حدود تعامل المعارض مع سفارات السودان فى اي دولة _ صديق الموج نموذجا

هل المشاركة فى اي فعالية اجتماعية او ثقافية ..الخ تحت مظلة اي سفارة سودانية فى اي دولة
لايخدم مصالح الحكومة و تحسين صورتها امام العالم الخارجي ؟؟؟
هل علاقة عضوية المنبر (تحديدا مع كيزان المنبر) مبرر كافي يجعل عضو معارض
انو يجامل ويشارك فى اي فعالية تحت مظلة واشراف سفارات النظام حول العالم؟



السنجك

والله يا السنجك انا كت ناوي افتح بوست بالموضوع ومالقيت وكت .
صراحة مشاركة صديق الموج ،وهو واحد من الناس مواقفو واضحة جدا ضد الطغمة الحاكمة ،في فعالية ثقافية ،اجتماعية في منصة سفارة النظام وجلوسو جنبا الي جنب مع يدعم النظام ويؤيد قتل شبابنا في الداخل ويجند نفسه جاسوسا علي السودانيين في الخارج،مشاركة غير مببررة ولا تشبه من يقف موقفا مبدئيا من هؤلاء المجرمين .
علينا ان نعي تماما ان اي نشاط ولو كان (دافوري في حارة )سيستغله هؤلاء لصالح فك عزلتهم.
تحياتي لفتح هكذه النافذة.

واحزابكم القعدت في المائدة المستديرة مع الحكومة ليه ما فتحتوا ليها بوستات

الاخ مرتضى
تحية طيبة

اتفق معاك خاصة الاخ صديق الموج لان مواقفه واضحة جدا ضد هذا النظام
يبدو ان هذه المشكلة ليست حكرا على بعض قائدات الاحزاب مثل الامة والاتحادي وبعض الحركات المسلحة
لكن يبدو ان العدوى انتقلت لعدد كبير من معارضي النظام والمسألة دي بدأت تبدو واضحة هنا فى المنبر كمان.

Quote: واحزابكم القعدت في المائدة المستديرة مع الحكومة ليه ما فتحتوا ليها بوستات

المتخاذلين من الاحزاب القعدوا مع الكيزان معروفين وما محتاجين فتح بوست بالعكس قيادات احزاب الامة والاتحادي
ومن شابههم ديل اخيرا قعدوا فى المكان البشبهم وان شاءالله دي نهاية الانقاذ حتبدأ من هنا طيلة الفترة السابقة دي
نحن كمواطنيين عاديين بنحلم ببلد حر ومستقل ويحترمنا كبشر كان الواقف بينا وبينكم الديناصورات الموجودة فى
ساحة المعارضة امثال الميرغني والصادق والترابي ...الخ ديل والله لايختلفون عن الكيزان فى شئ وديل بمعارضتهم
كانوا بالمناسبة لاعبين دور كبير جدا فى حماية نظام البشير من الشعب لانو الشعب كان كل ما يزهج من الحاصل فى البلد
ويحاول بس يرفع رأسه يجد نفس الاشكال الانتهازية منتظرة خروجهم للشارع عشان يشيلوا ليهم النظام ويهجموا هم بعد كده
على الكراسي تاني . ده مشهد كفيل يخلي اي سوداني بسيط يصرف نظر وينعل حظه ويواصل مسلسل كفاحه اليومي.
ومادام اجتمع البيض الفاسد كله فى سلة واحدة الفرج ان شاءالله قريب.

السنجك

تحدث الاخ صديق الموج عن عدم رغبته فى الدفاع عن ذهابه للسفارة لانو ذهب
اليها الاف المرات لخدمة مواطن لا يعرف حقوقه تارة وتارة اخرى ليسجل موقفه ضد النظام
وسيظل يذهب كل ما رأى ان فى ذهابه ما يصب فى خانة اي من قضايا الوطن الملحة واستشهد
بقول احدهم ليس المهم ان تذهب لكن الأهم ماذا تقول فى وجه سلطان جائر.

ده كلام سليم ميه الميه وده عشمنا برضو فى اي معارض نزيه.

هل يا ترى يستطيع الاخ صديق الموج يشرح لينا اين موقع مشاركته الاخيرة مع سفارة النظام من الاعراب فى حديثه اعلاه؟؟

فقط من اجل ان نبتعد عن الخم الحاصل الايام دي من معارضي النظام فى المنبر.

