جيت من كوستي اغسل ليك وراجع

عطفا علي النكتة الشهيرة ولكن لا تشبهها

الأكل مع النسوان بشيل بركة الراجل
قول سوداني مأثور

ونحن صغار نترتح بي صينية الغدا ونوديها الصالون للرجال , ونقيف ديدبان
يا ولد جيب زيادة كسرة
جيب ملاح بامية
جيب موية
نقيف مرمطون ,, جمبهم ,, والشاطر فينا ما محتاج مرسال , شاف الكسرة كملت فررررر يمشي يجيبها ويجي ,,, والضو ما بي قوللو سو
اي واحد يشبع ويقوم تمشي تجري تمسك الابريق وتغسل ليهو
بعد ياكلو تب ويغسلو
نشيل باقي الصينية ونمشي ناكل مع النسوان

السلام عليكم ...،،،
وأكل المرة مع الرجال بشيل شنو ....
تنبؤات لقول قد لا يكون سوداني يوماً ما ... ما بقن بياكلن عادي مع الرجال ...
في إنتظار السرد الممتع والشيق كما عودتنا دوما أخي عبد الحفيظ ..
ودمت بخير وعافية مع الاحترام

الحبيب ودابسن - اسعد الله اوقاتك بكل خير

ويا سلام ياخ

تفاصيل اليوم في الحلال والفرقان ليها طعم والحنين ليها بزيد كل ما نبعد

القهوة ليها طقوس

وصينية الغداء ليها شنة ورنة (رغم انها ملاح مفروك وكسرة رهيفة وصحن شطة خدراء بالدكوة وفوقيها ليمونة وكم بنبون بصل لزوم الكرمك )

تصدق يامؤمن شاي الغداء الفي ضل الديوان ده بعدل المزاج براه

يا سلام ياخ

Quote: ونقيف ديدبان يا ولد جيب زيادة كسرة جيب ملاح بامية جيب موية

الوقفة هينة يوم حنوا عليّ كده وقالوا تعال اقعد في الصينية على الايمان الوصايا قبل القعاد اخير منها الوقفة

ما تفتح خشمك واللقمة فيهو (يعني تمدغ ساكت) تاكل من الجمبك ما تتشابى للحمة ماتشيل اللحمة الفي الملاح
ماتعاين في يد زول ولا في وشو وهو بياكل وفوق ده لو شلتلك عجورة (ما تقول كرم دي غلبتني تب ومنها نهروني ومرقت )
لكن مبسوط اني قعدت مع الكبار في اليوم داك .

حكاية المرسال دي صاحبن لي قريبي ابوهو جنوا مراسيل
قالوا والله ابوي ده لو ليه مراد صينية الشاي يوديني ليها كباية كباية



معليش على التصريجة دي

واصل ياحبيب

الشبكة دي غايتو بتعلمنا سف الصعوط
أها
توقير الكبير واحترامو من تبينا جهال مبارينا ,, وانت واقف للمراسيل والغسيل ما بجيك احساس بالدونية ابدا ,, ولا انك خدام ,, ولا اكل الفضلة عيب ,, وأكل الفضلة بشيل السحت
‏ وقبل ان تلعب تحت الاضواء الكاشفة اقصد قبل ان تاكل مع الرجال في الديوان , في كورسات تدريبية , تاكل مع ابوك لامن يكون مافي ضيوف ودي نادرة ,, ينادوك وتقعد وانت فرحانو ! لكن ارجي الراجيك
يدوك درس في كل لقمة , أكل قدر خشمك ما تخليك مزلوع وشرفان ,, ما تتناطا لي الاكل ,, زح شوية من الصينية ,,, المطايب ما تاكلها قدام الكبار ,,وهي شن المطايب غير لحمة الملاح ,, ولا عضم المشاش للكد واستخراج المخ حقو
تاكل وتترسل
ولو الله غضبا عليك يرسلوك وتحرد ,, تاكل وتنجلد وتتنبذ ,, تتحرد زي النسوان
تترسل واللقمة في خشمك ,,كنت بعمل كدة ,,رسلوني اشيل لي لقمة تقصر المشوار

