قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!

Post: #1
Title: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 09:35 PM
Parent: #0

أحد اصدقائي المسكونين بالعلم و المعرفه ... سالني و هو في قمة حزنه علي رحيل محجوب شريف

قائلاً :

انت يا كافي البلا ... رموز الكيزان ديل لابموتوا لا بفوتوا ... ؟

بس يموتوا ناس وردي و حميد و محجوب و الليله ناجي القدسي ...

قلت ليهو ... مش بالأول يجيبوا لينا مبدع ... حتين بعد داك نشوف موضوع موتهم ده !!!

يا كافي البلا ما جا منهم للسودان ... لا كاتب ... لا شاعر ... لا مسرحي ... لا موسيقي ...

جنسهم شنو ديل ؟ ...

تجيرنا يا محمد ...

Post: #2
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: معاوية الزبير
Date: 04-04-2014, 09:47 PM
Parent: #1

إبداع أكتر من كدا
عليك الله يا قباني ما تفوّل علينا ياخ

Post: #3
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: ناصر احمد الامين
Date: 04-04-2014, 09:56 PM
Parent: #2

Quote: بس يموتوا ناس وردي و حميد و محجوب و الليله ناجي القدسي ...

ديل ما ماتو لانهم لسه عايشين في قلوبنا و في ضمير الشعب

Quote: انت يا كافي البلا ... رموز الكيزان ديل لابموتوا لا بفوتوا ... ؟

أما ديل فقاعدين يموتو كل يوم الف مره

تحياتي يا ملك و ربنا يجبر كسورنا و تبقي سيرة شرفاء شعبنا ذخرا لنا في قادم ايام الوطن

Post: #4
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 10:07 PM
Parent: #3

Quote: إبداع أكتر من كدا
عليك الله يا قباني ما تفوّل علينا ياخ

ود الزبير يا صديق ...

قلت لواحد تاني من الاصدقاء حكاية ما بموتوا دي ...

قال لي يا قباني يا صاحبي الموت ده داير ليهو أسباب ...

و الناس ديل الاسباب ما بدوها فرصه ... الواحد لو ضرسوا قام عليهو يركب يمشي اوروبا ...

قلت ليهو والله معاك حق ...

في وزير... وهو جاي من بورتسودان بالطياره

نازل السلم بتنطط ... كراعوا انزلقت من آخر عتبه ... والانكل انجزع ...

جاهو البشير زاروا في البيت و قال ليهو لازم تمشي سويسرا ...

قال ليهو لكن دي ما حاجه بسيطه ؟

قال لا لا ... بكره ممكن البسيطه دي تبقي كبيره ... اخير تتطمن ... وتعمل تشييك كامل بالمره ...
____________________________________________________________
لكن صحي يا معاويه ... مالهم ناشفين كده ... وخاليين من الابداع ؟

هل الزول بيكون كوز بالاول عشان كده ما ببقي مبدع ...

و لا اصلا ما بكون مبدع ... عشان كده ببقي كوز ؟

Post: #5
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 10:10 PM
Parent: #4

Quote: أما ديل فقاعدين يموتو كل يوم الف مره

تحياتي يا ملك و ربنا يجبر كسورنا و تبقي سيرة شرفاء شعبنا ذخرا لنا في قادم ايام الوطن

و الله يا ناصر تعدل ولا ما تعدل انا قريت موضوع الصنف ده و كلمتو ههههههه

الظاهر عليك لقيت موضوع الصنف طابق علي قمت قلت اخير تشيلوا ... ههه

التحيه ليك يا صديقي و الله يجبر كسورنا و خواطرنا انشاء الله ...

Post: #6
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: محمد المرتضى حامد
Date: 04-04-2014, 10:32 PM
Parent: #5

Quote: يا كافي البلا ما جا منهم للسودان ... لا كاتب ... لا شاعر ... لا مسرحي ... لا موسيقي ...

أذكر أن أحد قادتهم أقر في لقاء تلفزيوني بأنهم كانوا يفتقرون إلى الكوادر
التي تعنى بالثقافة في حركتهم ..
وهاهي النتيجة بعد ربع قرن ..زي ما شايف..

قلت ثقافه!!

سلام يا قبه..

Post: #7
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: ناصر احمد الامين
Date: 04-04-2014, 10:39 PM
Parent: #6

Quote: أذكر أن أحد قادتهم أقر في لقاء تلفزيوني بأنهم كانوا يفتقرون إلى الكوادر
التي تعنى بالثقافة في حركتهم ..
وهاهي النتيجة بعد ربع قرن ..زي ما شايف..

قلت ثقافه!!

سلام يا قبه..

يااااااااه محمد المرتضي حامد شخصيا
يعلم الله مشتاق ليك و كويس انو بوست هباني دا لاقاني بيك
قلت لي ثقافة؟ ههههههههههه
كن بخير يا رجل يا جميل و موعدنا ياني Yanni

Post: #9
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 10:49 PM
Parent: #7

Quote: أذكر أن أحد قادتهم أقر في لقاء تلفزيوني بأنهم كانوا يفتقرون إلى الكوادر
التي تعنى بالثقافة في حركتهم ..
وهاهي النتيجة بعد ربع قرن ..زي ما شايف..

قلت ثقافه!!

سلام يا قبه..

مشتاقين يا مولانا ...

شفت لمن يضيق بينا الحال ... و يفوتوا الناس السمحين بنبقي كيف ؟

لكن صحي يا محمد القصة حقة عدم الابداع دي شنو ؟

حتي ايام الجامعه لمن ناس حلمنتيش كتبوا فوقهم الكلام ده ... يا كافي البلا ما عندهم زول رده عليهو بكلام منسق او مموسق ...

مولانا جانا اسد الخلا النّر نّر
فار شنباتو زي عنتر ... مطرقط وشو ما بنفر ...
ولابد لبده في مصلياتو ...بي كراكه ما بنجر ...
و قانص قنصه .. لا تيبان و لا فستان ..
أكان احمر .. وكان اصفر ...
وكت شرّوهو قال واللهي ما منشر ..
واقف ساكت اتمنظر ...!!
حريف مولانا ... العب غيرها ... واقف ساعه ... ياهو الشر...
اكانا هامانا كان عرمانه كان عنتر تضوق الشر ..
_________________________________
ناصر ده كان تاني قال لي هباني ... لا بيني لا بينو ... ههه

مع كامل احترامنا و اشتياقنا للناظر هشام ...

