المتعافي

يمين الله لو الامر بيدي ما ادخلك محكمة والله اقلع منك لما تعرف حاجة
وقال ايه قال 9 من الائمة دخلو السجن !!!!!
بكرة يجو المحامين وتبدأ اللولوه ويطلعوك زي الائمه ال 9 , الشعب ده شايف عندو قنابير -- قلع بس وزي ما جئت الحكم تطلع منو

الشعب السوداني متسامح لا يميل للظلم او الانتقام الا ان ما حدث فاق كل الممكن والمعقول
بيوت اشباح عذب بها التقابيون = السخي , ود الفضل وغيرهم = عذبوا حتي الموت
قصفت الجبال واغتصبت حرائر دارفور
فصل الجنوب
وهذا المتعافي يتذاكي يجمع الاموال من دم الضحايا الجوع عم الخرطوم وطالبات المدارس اكلن من الكوش والسندوتشات بفت ملاح ويكه بيضاء
والله ما ادخلك محكمة قلع بس

و
قال
انا ما
كيشة
ضحك !
سلام اخلاص

د. إخلاص المشرف
سلامات وكيف الحال ..

الحكاية شنو .. فمتابعة كل الذي يحدث في ذلك الوطن المحزون أصبحت عسيرة علينا ..

مرحب بيك عبدالحفيظ اب سن
المتعافي اخر شئ فال مالو ما تكون عندو شركات ما برلسكوني في ايطاليا عندو شركات وتناسي انو برلسكوني ملياردير قبل الحكم وعندو شركات فبل الحكم
هو ما كيشه هو الطلياني
محمد الحسن ود حيدر اخوي كيفك والاهل في السودان منحونا الحرية هبه وعطيه منهم وح يمشو بقروشهم ويخلو البلد قاعآ صفصفا

الأخت العزيزة إخلاص
سلام عليكم
لا أشاهد تلفزيون السودان بكل مسمياته إلا فيما أقتضت الضرورة ، والغريبة اليوم الحضرت فيهو دقائق مع المتعافي كان بدون ضرورة ، ربما ليزيد الله ضغطي ويؤكد لي قناعتي بجدوى عدم متابعة التلفزيون


المهم في الدقائق المعدودة الحضرتها المتعافي فقع مراراتي - الله يفقع مرارتو - قال كل من يعمل لا ينتظر جزاؤه في الدنيا ، وقد صدق في هذا القول رغم ثقته ومدلولاته الإيجابية في إحتسابه لهذا الأمر ولما يأخذ في الحسبان الأمور العظيمة التي أرتكبها هذا الرجل في حق الشعب السوداني الفضل ... وقال أنه لا يريد الإنتقام الشخصي ممن ينتقدوه لان من ينتقدوه لايمثلون رائهم الشخصي بل يمثلون أراء جهات تقف خلفهم ، وهو بهذا الحديث يقع في مغبة أمور غير كريمة منه ، منها التهديد المبطن في قدرته على الإنتقام من منتقديه بطريقه أو بأخرى ، كما أنه يقع في إلغاء أراء الصحفيين المنتقدين له وكأنهم يكتبون لغيرهم لا لأنفسهم !ّ!! وهذا امر عجيب
ثم يقع في مغبة تضخيم الذات بإنه فوق النقد ومن ينتقدونه هم مجرد أعداء للوطن وليس وطنيين شرفاء أكثر منه ...

هذا رجل يلغى الحديث على عواهنه وأستغرب كيف تكون مثل هذه الأراء الفطيرة تخرج من شخص يفترض فيه الكياسة والفهم والإدراكـ أذ علاوة على عمل السياسي فهو من المفترض أن يكون من الملمين بمثل هذه الأراء التي أحتوتها مداخلتي المتواضعة ، وهذا يوضح بجلاء الذهنية التي تحكم هذا الوطن وإنفصالها عن واقعها وعن معطياتها الحقيقية
والله المستعان

سلام الحبيبة \ لوسي .. وضيوفك الكرام ..

Quote: قلع بس وزي ما جئت الحكم تطلع منو

قلنا الكلام ده زمان ما قلع بس تصفية عديييييييييييل ديل ناس مفسدين ومتمادين
في الفساد وافسدوا البلد وقبلوا علي العالم مافي اي طريقة غير التصفية الجسدية
المباشرة . ودمتي ولي قدام ز

المحترم Sidig Rahma Alnour
تلفزيونات السودان يصدق عليها وصفك بس غير البلد دي ما عندي حل = ناسها ناسي وحبهم كاتلني انوم واصحي معي زي ضلي = اسوي شنو ؟؟؟ وبالنسبه للضغط عليك بالكركدي البارد = السخن للكحة = وشيل معانا الصبر
منو مني عمسيب والله مرات لما اعفص نملة قلبي بوجعني , غايتو لو لميتي فيهم وكتلتيهم انا بغمض عيوني لانهم يستاهلو

هو بفتكر حسب طايوقوا انوا الغني والقروش دي فهم وفهلوة وذكاء
اذا كانت الارزاق تجري علي الحجى هلكن اذا من جهلهن البائهم