اووووو
الانبطاحة دي عيب قدام الناس الكبار
وممكن لامن تبقي راجل بي عيالك ما تكون قعدت مع ابوك في سرير واحد
فالقعاد جمب ابوك في سرير واحد عيب
والاخ الاكبر يقوم مقام الاب
له جميع سلطات الوالد
وأكبر منك بي يوم ياهو أكبر منك ,, ففي الاعمال الدنيا انت الاولي ,, وفي المطايب هو الاولي
يعني نحمد الله سيدنا اهلنا علمونا احترام وتوقير الكبير ولو لم يمت لك بصلة قرابة
أي زول كبير يلطشك في الشارع ,, تشتكي اهلك يقولو ليك لو ما قليت ادبك ما دقاك واحتمال تاخد ليك جلدة زيادة بدون سبب ما اصلهم عارفينك بتكون غلطت
ف شنو
زي دي بتاكلها في حنانك وتسردب

مرحبا عثمان محمدين
وحبابك
لينا حاجاتنا برانا
شوف العالم في المناسبات اول شي بأكلو الشفع
وفي المواصلات الكبير بقعد الصغير
دي حاجات حقتنا برانا

مرحبا الجنيد
وحبابك
ياخ اهلنا ديل كانو صعبين خلاس فيما يخص تربيتنا
سوط عنج حق عينسيت معلق جوة وجاهز ,, مدفون في القطران جوه التراب شهر وممارن بالزيت
والنعال قاعدة للضربات السريعة , تقوم جاري يلحقوك المركوب ويمكن يفهقك زاتو
تربية وفق ما يرون ,, صارمة وحاسمة
لا يعني لا ,
عيب يعني عيب
ما تبرر لي وبتاع
بجيك

حالياً عادي ممكن تسمع زول يقول لي أبوهو ( كدي جيب سفة يا حاج ) ..

مرحب خالد
وحبابك
الفي والدك بقالدك
كما يقول المثل
زي ديل بشبهو ابهاتم
يقول ليك
الجلكين جر شفاطة
واتلحس
والشايب ده بقا ما بقسم معاي
سمعت بي نكتة عواليق ده ?

Quote: الانبطاحة دي عيب قدام الناس الكبار وممكن لامن تبقي راجل بي عيالك ما تكون قعدت مع ابوك في سرير واحد فالقعاد جمب ابوك في سرير واحد عيب والاخ الاكبر يقوم مقام الاب له جميع سلطات الوالد وأكبر منك بي يوم ياهو أكبر منك ,, ففي الاعمال الدنيا انت الاولي ,, وفي المطايب هو الاولي

الحياة لها نواميس ولكل زمن حال ورجال
انت عارف مرة رسلوني اجيب سعوط راجل كبير جانا ضيف
قال لي ياولد امشي جيب صعود هاك الحقة دي المهم في الطريق وانا عائد
بالحقة فتحتهااااا وسفيت سفة تحت اللسان تقليد للراجل كما يفعل المهم
اتخيل الحاصل بعداك كانت الدقة بمطرق السلم
لاني تجاوزت حدودي ومن يومها كرهت الصعود مشارة اتقبلها ياعزيز

سلام عليكم ود اب سن

كتجربتك الان مع اولادك او اولاد اولادك و محيطك من الحلة والجيران هل هي نفس السلوك والنمط الحياتي لهذه التربية التي غرست فيكم و فينا قيم وصفات من الاباء والاجداد والامهات والحبوبات منها احترام الكبير وتوقير الصغير ، ام ان هنالك تغيرات قد طرأت في مثل هذه العلاقات والارث الذي اعتقد من اسباب اندثاره تمدن المجتمع الذي اخذ شكل المدينة اكثر من الريف واصبح كله مجتمع حضري وغزت الثقافات الاخرى وكانت هي الغالبة في صراعها مع الثقافة المحلية ، واختفت تماما حكاية الصينية ولمة اهل البيت حولها لسرعة ايقاع الحياة وانشغال الجميع في كسب المعايش والتحول الكبير الذي حدث حول الاسرة الصغيرة والممتدة ـ واختفاء ظاهرة التعايش والسكن في بيت واحد كبير

عكســــة :- مدخل كبير بوستك ده حول الحياة السودانية وعلاقاتها بين الافراد والاسر والمجتمع ككل ومقارنة ما بين الماضي والحاضر واسباب وتداعيات الاختلاف لعوامل كثيرة مؤثرة في تغير النمط الحياتي والسلوكي للفرد والمجتمع