Post: #8
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: cantona_1
Date: 04-04-2014, 10:41 PM
Parent: #6

يا قباني حرام عليك.. يعني عاوز ليك إبداع أكتر من الفعلوه دا .. هسّع إنت لو أدوك قروش يعني أجّروك وقالوا ليك سوي الفعلوه الجماعة ديل بتقدر عليهو؟
طيب ما ياهو الإبداع ذاتو بس إبداع بالماينص.
تحياتي

كبـّاشي الصـّـافي
(العوج راي والعديل راي) .

Post: #10
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 10:56 PM
Parent: #8

Quote: يا قباني حرام عليك.. يعني عاوز ليك إبداع أكتر من الفعلوه دا .. هسّع إنت لو أدوك قروش يعني أجّروك وقالوا ليك سوي الفعلوه الجماعة ديل بتقدر عليهو؟
طيب ما ياهو الإبداع ذاتو بس إبداع بالماينص.

سلام يا باشمهندس ...

و الله ما بهظر يا الكباشي

بس معقول ...

لا بيت شعر ... لا دوبيت ... لا نقرشة عود ... لا نمة ... لا ترنيمه ...

لا قصة ... لا مسرح ... لا لحن ... لا تيمه ...

أصلوا شنو ده ؟

غايتو الإخترعهم بالغ ...

Post: #11
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: محمد محمود محمد
Date: 04-04-2014, 10:57 PM
Parent: #8

Quote: كويس انو بوست هباني دا لاقاني بيك

يا ناصر ركّز ياخ..
هباني في عزلتو المجيدة..

ومشتاقين كتير يا يحيى.

Post: #12
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 11:07 PM
Parent: #11

Quote: يا ناصر ركّز ياخ..
هباني في عزلتو المجيدة..

ومشتاقين كتير يا يحيى.

كلموا بالله يابوحميد ...

كتبها مرتين و انا ساكت ... ههه

Post: #13
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: bashir kurdufan
Date: 04-04-2014, 11:13 PM
Parent: #11

لابداع وين مع العنف والحركات الزى دي يا قباني,
وكت الناس كانوا بشتغلوا المسرح الجامعي, وأبو دماك مدورة,
وناس الحركة التشكيلية شغالين أعمال وتنظير, ديل كانوا شايلين السيخ لمحاربة الرقص الشعبي
وقبل الابداع

وغايتو ما عارف هم بحاربوا الابداع وبكتلوا المبدعين لأنهم ما عندهم مبدعين,
ولا ما عندهم مبدعين لأنهم بكتلوا بوادر الابداع واتجاهاته داخل عضزيتهم؟ ههههه ياهو ده نفس سؤالك الفوق

بشير اسماعي

Post: #14
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 11:22 PM
Parent: #13

Quote: وكت الناس كانوا بشتغلوا المسرح الجامعي, وأبو دماك مدورة,
وناس الحركة التشكيلية شغالين أعمال وتنظير, ديل كانوا شايلين السيخ لمحاربة الرقص الشعبي
وقبل الابداع

سلامات يا كرفاني ... مشتاقين يا رجل ... و البركه فيكم في رحيل المبدعين يا حبيب ...

عاين عز الدين عثمان الله يرحموا عمل فيهم شنو زمان

Post: #15
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-04-2014, 11:40 PM
Parent: #14

Quote: وغايتو ما عارف هم بحاربوا الابداع وبكتلوا المبدعين لأنهم ما عندهم مبدعين,
ولا ما عندهم مبدعين لأنهم بكتلوا بوادر الابداع واتجاهاته داخل عضزيتهم؟ ههههه ياهو ده نفس سؤالك الفوق

وده يا بشير هو سؤال المليونين ريــال في من سيربح المليونين ...

( مش بقوا مليونين حسي ؟ ) ...

العارف الجواب يلحقنا بيهو ...!!!

Post: #16
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: Nader Abu Kadouk
Date: 04-04-2014, 11:43 PM
Parent: #14

Quote: لا بيت شعر ... لا دوبيت ... لا نقرشة عود ... لا نمة ... لا ترنيمه ...

لا قصة ... لا مسرح ... لا لحن ... لا تيمه ...

يا قبة ماممكن ياخي الحاجات الفوق دي حرام حرام...............

الناس ديل ببدعوا في الحاجات الحلال فقط............انت ما سمعتة بحسبو نسوان ولا شنو..........ياخي ده كتلة من الابداع...........

Post: #18
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: bashir kurdufan
Date: 04-05-2014, 00:17 AM
Parent: #14

انت بتجين الحاجاات دي من وين يا قباني؟؟ عندك كنوز كده,, لكن هذه الكراكتيرات لاتزال كاملة الصلاحية حتى الآن ..
شئ عجيب

جيتك تاني يا قباني
هنالك مشروع على درجة من الأهمية يتعلق بالتوثيق لحياة محجوب شريف من خلال شهادات يقدمها كل من له علاقة,
عن بقض التفاصيل والمواقف المهمة التي تلقي مزيدا من ضوء ومن مسافة أكثر قربا من العام, حتى العام هنالك مساحة له,
كما أن العارض من المواقف يمكن أن يكون ه حضور دال, فاذا كان مثل هذا الموقف بين محجوب وشخص لا يعرفه أو ليس بينه وبينه علاقة,
فهو يمكن أن يكون ذا دلالة كبيرة, ومبلغ القول أن كل شهادة يقدمها أحد عن الراحل محجوب شريف لها أهميتها بغض النظر عن أي شئ.
فلنوثق له على البوست المفتوح غلى الرابط أدناه:

http://www.sudaneseonline.com/board/460/msg/1396566384.html

هذه الشهادات ليست فقط من أجل التوثيق, لكن ليفيد منها "أولادنا الجايين" لأنها على أنصع وأبلغ ما تكون السير, وأيضا ربما استطعنا من خلال هذه الشهادات أن نصل لوصفة
تمكننا من استنبات مثل هذه الصفات في شخصيات أبنائنا من الأجيال القادمة لأن اليقين أن شخصية محجوب ومن يشبهونه هي نتاج تجاربهم مع مجتمعهمز

Post: #17
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: محمد حيدر المشرف
Date: 04-04-2014, 11:57 PM
Parent: #1

عزيزي يحى ..