السلام عليكم ورحمة الله وبركاته


افتكر أن السفارات ملك للشعب السوداني مثلها مثل أي وزارة أو جامعة حكومية...

وفيما يتعلق بحضور أمسية ثقافية أو غنائية ..الخ فليس في الأمر عجب ولكن يكون التعجب عندما يغوص

بعض الناس الحضور لتغليب وجهة نظر معينة والاستهتار بجموع الشعب السوداني

لكم الود

محمد خضر بشير

Quote: وفيما يتعلق بحضور أمسية ثقافية أو غنائية ..الخ فليس في الأمر عجب

وعليكم السلام

ما عرفت اجابتك على السؤال المهم فى موضوع البوست:

هل المشاركات دي بتخدم النظام وتحسن صورته بالمجمل حول العالم ام لا؟

نعم اخونا السنجك
اي مشاركة في اي فعالية ينظمها هذا النظام المجرم لانؤيدها
لاننا نؤمن بانها تساهم في اطالة عمره بشكل او باخر
كما انها اعتراف صريح بنظام دموي قاتل
نأمل الا نري او نسمع لاحقا امثال العزيز صديق الموج في حفل كيزاني!
في وقت يذبح فيه النظام الالاف من ابناء الوطن !

Quote: واحزابكم القعدت في المائدة المستديرة مع الحكومة ليه ما فتحتوا ليها بوستات

مائـدة مستديــرة مغطيــة بطبق السعف المزخرف.

الغريبـة فى ناس اسيادهم وزعماؤهم التأريخيين والجغرافيين طالعين نازلين مع ناس الحكومة زاتهم، موش مع ناس (اكل العيش) فى السفارات..

السفارة فى الدولة التى فيها تحكمها قوانين الدولة المضيفة، وليست قوانين امن الدولة فى السودان.. وارى العكس، فإن السفارة هى التى كان عليها التخوف من المعارضين بأن يختطفوهم او يفجروهم، فلا يدعوهم
يقتربوا من السفارة مثل ما تفعل بقيـة الدول العربيـة.. خلى معارض من اى دولة عربيـة يقترب فقط من سور سفارة بلده، وشوف اليحصل ليه.. هنا الواحد يشتم الحكومة ويشارك فى مظاهرات ويؤلب المنظمات
(ولا إعتراض لى على هـذا) ثم يدخل السفارة عادى وكمان مكتب السفير بدون بروتوكولات ولا امن ولا حراسـة.. ويتم معاملاته القنصليـة..... حتى المواطن العادى الغير معارض، حين يذهب لسفارة بلده العربى لا يستطيع الدخول وينهى معاملاته من الخارج وفى ظل وجود امنى شامل.
الأخوة الكرام الفوق ديل يمشوا السفارات ويجددوا جوازاتهم ويدفعوا الرسوم التى تدعم الحكومـة وبرنامجها الحضارى. وزعماء احزاب الكثيرين منهم لبن على عسل مع الحكومة من البشير وانت نازل.

Quote: هل يا ترى يستطيع الاخ صديق الموج يشرح لينا اين موقع مشاركته الاخيرة مع سفارة النظام من الاعراب فى حديثه اعلاه؟؟

الاخ الحبيب السنجك والمتداخلين سلام
لعله من نافلة القول ان اقول لك السفارة هى ديوان السودانيين ولا يمكن ان تنرك بيتنا لاى نظام.
ولكن الا ترى فى وقوفى فى اى منتدى لازيل شبهة او لابين حقيقة او لادافع عن جزء من
مكوننا الثقافى او تراثنا يصب فى خانة نظالنا؟ باعتبار كل انسان يؤمن بهذا البلد وانسان البلد
عليه ان ينصره فى ما يليه، ولانى اعرف رأى د. عبد الله حمدنا الله وهو لايخالف رأى الطيب
مصطفى ومعظم اركان هذا النظام القمىء ذهبت لاحدث عن ان الحقيبة لا تمثل عصر انحطاط
الغناء السودانى وانها ليست اغنية حسية ولا كلماتها مبتذلة ولا شعرائها صيع كما هو رأى
الغالبة من اهل النظام وانها هى التى شكلت وجدان الناس وانها تغنت للجمال وللوطن وللطبيعه
وللكفاح وللنضال ولتعليم المرأة ولكل ضروب الفن.
انا اتمنى ان تحاربوا هذا الحزب الفاشل وهذه الطغمة الفاسدة المفسدة لكن لا تحاربوا الوطن
وعلوا راياته ورايات ارثه ، وعلى فكرة انا لم اقيم الندوة ولم اكن محدثها كل الذى فعلت اننى
ذهبت لعمل مداخلة وهى التى احدثت كل هذا واشكر لكم حرصكم على البلد وعلى انا شخصياً
واطمنكم يانى صديق المدافع عنكم وعن الوطن وارثه ومكتسباته وانسانه اين ما وقفت ويبقى الود،،،

