحاة الرسول الا كان تجيبلك مترجم )
علا الحديث ده ماهو ليك اااااجنا المناصير خخخخخخخخخخخخخخخخخ
اما بخصوص العنوان ( انا زاتي لما كتبته قلت هسي عنوان بوستيني ده كان راح وسط القيامة ده القاهو وين تاني )
ياخي وانا من يوم عرفت المنتديات مالاقتني عناوين ( بتلخص الموضوع ) زي عناوينكم دي
المصيبة الاكبر اني فعلا لما اغيب ساعتين بتضطر اجي افتش البلد كلها عشان القى ( عنيويني ) السغير ده
المنصوري , حبابك الف وحباب اهلي شقيش ماقبلوا
سعيدة باطلالتك هنا
|
Post: #27
Title: Re: أما بعد ...
Author: Asma.A.Salih
Date: 04-27-2014, 10:31 AM
Parent: #23
عزيزتي اميرة
انتي فعلا اميرة بحرفك الانيق واسلوبك المتواضع
المشكلة انه لحد هسي مافي ولا خبير وراني وشو الا واحد من الزملاء ماقصر اداني رابط اظنه يجيب على كل اسئلتي لكني للامانة لحد هسي ما عاينت ليهو
اظنني بعادتي القديمة ( بهبش براي لحد مايوم الدغ ) هههههههههههه
عل كلا ياراقية الطلة , باذن الله نتعلم حبة حبة والاهم هو ان نجد هنا الاحترام والصدق في التعامل بعيد عن العنصرية والشللية والمجاملات
عاطر الود لمرورك الرقيق
|
Post: #25
Title: Re: أما بعد ...
Author: نعمات عماد
Date: 04-27-2014, 09:16 AM
Parent: #1
سلام اسماء
نورت المنبر
أكيد انتى اضافة .اقامة سعيدة .
|
Post: #29
Title: Re: أما بعد ...
Author: Asma.A.Salih
Date: 04-27-2014, 10:39 AM
Parent: #25
عزيزتي نعمات , الإضافة الحقيقية هي وجودي بين اخوات امثالكن
( كدا الوحدة تحس بانه في حد حايفهمها ويقيف معاها لما عيال آدم يتمردوا)
سعيدة بترحيبك الغالي
|
Post: #26
Title: Re: أما بعد ...
Author: Asma.A.Salih
Date: 04-27-2014, 10:26 AM
Parent: #1
الجماعة الفوق , جاياكم فردا فردا , بس في حاجة محيراني من امبارح
هو العضو مسموح ليهو بكتابة كم مشاركة خلال اليوم ؟؟؟؟؟؟؟؟؟
|
Post: #30
Title: Re: أما بعد ...
Author: اميرة السيد
Date: 04-27-2014, 11:55 AM
Parent: #26
Quote: []اشتهيناك يا ولدي.. عايزنك تجي تحضر معانا لحمة السوق الجاي..
الجامعة لما تقفل ما تتأخر في الخرتوم.أوعك من بنات الخرتوم.. أبوك بي يكتلك... تعال لى أمك جري.. أبوك راجيك تسوق معاهو بوغة الصيف..
كان سألت من ناس بت سليمان الحمد لله جات من الحج..
أقبل سلام أخوانك وأبوك وأخواتك..
نورة قالت ليك لما تجي جيب ليها معاك قلم تصحيح فيهو اربعة ألوان مع بعض..
والسلام عليكم ورحمة الله |
<<<<<<<<<<<<<<<<<<<<<<<<<<<<<<<
عزيزي منصوري
عليك الله كان ما كتبت لينا قصة صغيرة نستمتع بيها وسط الجفاف ده...والله اسلوبك الشعبي والواقعي الذي يحكي واقع اهلنا الطيبين عجبني بالحيل.. انت مبدع ومشروع كاتب وما تضيع الموهبة دي ساكت.. ولا اظنك من كتاب القصص المعروفين ونحن ما جايبين خبر!!!
حاولت احاكيك وارد ليك بهذا الأسلوب ولغة الشايقية بس ما قدرت عشان انا محسية الأب ، أما من ناحية الأم فغريبة..
والله يديك العافية
|
Post: #31
Title: Re: أما بعد ...
Author: Asma.A.Salih
Date: 04-29-2014, 09:11 AM
Parent: #1
اما بعد ، وبعد ( اللواصة ) بين موضوعات المنبر وبعد ( حصولي على درجة مقبول ) في طريقة التعامل مع استايل المنتدى ، وبعد محاولاتي لفهم طبيعة الكتاب في المنبر فاني أعدكم ( بإستنطاق قلمي ) الصامت دهرآ واخشى ان ينطق كفرآ بكل مااتمنى ان ينال إعجابكم
|
|