Post: #1
Title: كفترة تفك الحيرة_ الله يرحمك يا محجوب شريف
Author: Halema2
Date: 04-18-2014, 11:10 AM
كفتيرة تفك الحيرة
يابت أحسن من غيرا
الريح بتهد من حيلا
بتقلل ليلا مطيرا
أمك والصحة بتنزل...
بتمغرب قبل عصيرا
يا حليلا العرق اتصبب
فصّد والله جبينا
إتدنى همقلوبينا
أخوانك شفع قُصّر
لسه ما بفِشوا غبينة!!
والحيلة قليلا بليلة
مرات بموية كسيرة
روشتة تخلى الحتة ..
أضيق من ثقب إبيرة!!
جيران والحال من بعضو
نيرانم نار الحمى . ضلمّه
الضل كرتون وحصيرة
والعين والنية بصيرة
وحبال النجدة قصيرة
من ستة الزول لي ستة
الجتة تتكل جتة
بين كارو وبص كركوبة
وراهم شفع قصّر
يرعاهم حس حبوبة
تتوسد إيدا وتوبا
تتحسس باقي عِميرا
كفتيرا تفك الحيره
يا بت أحسن من غيرا
ولذلك إنتي هنالك
في ركن السوق الشعبي
بت أمك ما بتكوسي..
دروب الشك والذلة
جربتي الكسرة تعوسي
ما بسمع حسك إلا..
النجمة وديك الحلة
وعجينك في البستلة
في ليل الصاج الداكن
ترميهو قميرا..قميرا
كفتيرا تفك الحيرة
يا بت أحسن من غيرا
البنبر جنب البنبر
والمسك الفايح عنبر
نعناعك طينو قريرا
الشاى والبن قلاية
هبابة ترفرف طيرا
نجوم الضحى جمراتك
صحيها جميرا جميرا
غزلانك دستة كبابي
تتفنني في تِمّيرا
فنجانك جنب فنجانك
شفع في زفة وسيرا
وتزازي برندا برندا
العدة حرام كسيرا
كفتيرا تفك الحيرة
يا بت احسن من غيرا
حليمة النيمة تلمك
في ضلها كترخيرا
...........................
محجوب شريف
---------------------------
أجمل ما كتب المرحوم الرائع محجوب شريف
ببكئ كل ما اقرا الكلمات الصادقة المعبرة دي
رحم الله محجوب ذلك الوطني الجميل
|
Post: #2
Title: Re: كفترة تفك الحيرة_ الله يرحمك يا محجوب شريف
Author: Halema2
Date: 04-18-2014, 11:27 AM
Parent: #1
Quote: بت أمك ما بتكوسي..
دروب الشك والذلة
جربتي الكسرة تعوسي
ما بسمع حسك إلا..
النجمة وديك الحلة |
ما اجملهم ستات الشاي
احيانا اراهم بعيني كباحثة اجتماعية
اكتر مننا دراية وعلم
يجدن الاستماع واعطاء النصيحة والشورة
كم من مهموم او مهمومة جلس بجانب ست الشاي
وحكي وفضفض عن همومه مع كباية الشاي
وست الشاي تسمع وتنصح وتدي الشورة
والله رائعات انتن
في بلد ما بمحترمكن وانتن دائما حيطة الحكومة القصيرة, يسوكهم ويشردوهم كل حين وحين
الرحمة لرجل حس بكم واحترمكم وكتب عن حالكم
محجوب شريف فقدك عظيم!
|
Post: #3
Title: Re: كفترة تفك الحيرة_ الله يرحمك يا محجوب شريف
Author: Halema2
Date: 04-18-2014, 11:41 AM
Parent: #2
Quote: وتزازي برندا برندا
العدة حرام كسيرا |
اخ يا محجوب اخ
----
العدة وشراء العدة لست الشاي في بلد غالي زي السودان
وهي لملمت قدر القريشات العندها واشترت العدة
وتضاري فيها لإنو دا راس مالها
ويجوا الجماعة بأوامر علية يطردوها ومرات يكسروا عدتا
حرام والله حرام
شت الشاي ما تهبشوها
--------
والبركة فينا وفيكم يا ستات الشاي في محجوب !
|
|