Post: #1
Title: مرصد صلاح غريبة لتوضيح الحقائق ودحض الاشاعات.
Author: صلاح غريبة
Date: 04-22-2014, 08:08 AM
Parent: #0
لأحظت انتشار الكثير من الاشاعات والمعلومات المغلوطة في صحفنا واعلام التواصل الاجتماعي والواتساب.
واشارة الى مهنيتي الاعلامية سابذل الجهد لتصحيح الاخبار وتبيان اخبار الاشاعات والاخبار المغرضة والاخبار المغلوطة.
م. صلاح غريبة خبير استراتيجي
عنوان المرصد:
[email protected]
هاتف واتساب :
002499113113031
0113113031
|
Post: #2
Title: .
Author: صلاح غريبة
Date: 04-22-2014, 08:22 AM
Parent: #1
سرت بالامس شائعات على مواقع التواصل الاجتماعي والواتساب،تتحدث عن استقالة رئيس القضاء مولانا محمد حمد ابوسن واستقالة والي الخرطوم عبد الرحمن الخضر ووالي الجزيرة البروف الزبير بشير طه، وزاد نشر خبر قرب اقالة والي الجزيرة في صحف الخرطوم امس، من انتشار الشائعات وتبادلها بين الكثيرين عبر المهاتفات والواتساب وغيرها.
ونفت جهات عليمة هذه الاخبار.
|
Post: #3
Title: Re: .
Author: محمد عمر الفكي
Date: 04-22-2014, 08:45 AM
Parent: #2
Quote: لأحظت انتشار الكثير من الاشاعات والمعلومات المغلوطة في صحفنا واعلام التواصل الاجتماعي والواتساب.
واشارة الى مهنيتي الاعلامية سابذل الجهد لتصحيح الاخبار وتبيان اخبار الاشاعات والاخبار المغرضة والاخبار المغلوطة.
م. صلاح غريبة خبير استراتيجي
عنوان المرصد:
[email protected]
هاتف واتساب :
002499113113031
0113113031 |
هو يا استاذ صلاح في صحفيين الايام دي؟ البلد انعدمت فيها الكفاءات والكوادر الصحفية ولم يتبق منهم الا القليل الذي يُعد على الاصابع وانت منهم
ربنا يخليك ويحفظك لفقع مرارتنا ودر الارباح لشركات صناعة الدواء وخصوصاً ادوية الحموضة وارتفاع ضغط الدم
انت قبال فترة كدة فتحت مرصد خاص بإشعاعات نبوية، قفلتوا مالك؟ نبوية وقفت الاشاعات ولا ما دفعت النفايات ولا المرايات حقت (هابل) بتاعك دا اتكسرت؟
|
Post: #4
Title: Re: مرصد صلاح غريبة لتوضيح الحقائق ودحض الاشاعات.
Author: sadig mirghani
Date: 04-22-2014, 12:17 PM
Parent: #1
بالنسبة لي مكوة الفحم الفهم شنو
|
Post: #5
Title: Re: مرصد صلاح غريبة لتوضيح الحقائق ودحض الاشاعات.
Author: صلاح غريبة
Date: 04-23-2014, 07:36 AM
Parent: #1
صحة الخرطوم تنفي ظهور حالات سحائي بالولاية.
.......
كذب حزب المؤتمر الشعبي ماتناقلته وسائل الاعلام عن موافقة الرئيس البشير بحكومة انتقالية لمدة عاميين.
|
Post: #6
Title: Re: مرصد صلاح غريبة لتوضيح الحقائق ودحض الاشاعات.
Author: صلاح غريبة
Date: 04-23-2014, 07:39 AM
Parent: #1
صحة الخرطوم تنفي ظهور حالات سحائي بالولاية.
.......
كذب حزب المؤتمر الشعبي ماتناقلته وسائل الاعلام عن موافقة الرئيس البشير بحكومة انتقالية لمدة عاميين.
|
Post: #7
Title: Re: مرصد صلاح غريبة لتوضيح الحقائق ودحض الاشاعات.
Author: جمال خضر
Date: 04-23-2014, 10:11 AM
Parent: #6
Quote: صحة الخرطوم تنفي ظهور حالات سحائي بالولاية.
....... |
أخونا غريبة الناس يفكوا الكضبة ويصدقوها سحائى شنو كمان
الأمراض دى فارقت السودان فراق الطريفى لى جمله منذ مجئ
جهابذة الإنقاذ المباركين الى أرض السودان تقول لى شنو تقول منو
|
Post: #8
Title: Re: مرصد صلاح غريبة لتوضيح الحقائق ودحض الاشاعات.