مودتي


الرحــــال

باسط
الرحال
حبابكم
متفقين
لكن القيمة الاخلاقية لازالت موجودة وعالية وهي احترام الكبير
الطريق مختلف للتربية
بجيكم

الأخ ود أبسن سلام
كلامك حلو ولكن هو دا الحاصل الآن ولا زمان لمّن كانت كوستي بلد وأحمد كوكو ولد؟
بالله لو إنت في كوستي رسِّل سلامي لناس أبو جبيهة عن طريق البص الأوستن البمشي بالراوات والمشاريع.. عشان الزلط لسع ما وصلنا.
إن شاء الزلط أو الردمية وصلت الراوات .. مافي داعي نقول المقينص.
تحياتي

كبـّاشي الصـّـافي
(العوج راي والعديل راي) .

Quote: لكن القيمة الاخلاقية لازالت موجودة وعالية وهي احترام الكبير الطريق مختلف للتربية

وإنشاء الله إلي ان بجينا صاحب الدَّين..الدين بفتح الدال
تكون هذه القيمة موجودة
لكن يا ودأب سن أخوي
الناس الفُسل والجُفر ديل الخمسة وعشرين السنة العدوها دي
خربوا طبع الناس وكاربوا النفوس..
الريف دخلتوا تغيرات وميلة بسيطة..
لكن مازالوا عدّالين المايلة موجودين
محبتي

مرحب كباشي
وحبابك
ود اب سن كان مشهور ببيع السمن ,, واحد من عينات السمن كان السمن الغربي , سمن العباسية والبيترا وابوجبيهة , شايف اللواري بتشحن من كوستي لي اليوم وتمشي العباسية ,, ومنقة العباسية وابوجبيهة بتجينا
اظنها ردمية
لومك علي اوصل سلامي
كوستي بلد واحمد كوكو ولد داك زمنا مضي ولازلت بكوستي حتي اليوم

العبيد آ خوي
جيتني في مكان الوجع
محل الكية زاتها
والهدف الاساسي من البوست
توضيح اننا شعبا مؤدبا نحترم الكبير ونوقره ولو علي حساب انفسنا وإن أخطأ فينا
عادي بتسمع التعليقات دون معرفة الحيثيات
ياخ الكلام ده عيب ده راجل قدر ابوك
والله لو ما كنت زول كبير كان وريتك
و
جانا ك ل ب سنونو صفر
عيونو حمر
حلب الناقة في السنقاقة
والسنقافة هي القشرة البتقشرها من القصبة , يعني ملا مواعينو كلها والباقي بحلب فيهو في القشة

مشاركة من خالي
عبدالمنعم صديق مليك بقرية الصقيعة
واتس اب

قد يتعب القلب من تربية الأبناء وتعاني النفس من تمَرّدِهِم، ممايسبب الهمّ والغم للوالدين.
قال ابن القيم :
إنّ من الذنوب مالا يكفّره إلا
الهمّ بالأولاد.
فهنيئا لكل من اهتم بتربية أبناءه على مايحبه الله ويرضاه هنيئا لكم طريقا لتكفير
الذنوب.
وان وجدتم من ابنائكم ما يتعبكم في تربيتهم . فاستغفروا ربكم .
دخل "مقاتل بن سليمان" رحمه الله ، على "المنصور" رحمه الله ، يوم بُويعَ بالخلافة،
فقال له "المنصور" عِظني يا "مقاتل" !
فقال : أعظُك بما رأيت أم بما سمعت؟
قال : بما رأيت.
قال : يا أمير المؤمنين !
إن عمر بن عبد العزيز أنجب أحد عشر ولدا ً وترك ثمانية عشر دينارا ً ، كُفّنَ بخمسة دنانير ، واشتُريَ له قبر بأربعة دنانير وَوزّع الباقي على أبنائه.
وهشام بن عبد الملك أنجب أحد عشر ولدا ً ، وكان نصيب كلّ ولد ٍ من التركة مليون دينار.
والله... يا أمير المؤمنين :
لقد رأيت في يوم ٍ واحد ٍ أحد أبناء عمر بن عبد العزيز يتصدق بمائة فرس للجهاد في سبيل الله ،
وأحد أبناء هشام يتسول في الأسواق.

