Post: #1
Title: ***نكتة***
Author: يوسف محمود
Date: 03-20-2014, 07:43 AM
Parent: #0
قالو جلاكسي S4 بقلب الصفحات بالنظر فقط
ودون لمس الشاشة
الأمريكي
: واااااااااو من اين جاءوا بهذه الفكرة الرائعة؟
.
.
الأوروبي
ترى كم استغرقوا من الوقت للتمكن من تنفيذ هذه التقنية؟
.
.
الياباني
ياترى مانوع هذه الحساسات التي تستجيب دون لمس الشاشة؟
.
الصينى
كم يحتاج ان نقلده وننسخ الشغل ده في موبايل بعشرة جنيه
.
السوداني.
.
.
.
حسي لو اشتراه زول احوص
|
Post: #2
Title: Re: ***نكتة***
Author: يوسف محمود
Date: 03-20-2014, 08:11 AM
Parent: #1
مسطول صدم شرطي مرور ومات الشرطي
دق المسطول علي 999
قال انتو 999
قالو نعم
قال
ياجنابو
ماقادر اقول ليكم
في خبر كعب
غايتو بقيتو 998
واحد منكم مات
|
Post: #3
Title: Re: ***نكتة***
Author: يوسف محمود
Date: 03-20-2014, 08:14 AM
Parent: #1
وحده مثقفاتيه
مجنونة شعر
تحب الشعر والقصايد معرسه واحد مكنيكى اصنج
لايحب الشعر
ولايسرح الشعر
صحتو نص الليل
وقالت : ((هل ينام الحُب ليلا أم ينام الليل حباً أم أنا والليل حب لا ينام ))
رد عليها : هل تريدين الطلاق ؟
أم الطلاق يريدك ؟
أم أنت والطلاق تريدون بعضاً ؟؟!!ا
زولتك نامت وهي تقرأ المعوذات
|
Post: #4
Title: Re: ***نكتة***
Author: عبداللطيف خليل محمد على
Date: 03-20-2014, 08:52 AM
Parent: #3
صباح الخير يا يوسف ..
لي كم يوم بفتش لي في كم ضحكة كدا و الله ..
|
Post: #5
Title: Re: ***نكتة***
Author: يوسف محمود
Date: 03-20-2014, 09:01 AM
Parent: #4
حبابك عشرة
عبداللطيف خليل محمد على
تعرف نحنا فاشلين سياسة واقتصاد وبرضو الناس ماراضية تخلينا في غربتنا وظرونا بيلاحقونا بأسؤ ما يمكن ان تنتجه الصحافة الصفراء
واسؤ ماينتجه المتشائمون لدرجة الواحد بتردد قبل مايفتح الفيس بوك او تويتر قتل ضبح اغتصاب
فقلت خلينا نكتب كلمة نكتة في صدر الصفحة الاولى وود الحلال يفتح الباب تيمنا وتفاؤلا بايمامنا الخوالى
كنت داسى لى نكتتين لليوم الاسود بس عشان جيتك ديل حرم الا انزلن
خلك قريب
|
Post: #6
Title: Re: ***نكتة***
Author: Abureesh
Date: 03-20-2014, 09:32 AM
Parent: #5
سلام يوسف،
قومت نفسنا ياخ جارين من سطر لسطر.. بعدين ياخ ادى إعتبار للعمر.. انا اقر سطر واستعمل الماوس وانزل انزل أنزل، لما اصل السطر التانى اكون نسيت موضوع السطر الاول فأقوم ارجعلو تانى.
|
Post: #7
Title: Re: ***نكتة***
Author: يوسف محمود
Date: 03-20-2014, 09:42 AM
Parent: #6
ابوالريش
الراجل الكلس
حبابك
عمر شينو ياخ
نحنا كايسين ليك الدبل
بس شهرين تانى مابيفرزوك من رونالدينو وميسى
اضحك
تفائل
وفرفش
وعرس
هههههههههههههههاهاه
|
Post: #8
Title: Re: ***نكتة***
Author: سامى عبد المطلب
Date: 03-20-2014, 09:43 AM
Parent: #6
احم احم ممكن نشارك اخونا يوسف
قال ليك رباطابي مشي بيت عزابه فيهو مخدة واحدة سيد البيت سحبها من واحد نايم وأداها للرباطابي..
