عاجل/تعرضت لعملية احتيال بسوق امدرمان نهار اليوم-صور المعروضات

في نهار هذا اليوم تعرضت لاكبر عملية احتيال في حياتي وهذه أول مرة في تاريخ ميلادي
في تمام الساعة الواحدة ظهراً كنت في السوق الشعبي امدرمان لاستلام التحويلة منذ الامس وقدره مبلغ 3000جنيه محول باسمي وهذه أمانة لتسليم اصحاب الحق.
وايضاً بالامس حول احد البورداب مبلغ 1255جنيه في سوق امدرمان وايضاً امانة لتسليم اصحاب الحق.
فقلت مادام التحويلات وصلت في يوم واحد من الاحسن امش الصباح لاستلام المبلغ ومنه اذهب لتسليم المبلغ لاصحابه.
بدايةً بالسوق الشعبي امدرمان ،قمت باستلام مبلغ 3000جنيه ومن هذا المبلغ حولت الف جنيه .وتبقى في جيبي 2000 جنيه
ركبت مواصلات امدرمان السوق المتجه الى استاد الهلال ومنه نزلت في الاستاد ومتجها الى البوست وفي شرق الاستاد قابلني شاب يرتدي جلابية وعراقي باللون الذهبي
وطاقية صفراْ، وبحسن نية رديت السلام .
فقال لي يا ابو الشباب ما تعرف ليك محل تركيب ريحة
قلت ليه انت خليت المحل وراك
قال لي انا مشيت المحل والسعر ما عجبني
طيب داير وين اوصف ليك
قلت ليه بعد دا الا العطارين وسط سوق امدرمان، وفي اثناء كلامي معه جاء شاب لابس بنطلون وقال لي شوف الزول دا عندو صندلية خام في البلد دي مافي
اشتريتو منو ورفض يبعيو لي .
قلت ليه السبب شنو؟
رد لي الشاب صاحب البضاعة اللابس جلابية بلون ذهبي وطاقية وقال لي الزول دا استفذاني واداني خمسين جنيه مقطعة وقال لي انت جاي من ليبيا وما تعرف حاجة
قلت ليه طيب عشان الخمسين المشرطة دا ممكن يبدلا ليك
قال لي انا حلفت وما برجع في كلامي تاني
اما الشاب الداير يشتري لابس بنطلون رمادي وقميص كاروهات بنية مربعات كبيرة ، قال لي ابقى لينا وسيط
قلت ليهم خير المشكلة بتحلى
طيب عشان الزول دا حلف ما بشيل قروشك ، انا بديه من عندي وبمش بشيلو منك قال لي خلاص
دخلت يدي في جيبي وطلعت الالفين جنيه الامانة العندي وامش استلم من الشاب دا مبلغ 3800جنيه واسلم صاحب البضاعة 1800 وانا اشيل قروشي 2000جنيه
تحركت مع الزبون وانا شايل الصندلية الخام فقام صاحب البضاعة ناديني قال لي انا عندي بضاعة تاني في الجمارك ماشي اطلعو
قلت ليه خير بساعدك فيه
سالتو قلت انت من وين قال لي من الفاشر ومن الفاشر وين قال لي من خرطوم بليل ، قلت ليه الفاشر ما فيه خرطوم بليل قال لي تكساس ، قلت ليه مافيه تكساس
طيب قبيلتك شنو قال لي تنجراوي ، قلت ليه التنجر اصلاً من كتم ولكن دا كل ما يهمني بس داير اساعدك
قال لي انا شفت فيك الخير
قلت ليه انت سوداني وما عندك مشكلة والقروش دا امانة حق زول بس عايز احل مشكلة مادام حقي برجع
استلمت الريحة في الكيس ومكتوب عليه صندلية
مشيت للزبون عشان استلم القروش لقيتوا مافي ورجعت لصاحب البضاعة ايضاً لقيتوا مافي
سالت شباب متواجدين قدام الدكاكين قالو لي ما شفنا زول حايم بجاي
مشيت لست شاي قلت ليه وين الزول اللابس جلابية صفراء قال لي جرى بجاي
ومشيت قدام لقيت شباب قاعدين ما ست شاي تاني في اول الشارع قالو لي الزول دا جرى بجاي
مشيت لفيت من خلال الوصف ووصلت لحد المنطقة الصناعية امدرمان ودخلت بي زريبة العيش
ورجعت لحد البوست ما لقيتو.
ـــــــــــــ
هكذا يتم احتيالي وهذه اول مرة في تاريخ حياتي ، ويدل على ذلك التعامل بحسن نية مع اي شخص في الشارع العام
ويعلم الله لو المبلغ حقي لي ما طاردتوا ، ولكن الحسنة الوحيدة حولت مبلغ 1000جنيه لصاحبزا وهذا المبلغ من احد البورداب
لا اريد ذكر اسمه ولكن فاعل خير يريد ان يقوم بمساعدة الاخرين.
ومن هنا ابرر ذمتي امام الجميع بان المبلغ الذي تم احتياله هو مبلغ 2000جنيه . امانة بحوزتي
وسوف اجتهد بنفسي حتى اصل لهذا الحرامي ، والحمدلله رب العالمين
قدر الله ان يكون المبلغ نصيب هذا المحتال


