حبة تراب

قصيدة للام و المربية آمال راسخ

حبة تراب
من أرض الوطن حبة تراب * شفاء للحواس الخمسه الماتوا من طول اغتراب

يا ماشى لبلدي الحبيب *** جيب لي معاك حبة تراب
قبال من أصبح كوم تراب
حبة تراب من تحت رجلين طفولة مشرده *** من غير علم فاقده الصواب
من تحت رجلين عجوزه مدردره *** طلبة العلاج سائله المجيب راجيه الجواب
من تحت رجلين غلابه مهمشه *** تجري تلهث للسراب
من تحت رجلين شبابا مستجير من رمضا بى نار احتراب
حبة تراب شفاء للحواس الخمسة *** الكادت تموت شوق واكتئاب
بركة وتبرك من أرض *** بلدي الحبيب المستطاب
فعسى ولعل تخفف البي *** من شحتفة روح من عذاب
ومعاها مويه معكره *** ممكرره ... من عطبره !!
للعبره عبره معبّره *** تشفي العلل غير دكتره
وترويني من النيل شراب
حبة تراب فوق العيون *** ورؤية حبايبا كيف عفيفه نفوسها خاليه من المجون
وقلب حنون كان تشفي لي *** قلبا عليل بالفرقة ممكون
حبة تراب فوق الأضان *** بها أستمع نغم الحنان
والذكريات الطيبه *** ناس فاطمة وحنان
فقدوني بالحيطة *** مالك ما مرقت على الجيران !!
وما سمعت قالوا الليلة عقد جيهان

حبة تراب فوق اللسان ... ما منها الانسان خلق
وبها يعاد يوم الحساب
ما رضعت من خيرات خصوبتو ... من ثدي أم مؤمن رؤوم مخلص خدوم
كم ليهو أقدر وكم أهاب
حبة تراب لحاسة الشم ... أديها شمه
ترد الروح تزيل البي ضمه ... وبي فضل الكريم العين تضوي من الضلّمه
حبة تراب لحاسة اللمس ... اتحسسها وأديها لمسه
وبها أسرح وأغيب ... في ضل ضحى ليو همبريب ونسيمو هبّاب
بيها أتكي في عنقريبا ... صانعه ماهر وليهو كرّاب
وجلسة ودع بس تسليه ... بس دردشه
وبقناعه من ايمان عميق ... وقلب شفيق ... لو صدق المنجم برضوا كذاب
عزة تراب بالحيل عزيز ... من خيره كم كم سل دهب وكم عادت العملات صعاب
والله يجازي الشتت أهله ... في ضهاري الدنيا وبشتن للعقاب
الله يجازي الكان سبب خرب البلد وخلاه خراب

معى تحيات خالتكم
آمال محي الدين حسين راسخ
ملحوظة:-
للعبرة : بفتح العين وسكون الباء وفتح الراء
عبرة : بكسر العين وسكون الباء وفتح الراء
معبرة : بضم الميم وفتح العين وشدة وكسره على الباء وفتحه على الراء .
كما أرجو ارسال نمرة التلفون للتأكد من وصول الرسالة . وشكرا .