خلى الرباطابي نام شال المخدة من تحتو الرباطابي فتح عيونو قال ليهو : شنو يا خوي .. دي مخدة ولا استارتر لمبة !
|
Post: #9
Title: Re: ***نكتة***
Author: يوسف محمود
Date: 03-20-2014, 09:51 AM
Parent: #8
سامى عبدالمطلب
قوووووووووووووووووووية
ههههههههههههههاهاهاهاها
الرباطاب اجارك الله
خطرين
|
Post: #10
Title: Re: ***نكتة***
Author: عبدالله ود البوش
Date: 03-20-2014, 10:29 AM
Parent: #9
صحفي اجنبي في الخرطوم بعمل في استطلاع
لاقا زول وقال ليهو لاحظت ان السودانيين لمن تسألوا سؤال يجاوبك بسؤال
قام الزول قاليهو
زي شنو مثلا ؟؟؟؟؟؟؟
شكرا يوسف محمود
تحياتي
|
Post: #11
Title: Re: ***نكتة***
Author: يوسف محمود
Date: 03-24-2014, 02:48 PM
Parent: #1
Quote: اسد شالو من السودان ودهو حديقه الحيوانات في السعودية
الاسد متكيف كيف شديد قال دي بلد تمام قفص نضيف والحديقه جميله ياخ انا كنت عايش في كوشة الحمد لله المرقتا من البلد الشوم ديك..
اول يوم جات مواعيد الوجبة الاسد قاعد وخالف رجل علي رجل راجي اللحوم والطيبات لكن الحارس جاهو بي صينيه كبيره ملانه موز
الاسد اتخلع قال الحارس دا اكيد جاب الموز ده بالغلط او الصواني تكون اتبدلت الايام البعدها برضو قصه الموز مدوره...
في اليوم التالت الاسد اضايق شديد وخمش الحارس من رقبتو قال ليهو عاين لي هنا كويس: انا شنو؟
الحارس رد انت اسد قال ليهو طيب مالك مكرهني كل يوم موز موز؟؟
الحارس قال ليهو معليش بس كفيلك جايبك بي فيزة قرد اصبر لامن تنقل كفالتك
|
***
*
*
*
Quote: الشايقي مشى مطعم
وبعد أكل وقرب يشبع
طلع من جيبه ضب
براااااحة ختاهو في الصحن
وقام يكوروك نادو لي سيد المطعم
والله انا بشتكيكم لناس الصحة
جا صاحب المطعم اعتذر ليهو
وقال ليهو خلاص ما تدفع الحساب علينا
واحد شايف المنظر من بعيد
جاهو قال ليهو ما عندك لي حاجة تخارج أخوك؟؟
الشايقي قال ليهو
والله عندي جندب
لكن دار اشرب بيهو الشاي
|
Quote: قالو واحد معرس اتنين سودانية ومصرية بعامل السودانية كعب شديد وعسل مع المصرية قامت السودانية سالت المصرية
قالت ليها يختي انتي بتسوي ليه شنو
قالت ليها اول مايدخل بشيلو من على الارض شيل واحطه عالسرير واغسل رجليه بميه سخنة وملح وااكله وانيمه وبصحا فل الفل ..
