دفن نفايات نووية في الشرق مقابل اربعة مليار ونصف دولار!

Post: #1
Title: دفن نفايات نووية في الشرق مقابل اربعة مليار ونصف دولار!
Author: jini
Date: 03-16-2014, 08:11 PM

ألبدون!
و اسوا من النفايات قوم دون جذور يحملون معهم الملايين
جنى

Post: #2
Title: Re: دفن نفايات نووية في الشرق مقابل اربعة مليار ونصف دولار!
Author: Abureesh
Date: 03-16-2014, 08:25 PM
Parent: #1

يا جنى نحن نملك وسائل توجع الكويت، وتخليهم يندموا على اليوم الإتولدوا فيه.. بس أصبر خلينا نشوف الخبر النجيض..

Post: #3
Title: Re: دفن نفايات نووية في الشرق مقابل اربعة مليار ونصف دولار!
Author: jini
Date: 03-16-2014, 08:28 PM
Parent: #1

لا احب الإثارة ولا اعمد اليها
ولكن توطين البدون الكويتيين
اخطر من دفن نفايات نووية التى ربما تؤدي الي تشوهات لاحقة في الاجنة وسرطانات
فهؤلاء سيؤدون الى تشوهات انية وتغيير ديموغرافي وزلزال تسونامي يفتك بالمنطقة باسرها
جني

Post: #4
Title: Re: دفن نفايات نووية في الشرق مقابل اربعة مليار ونصف دولار!
Author: jini
Date: 03-16-2014, 08:42 PM
Parent: #3

Quote: يا جنى نحن نملك وسائل توجع الكويت، وتخليهم يندموا على اليوم الإتولدوا فيه.. بس أصبر خلينا نشوف الخبر النجيض..

هذا نظام مفلس لا يتورع عن بيع الأرض أو العرض ان لم تتم محاصرته
حتى يكف أذاه عن الوطن ومواطنيه
جني

Post: #5
Title: Re: دفن نفايات نووية في الشرق مقابل اربعة مليار ونصف دولار!
Author: أبوبكر أبوالقاسم
Date: 03-16-2014, 08:42 PM
Parent: #3

عشنا وشفنا نوعية الإستثمار وإبداعات د. مصطفى عثمان !!!!

إنتو ماليزيا لسه بتنادى : هل من مزيد ؟

مرحباً بعودتك للمنبر.

Post: #6
Title: Re: دفن نفايات نووية في الشرق مقابل اربعة مليار ونصف دولار!
Author: أسامة البلال
Date: 03-16-2014, 11:20 PM
Parent: #5

ها ناس إنتو مفتكرين ابدون ديل معبنهم في كونتينرات عشان يشحنهم لميناء بورتسودان!!!!!!!!!!!!!!

مبلغ قدر دا كندا وأمريكا ممكن يرسلوا ليهم اسطول طائرات وعاها 120 ألف بوسة

ها ناس انتو جادين!!!!!!!!!!!

ياريت يجوا السودان بملياراتهم يساعدونا في تعمير السودان علي الأقل خبرات وجينات مختلفة

مئات الالاف من الحبش والارتريين نزحوا للسودان بسبب الحرب واستوطنوا واتجنسوا اها ضايقونا في شنو

واكتر من 13 مليون من غرب افريقيا دخلوا السودان واستوطنوا واتجنسوا وكانوا عمالة مجانية لولاهم لتوقفت أغلب مشاريعنا الزراعية

مرحبا بالبدون في وطنهم الجديد ولو ناس الشرق ما عاوزنهم اليجونا في دار جعل

Post: #7
Title: Re: دفن نفايات نووية في الشرق مقابل اربعة مليار ونصف دولار!
Author: Mohammed Ahmed Saeed
Date: 03-17-2014, 07:26 AM
Parent: #6

البدون رضيانين بينا .؟.

Post: #8
Title: Re: دفن نفايات نووية في الشرق مقابل اربعة مليار ونصف دولار!
Author: jini
Date: 03-17-2014, 06:51 PM
Parent: #6

Quote: ها ناس إنتو مفتكرين ابدون ديل معبنهم في كونتينرات عشان يشحنهم لميناء بورتسودان!!!!!!!!!!!!!!

