مسدار ... ( ود البوش ) ...

الراجل الاصــــــل الاسمو ود البوش
معروف من عقب مرقآ بسنـد الحوش

مقنع للبنات داخل قلوبن تووووووش
ويا رب يا كريم قسمتنا ليهو تحووش

حاشاهو العوج هو الديمة طبعو بشوش
وباستاتو العجب! تقول لي ماكنتووووش؟

بت عمسيب .

الفارس الهمــام حاشاهو نفســآ طامعـا
وباسمح الكلام كل الخلـــوق ليو سامعا
راكاب الخيول وفوق الخيول الجامـحــا
شيال السيوف فرتاق صفـــوفا جامعــا


بت عمسيب

***

يا علي الله يجازيك خربت لي مسداري .. مداخلتك متخلفة زيك .

والله يا بت عمسيب ود البوش ياهو الزول البتمنو
اخترتي واحسنتي الاختيار
وانا بقول معاك يا رب
ووعد بنمة كاربة من هنا
مع التحييييييييييييييييية

الراجل الكـــلس الديمـــة لازم حـــدو
حشاهو الملام حاشــاهو ناســـآ ضدو
ويا الحاقدين اخير اختوا المكرس ذندو
والداير الكلام واصلين هناك لي عـندو

صديقي الوفي \ ابو روضة .. تحياتي واحتراماتي ..

اقتباس : _

والله يا بت عمسيب ود البوش ياهو الزول البتمنو
اخترتي واحسنتي الاختيار
وانا بقول معاك يا رب
ووعد بنمة كاربة من هنا
مع التحييييييييييييييييية

والله يا ابور روضة المسادير دي ما ضروري تكون بتأخد ماخد الجد هي عبارة عن
كلام بطانة من نسج الخيال .. يعني اي انسان تعجبك طريقتو في التعامل او السلوك ممكن
تنم فيهو ولما كنا بنكتب مع الهمباته في منتدي النافذة الله يطراهم بالخير كانت دي طريقتنا
في النم لكن كنا محظوظين المعانا كلهم بنفس فهمك العالي ده .. لكن شوف امثال المدعو علي
بقول لي اختشي ... انا بكتب في شعر وبقول لي اختشي اها اسه زي المعاق فنيآ ده اعملو معاهو
شنو ؟؟؟

بعيدا عن اي شي !
اشتهرت خنساء السودان ومنذ عهد بنونة بت المك نمر،، مرورا بشغبة المرقومابية ،، ورقية التي صاغت الشعر
اصنافا واللوانا في اخيها ود حبوبة وغيرهن الكثير
اشتهرن بنظم شعر الحماس والفروسية حتى امتلاْ سعن تراثنا السوداني بسمن القصائد
وبما انك واحدة من خنساوات بلادي فلا تختشي وانظمي الشعر
والمسادير بقدر ما استطعتي

Quote: بعيدا عن اي شي ! اشتهرت خنساء السودان ومنذ عهد بنونة بت المك نمر،، مرورا بشغبة المرقومابية ،، ورقية التي صاغت الشعر اصنافا واللوانا في اخيها ود حبوبة وغيرهن الكثير اشتهرن بنظم شعر الحماس والفروسية حتى امتلاْ سعن تراثنا السوداني بسمن القصائد وبما انك واحدة من خنساوات بلادي فلا تختشي وانظمي الشعر والمسادير بقدر ما استطعتي

وااااااااااااااااااااو الطاهر الجديد الشديد منور المسدرة .. حبابك يا الصديق الجديد ...
وسلمت يداك ويا ريت الكل يعرف هذا التراث الذي اعشقه حتي النخاع . يا رجل
منور فانوس ومشور علي المرور .. ولي قدام .

البوش حبابو فارس النضم والنمه
سوداني اصيل خايله فوقو العمه
اخو اخوان قامتو ديمه في القمه
بيهو نتفاخر ونعرض ولا نهتمه


هيييييييع كع كرع

حباب بنت الرجال
السمحه ست الفال
وينصر دين من قال
ود البوش زينة الرجال.




ههههههههع وكع!!