ادى البحر نُصو

بين السما الغتت مسافات الودار
والواطا الرحيبة الشايله همك
لملم وجع عمرك وفوت
ودّع وامسك
بحرك الحاضن الديار
ومن حسك البغزل فرِش نمَك
خُت حزنك قريب
مع طين البيوت
واتقاسمو الضحك الكوبار

بشوفك من بعيد مارق
ومارقه منك
ريحة الدروب والناس
شى من جواك
شى من حبانك الجنبك
جاى من عصب الحواس
شى من خالك ومن عمّك
تمتم وكلم بيهو روحك
باللاميهو بتحسو
واقيف مع شمس النهار
خلى شويه للقمرا
وادى البحر نصو

ادى البحر نصو
وتانى كمان
حجينا بالباقى
وكان فضل قليل منك
وريهو للضايعين
اديهو للماشين
ارويهو قصو

قص لينا
حكاية روحك المشتولة
فى روح الخدار
وش البنيه النيه
ساعة عيونا تمدها
سيفا سنين بتار
مبروزة بى ضى المساير السادله نازله
شلال على الخد النضار
امسك رويحتك شدها
واختا البنيه النيه
قبال الغباين توصلك
فوق القلب تسكن جوار
وفى رويحتك تخلف الكيّه
احسب سنينك عدها
كم باقى ليك ؟
كمين مواجع فى قفاك
بيناتا بين الغنيه تار
سوى العليك
كمين مواسم طيرا طار
لا خرفت عز الخريف
ولا للسحاب حفظت وصيه
كمين هواجس فى رجاك
ما بتنهى
راجياك فى قيف النزيف
خاتاك فى بال السهر
دافناك فى موج الأسيه
رجع لياليك ردها
ارفع قدم نوحك تعال
قالو الدرب دس الأتر
غطى المشاوير بالغبار
ومن دمك الواقف حداك
اسقى بور خوفك مطر
شد خيل غناك
اتوكل على الحيل الفتر
وابدا السفر
ادفنو مع الفضّل قبيل
من المسادير الأبت
غنايا حار بيهو الدليل
طفشن مشت
سكنت طرف حسو
بِل الرويحه الناشفه
فى حيضان مناك
وادى البحر نصو

بشوفك من بعيد مارق
ومارقه منك
ريحة الدروب والناس
شى من جواك
شى من حبانك الجنبك
جاى من عصب الحواس
شى من خالك ومن عمّك
تمتم وكلم بيهو روحك
باللاميهو بتحسو
واقيف مع شمس النهار
خلى شويه للقمرا
وادى البحر نصو

***

المطر

نحن تكفينا من هذا البحر ولو رشفة ، فما بالك بالنص
دمتم

أديك السلام ونصو
وليك الوئام ونصو
وحب الأنام ونصو

أهديك الحب ونصو
ولقا المحب ونصو
ونضار الدرب ونصو

أهديك الشغب ونصو
وحلاوة التعب ونصو
ورحيق الحرف ونصو

أهديك جرف ونصو
وساقية بتلف في نصو
ونخيل مختلف بنصو

وأدي السهاد نصو
وأدي البعاد نصو
أدي الصبر نصو
وأدي الشهد نصو

تهنئة قلبية خالصة ...بيوم الشعر ...ولقلمك العالي ..قومة وتحية .
--------------------------------------------------------------
يبدو أن بهنس قد تسلل عميقاً ...فأطل من بين الحروف والمعاني المرتجلة
أعلاه على سبيل التحية والتقدير لنصك الباذخ ...أخي وأستاذي ابوذر ...
ألف رحمة على روح بهنس ...

أنا غايتو شلت نصو زمان

وجاي أسي أشيل نصو التاني ..

طمع !؟؟؟

جميل هذا الرجع الراسخ في كلمة : محبة .

تحياتي وودي

جورج

طمعك جميل
زى طلتك

وطلتك عين الشمس
بشارة لى باكر
باقى فرحتنا المن امس

السلام عليك يا إبراهيم

السلام عليك فى الطيبين

بهنس
تأبط دمه الأخضر
وجلس هناك يرقبنا
اختار مقعده العالى فى الضفة الأخرى
بذات الإبتسامة الطينية العذبة تلك

يتلو آيات الحضور
كيلا يشاغب أبجدية الغياب المر

ونحن على موعد


أحييك يا إبراهيم
يا خليل المعنى

وصاحب الحبر الجميل

يا أبا جهينة

ومن لدنك
يأتينا حضور يقين
خبر التفتح
رفقة الحبر الأمين

ولا نكتفى أبدا

ولسان حال الفرح
ينادى

هل من مزيد ؟

وأهديك المودة

بكل عطرها