هل ممكن الواحد يتعلم السياسة وهو كبير ؟

يعني زول ما مارس سياسة لا في المتوسط ولا الثانوي ولا الجامعة

لحدي ما إشتغل وقارب الأربعين قال كدي النجرب السياسة

زول زي دا هل ممكن يكون ليهو رأي سياسي يُعتد به أو مواقف مبدئية حول ما يطرح من قضايا ؟

وهل بكون ليهو مستوى من التضحية زي زول عارك الساسة من الثانوي مثلا


نشوف

Quote: هل ممكن يكون ليهو رأي سياسي يُعتد به

لا يمكن فرأيه تتجاذبه الأهواء فتراه يسير يمينا تارة وتارة يسار ويريد أن يرضي الجميع

أهواء أنه يريد أن يرعى اسرته وأن يبعد ينأى بنفسه من الصدام فهو لم يتعود على العراك والأراء المصادمة وقوة الشخصية لطرح رأي معين في قضية سياسية معينة فهذه تصقلها التجربة والقراءة والممارسة

في الأحزاب الأراء لها مرجعية يثبتها الحزب أراء يطرحها القادة وتناقشها القاعدة ويكون الفصل فيها لدستور الحزب

Quote: يعني زول ما مارس سياسة لا في المتوسط ولا الثانوي ولا الجامعة لحدي ما إشتغل وقارب الأربعين قال كدي النجرب السياسة زول زي دا هل ممكن يكون ليهو رأي سياسي يُعتد به أو مواقف مبدئية حول ما يطرح من قضايا ؟ وهل بكون ليهو مستوى من التضحية زي زول عارك الساسة من الثانوي مثلا نشوف

أعتقد أن الشخص الذي قارب الخمسين، ناهيك عن الأربعين، قد يكون طوال السنين الماضية مجرد ملاحظ ومتابع،
وممارسته للسياسة في هذا العمر بلاشك ستكون بصورة أنضج وأسهل، خصوصا أن لا ماضي سيئ لديه يحسب عليه سلبا،

Quote: عتقد أن الشخص الذي قارب الخمسين

مرحب قصي

خمسين سنة ما دق رجلوا في كفر السياسة ويجي يمارس سياسة ويخت أراء كمان ؟


أنت تعرف المراقبين البجوا فجأة ديل ياهم البضيعوا القصة
زي تجيب ليك بروفيسور ما اشتغل خدمة مدنية من قاعات الدراسة وتبقيهو وزير

فاشل بالطبع

الغالي حمد
هل تقصد السياسة في السودان ..؟؟
ان كان نعم فيمكن للكبير ابو 100 سنة ان يمارسها
وللصغير ابو 12 سنة كذلك
فهي في السودان كسوق " امدفسو"
او كزواج الحسناء في رائعة الكابلي سعاد
فلا تتطلب منك الا ان " تدفق شوق وتنط وفي خشمك تخط القميص " ...

Quote: هل ممكن الواحد يتعلم السياسة وهو كبير ؟

داير بها شنو ؟؟؟...

سلام استاذ حمد
مثال حي: ارنولد شوارز(.........)
الزول ده من رفع اثقال الي هوليوود و قالو لغاية قبل الترشيح ما حصل يوم صوت في الانتخابات الامريكية و لكن فجأة بقوهو المرشح لحاكم ولاية كاليفورنيا و فاز
طبعا امريكا حاجاتها بتعتمد علي المستشارين و ليس حكم الرجل الواحد.

عموما بتحفظ بقول انو ممكن اي انسان يدخل السياسة في اي مرحلة عمرية و ينجح و ممكن يكون توافقي اكثر لانو الكثير من المنظمين سياسيا منذ الصغر بكونو متحجرين في افكارهم

السياسة لو لفخ ولبع زى بتاع العالم التالت مادايره خبرة ولاحرفنة اى نشال متعاون في موقف عام بيعلمك ليها احسن من ناس ايكسيوفرد زاتو
بس لو ديــــــــــــــــــــــــــــــــــك بتاع 10 داون استريت والجهابزة والاقناع وفنون ادراة الكوارث وانتشال البلاد من المشاكل وهموم الناس وكدا اقل شئ عشرين سنة قراية وممارسة ويادوب يرضو بيك موحافظ الدندير

والله اعلم





تخريمة
ولكم في بوتفليقة عبرة يا اولى الالباب
عمره قريب 200 سنة وداير يترشح لرياسة مشى مايقدر
والقذافى الله يرحمه كان وكيل عريف وحكم 42 سنة
وواحد في افريقيا الورا ماعارف صول ولا رقيب ولا شنو برضو حكمهم سنين عددا

الحبيب ناصر حسين
ياخ في السودان أي حاجة بتحصل

أي زول ممكن يبقى أي حاجة من رئيس لي أي حاجة

بس لكن ليه يحصل والواحد نفسو ما بخل يتقدم لي حتة أصلا هو ما عندو التأهيل المناسب ليها