الابداع يتطلب نوع من الرقي والجمال الانساني ..
ولا أعتقد أن أحدهم وقد تمتع بشيء من هذا الرقي الانساني قد يصبح "كوزا" ..
هؤلاء فاتهم هذا النوع من الجمال الانساني فتكوزنوا..
فكيف بالله قد يكونوا مبدعين ؟!!

Post: #19
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: cantona_1
Date: 04-05-2014, 00:55 AM
Parent: #17

يا جماعة الخير سلام
إنتو زعلانين مالكم؟ ما عندهم مبدعين دي معروفة لأن كل إنسان لما يُسِّر له.. الناس ديل ربهم يسّرهم للسفسفة والخم .. ليش ما عندكم ناس بتاعين سفسفة وخم؟
ديل في ستينيات القرن الماضي حاربوا رقصة شعبية في كردفان اسمها العجكو .. تُرقص في الليالي المقمرة في كردفان .. عاوزين منهم يفهموا ليكم إبداع محجوب شريف الله يرحمه..
بصراحة كدا مش عصرتو عليهم شوية؟
تحياتي

كبـّاشي الصـّـافي
(العوج راي والعديل راي) .

Post: #20
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: معاوية الزبير
Date: 04-05-2014, 01:44 AM
Parent: #19

بالجد يا قباني السؤال مهم، والبحث عن إجابة له لا تقل أهمية عن البحث في وسائل تخليص الوطن من أنيابهم
مبدئيا أؤيد الزملاء الذين ذهبوا إلى أن بيئة الكيزان غير صالحة لنمو الإبداع، لذلك سرعان ما تذبل المواهب عندهم
ليت من له معرفة بمكونات تلك البيئة أن ينوّرنا، ربما واحد ممن يـ(سـ) يشاركون في هذا البوست كان هناك ذات تيه
وعودة عن الجد أقوليك، عيب لي الرقص، أليس من أنواع الفنون يا متعلم
ولّ لازم يكون باليه يعني

Post: #21
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 02:33 AM
Parent: #20

Quote:
Quote: لا بيت شعر ... لا دوبيت ... لا نقرشة عود ... لا نمة ... لا ترنيمه ...

لا قصة ... لا مسرح ... لا لحن ... لا تيمه ...

يا قبة ماممكن ياخي الحاجات الفوق دي حرام حرام...............

الناس ديل ببدعوا في الحاجات الحلال فقط............انت ما سمعتة بحسبو نسوان ولا شنو..........ياخي ده كتلة من الابداع...........

ابكدوك يا صاحب ...

موبقات قلت لي !

و الله العظيم كرهونا في ديننا ...

زى ما قال عمك للخواجه الداير يدخل الاسلام

قال ليهو : هو الناس مارقين و انت داخل ؟
_____________________________
لكن بالجد يا نادر ...

عمرك سمعت بي واحد منهم كتب ليهو انشاء الله نشيد ؟

Post: #22
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 02:38 AM
Parent: #21

Quote: انت بتجين الحاجاات دي من وين يا قباني؟؟ عندك كنوز كده,, لكن هذه الكراكتيرات لاتزال كاملة الصلاحية حتى الآن ..
شئ عجيب

جيتك تاني يا قباني
هنالك مشروع على درجة من الأهمية يتعلق بالتوثيق لحياة محجوب شريف من خلال شهادات يقدمها كل من له علاقة,

عزالدين رحمة الله عليه كان سابق زمنه ...

انا عندي مجموعة العهد البائد الأصدرها 69-70

انشاء الله بجيب ليك منها مجموعه في البوست ده
__________________________________
حاجيكم في بوست التوثيق بمشيئة الله يا كردفاني

Post: #23
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 02:49 AM
Parent: #22

Quote: عزيزي يحى ..

الابداع يتطلب نوع من الرقي والجمال الانساني ..
ولا أعتقد أن أحدهم وقد تمتع بشيء من هذا الرقي الانساني قد يصبح "كوزا" ..
هؤلاء فاتهم هذا النوع من الجمال الانساني فتكوزنوا..
فكيف بالله قد يكونوا مبدعين ؟!!

مشرف يا صديقي...

و اطاتهم مالها راقده بور كده ...

ياخي الاسلام ده دين رقيق جداً ( بافتراض انهم كذلك ) ...

و شاعر الاسلام الاول حسان بن ثابت

كتب ما كتب عن الرسول الكريم صلوات الله عليه و سلامه ...

طيب اذا قلنا هم المسلمين و كلنا ( غير ذلك ) ...

معقول تكون اخر قصيده بانت سعاد ؟

Post: #24
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: محمد حيدر المشرف
Date: 04-05-2014, 02:56 AM
Parent: #23

يحى يا حبيب ..
هؤلاء الكيزان منبتين وحتى على المستوى الديني ..
ما عندهم ادنى علاقة بالرموز الاسلامية يا يحى ..
هو العندو دين ... بيسرق البلد العبادها موحدين ..
او كما قال حميد شلة مسخرة وعبدة كراسي و مرتشين ..
ديل .. ديل يا يحى .. ديل كيزان !!!

Post: #25
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 03:43 AM
Parent: #24

Quote: ديل في ستينيات القرن الماضي حاربوا رقصة شعبية في كردفان اسمها العجكو .. تُرقص في الليالي المقمرة في كردفان .. عاوزين منهم يفهموا ليكم إبداع محجوب شريف الله يرحمه..
بصراحة كدا مش عصرتو عليهم شوية؟

هاك يا كباشي دي من عزالدين الله يرحمه

و رأي الاخوان في الرقصات الشعبيه ... ( 1968 ) ...

Post: #26
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 03:49 AM
Parent: #25

Quote: بالجد يا قباني السؤال مهم، والبحث عن إجابة له لا تقل أهمية عن البحث في وسائل تخليص الوطن من أنيابهم
مبدئيا أؤيد الزملاء الذين ذهبوا إلى أن بيئة الكيزان غير صالحة لنمو الإبداع، لذلك سرعان ما تذبل المواهب عندهم
ليت من له معرفة بمكونات تلك البيئة أن ينوّرنا، ربما واحد ممن يـ(سـ) يشاركون في هذا البوست كان هناك ذات تيه
وعودة عن الجد أقوليك، عيب لي الرقص، أليس من أنواع الفنون يا متعلم
ولّ لازم يكون باليه يعني

عن الشق الجاد في مداخلتك يا معاويه بالأول :

يعني ممكن يكون في انسان في دواخله ابداع ...