.. تاني يوم الراجل خش للسودانية لقاها واقفة ليه جمب الباب قال ليها مالك واقفة لي كده قالت ليه مادايرة اشيلك يشيلك الشال ابوي
|
(منشول بتصرف)
|
Post: #12
Title: Re: ***نكتة***
Author: الامين موسى البشاري
Date: 03-24-2014, 03:13 PM
Parent: #11
تحياتي يا يوسف
قلنا نخت طوبتنا حتى انجلاء مسلسل نجاة ومهند
شكرا على الابتسامة ....
|
Post: #13
Title: Re: ***نكتة***
Author: يوسف محمود
Date: 03-24-2014, 03:23 PM
Parent: #12
اووووووووو
البشارى ود ناس (محمدين كرار)
عارف بوستاتك هى اللى فتحت شهيتنا للابتسامة فجل المعروض في سوق بكرى بقى امسح اكسح قلما تجد مكان للابتسامة
حبابك الف
|
Post: #14
Title: Re: ***نكتة***
Author: cantona_1
Date: 03-24-2014, 03:45 PM
Parent: #13
رباطابي أبوه مات .. مشى يطلع شهادة الوفاة ..الموظفة المسؤولة كانت مشغولة وسرحانة قاليها داير اطلع شهادة وفاة ..قالت ليهو: داير تعمل بيها شنو؟ .. قاليها : المرحوم قبلوه في جامعة النيلين ماشي اسجله
تحياتي
كبـّاشي الصـّـافي
.
|
Post: #15
Title: Re: ***نكتة***
Author: يوسف محمود
Date: 03-24-2014, 04:43 PM
Parent: #14
حلوووه
أخ كونتون
تعرف الرباطابى ده زاتو يكون هو القرض ابوهو نجهو بى عين صاموتيه
ياخى ديل نكتة متحركة
|
Post: #16
Title: Re: ***نكتة***
Author: يوسف محمود
Date: 03-24-2014, 05:13 PM
Parent: #1
نكتة من شمال الوادى**واحد بيقول لى صاحبومراتك بتخونك مع الكهربائى!!!رد عليهو وهومتنرفز (ماتقولش كهربائى دامابيفهمش حاجة فى الكهربا
*
*
*
موظف سودانى بيسال امريكى راتبك كم؟قاليهو 700 دولار اساسى
و800 بدل سفر و900 بدل لبس و 600 بدل عربية و1000 بدل علاج
و500 بدل خطر
قام اللمريكى سال السودانى راتبك كم؟؟؟قاليهو 800 جنيه!!!قام اللمريكى سالو ده بدل ايه؟؟؟قاليهو بدل اشحد!!!
|
Post: #17
Title: Re: ***نكتة***
Author: عبدالله محمد احمد بلة
Date: 03-24-2014, 05:48 PM
Parent: #16
حنكوشة مشت السينما مع زوجها ؛ غمضت عينها من فلم رعب ابتسم زوجها وقال لها :- (اتخافين من قتل كاذب ؛ وانتي تقتلينني كل يوم الف مرة بجمالك ورقتك) !!
جنبهم شايقية غمضت عيونا زوجها عاين ليها قال ليها :(علي الطلاق تغمضي عيونك تاني الا كان ألطشك كف أطيرلك سنيناتك ديل ؛ ماتسويلي فيها مشاعرك رقيقي وماعارف شنو ؛ افتحي عيونك ديل نحنا دافعين لنا قروش)
and#58386;and#58386;and#58386;and#58386;and#58386;
|
Post: #18
Title: Re: ***نكتة***
Author: أحمد التجانى حمودى
Date: 03-25-2014, 04:25 AM
Parent: #17
واحدة سمحة جدا راجلها مات
صاحبتها زارتها في بيت الحبس
لما رجعت راجلها سألها
قال ليها كيف لقيتي صاحبتك المحبوسة
قالت ليه أسكت ساي
والله جنس سماحةً
وجنس بيضةً
الله يعلم شهتني في الحبس ...
|
Post: #21
Title: Re: ***نكتة***
Author: ادم شحوتاي
Date: 03-25-2014, 09:35 AM
شكراً يوسف تصنع لنا ابتسامه
من وسط احباطات البورد
|
Post: #25
Title: Re: ***نكتة***
Author: cantona_1
Date: 03-25-2014, 06:37 PM
سلام مربع يا دكتور أحمد التجاني حمودي... يا أخي غيرت الاسم .. بس فتحت البروفايل لقيت ليك المعلومات الما تغباني بس ناقصة الحِلّة بتاعتكم في أم در أمان.