وقد سأل الناس عمر بن عبدالعزيز وهو على فراش الموت : ماذا تركت لأبنائك يا عمر ؟ قال : تركت لهم تقوى الله ، فإن كانوا صالحين فالله تعالى يتولى الصالحين ، وإن كانوا غير ذلك فلن أترك لهم ما يعينهم على معصية الله تعالى .

... كثير من الناس يسعى ويكد ويتعب ليؤمن مستقبل أولاده ظنا منه أن وجود المال في أيديهم بعد موته أمان لهم، وغفل عن الأمان العظيم الذي ذكره الله في كتابه: (وَلْيَخْشَ الَّذِينَ لَوْ تَرَكُوا مِنْ خَلْفِهِمْ ذُرِّيَّةً ضِعَافًا خَافُوا عَلَيْهِمْ فَلْيَتَّقُوا اللَّهَ وَلْيَقُولُوا قَوْلًا سَدِيدًا).

بدأ التعدي علي القيم حين تم السماح لأطفال صغار غر بإعتقال وتعذيب من هم اسن منهم , دون سقف محدد لنوعية التعذيب , فإعتقلوا من هم في سن اجدادهم ,, واعتقلوا معلميهم , بل ناهيك عن الاطفال ,بل اعتقل وعذب استاذة الجامعات من درسهم فيها وكانوا زملاءهم , وترقي صغار الضباط امام من هم احق منهم
تم التعدي بشكل ممنهج علي قيمة احترام الكبير ,, الكبير سنا والكبير علما والكبير مكانة

فهم من اضاعوا قداسة احترام الكبير
وقداسة القيم
ف شنو بعد ده
يجو يقولو ليك مفروض منو كده ما عارف تحترم منو كده شان قدر ابوها
ولا
حقو تحترم فلان ده لأنو بمثل رمز شنو كده ما تعرف
قالو يجدع شنطتك المدرسية في الواطة ولامن تجدع شنطتو يقول ليك حرام فيها كتاب الدين

فالقيم لا تتجزأ , ولا تنفصل عن منظومتها
ولكنها يمكن ان تتبع مجموعتها الاجتماعية
فللشعب قيم لازالت راسخة وضاربة بجذورها في حياة الناس ومعاشهم
وللسلطة قيمها الاخلاقية التي ارادت بها السيطرة علي الناس وفي ان يظلوا يتبعون قيمهم ,, أي أن
يأكلوا التفاحة ويحتفظوا بها
استطاع الذكاء الشعبي والقيم المغروسة فيه بالحفاظ علي ما توارثوه دون ان يغيب عن معاملة اهل السلطة بقيمهم

من النفاج
مرحي شمس الدين
وينك يا صاحب
اهو بنكابس غايتو

اها برضو كنا بنحترم الدكاترة احترام حد القداسة
إحترام لعلمهم
يعني الولد من يخش اولي طب كلمة دكتور تكون لاصقة فيهو
والواحد يقيف قدام الدكتور مؤدب اكتر من ادبو في الصلاة
ما ينضم إلا يسألو الدكتور ويتكلم بصوت منخفض , وما بقعد إلا يقعدوهو

وغني ابوداؤود
الدكاترة ولادة الهنا
وإفتخرن البنات
شاي زي دم الدكاترة
ومن اعجبه هندامه
دكتور بس الليلة
ومتين ما الولد دخل الطب طوالي بقا دكتور
فرفعت عنه الاعمال اليدوية في المناسبات , لا بدق صيوان ,, لا بغسل لي زول ,,, ولا بشيل صينية
بل يرتفع مكانه مع الرجال الكبار
لكن ما عارف وضع الدكتورة شنو ? غايتو لا بتتحنن لا بتدخن لو معرسا ,, طالبه بس ,,, كركينها بيوووض

نايم لامن الشمش طلعت اصلك قايل نفسك دكتور !
وبادل الدكاترة الناس احترامهم بإفتراء وقندفة ,, وكانت قندفة باردة علي قلوبهم ما دكتور
الدكتور ممكن ما يبدأك بالسلام في الحلة لكن انت بتسلم عليهو وبتنشرح لو رد ليك
كانوا ما بشبهو الناس !!
فهم عليهم درجة
ويلحقهم علي درجة اقل بعض خريجي الجامعات