قامت بيئتهم الغير صالحه قتلت ذلك الابداع لدرجة انو ممكن يبقي مسخ بالشكل ده ...

قلب ميت .. و جشع ... معقول بس ؟
_______________________________
اما الشق التاني يا صديقي فما عندا فيهو كلام ...

كبيرهم الذي علمهم ( الرقص ) ...

عشان كده ما كتبت (الرقيص) ... لأنهم بصراحه ( بَدّعوا ) فوقه ...
_________________________________________

واحده تانيه من ابو الابداع عزالدين رحمه الله :عشان تشوف قتل الابداع ...

Post: #27
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 03:52 AM
Parent: #26

Quote: Mawada Mohammed · الأكثر تعليقا
استاذ قباني الحقيقه انو الكيزان قتلوا كل المبدعين ولسه في طريقهم للتخلص من القله الباقيه وهذه حقيقه اما بواسطة السموم اوالحقن القاتله او حوادث الحركه المفتعله ..حقو الناس تفكر في الموضوع ده بجديه لانو الموت الحاصل ده وفي فتره وجيزه للفنانين والشعرا، ما موت الله براه والموضوع مش انهم ما مبدعين او غيره الحكايه انو الاخوان المسلمين عايزين ينتهو من اي ثقافه او فن في البلاد وانو الناس ما تمارس اي نوع من الحريه وتكون مخدره وبعيده من اي ابداع وده ما حاول الاخوان المسلمون في مصر عمله وبداوا بالممثلين وكان حا يكون مصيرهم نفس مصير مبدعي بلادي لولا انهم فطنوا اليه باكرا وربنا نجاهم من هولا، الاوغاد ..

يا موده ...

عمك كامل عبد الماجد كتب للجابري و قال

انا في العيون ببنيلو دارين من ( موده ) و من مني ...

بالله معقول الجمال ده دايرين يكتلوهوا ؟

قبح الله وجوههم اكتر مما هي قبيحه ...

Post: #28
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 03:56 AM
Parent: #27

حسي الولد الصيني ( الكافر ) ده ...
في داعي ( يفسق ) بالشكل ده ؟

Post: #29
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 04:20 AM
Parent: #28

Quote: يحى يا حبيب ..
هؤلاء الكيزان منبتين وحتى على المستوى الديني ..
ما عندهم ادنى علاقة بالرموز الاسلامية يا يحى ..
هو العندو دين ... بيسرق البلد العبادها موحدين ..
او كما قال حميد شلة مسخرة وعبدة كراسي و مرتشين ..
ديل .. ديل يا يحى .. ديل كيزان !!!

لكن يا المشرف ...

كلو خلّينا ...

يا كافي البلا ... ما عندهم حاجه كده فيها ( ريحة ) ابداع ...

الناس تتذكرهم بيها بعد ما يغوروا ؟

و الله كان كده كلام ود الزبير يا هو الحقيقه ...

عندهم ( غربال كبير ) يخجوا ناسهم فيهو ...

اي زول عنده حبة ابداع ... ينتهوا منو قبال ما يقلبوهوا في ( الجردل ) ...

Post: #30
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: BALLAH EL BAKRY
Date: 04-05-2014, 04:46 AM
Parent: #28

Quote: لا بيت شعر ... لا دوبيت ... لا نقرشة عود ... لا نمة ... لا ترنيمه ...
لا قصة ... لا مسرح ... لا لحن ... لا تيمه ...

سلام يا صديق والبركة فيك وفي السودان كله في فقده الجلل
الحاجات الفوق دي كلها شغل انساني صرف ينبع
من نفوس سالمة سليمة محبة للأنسان والجمال وروعة التنوع.
نفوس لا تبحث في ضمائر الناس لتصنفهم
ولا تتناطى لعرضهم ولا تتدخل في البينهم وبين
ربهم. نفوس لاتكذب ولا تغش ولا تراوغ ولا تخدع انسانها
فكيف لهم بي (الحاجات الفوق دي) يجيبوها من وين دحين؟!!

Post: #31
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: BALLAH EL BAKRY
Date: 04-05-2014, 05:14 AM
Parent: #30

الأنسان يولد وهو مبدع ب(الفطرة) فكيف قتلوا الأبداع في نفوسهم؟!!
أنظر لنشوة هذا الصغير في الدقيقة الثالثة

Post: #32
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 05:42 AM
Parent: #31

Quote: سلام يا صديق والبركة فيك وفي السودان كله في فقده الجلل
الحاجات الفوق دي كلها شغل انساني صرف ينبع
من نفوس سالمة سليمة محبة للأنسان والجمال وروعة التنوع.
نفوس لا تبحث في ضمائر الناس لتصنفهم
ولا تتناطى لعرضهم ولا تتدخل في البينهم وبين
ربهم. نفوس لاتكذب ولا تغش ولا تراوغ ولا تخدع انسانها
فكيف لهم بي (الحاجات الفوق دي) يجيبوها من وين دحين؟!!

بله يا صديق الزمن الجميل ...

لا ادري هل نحن سعداء لمعاصرتنا لهؤلاء المبدعين ...

ام تعساء لاننا تعلقنا بهم ... وهاهم يرحلون عنا واحداً تلو الآخر ...

رحل محجوب شريف يا بله ...

وهل تذكر كورال الهندسه و هو يؤدي بفخر شديد يا والده يا مريم ؟

خيري عبد الرحمن ... معاويه عبد الرحمن ... وصال احمد ... و البقيه ...

زمن جميل ... لن يفلحوا مهما شوهوا التاريخ ان ينزعوه من دواخلنا ...

البركه فينا و فيك يا صديقي ...

