عاجل/تعرضت لعملية احتيال بسوق امدرمان نهار اليوم-صور المعروضات

في نهار هذا اليوم تعرضت لاكبر عملية احتيال في حياتي وهذه أول مرة في تاريخ ميلادي
في تمام الساعة الواحدة ظهراً كنت في السوق الشعبي امدرمان لاستلام التحويلة منذ الامس وقدره مبلغ 3000جنيه محول باسمي وهذه أمانة لتسليم اصحاب الحق.
وايضاً بالامس حول احد البورداب مبلغ 1255جنيه في سوق امدرمان وايضاً امانة لتسليم اصحاب الحق.
فقلت مادام التحويلات وصلت في يوم واحد من الاحسن امش الصباح لاستلام المبلغ ومنه اذهب لتسليم المبلغ لاصحابه.
بدايةً بالسوق الشعبي امدرمان ،قمت باستلام مبلغ 3000جنيه ومن هذا المبلغ حولت الف جنيه .وتبقى في جيبي 2000 جنيه
ركبت مواصلات امدرمان السوق المتجه الى استاد الهلال ومنه نزلت في الاستاد ومتجها الى البوست وفي شرق الاستاد قابلني شاب يرتدي جلابية وعراقي باللون الذهبي
وطاقية صفراْ، وبحسن نية رديت السلام .
فقال لي يا ابو الشباب ما تعرف ليك محل تركيب ريحة
قلت ليه انت خليت المحل وراك
قال لي انا مشيت المحل والسعر ما عجبني
طيب داير وين اوصف ليك
قلت ليه بعد دا الا العطارين وسط سوق امدرمان، وفي اثناء كلامي معه جاء شاب لابس بنطلون وقال لي شوف الزول دا عندو صندلية خام في البلد دي مافي
اشتريتو منو ورفض يبعيو لي .
قلت ليه السبب شنو؟
رد لي الشاب صاحب البضاعة اللابس جلابية بلون ذهبي وطاقية وقال لي الزول دا استفذاني واداني خمسين جنيه مقطعة وقال لي انت جاي من ليبيا وما تعرف حاجة
قلت ليه طيب عشان الخمسين المشرطة دا ممكن يبدلا ليك
قال لي انا حلفت وما برجع في كلامي تاني
اما الشاب الداير يشتري لابس بنطلون رمادي وقميص كاروهات بنية مربعات كبيرة ، قال لي ابقى لينا وسيط
قلت ليهم خير المشكلة بتحلى
طيب عشان الزول دا حلف ما بشيل قروشك ، انا بديه من عندي وبمش بشيلو منك قال لي خلاص
دخلت يدي في جيبي وطلعت الالفين جنيه الامانة العندي وامش استلم من الشاب دا مبلغ 3800جنيه واسلم صاحب البضاعة 1800 وانا اشيل قروشي 2000جنيه
تحركت مع الزبون وانا شايل الصندلية الخام فقام صاحب البضاعة ناديني قال لي انا عندي بضاعة تاني في الجمارك ماشي اطلعو
قلت ليه خير بساعدك فيه
سالتو قلت انت من وين قال لي من الفاشر ومن الفاشر وين قال لي من خرطوم بليل ، قلت ليه الفاشر ما فيه خرطوم بليل قال لي تكساس ، قلت ليه مافيه تكساس
طيب قبيلتك شنو قال لي تنجراوي ، قلت ليه التنجر اصلاً من كتم ولكن دا كل ما يهمني بس داير اساعدك
قال لي انا شفت فيك الخير
قلت ليه انت سوداني وما عندك مشكلة والقروش دا امانة حق زول بس عايز احل مشكلة مادام حقي برجع
استلمت الريحة في الكيس ومكتوب عليه صندلية
مشيت للزبون عشان استلم القروش لقيتوا مافي ورجعت لصاحب البضاعة ايضاً لقيتوا مافي
سالت شباب متواجدين قدام الدكاكين قالو لي ما شفنا زول حايم بجاي
مشيت لست شاي قلت ليه وين الزول اللابس جلابية صفراء قال لي جرى بجاي
ومشيت قدام لقيت شباب قاعدين ما ست شاي تاني في اول الشارع قالو لي الزول دا جرى بجاي
مشيت لفيت من خلال الوصف ووصلت لحد المنطقة الصناعية امدرمان ودخلت بي زريبة العيش
ورجعت لحد البوست ما لقيتو.
ـــــــــــــ
هكذا يتم احتيالي وهذه اول مرة في تاريخ حياتي ، ويدل على ذلك التعامل بحسن نية مع اي شخص في الشارع العام
ويعلم الله لو المبلغ حقي لي ما طاردتوا ، ولكن الحسنة الوحيدة حولت مبلغ 1000جنيه لصاحبزا وهذا المبلغ من احد البورداب
لا اريد ذكر اسمه ولكن فاعل خير يريد ان يقوم بمساعدة الاخرين.
ومن هنا ابرر ذمتي امام الجميع بان المبلغ الذي تم احتياله هو مبلغ 2000جنيه . امانة بحوزتي
وسوف اجتهد بنفسي حتى اصل لهذا الحرامي ، والحمدلله رب العالمين
قدر الله ان يكون المبلغ نصيب هذا المحتال


صور البضاعة الضاربة






ا

السلام عليكم ذواليد سليمان مصطفى

ربنا يخلف عليك خيراً ويزدك من فضله

فقط تعامل مع من لا تعرف بحذر !!!!

من القصة واضح أنك إنسان أصيل تحب الخير وتسعى في خدمة الغير بصفاء سريرة وحسن نية

تألمت جداً لهذه الحادثة من نواحي عدة

نسأل الله أن يعوضك خيراً ويرزقك من حيث لا تحتسب

الأخ ذو اليد بعد السلام
بصراحة كدا ما بجاملك.. إنت غلطان 60 غلطان وتستاهل 60 جلدة بسوط عنج..
كيف يتم البيع والشراء في الشارع العام؟ دا الطمع الودّر ما جمع. كما يقول أهلنا البقارة: (دي بيعا ليك بقل).
تحياتي

كبـّاشي الصـّـافي
(العوج راي والعديل راي) .

حبيبنا ذو اليد الجاتك في مالك سامحتك وارجو ان تنتبه في مستقبل الايام

لكن دي عالم عجيبة شوف كيف التخطيط للنصب

عوضك الله وخليك صاحي

مهما كانت حسن نيتك مابتديك الحق تصرف فى امانة معاك ...

ربنا يخلف خيرا منها