مبلغ قدر دا كندا وأمريكا ممكن يرسلوا ليهم اسطول طائرات وعاها 120 ألف بوسة

ها ناس انتو جادين!!!!!!!!!!!

ياريت يجوا السودان بملياراتهم يساعدونا في تعمير السودان علي الأقل خبرات وجينات مختلفة

مئات الالاف من الحبش والارتريين نزحوا للسودان بسبب الحرب واستوطنوا واتجنسوا اها ضايقونا في شنو

واكتر من 13 مليون من غرب افريقيا دخلوا السودان واستوطنوا واتجنسوا وكانوا عمالة مجانية لولاهم لتوقفت أغلب مشاريعنا الزراعية

مرحبا بالبدون في وطنهم الجديد ولو ناس الشرق ما عاوزنهم اليجونا في دار جعل

لا حول ولا قوة الا بالله
طيب الكويت مارقاهم ليه بي قروشهم وكمان معها خمسة مليار ليه وكت أمريكا بترسل اساطيلها لنقلهم واستضافتهم يجونا يسووا بينا شنوا!
جني

Post: #9
Title: Re: دفن نفايات نووية في الشرق مقابل اربعة مليار ونصف دولار!
Author: Abureesh
Date: 03-17-2014, 07:04 PM
Parent: #8

Quote: مرحبا بالبدون في وطنهم الجديد ولو ناس الشرق ما عاوزنهم اليجونا في دار جعل

كدا أحكى لينا تجربة الفلسطينيين فى دار جعل.. بعدين البدون ديل، خدوهم وخدوا الخمس مليار.. إن شاء الله تنفعكم قبل ما الحلم دا يتحول لكابوس.

Post: #10
Title: Re: دفن نفايات نووية في الشرق مقابل اربعة مليار ونصف دولار!
Author: elhilayla
Date: 03-17-2014, 08:44 PM
Parent: #9

كدا أحكى لينا تجربة الفلسطينيين فى دار جعل.

في اليوم التالي مباشرة هتفوا- وما زلت أتذكر-:
إسرائيل ولا المعاقيل
ــــــــــــــــــ
الحليلة

Post: #11
Title: Re: دفن نفايات نووية في الشرق مقابل اربعة مليار ونصف دولار!
Author: elhilayla
Date: 03-17-2014, 08:48 PM
Parent: #10

Quote:
كدا أحكى لينا تجربة الفلسطينيين فى دار جعل.

‎في اليوم التالي مباشرة هتفوا- وما زلت أتذكر-:
إسرائيل ولا المعاقيل
‎ــــــــــــــــــ
‎الحليلة

Post: #12
Title: Re: دفن نفايات نووية في الشرق مقابل اربعة مليار ونصف دولار!
Author: Abureesh
Date: 03-17-2014, 08:52 PM
Parent: #11

Quote: إسرائيل ولا المعاقيل

ههههه

شكرا يا الحليلة جبت النجيضـة.. وكنت دايرها تجى من الاخ، وهسى اولاد جعل يرحبوا بالبدون فى الشرق..

جلدا ما جلدك جر فيه الشوك...

Post: #13
Title: Re: دفن نفايات نووية في الشرق مقابل اربعة مليار ونصف دولار!
Author: Mahjob Abdalla
Date: 03-17-2014, 09:09 PM
Parent: #11

Quote: ياريت يجوا السودان بملياراتهم يساعدونا في تعمير السودان

معقولة 5 مليار بتعمر السودان؟ ما ياه قروش البترول 300 مليار و طلعت برة و هل في مأمن انو الــ 5 مليار دي حتقغد ليك انت؟
يا اخي لو قالو بس هؤلاء الناس ما عندهم و جيبوهم لوجه الله كلاجئين ما في زول كان قال فيهم حاجة.
Quote: واكتر من 13 مليون من غرب افريقيا دخلوا السودان