Post: #33
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 05:46 AM
Parent: #32

شوفوا الكتب قاعده وين و السيف ( مرفوع ) كيف ... في كراكاتير عز الدين ده

Post: #34
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 06:07 AM
Parent: #33

الإمام الشافعي قال :

من تعلّم القرآن عَظُمــت قِيمَتَه

و من كتب الحديث قَوِيَت حُجّتَه

و من نظر في الفِقهِ نَبُلَ قَدرَهُ

و من نظر في اللًّغَةِ و الشِعـــــر رقّ طبعهُ
___________________________
تاني نقول شنو بعد الكلام ده ؟

Post: #35
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: معاوية الزبير
Date: 04-05-2014, 06:31 AM
Parent: #33

بالجد -مرة تانية- يا قباني الكيزان ديل بنهلوا من معين فكري واحد (طبعا زيهم زي أي حزب عقائدي)
ومنهلهم هذا يحرّم النحت والرسم (غير الطبيعة) والتصوير والغناء والرقص والتمثيل وهلمجرا
فكيف بالله عليك تريدهم أن ينبغوا في هذه الموبقات
بعيدا عن الجد، أنا الناس ديل ما بضمنهم، بكون عندهم غواصات
يعني هسع انت أصلو ما انتابك -في لحظة ضعف كدا- شك في مبدعين زي أبو داوود أو حسن موسى أو جكسا

Post: #36
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 06:52 AM
Parent: #35

Quote: بالجد -مرة تانية- يا قباني الكيزان ديل بنهلوا من معين فكري واحد (طبعا زيهم زي أي حزب عقائدي)
ومنهلهم هذا يحرّم النحت والرسم (غير الطبيعة) والتصوير والغناء والرقص والتمثيل وهلمجرا
فكيف بالله عليك تريدهم أن ينبغوا في هذه الموبقات

يا معاويه ( المعين ) ( البنهلوا ) منو ده ...

ما وصلوا لي حدُّودو ؟

ما عندهم زول عاقل يصحي بدري يدسّوا منهم ؟

عشان يصحوا الساعة 12 ما يلقوا ( معين ) ينهلوا منو تاني ..!!!

Quote: يعني هسع انت أصلو ما انتابك -في لحظة ضعف كدا- شك في مبدعين زي أبو داوود أو حسن موسى أو جكس

الله أكبر ... كيف ما انتابني ؟

Post: #37
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: جمال خضر
Date: 04-05-2014, 08:02 AM
Parent: #36

الأخ قبانى

لك التحية

منذ أن جاء هؤلاء التتار بذلوا الغالى والنفيس فى سبيل تجفيف السودان ثقافيا وما حييت لن أنسى

كلمات عبدالله محمد أحمد فى ندوة وقد كان وزيرا للأعلام أو الثقافة فى بدايات عهدهم الميمون فقد

ذكر أن تاريخ السودان يبدأ من 1505 وكل آثار السودان قبل هذا العهد أصنام وأوثان .

ولا أنسى إيقافهم إجازة الأغانى العاطفية والسماح فقط لما يسمى للأغانى الجهادية وهذه

سرقوا لها ألحان الأغانى وفى تلك الفترة ضيقوا الخناق على أهل الفن لإجبارهم على الخروج

من السودان .

حاولوا إيجاد جسم موازى لعقد الجلاد وفرقة الأصدقاء بصناعة فرقة نمارق وخصصوا لها الأموال

ولكنها فشلت فالإبداع لا يُصنع بالمال .

فى القضارف شغلهم الشاغل محاربة كل من يحاول محاربة التصحر الثقافى فى تلك المدينة العريقة

فأصبح منتدى شروق هو عدوهم رقم واحد فسلطوا عليه جهاز الأمن الذى أصبح كل عمله محاربة

المنتدى واعتقال منسوبيه ومصادرة ممتلكاته

Re: ما زال منتدى شروق يمارس إرهابه بالقضارف فكان محتما أن ي...ا الأشاوس وفقهم الله

Post: #38
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: أسامة العوض
Date: 04-05-2014, 08:52 AM
Parent: #37

قباني ..صباحك خير
أعزيكم ونفسي في شاعر الشعب , ربنا يجعل مثواه الجنه
Quote: قلت ليهو ... مش بالأول يجيبوا لينا مبدع ... حتين بعد داك نشوف موضوع موتهم ده !!!
يا كافي البلا ما جا منهم للسودان ... لا كاتب ... لا شاعر ... لا مسرحي ... لا موسيقي ...
جنسهم شنو ديل ؟ ...
تجيرنا يا محمد ...

تساؤلك العميق هذا يحتاج بالفعل إلى دراسة وبحث علمي أكاديمي , وأتمنى أن يتبناه أحد طلاب الإجتماع أو الفنون أو السياسة لنيل درجة ماجستير أو حتى دكتوراه , في أوقات أكثر رحابة , أو جامعة بالخارج
أتذكر في بداية الإنقاذ كان يوجد بعض الفرق الموسيقية (الكيزانية) التي تقوم بتحوير الأغاني المشهورة بكلمات أخرى مما يعطي مؤشراُ لمعين ناضب , لكن لاحقاً حتى هذه التحويرات تركوها وتفرغوا لإفقار المبدعين والتنكيل بهم ومحاربتهم وطمس أعمالهم الفنية.
لك مودتي

Post: #39
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: Abutalib Elgorashi
Date: 04-05-2014, 10:10 AM
Parent: #38

Quote: لا بيت شعر ... لا دوبيت ... لا نقرشة عود ... لا نمة ... لا ترنيمه ...

والله بتبالغ يا هندسة..
انت ناس قيم ومحمد بخيت وشنان الذين شنفوا اذاننا سنين عددا ديل ما معترف بيهم ولا كيف
ولا الشعر بتاع امريكا روسيا قد دنا عذابها ..
ولا شعارات هي لله هي لله لا للسلطة (أو السطلة ما عارف) ولا للجاه
دا مش ابداع يا متعلمين يا بتوع المدارس

Post: #40
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: محمد أبوالعزائم أبوالريش
Date: 04-05-2014, 12:33 PM
Parent: #39

Quote: هل الزول بيكون كوز بالاول عشان كده ما ببقي مبدع ...

و لا اصلا ما بكون مبدع ... عشان كده ببقي كوز ؟

البيضة من الجدادة .... والاّ الجدادة من البيضة؟ ........................ صراحة ما فرقت.

يا قباني، هم ذاتهم منتبهين للمسألة دي، وحاولوا يعالجوها زمان، ولما ظهرت فرقة عقد الجلاد، راسهم سخّن وقاموا عملوا الحاجة الإسمها (نمارق)، لكن ما استمرت ولا علقت بذاكرة زول.

