Post: #1
Title: أين الشباب من الحوار (الوطني) ... بل أين الشعب؟
Author: أيمن محمود
Date: 04-08-2014, 10:43 PM
العشرات من الوجوه المعاد تدويرها طافحة في حوار سمي بالحوار الوطني، كلهم لا يحمل هم باقي الشهر ده يتموا كيف ؟
عايزين يتحاوروا في شنو؟
حكومة قومية، انتخابات نزيهة، دستور، حريات ... الخ؟
لت وعجن، محاصصات، تنظير فارغ (الدستور اول والا الانتخابات أول؟)
مجموعة من الفشلة خبرهم الشعب عبر عشرات السنين عبر ساقية عبث
واحد بس من القاعدين يتحاورا ديل مات ليهو زول في المظاهرات الفاتت مافي !
الشباب الغير منتمي للاحزاب مغيب تماماً، الشباب الما بعرف سيدي والا شيخي !
الجمرة بتحرق الواطيها
وحوار ما لم الناس كلها ما منو فايدة
الصادق والميرغني لابدين من زماان ومابين الثورة عشان جنس ده - ترجع ليهم (هم بس) بااردة !
الصادق والميرغني جهزوا وليداتم عشان يورثوكم
|
Post: #3
Title: Re: أين الشباب من الحوار (الوطني) ... بل أين الشعب؟
Author: تبارك شيخ الدين جبريل
Date: 04-09-2014, 01:02 AM
Parent: #2
Quote: الصادق والميرغني لابدين من زماان ومابين الثورة عشان جنس ده - ترجع ليهم (هم بس) بااردة !
الصادق والميرغني جهزوا وليداتم عشان يورثوكم |
قطرهم صفّر ... ومحولجيهم محمد على عثمان ... محولجي قطار الشوق ...
(قطار الشوق ... اظنو حا يلحق "سفينة الإنقاذ" ورا الجُّكُّو  )
... المهم ....
|
Post: #4
Title: Re: أين الشباب من الحوار (الوطني) ... بل أين الشعب؟
Author: Osama Mohammed
Date: 04-09-2014, 01:03 AM
Parent: #2
الاخ ايمن
احسبك اذكى و افطن من هذا .
انت مصدق انو في حوار ؟
اجمل تعليق قريتو في فيسبوك من وليد الشفت قال
Quote: ياخ البشير بلعب مع الاحزاب ذي شفع زمان
ياااااااااااك ..... ياااااااااك
|
البشير عارف نفسو لاحق القذافي بالمناسبة بس ( بكسب زمن ) .
تعرف الشباب البفطو فيهم ديل ( حا ياخدو حقهم بي يدهم ) والزمن دوار يا عبد الستار ( على حسب القصة عبد الستار هو بتاع العرقي والذي كان احد منفذي انقلاب يونيو - زبون دائم - وعبد الستار في الاسبوع الاخير ( حرن ) وابي يدي زولك ولا كباية اها بعد الانقلاب بي شهرين تلاتة زولنا زاتو بقا طبعا من المقربين وسمع انو عبد الستار كشوهو فقام مشا القسم وفكاهو . وقال قولته المشهورة ( الزمن دوار يا عبد الستار ) .
النوم وجب يا صحبي .
بكرة ألف فرج
|
Post: #5
Title: Re: أين الشباب من الحوار (الوطني) ... بل أين الشعب؟
Author: أيمن محمود
Date: 04-09-2014, 05:41 AM
Parent: #2
محمد علي،،، سلامات
| Quote: لمهم يا ايمن محمود و جيبهم يركبوا في القطر ده واقف و منتظرهم و مليان شباب ونساء ورجال. |
القصة ما قصة استقطاب وكيمان
أهل الوجيعة الجد مغيبين وكأنهم ترلات، والحوار حبابو مع الشيطان لو كان ده في مصلحة المواطن
الجبهة الثورية وقوى الإجماع الوطني قوى أساسية غيابها بيفقد الحوار معناهو
|
Post: #6
Title: Re: أين الشباب من الحوار (الوطني) ... بل أين الشعب؟
Author: مدثر صديق
Date: 04-09-2014, 09:28 AM
Parent: #5
ايمن محمود سلام
لا يمكن تبدأ كلامك ب | Quote: أين الشباب من الحوار (الوطني) ... بل أين الشعب؟ |
و تختموا ب | Quote: الجبهة الثورية وقوى الإجماع الوطني قوى أساسية غيابها بيفقد الحوار معناهو |
هل الجبهة الثورية تمثل (شباب) و تمثل الشعب السوداني هم جزء مهم زي بقية مكونات الشعب السوداني ....
|
Post: #7
Title: Re: أين الشباب من الحوار (الوطني) ... بل أين الشعب؟
Author: أيمن محمود
Date: 04-09-2014, 10:06 AM
Parent: #6
مدثر صديق،،، تحياتي
| Quote: هل الجبهة الثورية تمثل (شباب) و تمثل الشعب السوداني هم جزء مهم زي بقية مكونات الشعب السوداني |
تحدثنا عن غياب الشباب على وجه التخصيص والشعب على وجه التعميم
الجبهة الثورية جزء من الشعب السوداني وعدم مشاركتها يفقد الحوار معناه باعتبارها أحد مكونات هذا الشعب وتمثل شريحة كبيرة ومؤثرة
الذين يتحاورون الآن في أفضل الاحوال يمكن اعتبارهم طبقة حاكمة لا تمثل الشعب ومكوناته: من شباب + الجبهة الثورة + قوى الاجماع الوطني ....الخ !
|
|