Post: #1
Title: يا محجوب شريف... فيك القول يطول (شعرا)
Author: Mannan
Date: 04-04-2014, 00:14 AM
سكت الكلام ... طار الكلام... لم أجد غير هذه الكلمات امام صدمة رحيله المر..... ******
يا محجوب شريف
يا إنسان فى شاعر
"نيرودا" الغلابة
ويا زخم المنابر
يا الإسمك نقشتو
فى ضمير كل ثائر
وما بيعرف مقامك
زول خواف وخائر
شعرك زاد نضالنا
وهدير الحناجر
يا معجون بحبك
فى جسد شعب صابر
يا محجوب حجابنا
من ظلم العساكر
*******
يا محجوب شريف
يا من نبض كوش
يا شاعر الجياع
ورزقك ما بتحوش
يا حامى الحزانى
من بطش الوحوش
أشعارك رصاص
تخاف منو العروش
يا جيش القصائد
بيك نهزم جيوش
يا من عهد كشتا
مرسوم فى النقوش
مكتوب فى الأزل
إنك ذات يوم
تقيف ضد الكروش
ودقون الضلال
وبنوك العيوش
ما أحلى النضال
خاصة بدون قروش
وما أحلاها عيشة
بسيطة بلا رتوش
يوم وسط الزحام
ويوم فوق النعوش
........
يا محجوب شريف
مين بعدك يقول
"فى حضرة جلالك"
يطيب المثول
والوطن المفدى
فى رحلة افول
وفى كافورى تنعق
غربان الطلول
ودقون الضلال
والإفك المهول
وغناك للوطن
الما قالو زول
يا أمير القصيد
فيك القول يطول
ويبقى كلامك انت
زاد يوم الرحول
يا محجوب شريف
|
Post: #2
Title: Re: يا محجوب شريف... فيك القول يطول (شعرا)
Author: فقيرى جاويش طه
Date: 04-04-2014, 00:40 AM
Parent: #1
يا محجوب شريف
مين بعدك يقول
"فى حضرة جلالك"
يطيب المثول
احسن الله عزاءكم الارو نورالدين
|
Post: #3
Title: Re: يا محجوب شريف... فيك القول يطول (شعرا)
Author: Mannan
Date: 04-04-2014, 03:51 AM
Parent: #2
الشعب حبيبى وشريانى
اهدانى بطاقة شخصية
الاسم الكامل انسان
الشعب الطيب والديا
المهنة بناضل بتعلم
تلميذ فى مدرسة شعبية
المدرسة فاتحة على الشارع
والشارع فاتح فى قلبى
وانا قلبى مساكن شعبية
كل كلمات الرثاء ومناحات الشعراء لا تفيك حقك يا شاعر البؤساء والمحرومين ... شاعر الطبقة العاملة وفقراء الشعب ...ماكا الوليد العاق ... لا خنت لا سراق... نودعك ونحتضن أشعارك الثورية فهى زادنا ليوم الصدام والنصر للشعب الذى أحبك لأنك أحببته حتى الثمالة... أدمنت حبه فخرج غناءا صادحا باسم الشعب وصادما للطواغيت... جلست فى حضرة جلال الوطن وطاب لك الجلوس... راهبا فى معبد الوطن الكبير... الذى حلمت به .. وطن حدادى مدادى... الى روحك الندية وهى تحلق فى سماوات الوطن يا شاعر الشعب دعواتنا ان ترقد فى سلام فى برزخ الأرواح وليرحمك الله وتعازينا لأسرتك الصغيرة واسرتك الكبيرة ... الشعب السودانى والرفاق فى الحزب الشيوعى السودانى ...
|
Post: #4
Title: Re: يا محجوب شريف... فيك القول يطول (شعرا)
Author: Mannan
Date: 04-04-2014, 09:51 AM
Parent: #3
وهذا شعر ابن شقيقى: دكتور هيثم منان فى وداع شاعر الشعب محجوب شريف:
@@@@@
الشعب مات..
..شاعرو..
من أوله ل آخرو..
منو بيستحق بعده..
سوداني بينفاخرو..
مات الشعر والقول..
وحكامنا بيشاخرو..
ناضمت ناس أبريل..
شان يطلعوا يظاهروا..
مات ودشريف لكن..
شعره الظلم قاهرو..
@@@@@@@@@@@@@@@
ستفت قولي هتاف..
رغم الحزن والنوح..
صوت عالي بس مبحوح..
محجوب شريف موجود..
ونضال سنين مابروح..
كان منتظر ثورة..
وسودان يرد الروح..
@@@@@@@@@@@@@@@
والقرقريبة هناك..
والكسرة..والقرقوش..
يامترف القسمات..
وغناك ما هو قروش..
أنا عندي متلك كم؟
يسوو وما يسووش؟
خليتنا يا محجوب..
بعدك بيضيق الحوش..
وإنت العفيف أصلك..
إنسان ومافي رتوش..
يا الصغت وجدان شعب..
وإنت وبتاكل بوش..
ومشيت تلاقي أسياد..
حميد معاهو الدوش..
وردي وخليل وأبدرش..
وتركت سودان (قوش)..
هذا الوطن دونك..
بالجد وطن مهبوش..
سودان بدون شعرك..
أشتر وما معيوش..
شعر: د.هيثم منان
3/أبريل/2014م
تبوك-المملكة العربية السعودية
|
Post: #5
Title: Re: يا محجوب شريف... فيك القول يطول (شعرا)
Author: فقيرى جاويش طه
Date: 04-04-2014, 05:57 PM
Parent: #4
هذا الوطن دونك..
بالجد وطن مهبوش..
سودان بدون شعرك..
أشتر وما معيوش..
|
Post: #6
Title: Re: يا محجوب شريف... فيك القول يطول (شعرا)
Author: Kostawi
Date: 04-04-2014, 08:02 PM
Parent: #5
|
Post: #7
Title: Re: يا محجوب شريف... فيك القول يطول (شعرا)
Author: أسامة العوض
Date: 04-04-2014, 11:50 PM
Parent: #6
وداعاً شاعر الشعب
ماك الوليد العاق ...لا خنت لا سرّاق
إلى جنات الخلد
|
|