ســألــتــنــي

سالتني
والخدين ازاهر في الربيع
نديانة فواحة اريج
( ليه كل كلامك ،
عن القمرة والليل والنجوم
وموجة تنبض في حشا النيل البهيج؟)
وضحكت يا مزيونة
شان
عرق النهر
ممتد في جواي شرايين
وانتما
والقمرة في الزمن الزمين
عمدتني وجود اصيل
والنجم كان شاهد حضور،
ونذرت من ده الوقت
يا منبع هواي وحرقتي
كلامي ما يشوف الحزن
ماتغشى فيني المفردات
نبرة نشيج
لكن عوارض جاتنا من مدفع دلاقين
الدقون
رمتني في زيفة المنافي
وفي الرصيف المر
والطوب اللحاف
مترار ارق يغزل خيوطه
علي وعيني تصبح ديمة مكحولة سهر
والعتمة اتلفت نسيج.
رغم التكالب للاسى
وفرقة الناس الوفا
والضحكة تمرق بالصفا
حرفي بيك دايما بهيج
ما انت حاجة من الفرح
كل عصافير الاماني جاية ليك
كل العشم جوة الحلم متوشي بيك
وليك كان دم الكتابة
والحكايات الصبابة
وعزة الانسان مهابة
وانت اغلى
من لاليء نادرة من جوف الخليج
يا مطر عز العطش
والحال الجفاف
يا غيوم الفال
ويا برقا
شلع عبادي
شايل فورة المطرة الكبيب
خلت مسام الارض
تصرخ بالضجيج
زغرودة في جوف الليالي
العامرة بالحزن الدفين
خليك معاي
نضرب دناقر الفرحة
نملا الدارة بالفرح الهجيج
خليك معاي
اميرة الزمن الرطيب
حلق الغنا المشروخ
صبح نديان
وعامر بي رهافة الحس الندي
طربا معطن التزام
يلاك على فلق الصباح
نملا المسامات بالهتاف
والكملة مكتلمة النمو
ما ها الوليد الداب خديج
وبس

اقتباس :

رغم التكالب للاسى
وفرقة الناس الوفا
والضحكة تمرق بالصفا
حرفي بيك دايما بهيج
ما انت حاجة من الفرح
كل عصافير الاماني جاية ليك
كل العشم جوة الحلم متوشي بيك
وليك كان دم الكتابة
والحكايات الصبابة
وعزة الانسان مهابة

سلام يا وطن وبس ههههههههه.

قلنا نرد الجميل عشان ما يبقي لينا في رقبتنا . ههههههههه .

شكرا جزيلا الاخت منى
سلام

وعزة في هواك

حلق الغنا انسد