أديك مثال هأهو معلق في صدر المنبر الأستاذة فاطمة أحمد إبراهيم دي وصلت من النضج السياسي والإجتماعي والتنظيمي مبلغا عظيما

بس بكل أسف قضت عمرها كلو عشان تعارض وتصحح اخطاء ناس يجوا داخلين تووووشك في المناصب بدون أي مقدمات وبدون أي تجارب يعني السودان ما يستفيد من تجربتها دي أي حاجة بسبب المتنطعين

وعليها قس ناس كتاااار

ود المدير ما هو الكشير مشى لي عمر البشير في محلو

حمد الله على السلامة ياخ وريني الطريقة المشيت بيها السودان دي أنا عايز أمشي

Quote: داير بها شنو ؟؟؟...

عشان يخوزق الناس بس ويدخلن في أضافرن

اذا كان ناس دعوني اعيش ممكن
اما اذا كان ينشد التغيير ومصلحة الوطن فلا

الحبيب محجوب

Quote: مثال حي: ارنولد شوارز(.........) الزول ده من رفع اثقال الي هوليوود و قالو لغاية قبل الترشيح ما حصل يوم صوت في الانتخابات الامريكية و لكن فجأة بقوهو المرشح لحاكم ولاية كاليفورنيا و فاز طبعا امريكا حاجاتها بتعتمد علي المستشارين و ليس حكم الرجل الواحد. عموما بتحفظ بقول انو ممكن اي انسان يدخل السياسة في اي مرحلة عمرية و ينجح و ممكن يكون توافقي اكثر لانو الكثير من المنظمين سياسيا منذ الصغر بكونو متحجرين في افكارهم

حكاية أرنولد شوارز دي ما طالعة من مجمل الدعاية الأمريكية لتوصيل فكرة التفوق في أي شيئ ولإظهار الممارسة العالية جدا للديمقراطية

هل أرنولد دا بمستوى كيري أو كلينتون أو ريجان (الممثل أيضا) أو أوباما من رجال السياسة العركوها وعركتهم بالتأكيد لا مجرد ديكور رغم إنو الأمريكان ديل ما مضمونين ممكن سائق بص يكون مثقف جدا وملم بكل مناحي الحياة

أم جزئية إنو يكون توافقي دي أنا أصلا ما بقبلا في صاح وفي غلط

الغلط يجب عدم التوافق فيهو أصلا لذلك أنا قبيل قلت الرأي المرة بيكون يسار ومرة بكون يمين دا صاحبو ما ناضج سياسيا .

اذا كان ناس دعوني اعيش ممكن
اما اذا كان ينشد التغيير ومصلحة الوطن فلا

مرحبتين يوسف محمود

Quote: ولكم في بوتفليقة عبرة يا اولى الالباب

جبتها تماما (رغم أنو هدفك قد يكون غير )

تعرف زي أبو تفليقة دا هو المقصود تماما

لولا أبو تفليقة هذا كان الدم حدو الركب في الجزائر

قاد الجزائر في مرحلة حرجة جدا وأرساها في بر الأمان بحنكة وخبر وتجربة سياسية عالية وسعة أفق منقطعة النظير اكتسبها من خلال ممارسة سياسية نظيفة ومنضبطة

فهو من جيل التحرير المحافظ على نضافتو

دكتورنا محمد حسن
كيفك

Quote: اذا كان ناس دعوني اعيش ممكن اما اذا كان ينشد التغيير ومصلحة الوطن فلا

ناس دعوني أعيش ديل الله يقهرهم بس البنطوا بدعوى أنهم فاهمين كل حاجة وهم أفشل من الفشل ديل ياهم سبب المصائب

تحياتي حمد

***

زول زي دا هل ممكن يكون ليهو رأي سياسي يُعتد به أو مواقف مبدئية حول ما يطرح من قضايا ؟

***

كما قال الأخ قصى
فإن رجلا في مثل هذا العمر ، يكون قد عايش كل التجارب وشاهد مجرياتها ومسالكها ومآلاتها ، السلبية منها والإيجابية دون أن يدخل معتركها ، لا بد له أن يختارإختيارا يوافق خبرته الحياتية وثقافته وقارن كل سياسات الأحزاب وقام بالقياس حسب نتائجها

تحياتي حمد عبد الغفار
نعم يمكن ان يتعلم الانسان في اي عمر
هذا يتوقف على مدى قدرات الانسان واستعداده
وعلى مدى قناعات الانسان بالفكره
فعلى قدر قناعتك بالفكرة تكون قدرتك على التضحية
السياسة ليست موهبة وهي ليست الزعامة
لذا يمكن تعلمها واكتسابها
ويكون الفرق بين من مارسها منذ ايامه الطلابيه ومن مارسها على كبر
هي الخبرة والتي بمرور الوقت سيمتلكها
ودونك كثير من العسكريين الذين نجحوا كسياسيين وهم قد اتو للسياسة على كبر