احمد ابسن أكبر اخواني كان المهندس المقيم لخزان سنار كم وتمانين
قال لي جابو لينا خريج جديد ,, وبعد كم شهر اشتري تلاجه وقال لي لو ماشي الخرطوم برفعها معاك
المهم
رفعها في عربيتي وغشيت اهلو في قري الجزيرة ,, من ما وصلنا ,, انا سايق وهو راكب جمبي والتلاجة وراء في الحوض بتاع اللاندكروزر
اهلو استلمو ولدهم مقالدة وإكرام ,, وسايقنو رجالة وحلايف لي جوة البيت , وانا لمو فيني نهير ,, استعدل ,,, امشي قدام ,, تعال وراء ,,, وشالو التلاجة ,,, ها الماكن ده ,,, تعال امسك بي هنا ,, واخوي كان له بسطة في جسمه
قال لي وانا شايل ,, يجي المهندس جاري ,
لا لا ياناس ,,, ده الباشمهندس اب سن مديري في الشغل
قال لي حلفت إلا ادخل معاهم التلاجة وهم اتحرجو قايلنو سواق

تمشي للدكتور وتدفع قروشك كااااااش بول جمل ,, وتقول ليهو
عندي نزلة
فيقول ليك بكل سخرية فجة
وقت عارف عندك ملاريا جاي ليه ما كان تتعالج براك
يهزيؤك بي قروشك

(*)

شـــــــــــبكااااااا

متابعه مستحقه للأديب الكاتب عبد الحفيظ ابوسن

تشكر ياصاحب على الذكريات الطاعمه المتشابهه فى جل ارجاء السودان
انا كنت بقول
حلب الناقه فى الشنقاقه
ولى هسى راكبه فى راسى الشنقاقه

تسلم ياحبيب

فوق

اها
الناس وعت
وزاد عدد طلاب المدارس ,, والهرم فوق اتسعت قاعدته
في أي بيت في خريجين ,, وفي اي اسرة في اطباء ,, وطبيبات
وحكاية انو الدكتور يعلو درجة علي الناس انتهت
بقا زيو وزي الناس
يأكل ويشرب ويدق الصيوان ويشيل صينية الغدا

يا سلام
يا ود ابوسن ونايب
وضرس كمان
جني

يا حفيظ ود عمنا أبوسن (عليه رحمة الله)،

فضايلنا دي لا خوف عليها ما دااام حراسها أنتم...
واصل هذا السرد الجميل

متابعه بي صمت ...

يا سلام عليك يا استاذ يا راقي

و تحياتنا لاهل كوستي و شوارعها ..

ليها وحشه تعصر الوجدان

مرحبا بلة
تشكر يا صاحب
كان المزاج عكرا لمآلات ما يحدث داخل الحوش

حبابك ملهم
تعرف حكاية جانا ك ل ب دي كنا بنقولها ونحن اطفال , وبرضو ونحن اطفال ورونا انو المقصود بيها هو المستعمر الانجليزي ,, وبتريد امك ولا ابوك
يااااااه زمن
ولا جهدية الاورطية جهدية الحالابونا
شدو جمالم جونا
وحكو لينا عن زمن الجهدية ,, الواحد يغز حربتو في الشافع ويجدعو
غير الجنزير في النجوم زي الهيكل المنضوم ما بخاف في المحاصة .....
يعني برضو كانوا بحكو لينا عن تاريخنا واننا ما قايمين بروس ,, وجدكنا كفت الخواجة وو

مرحبا جني
وحبابك
وشاكر ليك متابعتك
وجني احد اسماء طفولتي ,, تصدق في ناس لي الليلة من اهلي شايفني جني !
تعرف من تبينا مؤدبين ومتدينين واهلنا ورونا الغلط والصاح
والبعمل فينا غلط هو زاتو عارفو غلط
ربونا بما اتاحت لهم معرفتهم آنذاك ,, رغما عن شظف العيش والحياة ضنينة لكنهم غرسوا دأخلنا قيما جيدة وراقية
إمكن الطريقة كانت قاسية لكن الهدف كان اسمي