بعدين، الإبداع ده مش من شروطة إنو الزول يكون متصالح مع نفسو؟ ....... وتيب.

Post: #41
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 04:16 PM
Parent: #40

Quote: حاولوا إيجاد جسم موازى لعقد الجلاد وفرقة الأصدقاء بصناعة فرقة نمارق وخصصوا لها الأموال

ولكنها فشلت فالإبداع لا يُصنع بالمال .

فى القضارف شغلهم الشاغل محاربة كل من يحاول محاربة التصحر الثقافى فى تلك المدينة العريقة

فأصبح منتدى شروق هو عدوهم رقم واحد فسلطوا عليه جهاز الأمن الذى أصبح كل عمله محاربة

المنتدى واعتقال منسوبيه ومصادرة ممتلكاته

اخي جمال الخضر ...

هذا تاريخهم الاسود ... محفوظ و سيدرس للاجيال ...

فشلهم الابداعي ( يحلل ) لهم محاربة المبدعين و قتل الابداع في السودان ...

فاي جريمة اكثر شناعة من اغلاق معهد الموسيقي و المسرح ...

و منع اذاعة الاغنيات ... و تدمير المواد في مبنيي الاذاعه و التلفزيون ...

اي تخلفٍ هذا !!!

Post: #42
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: الامين محمد علي
Date: 04-05-2014, 04:31 PM
Parent: #41

سلام يا استاذ قباني...

الغريبة انتابني هذا السوال قبل فترة ..واكن في الحالة المصرية...

تأملت الخارطة الثقافية المصرية بمختلف نخبها....وقلت على ماذا يراهن هؤلاء في معارضتهم الصفرية البائسة للوضع الجديد....

وبدأت بالمؤسسة الثقافية...

قلت ....الشعر اء المصرين ضد مشروعهم بشكل مطلق وبدون استثناء
الروائئين المصريين ضد مشروعهم بشكل كامل

الفنانين
الممثلين
المخرجين
الاعلامين...
جبابرة القانون الدستوري
معظم اساتذة الجامعات...

كيف لهؤلاء ان يحكمو مصر؟ ان الذي جلبهم لحكم مصر في غفلة من اعين التاريخ محض تشوه سياسي عارض..

هذا مشروع ضد الحياة وضد الجمال وضد الاتزان والسواء النفسي ،عليه لن تجد ثمة مبدع يصفق لهذا الهراء ...

Post: #43
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 04:39 PM
Parent: #41

Quote: تساؤلك العميق هذا يحتاج بالفعل إلى دراسة وبحث علمي أكاديمي ,
وأتمنى أن يتبناه أحد طلاب الإجتماع أو الفنون أو السياسة لنيل درجة ماجستير أو حتى دكتوراه ,
في أوقات أكثر رحابة , أو جامعة بالخارج

حقيقة يا اسامة اتمني ان يخرج منهم انسان عاقل

ولو لي مره ...

و يقول ما هذا الغباء و الجفاف الذى نحن فيه ...

السوداني يطرب حتي لضربات قلبه ...

السوداني تأسره للابد الكلمة الرقيقه ...

السوداني ... يجوع ليشتري كتاباً يستقي منه علما ...

السوداني من كل بقعه في السودان لو اجتمع مع اي سوداني ووجده يدندن بلحن جميل ...

جلس و سمع ... و دندن معه ...

المزارع مع فأسه ... يدندن ...

الراعي مع مراحه يدندن ...

العامل في مصنعه يدندن ...

المهندس علي مرسمه يدندن ...

السوداني ... طروب ... يتنفس الفن و الشعر و الكلمه ....

لن تخنقوه ... ارجعوا لعقولكم ... و ابحثوا عن الجمال ...

فانتم ايضاً سودانيين ... و لابد ان يكون هناك موضع جمال خلف كل ذلك القبح ...

Post: #44
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: Nazik Eltayeb
Date: 04-05-2014, 04:58 PM
Parent: #40

اخانا قباني
احسن الله عزاء هذه الامة في مبدعيها و جبر كسرها الذي تطاول امده
-----
ممكن استعير منك كركتيرات المرحوم عز الدين لا ستخدامها غي صفحتي على الفيس بوك؟

Post: #45
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: محمد أبوالعزائم أبوالريش
Date: 04-05-2014, 05:02 PM
Parent: #44

يا الله ....

تاني واحد جميل قام مشى ......

رحم الله المبدع النوبي صالح ولوليه

Post: #46
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 05:24 PM
Parent: #45

Quote: والله بتبالغ يا هندسة..
انت ناس قيم ومحمد بخيت وشنان الذين شنفوا اذاننا سنين عددا ديل ما معترف بيهم ولا كيف
ولا الشعر بتاع امريكا روسيا قد دنا عذابها ..
ولا شعارات هي لله هي لله لا للسلطة (أو السطلة ما عارف) ولا للجاه
دا مش ابداع يا متعلمين يا بتوع المدارس

ما عندنا كلام نهائي يا ابوطالب ...

الجمتنا و الله ...

عارف يا بوطالب ...

زمان في الجامعه آخر السبعينات كنا لو قاعدين نغني او كشاتينا مدوره

وجانا واحد من كيزان الدفعه ... طوالي بخش معانا في الغنا ...

و يشوت ليهو عشره عشرتين ...

الكيزان ديل حسي منهم البقي وزير و البقي حاكم ولايه و البقي سفير و البقي منشق ...

كنت احتار في احدهم فقط .. ( دون ذكر اسمه ) ... كان من احرف لعيبة الوست في البركس ...

كنت احتار حينما اراه الساعة السادسة صباحاً في الميدان الغربي يؤدي تمارين الكيزان العسكريه الصباحيه

و ينشد انما الاسلام قوه ... شبابٌ و فتوة ...!!!

تنظيم غريب يا صديقي !!!

Post: #49
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 10:10 PM
Parent: #45

Quote: Aati Badri · كلية الهندسة جامعة عين شمس
باشمهندس غايتوا السويتا في بوستيك دا مع صاحبك ود الباوقة كوعت
اولا طلعتهم بلا ابداع
ثانيا حا تكرهوا في عز الدين ياخي دا كل يوم شابك عمر دفع الله
بالله انت فنان وعزالدين فنان يا مخربش ؟
رد · · منذ ‏4‏ ساعات

تعرف يا عاطي بدري ...