قبل سنتين وزير الدفاع مشي مصر و قال عايز 2 مليون فلاح مصري قال ما معناه انو في 8 مليون افريقي دخلو من غرب السودان, فالافضل انو يجيبو مصريين.
هسي بقو 13 مليون يعني في سنتين زادو 5 مليون.
ما قادر اعرف في حاجة زي التابو كدا بحيث ننسج من الخيال انو الافارقة جايين داخلين السودان و نحنا لازم نجيب العرب عشان نعمل موازنة.
يا اخوانا السودان دا ناسو كلهم اتشردو و هي بلد صحراوية, في شنو بخلي واحد من غرب افريقيا يجي السودان. يا خي لو عايز يشاهد كورة بس ما حيجي السودان

Post: #14
Title: Re: دفن نفايات نووية في الشرق مقابل اربعة مليار ونصف دولار!
Author: فيصل عثمان الحسن
Date: 03-17-2014, 09:59 PM
Parent: #13

يا جني قالوا أفورقي معترض علي توطين البدون في شرق السودان , وده بقوي من فرضية دور تلعبه أسمرا في شرق
السودان الذي أشرت له أنت في بوست مجاور .

Post: #15
Title: Re: دفن نفايات نووية في الشرق مقابل اربعة مليار ونصف دولار!
Author: jini
Date: 03-18-2014, 05:05 AM
Parent: #14

يديك العافية يا فيصل
في فمي
ماء يا رجل
جني

Post: #16
Title: Re: دفن نفايات نووية في الشرق مقابل اربعة مليار ونصف دولار!
Author: محمد علي البصير
Date: 03-18-2014, 07:29 AM
Parent: #15

Quote: يا جنى نحن نملك وسائل توجع الكويت، وتخليهم يندموا على اليوم الإتولدوا فيه.. بس أصبر خلينا نشوف الخبر النجيض..

أستاذنا الفاضل أبو ريش ـ لك التحية ـ ولصاحب البوست مثلها

أستاذنا الفاضل ـ ليتنا نطعن في النيل ، لا ظله
الكوايتا ذنبهم شنو في ذلك ؟

ناس عندهم بضاعة عارضنها في سوق الله أكبر
ناسنا قرروا يشتروا البضاعة دي ، وهم يتحملوا وزر الصفقة

هل الكوايتا فرضوا علينا الصفقة دي فرض ، ولا عندنا ناس دخلوها بمحض أرادتهم ، وحيقبضوا مقابلها مبالغ طائلة

ياريت يا جماعة ما نقتعل مشاكل مع شعوب لم تخطئ في حقنا أو تسعى لالحاق ضرر بنا !!!!
عندنا شئ نعملوا مع حكامنا المجردين من الحس الوطني

Post: #17
Title: Re: دفن نفايات نووية في الشرق مقابل اربعة مليار ونصف دولار!
Author: عبدالرحمن الحلاوي
Date: 03-18-2014, 08:03 AM
Parent: #16

يا جني في ظل الدولة المدنية ...دولة المؤسسات والشفافية والنزاهة ...لا يمكن الاعتراض على المهاجرين الجدد إذا كانوا إضافة نوعية تسهم في البناء والتعمير والإنتاج ..لكن في مثل دولة الجهة والمحسوبية والانتهازية فتوقع دخول نفايات حقيقية وليس بشر يراد التخلص منهم لأنهم يكلفون دولة صغيرة كالكويت الكثير من الخدمات أخطرها الأمن والتأثير على التركيبة السكانية وهم سكان جزر أو قادمون من ايران وشرق إفريقيا في ظروف تاريخية مختلفة وتخلصوا من كل أوراقهم الثبوتية وحصلوا على صفة (بدون) أو (دون) جنسية او هوية وقد تعربوا وحسنت عربيتهم (ههههه) إلا أنهم أصبحوا عالة على دولتهم ويريدون كبهم والتخلص منهم إلى الأبد في المفازة( المهلكة طبعا) بين سليب ومهمبت ..وشعب فاقد بوصلته وحكومة تبحث عن الدرهم والدينار والدولار بكل حيلة لإكمال البنايات والفلل وشراء الفارهات وزواج القاصرات وإرضاء الغواني..