اها
معليش مفروض ارجع حسب وعدي للشباب الفوق
الزمن إتغير صاح لكن زي ما قال العبيد أخوي القيمة بتظل موجودة لامن سيد الامانة يشيل امانتو
وبنربي حسب فهمنا ماخدين تغير العصر , عيالنا بقعدو جمبنا في السرير ويرقدو كمان , ومرات يقولو ليك زح شوية , وبنلعب معاهم , آي والله اللعب الواحد ده ما حق الاتاري ولا الكمبيوتر ,, وبناكل سوا
لكن برضو بنربي
هم عارفين ده عمهم وده خالهم , والعيال بحاكوك لو بتحترم اخوانك هم بحترموهم ,, ولو ماسك سيرة اهلك بالشر مع مرتك تأكد هم ما بعملو ليهم قيمة تاني
ولو رسلو ولدك ما بتنضم حتي لو داك ولدو قاعد , مش عشانو عشان ولدك
سندويتشات في البيت ممنوعة رسمي تقعد تاكل مع الناس
التلفزيون بتقفل وقت الاكل وحتي لو في واحد قال ما داير ياكل ,,
المهم
لن نعيد الزمان ولكن قدر الامكان نحافظ علي قيمة الاسره وتماسكهااها
معليش مفروض ارجع حسب وعدي للشباب الفوق
الزمن إتغير صاح لكن زي ما قال العبيد أخوي القيمة بتظل موجودة لامن سيد الامانة يشيل امانتو
وبنربي حسب فهمنا ماخدين تغير العصر , عيالنا بقعدو جمبنا في السرير ويرقدو كمان , ومرات يقولو ليك زح شوية , وبنلعب معاهم , آي والله اللعب الواحد ده ما حق الاتاري ولا الكمبيوتر ,, وبناكل سوا
لكن برضو بنربي
هم عارفين ده عمهم وده خالهم , والعيال بحاكوك لو بتحترم اخوانك هم بحترموهم ,, ولو ماسك سيرة اهلك بالشر مع مرتك تأكد هم ما بعملو ليهم قيمة تاني
ولو رسلو ولدك ما بتنضم حتي لو داك ولدو قاعد , مش عشانو عشان ولدك
سندويتشات في البيت ممنوعة رسمي تقعد تاكل مع الناس
التلفزيون بتقفل وقت الاكل وحتي لو في واحد قال ما داير ياكل ,,
المهم
لن نعيد الزمان ولكن قدر الامكان نحافظ علي قيمة الاسره وتماسكها

مرحبا كاروري
اوعا تقول لي ناس كاروري بتاعين حي ازهري بكوستي ,,, ولا ديم ازهري كما يقول اهلنا زمان
يسعدني انك تقرأ ما أكتب

من النفاج
مرحبا شمس
المهنة لا تخلق شخصا ,, بل الشخص هو من يخلق للمهنة شأنا
بعض الناس يرون مهنتهم كشخصية لهم , فإن جردتهم منها صاروا نكرات
فالانسان الجيد سيكون جيدا مهما كانت مهنته
هل قرأت لاحدهم يقول بروفسر انشتاين او باشمهندس اديسون او دكتور فرويد او او او
الآداب كانت اسفل الخيارات الجامعية , وقادمة من أسفل الخيارات في الثانوي , فلايذهب للمساق الادبي إلا من عجز عن العلمي
ولكن بروف عبدالله الطيب استطاع ان يتميز فيها تميزا عالميا
لذا لا تعجب من رجل فسر القرآن الكريم بالدارجية , وكان متواضعا جم التواضع وعالما لا يضاهي في اللغة العربية
ف شنو
كلنا اولاد تسعة ويعصرنا البول زي بعض , ونجوع

من النفاج
مرحب ابو احمد
وينك يا رجل
كتر خيرك والله للتشجيع والدعم

ابو سن سلام يا صديقي
ما لك بترجع للحاجات البتوجع

يسلم عبد الحفيظ أب سن.. الكاتب المميز الذي يكتب من الزمن الجميل.. وأصعب حاجة على النفس لما يكون ماضيك أجمل من حاضرك.. وشوارق المستقبل لا تنبئك بشئ. إلا بشئ في رحم الغيب
ثم ونحن نعرف قدر كوتي والكوستاويين تماما.. ولنا فيها فضل ظهر وفضل مقام وأيام خلت..

