قفشات من زمن الطفولة

قفشات من زمن الطفولة

في صغرنا نرتكب بعض الحماقات ولكن بعضها يكون تسليات لما فيها من طرافة.. ويأتي ذلك نتيجة لفلسفة من عندنا دون مبرر واضح.

وأنا شاب يافع أرسلتني والدتي عليها الرحمة لإحدى عمّاتي رحمها الله، لتعطيني الطايوق لأن والدتي عاوزة تعوس لينا الكسرة. ذهبت لعمتي وقلت لها:
عمتي مريم – وهذا اسمها- أمي قالت ليك عندك طايوق؟
ردّت عمتي قائلة: أنا عندي طايوق، إنت وأمك الما عندكم طايوق. هاك الطايوق ودِّي ليها. رجعت للوالدة وبيدي علبة الطايوق وأخبرتها أن عمتي قالت لي: إنت وأمك الماعندكم طايوق. أنا عندي طايوق. لماذا قالت هكذا؟
سألتني والدتي عن مادار وعندما حكيت لها شرحت لي أن السؤال غبي. كان تكلِّمها تقول ليها: أمي قالت ليك أديني طايوق للدوكة. لأن الزول الماعنده طايوق يعني أنه ما عارف التكتح وما ناقش حاجة.

وأنا في رابعة وسطى – سستم وزارة المعارف زمن زيادة أرباب- أرسلني مدرس اللغة العربية الأستاذ الطيب عبد الرحمن لناظر المدرسة – الزمن داك مافي حاجة اسمها مدير مدرسة، الناظر بس- لآت منه بالمُنجِد.
دخلت على السيد الناظر وقلت له: يا أفندي – في زمننا كنا نقول أفندي وليس أستاذ- الطيب أفندي قال ليك أديني المُنجِّد. ردّ علي الناظر قائلاً: قول ليهو في السوق. رجعت الفصل خالي اليدين. سألني الأستاذ الطيب: وين الكتاب يا زول؟ قلت له: الناظر قال ليك في السوق. إستغرب الأستاذ رد الناظر، ولكن قبل أن يعقِّب على ردِّي أو كلام الناظر، ظهر الناظر من خلفي وهو يحمل المُنجِد.
قال للأستاذ: العربي دا قال لي: الطيب أفندي قال ليك أديني المُنجِّد؟
لقد شددت حرف الجيم مع الكسرة. فتحولت الكلمة لكلمة أخرى 100%. فالمُنجِد بكسر الجيم هو الكتاب المعروف بمعاني الكلمات العربية. أما المُنجِّد بتشديد الجيم وكسرها أيضاً فهو الشخص الذي يقوم بتنجيد المراتب القطنية قبل ظهور مراتب السفنجات.
قال لي أستاذ الطيب: يا ولدي أنا أديتك ليها مكتوبة ولّا نطقتها ليك بخشمي؟ الشّدّة دي جبتها من وين؟ إن شاء الله يشدوا فيك بردعة ولا أحسن يشدو فيك سفين لأنك عربي بتركب التور.
تحياتي

(العوج راي والعديل راي) .