Post: #18
Title: Re: دفن نفايات نووية في الشرق مقابل اربعة مليار ونصف دولار!
Author: عثمان محمد كرار
Date: 03-18-2014, 08:48 AM
Parent: #17

دا كضب ساي ...لو وزعو عليهم القروش دي بيخدو الجنسيه االامريكيه في المطار

Post: #19
Title: Re: دفن نفايات نووية في الشرق مقابل اربعة مليار ونصف دولار!
Author: بريمة محمد
Date: 03-18-2014, 09:47 AM
Parent: #18

يا أخوانا .. الناس ديل كل راس منهم ب بحوالى 40 مليون دولار ..

كل زول من الشعب السودانى يسلموه مليون دولار .. وخلوا الحكومة تضعهم فى مناطق صحراوية .. إما نموها أو شردوا منها وفى كل خير.

بريمة

Post: #20
Title: Re: دفن نفايات نووية في الشرق مقابل اربعة مليار ونصف دولار!
Author: عبدالرحمن الحلاوي
Date: 03-18-2014, 11:49 AM
Parent: #19

Quote: الناس ديل كل راس منهم ب بحوالى 40 مليون دولار ..

معقول يا بريمة المواطن البسيط دا يلقى ليهو سنت واحد من هذه الصفقة ؟؟ إذا كان البترول طلع ما لقى منه غير البطش والمسغبة والاستفزاز بالاعلانات والخطب الصادمة من هوت دوق وبيتزا وايسكريم الشعلة فهل ترى يناله شي خاصة الهامش في أطراف المدينة والهامش الكبير!!! فكروا بعقولكم واطرحوا عواطفكم جانبا ..

Post: #21
Title: Re: دفن نفايات نووية في الشرق مقابل اربعة مليار ونصف دولار!
Author: Abureesh
Date: 03-18-2014, 12:39 PM
Parent: #20

Quote: معقولة 5 مليار بتعمر السودان؟

أنا ما عارف ناس بريمـة ومحجوب ديل يفكروا كيف.. غايتو السوتو الإنقاذ فى الشعب السودانى ما حيمرق بسهولة.. كلهم تأييد ومعارضة نفخت فيهم روح الدولار وقتلت روح الوطنيـة.
طيب يا اخ محجوب لو جو سعوديين دايرين يشتروا بارا بعشرة مليار بيعوا طوالى عشان نعمر بيه الابيض.. ولو جو الكويتيين دايرين يشتروا كسلا ب 15 مليار برضوا بيعوها ليهم وأدوهم القضارف إكرامية..
ما يحدث فى الشرق هو عملية بيع ارض.. بدون لف او دوران..
وهى عملية قلنا ليكم ضد القانون الدولى.. النقطة دى برضو تمشوها عشان الدولار...

خســارة.

Post: #22
Title: Re: دفن نفايات نووية في الشرق مقابل اربعة مليار ونصف دولار!
Author: Mahjob Abdalla
Date: 03-18-2014, 02:04 PM
Parent: #21

Quote: طيب يا اخ محجوب لو جو سعوديين دايرين يشتروا بارا بعشرة مليار بيعوا طوالى عشان نعمر بيه الابيض.. ولو جو الكويتيين دايرين يشتروا كسلا ب 15 مليار برضوا بيعوها ليهم وأدوهم القضارف إكرامية..

الاخ ابو الريش
يبدو انو اتلخبطت ليك الاقتباسات
اعيد الكرة مرة و ستجد انني اقتبست كلام اخونا اسامة البلال و قلت رأي اللي هو مقارب لرأيك و لكن انا في تقديري المسألة ليست شرق السودان فقط بل هي الحنسية السودانية و معها سياسة التغيير الديمغرافي بحيث تكون الاغلبية عربية و ذلك هو القصد الحقيقي للحكومة السودانية. قبل عامين ذهب وزير الدفاع الي مصر و طلب توطين 2 مليون مصري و قبلها اتو بعرب غرب افريقيا و الان عرب الخليج و كل هذه الحالات يتحدث العقل الباطني الذي يقول بأن سكان غرب افريقيا يدخلون السودان فلما لا نأتي بالعرب