ازيكم يا صحابي ... سنجك سلام وطني .. وضيوفك الكرميين .

عمومآ الشئ المعروف المبادئ لا تتجزأ . ولما الاحزاب التقليدية الرجعية
جزأت المبادئ كانت الطامة الكبري للأسف !

ولي قدام ...

تحياتي ياعزيزي السنجك -
وكما تعلم أن طاقم السفارة " موظف" لدي الشعب السوداني يتحصل علي مرتبه ومخصصاته من دافع الضرائب السوداني ومن عرق الشعب السوداني ومعظم الخدمات القنصلية التي تقدم للمواطن مدفوعة الرسوم !, ا لسفارة ملك للشعب السوداني والخدمات التي تقدم حق للمواطن لاعطية أو تفضل من طاقم السفارة أو الحكومة إذا ماتقوم به السفارة من خدمات يعتبر واجب وليس مكرمة ولا حتي حلم وتسامح مع معارض أو تكرم وتعطف علي ناقد للنظام! فالسفارة يجب أن تقف علي مسافة واحدة من كل الاحزاب والمواطنين !, من حق المواطن أن يرصد ويراقب مايجري في سفارات بلده - ويكشف أي ممارسات غير مهنية أو أي تسيس أو إضفاء طابع حزبي علي أنشطة السفارة- أو أي تجاوزات قد تحصل ! ** ومع وضع ماسبق في الإعتبار ومع إدراكنا التام للدمار الذي حاق بالخارجية والسفارات -وإعتلاء أهل الولاء الحزبي علي دفة الامور علي حساب أهل الكفاءة والمهنيية وطغيان الحزبية والتسيس مما يحتم - محاصرة هذه الظواهر ومحاربة التسيس - وعدم السماح للسفارة لأن تتحول لأداة وبوق يخدم المؤتمر الوطني ! لذا يجب الحرص والحيطة في التعامل مع الطاقم المسيس و ا لبعد عن ا لأنشطة المشبوهة وعدم الإنخراط فيما يخدم الحزب الشمولي الجاثم علي صدر الشعب والحرص علي الا لانتحول نحن لأدوات تخدم أجندة النظام من دون أن ندري .......

Quote: عمومآ الشئ المعروف المبادئ لا تتجزأ . ولما الاحزاب التقليدية الرجعية جزأت المبادئ كانت الطامة الكبري للأسف !

منى ده كلام صحيح ميه فى الميه وليتهم يعلمون


السنجك

Quote: الغريبـة فى ناس اسيادهم وزعماؤهم التأريخيين والجغرافيين طالعين نازلين مع ناس الحكومة زاتهم، موش مع ناس (اكل العيش) فى السفارات..

Quote: اي مشاركة في اي فعالية ينظمها هذا النظام المجرم لانؤيدها لاننا نؤمن بانها تساهم في اطالة عمره بشكل او باخر

التحية لك اخي هيثم ولموقفك الواضح هنا

تحياتي

,

Quote: اتمنى ان تحاربوا هذا الحزب الفاشل وهذه الطغمة الفاسدة المفسدة لكن لا تحاربوا الوطن

كلام درر

كلما تركناهم يبرطعوا زي ما عايزين كلما طال امدهم وظنوا انهم على الصواب
تحياتي السنجك وكل المتداخين
وموقف مشرف لصديق الموج

الاخ صديق الموج

اشكرك على التوضيح والبوست والاستفسار من عشمنا في مواقفك الواضحة جدا ضد هذا النظام

