ما بتلقى لي .. بلقى ليك!

أمام كشك بجوار إحدى الجامعات العريقة دار أمامي الحوار التالي بين صاحب الكشك وطالب البكالوريوس:
صاحب الكشك: عاملين كيف ..
طالب البكالوريوس: تمام .. الأمور ماشة .. أول أمبارح وزعوا علينا الأبحاث ..
صاحب الكشك: وقعت مع دكتور من؟
طالب البكالوريوس: مع دكتور (فلان) ..
صاحب الكشك: تمام ..
طالب البكالوريوس: ما بلقى عندك بحوث جاهزة؟!
صاحب الكشك: عندي .. بلقى ليك ..
طالب البكالوريوس: خلاص تمام .. أجيك متين؟!
صاحب الكشك: مر علي بكرة زي المواعيد دي بجيب كم واحد تختار منهم ..
- سلام
- سلام

ما بتلقى لي وش فيهو عيون منططة يا ملاسي!

طبعا يا حسين الاطلاع على البحوث السابقه ما فيه حاجه وبينصحوا بيه كتير من الاساتذه مرات لمعرفة هيكل وبناء البحث ومرات كمراجع..لكن ما يهزم هذه الفرضيه فى هذه الحاله كلمة (جاهز) التى استخدمها الطالب..اما سيد (الكشك) (لقيته) منجض شغله شديد عارف مواعيد التوزيع واسماء الاساتذه وجاهز ببحوثه وانا والله شايف ما فضل لينا عيون ننطا ذاته عشان كده اقوم اكان (القا) لى بندول..تحياتى

يا د. محمد بابكر ممكن المشرف يوريك لو عندو بحوث قبل كدا فيها معلومات ممكن تفيدك وبتزكر كان بيقيدونا بزمن محدد عشان نطلع
على البحث ونرجعو.. بس واضح انو سيد المكتبة دا بيطلبوا منو الناس انو يطبع ليهم البحوث حقتهم وهو بيعمل اكتر من نسخة وبيبيع للطلبة بتاعين
السنوات البعدها .. دي خيانة امانة عديييييل

زي مابقول اخونا (كرومبو) هو التعليم باظ من شوية المشكل انو اي واحد عاوز يقرا جامعة ويتخرج ويشتغل مدير سلفقة ساااكت وين معاهد التدريب المهني
ومدارس التلمذة الصناعية ولا نحن حنبقي مدرا كلنا ويجوا الاجانب يشتغلوا لينا عمال وفنيين وصنايعية هل تعلم انوا في اوروبا الصناعي دا مرغوب وبشتغل وبقبض اعلي مرتب من الخريج
وين معهد القرش والمدرسة البلجيكية وخلافوا................ز

يا جماعة التعليم دا بكينا عليهو زماااااااااان ..
ولما هاجرنا السعودية في اواخر التسعينيات كنا مفتكرين حنلقى التعليم هناك مختلف ..
لقينا البحوث مش جاهزة وبس بس الزول يقول اسمو بالكامل والجامعة والبحث ينطبع في خلال دقيقتين ..
التعليم في الدول العربية كلها تقريبا يمر بنفس مرحلة التدهور ..
لكن ابكو معاي في المنهج السوداني الأصبح يخرج (بتشديد الراء) حـمييير عديل كدة ..
زمان على الأقل كنا بنضمن انو خريج المتوسطة أو الثانوي بيكون احسن من جامعي في دول تانية ..
هسع يا كافي البلاء والله خريج الجامعة ممكن ما يكون فاهم الفرق بين "ذ" و "ز" وعادي يكتب ليك "بازن الله" ..