مرحبتين الريس أبو جهينة

Quote: يكون قد عايش كل التجارب وشاهد مجرياتها ومسالكها ومآلاتها ، السلبية منها والإيجابية دون أن يدخل معتركها ، لا بد له أن يختارإختيارا يوافق خبرته الحياتية وثقافته وقارن كل سياسات الأحزاب وقام بالقياس حسب نتائجها

بس لكن السياسة لا تقتصر على خبرة في جانب واحد ولا تنفع معها المشاهدة من علٍ فهي معترك يشمل كافة جوانب الحياة وكل ما يخص البشر وغير البشر وتحتاج للإلمام بكافة التفاصيل ودي ما بتأتي إلا بالممارسة الفعلية ولزمن طويل

أهو كان يمكن لعبود والنميري وعمر البشير أن يكونوا عسكريين ناجحين جدا ولكنهم ولجوا عالم السياسة في أعلى الهرم بدون سابق تجربة ماذا كانت النتيجة

حتى الصادق المهدي بن السياسة والسياسين عندما تقلد المنصب وهو في سن صغيرة بدون تجربة كان تحت رحمة عتاولة السياسة وقتئذٍ فكان ما كان

Quote: زي تجيب ليك بروفيسور ما اشتغل خدمة مدنية من قاعات الدراسة وتبقيهو وزير

سلامات يا حمد...
تعرف الحاجة دى انا شفتها كتير جدا عند الامركان.
اغلب الوزراء ناس ما ليهم دخل بالسياسة. خاصة وزير التعليم والطاقة و مير البنك المركزى و كل الحجات المهمة دى. بيكونوا ناس علمونيين فى مجالاتهم.
مثلا مديرة البنك المركزى الامريكى الجديدة قبل ما تبقى نائب المدير كانت برفسير فى الجامعة. (و زوجها اكاديمى برضو اظن انه حايز على جائزة نوبل فى الاقتصاد.)

Quote: حكاية أرنولد شوارز دي ما طالعة من مجمل الدعاية الأمريكية لتوصيل فكرة التفوق في أي شيئ ولإظهار الممارسة العالية جدا للديمقراطية

ارنولد فعلا ذى ما قال محجوب احسن مثال. فعلا هو كان بتاع رفع اثقال و بعدها ممثل لكن كان زول واعى جدا و بزنسيسمان كبير. غير كده مشي اتزوج من ال كندى و دى براها حاجة ما ساهلة.
ما فى غلاط ان الدعاية الامريكية موجودة فى اى شيء, لكن بالجد ما بقدروا يلعبوا فى انتخبات او حتى يلزوا زول عشان يترشح و يفوز. ارنولد ما زول حايم ساي. صحيح انقليزيه مكسر لكن انا شايفة انه كان زول عنده مخ كويس. ده شيء. الشيء التانى ارنولد اترشح فى وقت كانت كلفورنيا (سادس اقتصاد فى العالم لو كانت دولة مستقلة) فى حالة صعبة. و اظن انه he did well .
اللى عاوزة اقوله....ايوه, ممكن زول يتعلم السياسة على كبر.
و الشيء التانى انه ما ضرورى الوزير يكون سياسي. بالعكس ...يا ريت الوزير ما يكون سياسي.

Quote: الغلط يجب عدم التوافق فيهو أصلا لذلك أنا قبيل قلت الرأي المرة بيكون يسار ومرة بكون يمين دا صاحبو ما ناضج سياسيا

بالعكس يا اخى.
اليمين ما كله تمام او صالح لكل زمان ومكان.
و الشمال ما كله تمام او صالح لكل زمان ومكان
عشان كده الزول اللى بياخد الكويس من كل حاجه ده الزول اللى عرف الدنيا و السياسة كويس و انها ما فيها ابيض و اسود.
كلامك صح فى الناس اللى بتغير رائيها عشان مصالحها الخاصة و ليش عشان مصلحة الشعب

مرحب علي محمد الفكي

Quote: عم يمكن ان يتعلم الانسان في اي عمر هذا يتوقف على مدى قدرات الانسان واستعداده وعلى مدى قناعات الانسان بالفكره فعلى قدر قناعتك بالفكرة تكون قدرتك على التضحية السياسة ليست موهبة وهي ليست الزعامة لذا يمكن تعلمها واكتسابها ويكون الفرق بين من مارسها منذ ايامه الطلابيه ومن مارسها على كبر هي الخبرة والتي بمرور الوقت سيمتلكها

كلام جميل ما في شك لكن السياسي مطلوب منو العطاء لمصلحة البلد ودا يرجعك لمداخلة د محمد حسن
متى يقدم تجربته وخبرته وهو في السبعين وعلى على أعتاب الثمانين النشاط والحركة والتفكير السليم وإتخاذ القرارات اشياء كلها مرتبطة مع بعضها