واكيد كل من لم يؤيد مشاركتك الاخيرة اخي صديق الموج لم يكن يقصد ان يقف ضد
محاولتك للتصدي لاي اجندة او مخططات يحاول النظام ان يمررها وده فعلا واجب اي مواطن ومعارض نزيه.
السؤال الآن عزيزي صديق الموج بعد مشاركتك الاخيرة دي النتيجة كانت كيف بشكل عام ؟

وخلينا نأخد المنبر هنا كنموذج مثلا:

الاخ ودالباقة وهو يمثل النظام، طوالي بادر بخطوة عملية وفتح بوست اخد فيهو
ادفانتج واضح جدا وفي المجمل خدم النظام بيهو من خلال توضيح كيف اتواصل
مع الاخ صديق الموج وكيف كانت الفعالية رائعة وناجحة. تأكد شحصي والكثيرين نثق جدا فى مشاركتك وطبيعتها واهدافها
السؤال المهم الآن وبامانة اتمنى الاجابة عليه
ما هي المحصلة النهائية لهذه الفعالية اقصد هنا فى المنبر تحديدا كمثال
بوست ودالباوقة خدم فيهو صورة النظام من خلال الفعالية دي اين موقع هدفك من المشاركة فى البوست المعني بشكل عام ؟؟
الا تتفق معي انو نصر باهظ الثمن ؟؟

فى تقديري انو ودالباوقة اتعمد ياخد ادفانتج مستغل ادبك وذوقك(لااقصد التدخل فى طريقة ادارة علاقاتك الخاصة بالتأكيد)وده شأن
الكيزان بالعموم دائما وخاصة فى الفترة الاخيرة اصبحوا يروجون لمفهوم الحوار وفي اصوات كثيرة فى المنبر بدأت تقع فى الفخ ده
واهو امامكم المنبر ونماذج الاصوات البحكي عنها دي اصبح واضح جدا (بوست الاخ ود قاسم سأحاور).

السنجك

Quote: لكن لا تحاربوا الوطن وعلوا راياته ورايات ارثه

كلام جميل ورائع ..
وان طبق ... حل كل مشكلات الوطن..
التي ولدت معه...
وإن فعلنا ذلك ..
سيطيح من لا يستحق قيادة هذالوطن...

Quote: لكن لا تحاربوا الوطن وعلوا راياته ورايات ارثه

كلام جميل ورائع ..
وان طبق ... حل كل مشكلات الوطن..
التي ولدت معه...
وإن فعلنا ذلك ..
سيطيح من لا يستحق قيادة هذالوطن...

الاخ كمال عباس
تحية طيبة ومشتاقين والله. وشكرا كتير على المرور

كتبت :

Quote: والحرص علي الا لانتحول نحن لأدوات تخدم أجندة النظام من دون أن ندري .......

اتفق معك ميه في الميه على كل ماورد فى مداخلتك. واسمح لي اخد الجزء اعلاه لانو
يلخص موضوع البوست بتاعي ده باختصار شديد

والآن سؤال للاخوان الشفيعع و أمير السماني تحديدا

نفس السؤال الذي وجهته للاخ صديق الموج وياريت وياريت وعشان خاطر الوطن برضو وعشان ما يبقى حكي ساي حب
الوطن ده لانو بالجد نوع الكلام ده لمن يكون مغاير للواقع متعب جدا:

السؤال:

الاخ ودالباقة وهو يمثل النظام، طوالي بادر بخطوة عملية وفتح بوست اخد فيهو
ادفانتج واضح جدا وفي المجمل خدم النظام بيهو من خلال توضيح كيف اتواصل
مع الاخ صديق الموج وكيف كانت الفعالية رائعة وناجحة. تأكد شحصي والكثيرين نثق جدا فى مشاركتك وطبيعتها واهدافها
السؤال المهم الآن وبامانة اتمنى الاجابة عليه
ما هي المحصلة النهائية لهذه الفعالية اقصد هنا فى المنبر تحديدا كمثال
بوست ودالباوقة خدم فيهو صورة النظام من خلال الفعالية دي اين موقع هدفك من المشاركة فى البوست المعني بشكل عام ؟؟
الا تتفق معي انو نصر باهظ الثمن ؟؟