صاحبي ود الباوقه ده مارق بي قد قفتهم ساكت ...

اما جماعتك فقايلننا غبنا الكم وعشرين سنه دي من السودان و نسينا التاريخ ...

ما عارفين انو التاريخ محفوظ ... في عقولنا و في قلوبنا و مكتباتنا ...

غايتو الا جيلنا ده يفوت ... وكم جيل بي ورانا ... حتين كضبهم ده يبقي صدِق ...

Post: #47
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 05:31 PM
Parent: #44

Quote: اخانا قباني
احسن الله عزاء هذه الامة في مبدعيها و جبر كسرها الذي تطاول امده
-----
ممكن استعير منك كركتيرات المرحوم عز الدين لا ستخدامها غي صفحتي على الفيس بوك؟

معليش يا نازك رديت عليك قبل الاخوان عشان ما ااخرك ...

طوااالي تشيلي و تنشري ...

الفن للجميع يا حبيبه ...

ما تنسي حقوق الطبع للمنبر و للعبد الفقير هنا هههههههه

Post: #48
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 09:08 PM
Parent: #40

Quote: بعدين، الإبداع ده مش من شروطة إنو الزول يكون متصالح مع نفسو؟ ....... وتيب.

ده يابو الريش حزب تكفيري ...

داير يحرم كل شئ ... و يحلل افعاله بس ...

وديل لا يمكن حيكون عندهم تصالح مع نفسهم في يوم من الايام ...
________________________________
حقو نهديهم اغنية ( غُلُبت اصالح في روحي )

احمد رامي و كوكب الشرق ...

إمكن يِحِسّوا ...

Post: #50
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-05-2014, 10:48 PM
Parent: #48

Quote: هذا مشروع ضد الحياة وضد الجمال وضد الاتزان والسواء النفسي ،عليه لن تجد ثمة مبدع يصفق لهذا الهراء .

الأمين محمد علي ...

المصيبه انهم بتكلموا عن الدين ...

و الدين مبني علي الاتزان و الجمال ...

مسخ يا محمد ...

لابد من ان تكون لدي ( الزول ) عقده ما ... حتي ينتمي الي ذلك الاتجاه اللا إنساني ...

بالله ديل ممكن يكونا جو من رحم بقول:

أنــا ام درمـــان دا ميـــــلادي و تيـــــلادي البشــــــــــيل اسمــــــــــــي
أنــا الـــــقــــدمــــــت أولادي شــــــــرافــــه و سيــــــف على و سمــــى
و كـــــنت القـــــوه و الحـــوله و حــــــــــزت و فــــــــزت بالجـــــــــوله
و شلت الـــــراية و الـــدولة و فـــــي التـــــاريـــخ بقـيـــت عنــــــــوان

بقينا في مزابل التاريخ ... و لم يصبح لنا عنوان !!!

Post: #51
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: معاوية الزبير
Date: 04-06-2014, 10:38 AM
Parent: #50

Quote: بقينا في مزابل التاريخ ... و لم يصبح لنا عنوان !!!
لم يصبح لنا عنوان فعلا يا قباني
لكننا أصبحنا عنوانا يشار إليه عند الحديث عن:
الدولة الفاشلة
الدولة الفاسدة
الدولة المرتشية

اللي بصلي ع النبي يزيد

Post: #52
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-06-2014, 04:25 PM
Parent: #51

Quote: لم يصبح لنا عنوان فعلا يا قباني
لكننا أصبحنا عنوانا يشار إليه عند الحديث عن:
الدولة الفاشلة
الدولة الفاسدة
الدولة المرتشية

اللي بصلي ع النبي يزيد

آآخ بس يا معاويه ...

آآخ لما كنا طلبه في نص السبعينات ... تخيل لغاية نص السبعينات ...

نمشي السفاره البريطانيه في عمارة ابو العلا القديمه ...

يدونا التاشيره و انحنا واقفين طولنا ...

كنت امرق من هناك امشي لعمك علي طه رحمه الله مدير بنك الخرطوم فرع السوق العربي ...

يختم لي في الجواز مبلغ 15 جنيه سوداني ...

اشيل معاي ال 15 جنيه كاااااش

و اركب سودانير .... نعمممم ... سودانير ... رحلات منتظمه و فاخره ...

لا و نختار كمان ... عن طريق روما و لا فرانكفورت ...

أكل فاخر ... و كان داير ليك كاسين كلو متوفر ...

الغريبه مما منعوا الشربه ... البلد داك انخرب بيتو ... حكمه غريبه ...

طبعاً ده وكت الكباتن كانو ناس كابتن زمراوي ... و المضيفات كانن ناس شاديه و ناديه ربيع و فيولا ...

ونصل انجلترا ... نمشي نشتغل في الصيف ... شغل الطلبه ...

شي لقيط فراوله و شي غسيل صحون ... وشي تقليب هامبيرقر ...

كنت اشيل ال 15 جنيه و امشي لأي مكتب صرافه في اكسفورد ستريت او حواليهو ...

كان عندهم يافطه طوليه بالنور الاحمر ... فيها لستة العملات المقبوله لديهم ...

وحياتك في نص اللسته الكلها بس مارك و فرنك و دولار ... قاااعد و مجعوص السودانيز باوند ..!!!

تفتله يدوك استرليني او كما كانت اسميه ( استرنيلي ) ... تهكما من قيمته ( الواطيه ) امام جنيهنا العملاق ...

ذلك الزمن الذي كنت تبرز فيها الجواز ( اللبني ) في اي مكان في الدنيا ترفع لك القبعات ...

اصبح الان شبهة ...

قال هي لله ... و الله العظيم ربنا زاتو بقيتو ليهو في رقبتو ...
!!!

Post: #53
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-06-2014, 10:43 PM
Parent: #52

Quote: Mohamed Elsheikh Mohamed Arbab · يعمل لدى ‏‎Al-Muhaidib Contracting Co.‎‏
هههه تشكر يا قباني على البوست الجميل... لكن الكيزان حالتهم صعبة اليومين ديل حتى الناكرين اليومين دي فكوا اخرهم وطلعوا من طورهم.
رد · · منذ ‏12‏ ساعة

ود الأرباب ...