تحياتي لك والأسرة.
تلفونك في البرايفت من فضلك.
كبـّاشي الصـّـافي
.
|
Post: #19
Title: Re: ***نكتة***
Author: محمد مجيدو
Date: 03-25-2014, 09:24 AM
Parent: #1
يوسف .. سلام ..
البوست دا فاتني ياااخ ...
مسطول كان ما شي قدام القصر الجمهوري وقفوه الحرس قالوا ليهوا ماشي وين ؟؟
قال ليهم انا داير ابقي رئيس !!!
قالوا ليهو يازول انت عوير ؟؟
قال ليهم يعني ده شرط ضروري !!
---------
مسطول اوضاعو الماديه تعباااانه
مشى بربر لقى 10كيلو دهب،
حضن الدهب وبقى يرجف وعرقو جرى وجاتو حمى وبقي يستفرغ ،
الجماعه جرو عليهو وقالو الزول دا حيموت ،،
قال ليهم لا لا انا كويس بس دا الفقر قاعد يطلع مني ..
|
Post: #20
Title: Re: ***نكتة***
Author: محمد مجيدو
Date: 03-25-2014, 09:27 AM
Parent: #1
نكت من عصر الجاهليه:
يقال انه كانت هناك امرأةٌ حامل في أيام الجاهلية وقد ذهبت لأمها لكي تزف اليها الخبر
فقالت: أبشري يا أمي ستصبحين جدة
قالت الأم: جدة والا الرياض
فضحك الجميع
ومات الجنين من كثر الضحك
بينما كان العرب يحاربون الفرس
سقط سيف الجندي العربي فصاح قائلا : سيفي سيفي
فردّ عليه الجندي الفارسي : سيفي ولا شتوي
فضحك الجميع واجلوا الحرب
دخل أعرابيٌ إلى إحدى القهاوي وقال: عمتم مساءً أيها العرب !
فرد عليه احدهم قائلاً: عمتم ولا سبحتم !
ففرط الجميع من الضحك وعزم الأعرابي الجميع على شاي بحليب
وعمت الفرحة أرجاء المكان
رأى رجل غلاما يشرب الماء بيده اليسرى
فقال له: يا غلام!!! هل أنت ايسر؟
فأجابه الغلام: لا أنا "اتش بي"!!
فضحك الجميع و عم الفرح و السرور أرجاء القرية و اشتروا جميعهم لابتوب توشيبا !!!!
استيقظ رجل من نومه وهو ذاهب إلى العمل
فقال لزوجته: ما أجمل هذا الصباح
فقالت له: "صباح فخري ولا صباح الشحرورة"
فضحك الزوجين وصكها بنعال على وجهها على ثقاله الدم الزائدة مع الصبح
مر أعرابيٌ بإحدى الجاريات فرأى أن شعرها طويل جداً
وقال لها: هل شعرك توصيلة؟
فأجابته: لا وايرلس
فضحك الاثنان وشدها من شعرها وطلعت قرعه
أراد القاضي أن يهدد المجرم لكي يعترف بجريمته...
فقال له:فلتعترف والا جلدناك بالسوط..
