الـــعـــرجـــــونـــــة

يا عرجونة
يا مزيونة
ويامعجونة
من الصندل ونور الفجر الضاحك
يوم الجمعة
وحال الناس في يوم العيد
وشفتك بالاحساس
يا غالية علي
وانا متوسد ليل الغربة
وكنت بعيد
شفتك ضاوية
كوكب دري
وشفتك حانية زي النيل
وشفتك زاهية
زي الضفة وفيها نخيل
وشفتك ساهمة
ومن الليل الما بتراوح
من عقدين
كلما يقرب فجرا دافر
نلقى الليل يمتد ويزيد
عايز احكيك
عن انسان اتملى جمالك
قبال مايشوفك
حين اتكون من النطفة
وكان امشاج في جوة الغيب
وعاشك ريد
من ضفة نيلك كان اتعلم كيفن يسبح
عاكس دايما للتيار
عشان ما يفلرقك
كان عشان يتقوى ويبقى مناتل
زي عود نيلك ديمة
عنيد
ومن عينيك اتعلم
كيف بيكون جمال المفردة
اصلا كل حروف اللغة
الجافلة
من عينيك بتمرق خيل
تمرح في جنبات الخاطر
وكل ظنون الفكرة
انت
وكل جمال في اي نشيد
شلتك
وانا متوجه نحو الشمس
لمن جوة غلبني الليل
بقيت رغم النور المارق من الكلمة ونبض حروفي
بقيت ما شايف
ليلام كلو عساكر
واتعلمنا
لمن تكتر فينا دساكر
بيقى هوا الاحساس
متعفن وراكد
نمرق برة
يمكن تشلع لحظة برقا
من تالك
يا غيم المطرة الفارق
جرفا
جمب النيل
والنيل اتباقص
بقى زي خيط
وانت النادية
يا مسكونة
بالاحساس
وغناوي الالفة
وطعم الريد
ختي عليك
في جواك
عشم اللقيا
وانا بتوشح ديمة كلامك
ا احلام الزمن القادم
حتما بكرة
بي اذن الله
ببقى سعيد


وبس

وسقانا النيل
ترياق الالفة
وجذر فيني
هذا الانتما

شلتك
وانا متوجه نحو الشمس
لمن جوة غلبني الليل
بقيت رغم النور المارق من الكلمة ونبض حروفي
بقيت ما شايف

***

فلاش باك

Quote: ومن الليل الما بتراوح من عقدين كلما يقرب فجرا دافر نلقى الليل يمتد ويزيد عايز احكيك

يا سلااااااااااااااااااااااااااام

Quote: نمرق برة يمكن تشلع لحظة برقا من تالك يا غيم المطرة الفارق جرفا جمب النيل والنيل اتباقص بقى زي خيط وانت النادية يا مسكونة بالاحساس وغناوي الالفة وطعم الريد ختي عليك في جواك عشم اللقيا وانا بتوشح ديمة كلامك

وأنا ساساقت برَّة حين ومضت بروق حرفك الأنيق
وإستنشقت دعاشات هذه العرجونة...........!
وإحتضنت في جواي عشم اللقيا
وإتوشحت غيم شعرك الجميل

وكلنا الرائع أبو جهينة حين غرف براحتيه الوهيطتين

Quote: وانا متوجه نحو الشمس لمن جوة غلبني الليل بقيت رغم النور المارق من الكلمة ونبض حروفي بقيت ما شايف

محبتي لك وله

Quote: فلاش باك

اخاف من قراءتك لي
واسعد دوما بمرورك البهي
ياخ انا بحبك