حزب الجماهير ينزل الشارع طوالي ما عندنا وقت لحوار ولا نقة

حزب الجماهير شغلته الوحيدة الجماهير
الداير شغل اثرياء الحزب يشغلوه وينتج
الداير علاج وماعنده دكاترة الحزب يعالجوه
المفلس ومعلم الله نعمل شيرنق جماهيري وندعمه
الداير يتعلم عشان يشتغل سريع مراكز التأهيل الجماهيرية موجوده في الخطط
العلاج الدائر للقري والنجوع عبر باصات العافية العلاجية مخطط له
الدايرين العرس بالبركة موجود .. ولدينا في الخطط دعم العريس بابسط الحاجات
خططنا سريعة ..
الاسرة المنتجة كل اسرة ترعي ليها غنمايتين تلاتة وتزرع ليمونة ونخلة ومنقة وتفك في البيت دجاجتين تلاتة لزوم البيض واللحم
المهاجرون والمغتربون الذين ينوون الانضمام للحزب حقهم محفوظ يحولوا سريع لبنك الجماهير من اجل تبني المشاريع الجماهيرية

الشارع ال######ان ننضفه والكوش المالية البكان نشيلها لمكباتها .. عندنا خطط لاعادة التدوير كل حاجة شايفنها ما نافعة مهما كانت سنعيد انتاجها ويذهب ريعها لمنتيجنها ..

حزب الجماهير اعضاءه الشماشة والمشردين واللي مالاقين الشغل واللي ضاقين بيهم المكان والزمان .. ما عندنا وقت للندوات ولا للحوار طوالي نازلين الشارع شايلين المسطرين والمقشاشة والبذورة والكراس والكتاب وجاينكم لسة بالتقيل

عندنا افكار كبيرة شوية بس دي دايره ليها مهلة زي مدينة عطبرة الصناعية والجزيرة للانتاج الزراعي والحيواني .. مدن سياحية تكون قبلة للعالمين وده كله بعد ما الحرب تضع اوزارها وده شغل كل الناس

العاوز يشارك يشاركنا بفكره ودعمه والله لا يضيع اجر من احسن عملا

حزب الجماهير

ندواتنا حصص تعليمية لمحو الامية بكل انواعها

حوارنا جماهيري في احيتاجات الجماهير الفعلية وكيفية توفيرها

برامجنا التلفازية

نجوم الغد في العلم والاختراع والابتكار
اسماء في حياتنا نستلهم منها الارث والمشورة والنصح
عالم الرياضة الجماهيرية .. بنأسس طوالي اكاديميات رياضية في مختلف الانشطة بحسبان الرياضة للجميع وليس كرة القدم وحدها
ما حنسيب الغني حنغني بس نعلم اولادنا يغنوا بالمعاني الجميلة والنبيلة
كلنا متدينين مسلمين ومسيحيين ما عاوزين وصي يعلمنا دينا

الشباب هو وقود حزب الجماهير ورافده من الشيوخ والاطفال وشعارنا الما بيبني يناول الطوب

نبصم بالعشر ...الفلترة مهمة

Quote: بصم بالعشر ...الفلترة مهمة

اخونا عبد الرحمن الحلاوي اهلا بيك علمنا كيف تكون الفلترة وابدأ معانا بخطوة عملية

تعالوا نطبق حديث الرسول صلي الله عليه وسلم تطبيقا علي ارض الواقع

شوية الهدوم الما عايزها يعاد غسيلها وكويها وتكيس وتسلم مباشرة للمحتاجين ونحن هنا في الغربة جمعنا عدد نود تسفيره للسودان والفكرة يمكن تعميمها

شوية وبدون مؤاخذة الاحذية حقتك وحقت العيال الكبروا تورنش وتكيس وبرضه تسلم لمحتاجينها وانا شايف عدد من البيوت مكدس بها عدد لا حصر له من الاحذية القديمة

حزب الجماهير بينزل الشارع لا حيكورك ولا حيتفرج

ينزل الشارع لانه حقه لا هو ملك للحكومة و لا حكر للمعارضة

ما فينا عنصري ولا قبلي ولا جهوي ولا وصي كلنا سواسية والتمايز بالعمل

الشغلة التانية الدايرين نعملها علي طول وشركاءنا فيها الشماشة والمشردين نعلمهم كيف يجمعوا من النفايات ما يصلح لاعادة التدوير حيث تجمع هذه الاشياء وتصنف ونعلمهم كيف يصنعوا منها ما يفيد وكيف يبيعوا منها لجهات اخري حتي ندمجهم معنا في المجتمع قوي فاعلة وخيرة