صور البضاعة الضاربة






ا

تحياتي يا ذواليد؛؛

الله يعوضك خير إن شاء الله..

بس صراحة مافهمت القصة.

جــد يا ذواليد، الواحد لوما ثقته فيك كان قال الكلام دا ما يدخل الراس.. سذاجـة ذاتها كتيره عليه..

شنو داقى ونســة وأجاويد وحل مشاكل مع ناس فى الشارع ما تعرفهم، وفورا دخول فى معاملات ماليـة وقروش مقطعة وما عارف شنو تانى.. الواحد متحير جد.. وبينى وبينك
الناس ديل ما إحتالوا عليك ولا حاجـة.. ديل شالوا قروشك عديل كدا بمباركتك ومشوا.. الإحتيال موضوع تانى يحتاج لذكاء وتخطيط وحبكـة.. العملية دى ما فيها اى واحدة من التلاتة ديل..
وشوف الدراما.. زول سال من عنوان، وفجأة ظهر واحد جديد عنده شنو ما تعرف ويعرف دا.. ياخ سيبك..

ياخوي أول حاجة حمدا لله على سلامتك،
والله يعوضك خيرا منها.
القصة ذكرتني حلقات محمد نعيم سعد "متاعب"
وسبحان الله، ناس من اماناتها ترد المال لأصحابه وناس تسرق الأمانات !
ذكرت كمية من الأشخاص، لا أدري هل قصدك "جريمة منظمة"!
أم هي حادثة فردية محدودة من واحد شفة مع واحد داقس!
ههههههه
في حج 1423 هـ سرقت محفظتي يما فيها من إثباتات وبطاقات أخرى،
ولليوم زانة في رأسي ، فقط بسبب الإجراءات والجهجهة التي تلتها من أستخراج بدائل.
أصعب شئ فقدان الأوراق الثبوتية والشهادات،
أما المال فهو أبسط المفقودات أهمية.
لكن بيني وبينك :
ما راح تنساها عمرك كلو إلا إذا جات سرقة اكبر منها!
الله يحفظ الجميع
تحياتي وتقديري

ذو اليد يا صديق

ربنا يعوضك ياخي


خالص الود

والله انا المحرقني في القروش بس امانات بتاعت ناس في ام الحوجة للمبلغ
ولكن الحمدلله تم تسديد جزء من المبلغ لاصحابو

ربنا يعوضك يا ذو اليد

بالجد حارة الدقسة - واللدغة من حيث لا تدري

فعلا الواحد أبداً ما يتعامل بحسن نية خاصة في زمنا دا معليش لو بتعرف الناس

بس برضو الواحد بيغلط والناس الطيبين بالذات عُرضة لمقالب زي دي

Quote: والله انا المحرقني في القروش بس امانات بتاعت ناس في ام الحوجة للمبلغ

كونك تتصرف وتتجود لحل مشكلة بقروش أمانه فى ذمتك ده براهو مشكلة.
يا ذو اليد بمجرد خروجك من بنك أو صرافة أو أى مكان عندو علاقة بالقروش مفروض طوالي تكون منتبة لمثل هذه التدقيسات.
وزى ما قال ليك ابو الريش جماعتك ديل زاتم سنة اول غش .
ربنا يعوضك يا زول يا طيب .

كفارة وسلامتك
وربنا يعوضك

كفارة يا ذو اليد
لكن يا اخي شرطت عينا و سوف اقوم بأجراءات سحب جنسية (كتم) منك و من الان فصاعدا انت من الفتيحاب و بس.

كفارة ذو اليد ربنا يعوضك

Quote: بس صراحة مافهمت القصة.

يا بشير كويس إنك ما فهمت القصة لو فهمتها كان مشيت عضيت ذو اليد ده فى راسو :)

يا ذو اليد المحلبية دى طلعت محلبية ولا حاجه تانية :).