Author: محمد عمر الفكي
Date: 04-23-2014, 10:24 AM
Parent: #7
والله يا جمال انت طيب خلاص
كدي شوف العنوان عن السحائي والتفاصيل عن المؤتمر الشعبي !!!!!!
ياربي غريبة يكون قاصد انه الشعبي هو السحائي؟ 
|
Post: #9
Title: Re: مرصد صلاح غريبة لتوضيح الحقائق ودحض الاشاعات.
Author: عبد الماجد مصطفى
Date: 04-23-2014, 11:12 AM
Parent: #8
بوستات خبيرنا ،،، العالم ،، الفلتة ده ،،،
زي اطفال المايقوما ( مع الاعتذار لاطفال المايقوما) ،،،
يلدوهم ويفكوهم في الشارع ،،،،
وجه الشبه :
سعادة الخبير ،،، يعمل البوست ،،، ويفك البيرق ،،
يجي ود الفكي ،،، وجمال خضر ،،، بارك الله فيهم ،،،
يرعو ليهو ،، بوستاتو دي ،،، لمن يوصلوها الخور ..
ويجو راجعين ،،،
السؤال :
البوست ده ،،، بوست الرد على ،، الخراصين ،، المغرضين ،،، العملاء ،،، واذيال الامريكان الليهم تدربو ،،
سايقو براهو ،،، وباقي عليهو 10 ،،،
لي شنووووووووو ؟ ....
بالجنبة كده ( على قول تبارك)
ألف مبروك اضافة الخبرة الاعلامية الى مجمل خبراتك ،،
ومبروك المرصد ،،،
وبالمزيد ان شاء الله ،،،
|
Post: #10
Title: Re: مرصد صلاح غريبة لتوضيح الحقائق ودحض الاشاعات.
Author: محمد عمر الفكي
Date: 04-23-2014, 12:02 PM
Parent: #9
هههههههههههههههههههههههههه يا مصاريني
والله يا عبدالماجد حقو بعد كدا جمال وانا نخلي ليك الزول دا
ثم ثانياً انت لحدي هسي حائم بهنا مالك؟ مفروض تكون قاعد تجهز في كتابك عشان تشيلو معاك للدعوة بتاعة منظمة السياحة للقراءة في الساحة الخضراء.
ما تنسى جيب معاك اصحابك
التعديل للاضافة
|
Post: #11
Title: Re: مرصد صلاح غريبة لتوضيح الحقائق ودحض الاشاعات.
Author: جمال خضر
Date: 04-23-2014, 12:42 PM
Parent: #9
Quote: والله يا جمال انت طيب خلاص
كدي شوف العنوان عن السحائي والتفاصيل عن المؤتمر الشعبي !!!!!!
ياربي غريبة يكون قاصد انه الشعبي هو السحائي؟ |
غريبة ده كلامه غلاد غلاد مش كبير وفى كل المجالات
عشان كده الناس العاديين أمثالنا لن يستطيعوا فك طلاسم
كلماته عايز ليهو خبراء زيو يفسروا لينا مدلولات ومآلات كلماته
|
Post: #12
Title: Re: مرصد صلاح غريبة لتوضيح الحقائق ودحض الاشاعات.
Author: ولياب
Date: 04-23-2014, 02:45 PM
Parent: #11
تمام يا أبو أحمد ، بس إن شاء الله المرصد بتاعك ده يكون (Automatic) بحيث يتحول لمرصد فلكي عشان نعرف هلال رمضان .
|
Post: #13
Title: Re: مرصد صلاح غريبة لتوضيح الحقائق ودحض الاشاعات.
Author: جمال خضر
Date: 04-23-2014, 07:51 PM
Parent: #12
http://www.sudaneseonline.com/board/460/msg/1398275244.html
أخونا غريبة عايزنك تشيل الجهاز بتاع الغربلة بتاعك ( المرصد ) وتحوم على المواضيع الموجود ة
فى المنبر تدحضها واحد واحد ولتكون البداية بالبوست أعلاه ومن ثم تمشى لى بتاع المخدرات
أما عن البوست أعلاه فإن مرصد غريبة توصل أن ذلك محض إشاعات وإن والى الجزيرة
ورئيس القضاء باقيين فى منصبيهما الى أن يرث الله الأرض ومن عليها .
أما حكاية المخدرات المهربة فى حاويات فهى إشاعة مغرضة من قبل عملاء الصهيونية
والطابور الخامس لتشويه سمعة رجالات المؤتمر الوطنى الشرفاء فقد إتضح أن الحبوب
الموجودة فى الشحنة عبارة عن بنادول والمادة البيضاء التى أُعتقد أنها هيرويين فقد
تبين من الفحص أنها لبن بدرة 
|
Post: #14
Title: Re: مرصد صلاح غريبة لتوضيح الحقائق ودحض الاشاعات.