الجميل اب سن

يانا زاتنا ناس ازهري .. مواليد الرديف و تربيتو .. و بداية دراستنا الشرقيه مع اب صره .. و منيب مع اب قرجه .. لمن كانت الدراسه ليها طعم

دووم بي ود

Quote: هلو استلمو ولدهم مقالدة وإكرام ,, وسايقنو رجالة وحلايف لي جوة البيت , وانا لمو فيني نهير ,, استعدل ,,, امشي قدام ,, تعال وراء ,,, وشالو التلاجة ,,, ها الماكن ده ,,, تعال امسك بي هنا ,, واخوي كان له بسطة في جسمه قال لي وانا شايل ,, يجي المهندس جاري , لا لا ياناس ,,, ده الباشمهندس اب سن مديري في الشغل قال لي حلفت إلا ادخل معاهم التلاجة وهم اتحرجو قايلنو سواق

<<<<<<<<<<<<<<<<<<<<<<<<<<<<<<<<<<<<

روعة
والله يديك العافية

اوووووو تبيدي
وينك يا صاحب
ام العيال والوليدات والاهل عموم
لا والله ,, الفكرة اننا ما قايمين بروس ,, ولامنبتين ,,, ولا شذاذ آفاق
نحن اصلنا راسخ في هذا الوطن ,, ثابتين كما الجبال , لينا تاريخ وتراث
وعندنا سلوك واعي نحو القيم الانسانية العالية
وليس تباكيا علي الماضي , ولكنها محاولات لإستنهاض الهمم
ف شنو
الدكاترة وأضف ليهم القيادات السياسية والادباء ونجوم الميديا ,, داير احدثهم واقول ليهم ,, إن اردتم منا إحتراما فكونوا محترمين
اتخذوا من المواقف التي تجعلنا نحس انكم منا ,, وبرضو داير أذكرهم بأنو مزبلة التاريخ دي ما واقع إفتراضي بل مكانا مخزنا في الذاكرة الجمعية ,, والبخشو يتأكد انو ما حيمرق منو ,, وبظل مباري احفادو لي جني الجني حتي لينكر الحفيد جده

مرحبا منصوري
وحبابك
منصوري قبيلة ولا منصوري الحصاحيصا
وفي كل حبابك
وشرفتني بمتابعتك

فوق
لحين
شبكة

مرحب اميرة السيد
وحبابك
شاكر متابعتك يا خية

...*...

عبرك انت ده


للعم الرايع عبدالقادرعلم الهدى الجفرى واسرته في ربك الحنينة








حليل لمن كان يسموهو الاقليم الاوسط

حبابك نادوس ود عمنا المرحوم عبدالحليم عبدالجليل , ذلك الصول نظيف اليد واللسان والمظهر
القيم موجودة والدلالة عليها فقر معظم الشعب !
تحياتي لدكتور اسامة الرجل الفاضل والذي لم يتواني يوما كلما طلبت منه مساعدة لأحدهم
وتقبل الله شقيقكم معتصم قبولا طيبا
اسعدني مرورك جدا

سلام اب سن


انا و - أفخر - سنيري فى الهندسة أحمد اب سن .. و عبد القادر ود راوة
و فى نادى الخريجين الكمالين ( قنيف و اب شمة) ..
و فى العمل ( ميرغنى بيطرى).
تلميذ الاميرية الناظرها الخير ساتي و ود القوز من ابناء استاذ الفادنى ..

و عديل استاذ الرشيدعلى عمر المحامي ( أها شن ليك) ..
و سكنت فى بيت حسن رقيشن ..
و خالى عوض بنزين
و عمي قنيف ..

أها خليت فى كوستى شنو ؟

لكن برضو بنفخر بـ .. فاطمة السمحة بت ودرراوة .. و د. منى حامد .. التى انشأت الصيدلية الشعبية بجهد ذاتي و مولتها من رجال المدينة ( موظفيت قبال التجار ) و اقباط و مسلمين ..
و ... بدرية و د. اقبال و ... اشراقة و امال الشيخ ..


لكن كوستى اتغيرت لما اتغيرت اسماء محطات الكشك و عوض شلك .. وابراهيم داؤؤد .. ..