حالتهم صعبه ده لو بحسّوا ...

لكن بيني بينك زنقة جرقاس في طاحونه ...

و السوتوا كريت ... بلف بلف و يرجع يطلع روحها انشاء الله ...

Post: #54
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-07-2014, 03:27 AM
Parent: #53

Quote: مواصلة لقايمة المبدعين المتكوزنين صلاح مصطفى وعثمان مصطفى وترباس مصطفى واليمني مصطفى ومن الشعراء مختار دفع الله بتاع ثوره ضد الجانا من بلكونته ناطي. بعد ما غير ملامحو معليش افطر واجيك اصلي صايم الاثنين والخميس يوم الاحد بالليل

صيام مقبول و صباح الخير بالليل ...

ترباس مصطفي دي والله عجبتني جنس عجب ...

لكن بما انك فتحت الباب ده ...

ما كدي نحاول نجيب لينا اسم منهم يكون فيهوا ابداع انشالله علي الريحه ..!!!

احكي ليك قصه جميله جداً ...

زمااان في بداية حياتنا العمليه

انا راكب قطر راجع من بلد صغيرونه اسمها ( كولشستر ) في شرق انجلترا ...

لاقاني في القطر الباشمهندس سيد ( ابو السيد ) دفعتنا في الجامعه خريج هندسة مدنية ...

اول دفعته .. مرتبة الشرف الاولي ...

سيد مش بس مهندس ... رجل عبقري ... ومن ميزاته انه ما NERD ...

المهم ... اتلاقينا بالصدفه و حق الله بق الله ... قال انو خلاص خلص الدكتوراه .. وراجع السودان ...

انا طبعاً كان رأيي انو سيد يتخرج ببكالريوس ... ويدوهو معاهو دكتوراه طوالي ...

هو وصاحبي نواري عمر نواري .. ومعاهم العبقري المجنون جرجس فؤاد نخله ...

اها مع الونسه ... قال لي مالك بيجاي ... قلت ليهو ابدا اجازه بس ...

قال لي ياخ طيب ما تشوف لي صاحبك ( فلان) ... يساعدنا في عملية الشحن للسودان ...

و ابو السيد كعادته كادح مفلس ... كحال مبدعي بلادي ...

اهااا ... ( فلان ) ده كوز و دفعه من ايام الجامعه ... ليس له اي علاقه باي شئ اسمه ابداع او فن ...

ما بفرق بين صديق الكحلاوي وصديق احمد حمدون ...

قلت لابو السيد ... وفلان ده علاقته شنو بالشحن ... عندو وكالة سفر ولا شنو ....

ضحيييييك ابو السيد ... وقال لي ... تخيل انو بقي الملحق الثقافي في السفاره في لندن !!!!!!!!!

تقول لي يا ود بدري ...ابداع ؟

كدي حاول تلقي لينا اسم تاني !!

Post: #55
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-08-2014, 02:14 AM
Parent: #54

و الله قاعد افكر من أمس ... ما لقيت اي كوز مبدع ...

اها قبل شويه ضرب لي صاحبي ابو النور ...

و حاولنا نلقي لينا اسم مبدع ... و لا حتي من ايام الجامعه ...

و حياتكم حتي لاعب كوره كوز ما لقينا !!!

Post: #56
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: Tragie Mustafa
Date: 04-08-2014, 03:46 AM
Parent: #55

الفاضل يحي قباني….

تحياتي و تعازيه في هذا الفقد الفادح لشعبنا.

محجوب شريف…..سنظل نحمد الله ان امثاله…..كانوا بامتنا.

رحمه الله و عوضنا شعبنا بالمزيد من الاوفياء و المبدعين مثله.

اما ابداع الكيزان…..ففعلا له علاقة بكمية القمع التي التي يفرضونها علي انفسهم

و قمعهم للاخرين طبعا لاحقا.

الله يكفينا شرهم و يبعدهم عن تشويه نمط حياتنا اكثر مما فعلوا.

Post: #57
Title: Re: قال لي رموز الكيزان ديل اصلوا ما بموتوا؟ قلت ليهو مش يجيبوا لينا مبدع بالأول !!
Author: يحي قباني
Date: 04-08-2014, 04:09 AM
Parent: #56

Quote: الفاضل يحي قباني….
تحياتي و تعازيه في هذا الفقد الفادح لشعبنا.
محجوب شريف…..سنظل نحمد الله ان امثاله…..كانوا بامتنا.
رحمه الله و عوضنا شعبنا بالمزيد من الاوفياء و المبدعين مثله.
اما ابداع الكيزان…..ففعلا له علاقة بكمية القمع التي التي يفرضونها علي انفسهم
و قمعهم للاخرين طبعا لاحقا.
الله يكفينا شرهم و يبعدهم عن تشويه نمط حياتنا اكثر مما فعلوا.

مرحبتين تراجي ...

و البركه و الأمل في شبابنا انشاء الله ...

حقيقي ... بحاول جادي جداً ... اجد ولو واحد من الكيزان بالغلط فيهو ريحة ابداع باي شكل من الاشكال ...

لم ينجح أحد ..!!!

اما تشويه نمط الحياه ... فو الله يا تراجي ... بس ادخلي الواتساب بالغلط ...

و شوفي اقرب الناس ليك كيف انسخطوا ... و كلامهم كلو احاديث قاطعينها من راسهم ...

و خيال خصب لكرامات ما انزل الله بها من سلطان ...

و الاوضاع دي طبعا جايه علي هواهم تماماً ...

ياخي بت من بناتنا اتولدت علي يدي بالجد في التمانينات ...

بقت طبيبه و اتزوجت كوز ...

لاقيتها 2010 و ما شفتها من كانت طفله و انا في مقام عمها تماماً ...

جيت قال اخدها بالاحضان ...

ابت تصافحني ...!!!

قلت ليها طيب عيانينك ديل بتكشف عليهم كيفن؟ بالواي فاي ؟؟

لا و ازيدك من الشعر بيتين ... شغاله في الحوادث!!!

يا ريت لو تلقي لينا اسم من اسماء الكيزان ليهو اي علاقه بأي شي ابداعي ...

ينوبك ثواب ....

اسم واااحد نقد بيهو عين الشيطان ....