Author: جمال خضر
Date: 04-23-2014, 08:35 PM
Parent: #13
Quote: سعادة الخبير ،،، يعمل البوست ،،، ويفك البيرق ،،
يجي ود الفكي ،،، وجمال خضر ،،، بارك الله فيهم ،،،
يرعو ليهو ،، بوستاتو دي ،،، لمن يوصلوها الخور ..
ويجو راجعين ،،، |
أنا واخوى الكاشف نجقلب والشكر لى صلاح
نشيل ونعتل ونجرجر فى البوستات وهو ضارب الهمبريب
من حفلة لى مؤتمر لى إستنفار لى رحلة وسادى دى بى
طينة ودى بى عجينة لا شكر ولا تقدير .
نشكرك أخونا عبد الماجد على تقدير ما نبذله من جهد
فى سبيل أن تبقى بوستات الخبير فى الصفحة الأولى وما يتطلبه
ذلك من جهد ووقت ومال غايتو يا غريبة الفيك إتعرفت
|
Post: #15
Title: Re: مرصد صلاح غريبة لتوضيح الحقائق ودحض الاشاعات.
Author: الطاهر الطاهر
Date: 04-23-2014, 08:57 PM
Parent: #14
حقيقي انا مستغرب
المفروض صلاح غريبه دا يقاطع البورد 87 سنه لقدام
ياكافي البلاء ما عندك صليح كلو كلو
والاغرب الناس تقول البوست دا حيكون اخر بوست ليهو
يجيك في ظرف 24 ثانية يفتح بوست تاني
ياخي انت عندك تخانة جلد تحسدك عليهو القرنتيه ويغار منك التمساح
انا عندي ليك راي
انسى كل المسميات ناس خبير استراتيجي وسفير نوايا حسنه والخزعبلات دي
انت اشتغل كاسح الغام احسن ليك
تمشي مناطق الحروب وتشيل خرطه بمانطق الالغام
وتلم فيها فجيخ بكرعينك اللغم يقوم فيك تقع بعيد تتنفض وتجري للبعدو
|
Post: #16
Title: Re: مرصد صلاح غريبة لتوضيح الحقائق ودحض الاشاعات.
Author: nour tawir
Date: 04-23-2014, 10:14 PM
Parent: #15
وحقو بالمّرة تثبت أنه السودان يتمتع بالحرية والرفاهية والازدهار..
...
مصيبة تاخد أجلك أت والانقاذ فى يوم واحد..
|
Post: #17
Title: Re: مرصد صلاح غريبة لتوضيح الحقائق ودحض الاشاعات.
Author: ثروت سوار الدهب
Date: 04-23-2014, 10:32 PM
Parent: #16
لووول @ نور تاور
Quote:
مصيبة تاخد أجلك أت والانقاذ فى يوم واحد.. |
|
Post: #18
Title: Re: مرصد صلاح غريبة لتوضيح الحقائق ودحض الاشاعات.
Author: معاوية المدير
Date: 04-24-2014, 03:35 AM
Parent: #17
الواتسابات يا خبير،
الوتسابات يا خ، يعني جمع يجمعولك ذنوب ود الفكي
وجمال خضر، ومعاهم الطاهر القال ما عندك وجيع دا.
يا اخي يوجعوا ضرسوا يا بركة من جعل محمد نبي.
القالوا منو ما عندك وجيع ؟؟؟، سير ولا تلوي للرجرجة
والدهماء ,وانا معك، وحات الله يا خبير لو خضت بي
موية الصحة الفي الحاج يوسف ديّك لأخوضنها معك.
نور تاور دي عليكم الله ادوها موية صااااااااااقطة ...
|
Post: #19
Title: Re: مرصد صلاح غريبة لتوضيح الحقائق ودحض الاشاعات.
Author: محمد عمر الفكي
Date: 04-24-2014, 06:21 AM
Parent: #18
ههههههههههههههههههههههههههههه
والله يا شباب اكان فضل ليكم البرطوش بس بعد كدا
كفاهو يا جماعة
|
Post: #20
Title: Re: مرصد صلاح غريبة لتوضيح الحقائق ودحض الاشاعات.