دقيقة بس وجاي للترتيب
سونبهار للباشمهندس معتصم الطاهر
إبن اول صاحب لوري بربك
وصديق إبن عمي عبدالوهاب
ارحب بيك وبجي لمداخلتك بالتفصيل
والتحية لكل من ذكرت

مرحب يوسف محمود
ياخ عمك ده صحبي جدا , وكان رجلا لطيفا و طيبا وذو نفس لم أجد بياضا أكتر منها
فيثاغورث كان هذا لقبه ,,
له مني التحية له ولأسرته

مرحبا معتصم
ياخ حشدت كمية من الدكريات في رد مختصر
عبدالقادر ود راوه كان عبقريا فذا , تخرج من هندسة الخرطوم بديفيشن 1 وبعث لفرنسا للتحضير وعاد استاذا للهندسة بالجامعة , الآن هو بالسعودية , وهو شقيق اللواء ابراهيم احمد عبدالكريم ( فرسان في الميدان ) وشقيق فاطنة السمحة من اوائل بنات كوستي اللائي درسن بمصر , دفعة ناس احمد اخوي كان دفعة مميزة , دخل كل الفصل لكلية الهندسة جامعة الخرطوم إلا اثنان واتذكرهما بالاسم , والفضل يعود لأستاذ الفادني
شلة نادي الخريجين كمال ميرغني قنيف ابن اخ علي قنيف ! وكمال ابوشمة وميرغني قمر واسامة كوكو وغيرهم , انشأوا نادي الخريجين بكوستي
والرشيد علي عمر المحامي صديق ياسر عرمان ودفعته بالفرع هو و زكي منصور , وتربطني بهما علاقة حميمة ,, وكنت وزكي منصور وهاشم بلول اول من اقاموا حفل تأبين بالسودان للراحل حميد , ولا زالت صوره الملصق في باب دكاني
بجيك تاني
معتصم انا متذكر بصورة تذهلك رغم فارق السن لكن شكلك كبرت وبقيت تنسي

و الصيدلانية مني حامد محمود , بت معجونة بالصدق والتفاني , جات المستشفي ووجدت فسادا مستشريا داخله , ووضعت ضوابط صارمة لصرف الدواء , فتوفر الدواء ووصل للمريض في سريره ,, وانشأت بمعاونة اهل كوستي صيدلية خيرية واصلحت من شأن الصيدلية الداخلية , من هنا للصديقة مني وعيالها وزوجها عبدالرحمن دريسة كل الاحترام

حسن رقيشن حلتنا ولا قول شارع بيتنا عديل وآل ابنعوف ,, اولاد عوض بنزين بأمريكا ,
بدرية عبدالرحمن المرأة التي بذلت نفسها لعمل الخير , بت المرابيع
لعلك تقصد نوال حسن الشيخ الفتاة المصادمة وزوجة علي محجوب النضيف وهي الآن ببريطانيا
دكتورة اقبال عوض الحاج وهي بالخليج ترسل سنويا مئات الملابس للايتام وترسل المال
اشراقة تراها قاعده هنا

حسن رقيشن حلتنا ولا قول شارع بيتنا عديل وآل ابنعوف ,, اولاد عوض بنزين بأمريكا ,
بدرية عبدالرحمن المرأة التي بذلت نفسها لعمل الخير , بت المرابيع
لعلك تقصد نوال حسن الشيخ الفتاة المصادمة وزوجة علي محجوب النضيف وهي الآن ببريطانيا
دكتورة اقبال عوض الحاج وهي بالخليج ترسل سنويا مئات الملابس للايتام وترسل المال
اشراقة تراها قاعده هنا

مرسال الشفع
تغير الواقع , وبنسمع قصص تشيب الغراب ,,, شيخ خلوة ,,, مدرس ,,, رجل امن ووو واولئك المنوط بهم تجسيد جيد القيم والاخلاق والمحافظة عليها , يغتصبون اطفالا
ف شنو
خفنا !
آي والله الواحد يخاف يرسل طفلو الدكان ليلا او نهارا , والشافع الما متعلم المرسال لامن يكبر ما بترسل ولا بقضي غرض
بقينا نرسل الشافع ونمرق بي وراهو نباري بالطوالة