فقال المجرم: اجلدني إذاً بالسوط و الصوره
فضحك القاضي والمسثشارين وفكو أسره وأعطوه فلاش ميموري هديه
|
Post: #22
Title: Re: ***نكتة***
Author: محمد مجيدو
Date: 03-25-2014, 09:37 AM
Parent: #1
كفاك .. ولا نزيدك ؟؟؟
|
Post: #23
Title: Re: ***نكتة***
Author: يوسف محمود
Date: 03-25-2014, 09:50 AM
Parent: #22
اخونا
محمد مجيدو
ارررررررررردم واجرك على الله
المغتربين الممكونين ديل لمن تضحكم تكون خدمت بكرى بطريقة غير مباشرة
الواحد على الغربة العليهو مرتو تقطع فيهو مفراكة يقوم يجى ينبز ويفلع حوجار
في حويش بكرى ده
|
Post: #24
Title: Re: ***نكتة***
Author: يوسف محمود
Date: 03-25-2014, 05:33 PM
Parent: #1
|
Post: #26
Title: Re: ***نكتة***
Author: aosman
Date: 03-26-2014, 08:50 AM
Parent: #24
نكتة حقيقة:
معانا مصري حارس تابع لي شركة هنا في السعودية وكنا دائما تجذاب مع أطراف الحديث ورجل يحب القراءة بصورة غير طبيعية, مرة لقيناه زهجان شديد, قلت ليه: مالك يا عم أحمد اليوم زعلان كده؟ رد علي: في طالب سعودي ###### جاء يدخل سيارته من هنا, قلت ليهو ممنوع دخول السيارات من هنا وقال لي إنت ما واحد مصري. قلت ليهو أنا واحد مصري؟ يخرب بيت أبوك يا ######## يا حقير... إنت واحد سعودي معفن و########, إنتو السعوديين بتفهمو أيه؟!! أنحن المصريين العلمانكم يا ###### يا حمار. طبعا إندهشنا شديد بأنه كيف عامل مصري يتجرء بمثل هذا الكلام لواحد سعودي. وواصل حديثه: طبعا إنتو عارفين الكلام ده كلوا قلتا ليهو في سري!!!! ومال إيه؟!!!!
|
Post: #27
Title: Re: ***نكتة***
Author: يوسف محمود
Date: 03-26-2014, 09:01 AM
Parent: #26
قووووووووووووووووية
هم قلوبهم كبيرة جد
تعرف واحد مكانيكى ودينا ليهو تلفون سامسونغ جلاكسى جديد
لمن نزلت اجازة لقيتو شايل نوكيا (معولق وتعبان)قلت ليهو اها تلفونك وين ؟؟؟قالى بعتو
ده تلفون شنو؟ ؟؟العامل زى الزول البينضف بنقو !!!
طبعن الشاشة لمس فكل ماداير يقلب يقوم يمسح ويحكحك في الشاشة
|
Post: #28
Title: Re: ***نكتة***
Author: يوسف محمود
Date: 04-01-2014, 07:48 AM
Parent: #1
أدروب سمع الفنان بغنى نحنا في الدمعات غرقنا
قال
والله
راهاااااات
نحن فتة مالاقين
بايخه موش!!!
العتب على ودالبشرى
|
Post: #29
Title: Re: ***نكتة***
Author: محمد مجيدو
Date: 04-01-2014, 07:59 AM
Parent: #1
مسطول بتامل في علم النحو والإعراب
اسئله محيرة شديد...
هسي الضمير الغائب ناوي يرجع متين ..
والضمير المتصل في زول رد عليهو ولا لسه..
طيب حروف النصب ناويه تتوب متين..
والتاء المربوطه في زول فكاها ولا لسه مربوطه..
وان واخواتها اتزوجوا ولا لسه بايرات..
وحروف الجر خلو لعب الكتشينه ولا لسه ..
الحروف الساكنه ساكنة بالايجار ولا ساكنه ملك و ساكنين وين ؟؟؟
|
Post: #30
Title: Re: ***نكتة***
Author: مصطفى توفيق
Date: 04-01-2014, 10:26 AM
Parent: #29
واحدة عجوزة دخلوها محو الامية ، الاستاذة تقول : دخل اسامة الفصل ، العجوز تغطى وشها ، الاستاذة تقول خرج اسامة من الفصل ، العجوز تفتح وشها ، لمن رجعت البيت ولدها سالها ادكوم شنو ؟ قالت لى : هو اسامة خلانا نقرا يدخل ويمرق فينا
|
Post: #31
Title: Re: ***نكتة***
Author: يوسف محمود
Date: 04-01-2014, 10:34 AM
Parent: #1
الاحباب محمدمجيدو ومصطفى توفيق شكرا لاضافتكم الروعة والبسمة (مالابتسامة صدقة)يلانتصدق بيها للعالم كلو
|
|