Author: جمال خضر
Date: 04-25-2014, 04:30 PM
Parent: #19
Quote: سرت بالامس شائعات على مواقع التواصل الاجتماعي والواتساب،تتحدث عن استقالة رئيس القضاء مولانا محمد حمد ابوسن
واستقالة والي الخرطوم عبد الرحمن الخضر ووالي الجزيرة البروف الزبير بشير طه، وزاد نشر خبر قرب اقالة والي الجزيرة في
صحف الخرطوم امس، من انتشار الشائعات وتبادلها بين الكثيرين عبر المهاتفات والواتساب وغيرها.
ونفت جهات عليمة هذه الاخبار. |
Quote: د. حيدر دفع الله رئيساً للقضاء وقبول استقالة أبو سن
طباعةالبريد الإلكتروني
التفاصيل
نشر بتاريخ الخميس, 24 نيسان/أبريل 2014 07:59
الخرطوم: المثنى
قبلت المفوضية القومية للخدمة القضائية في اجتماعها الطارئ أمس الأربعاء استقالة رئيس القضاء مولانا محمد حمد أبو سن وإحالته للمعاش الإجباري لبلوغه السن القانونية.
وقال السكرتير الصحفي للرئيس لـ «الإنتباهة» ان الرئيس اصدر مرسوماً جمهورياً بتعيين قاضي المحكمة العليا د. حيدر أحمد دفع الله رئيساً للقضاء.
|
Quote: مدني : أحمد الطيب المنصور:
أعلن والي الجزيرة بروفيسر الزبير بشير طه، أنه سيتقدم باستقالته كتابة اليوم لرئيس الجمهورية، بناءً على طلب من الرئيس مساء أمس الأول . وقال الزبير في بيان تحصلت «الإنتباهة»على نسخة منه ، إن كرسي الولاية «كالدنيا تحت أقدامنا ووراء ظهورنا »،موضحاً أن الاستقالة في إطار التحولات التي تشهدها البلاد، والتي تتطلب ترجل العديد من القيادات في المركز والولايات. وقال «قبلت التكليف 2009 وأنا كاره له». |
( بيان هام وعاجل من مرصد صلاح غريبة لتوضيح الحقائق ودحض الإشاعات )
لقد تلاحظ فى الآونة الأخيرة تزايد عمليات إطلاق الشائعات المغرضة التى تستهدف السودان وقيادنه الرشيدة
من أجل تفتيت عضد الأُمة وشغلها بسفاسف الأمور وإعاقة جهازنا التنفيذى عن القيام بالدور المنوط به فى
ترقية الخدمات وتوطيد دعائم الدين والنهوض بالأمة السودانية فى كافة المجالات فكان لا بد من مكافحة
تلك الشائعات المغرضة فأسسنا مرصد صلاح غريبة لتوضيح الحقائق ودحض الإشاعات وقد نجحنا بتوفيق
من الله وبدعم مقدر من حكومتنا الرشيدة على إحباط كل الشائعات التى كان يطلقها أعداء السودان بدعم
من الحزب الشيوعى والجبهة الثورية وبرعاية أمريكا والصهيونية العالمية وعندما فشلوا فى مخططاتهم
بفضل يقظة رجالات المرصد وعلى رأسهم الزعيم المُفدى صلاح غريبة غيروا من خططهم وكان هدفهم
محاربة المرصد وضرب مصداقيته حتى يزيحوه من طريقهم حتى يسهل عليهم تمرير أجندتهم الخفية فعندما
تحدثنا عن نفينا التام لتلك الإشاعات المغرضة التى تتحدث عن إستقالة رئيس القضاء ووالى الخرطوم ووالى
الجزيرة نجد أن ذلك اللوبى إستخدم الأساليب الملتوية غير الأخلاقية تارة بالتهديد وتارة بالمال حتى أجبروا
جهات نافذة الإستجابة لطلباتها بإقالة والى الجزيرة وإقالة رئيس القضاء والضغوط لا زالت تُمارس حتى
يقدم والى الخرطوم إستقالته من ناحية أُخرى تم القبض على شخصين( م ع الفكى - م المدير) يُشتبه فى تورطهم فى عملية نشر السحائى
فقد وُجد بحوزتهم أنابيب تحتوى على بكتيريا تسمى Haemophilus influenzae وهى المسؤولة عن الإصابة
بذلك المرض وكل ذلك من أجل ضرب مصداقية مرصدنا وضرب المصداقية المهنية لقائدنا غريبة ولكن نقول لهم هيهات فهذه الإستهدافات لن
تزيدنا إلا قوة وإصرار وعزيمة فى السير قدما من أجل سودان خال من الإشاعات والدعايات المغرضة .
الله أكبر ولا نامت أعين الجبناء
مرصد صلاح غريبة لتوضيح الحقائق ودحض الإشاعات
السكرتير الإعلامى
جمال خضر الحسن الفكى
|
|