Post: #1 Title: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-15-2014, 01:20 PM Parent: #0
أمس الجمعة كانت في حفلة بي طارق أبو عبيدة في الدمام... ما عايزين نكون تقليديين في نقلنا للحدث، لكن فكّرت أكتب عن ملاحظاتي لإختلاف تجربة الحفلة عن الإعتدنا عليه مع الفنانيين الآخرين... فنيّا، انا زولة بستمتع بالغناء لكن لا أفقه فيه شيئاً... يعني ما تتوقعوا بوست يتكلم عن امكانيات طارق الإبداعية كفنان... لأني ما الحكم المناسب في الحالة دي...
طارق أبوعبيدة، أو مولانا خدر جانا امبارح وأهدانا حفلة جميلة كسرت الروتين وخلّتنا نشعر بتقريب مسافة الغربة شويه ... وخلتنا نلاقي ناس كتار طوّلنا منهم في دوامة الدنيا وجوطة الروتين... كانت أول مرّه أحضر حفلة لطارق، ومشيت عشان نلاقيه كصاحبنا من سودانيز أونلاين، قبل ما يكون الهدف الحفلة زاتها..
بداية أحب أقول انه الحفلة كانت إعادة هيكلة.. أو زي ما بنسمّيها احنا re-engineering لما اعتدنا عليه من الحفلات لأسباب كتيرة... أولها وأهمها انه طارق ظهر بي هيئة مختلفة.. وجديدة... جعلت الليلة لا تُنسى لينا ولأولادنا ولأصحابنا....
Post: #2 Title: Re: إعادة إختراع الفنان السوداني... طارق أبوعبيدة في حفل الدمام Author: ملهم كردفان Date: 03-15-2014, 01:48 PM Parent: #1
امنياتى الطيبه لطارق أبو عبيدة وكل فنان يحاول ان يبذل من اجل اهله واحبابه كل جميل
شكرا مريم
Post: #3 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-15-2014, 01:57 PM Parent: #1
فنان أونلاين...
من الحاجات الجميلة في الحفلة امبارح تفاعل طارق مع جمهوره... ما كان في حاجز من البداية، وكان مُصر على انه يكون في قناة مفتوحة بينه وبينهم... أول ما مسك المايك قال "مساء الخير"!! موش خلاص؟ لا ما خلاص... فضل يقولها لحدي ما أي زول قاعد انتبه ورد عليه التحية بالمقابل.... الحضور ده خلا البانر المكرفسه بي ورا ما مهمة شديد... وجعله يسكب الناس من أول لحظة... وكسر حاجز بتاع تلج عادة بكون موجود في الحفلات... كان في تفاعل كبير طوال الحفلة بين الفنان والموجودين لدرجة انه الناس شعروا بانهم ممكن يطلبوا منّو العايزين اسمعوه من أغاني... وفعلا كان في طلبات وصّلوها الأطفال (وديل قصّة براهم).. التفاعل بين الفنان وبين الناس كان مستمر على شكل حوارات قصيرة، وتعليقات مرحة .. الحفلة كانت مليانه بي أصحاب طارق .. جيرانه في الحلّة ... زملاء دراسة... من سودانيز أونلاين ... من الفيسبوك.. لكن الما بعرفوه، كسبهم في اللحظة ديك كأصدقاء جدد...
Post: #4 Title: Re: إعادة إختراع الفنان السوداني... طارق أبوعبيدة في حفل الدمام Author: smart_ana2001 Date: 03-15-2014, 06:29 PM Parent: #3
سلامات يا مريوم. و شكرًا علي البوست الظريف. مولانا خدر زول لطيف، ذكي، و لمّاح عشان كده ما بستغرب يكون عمل حفلة راقية. بختكم. انا اخر مرة مشيت حفلة قبل اكتر من سنتين :( و مولانا خدر ذاتو لما جاء بلدنا دي، طنش منطقتنا :(
Post: #5 Title: Re: إعادة إختراع الفنان السوداني... طارق أبوعبيدة في حفل الدمام Author: خدر Date: 03-23-2014, 08:55 PM Parent: #4
شكرا يا مريم و شكرا دي موش للكلام الجميل القلتيهو عني , شكرا دي لانك اديتيني فيدباك انا منتظرو لي سنين و ما حا اقول ليك اسه شكرا علي الكلام الجميل و حا احتفظ بي فرحتي و شجاعتي عشان اقول ليك انو القلتيهو ده بالضبط هو فكرتي في الغناء و الموسيقي .. الحفل او التسجيل بالنسبة لي هو وجبة كاملة يجب انك كموسيقي تقدمها للجمهور طرب و تفاعل و ونسه و مشاغلة و حوارات حتي .. لانو الجمهور ما جايي عشان يشوفك لابس كيف او يتسلطن بي صوتك و مزيكتك .. الجمهور عاوز يحس بيك اخوهو و حبيبو و راجل جيرانهم و ود حلتهم الخ الخ و دي المهمة البنحاول و معي كثيرين اننا نتمها علي اكمل وجه وفق ظروف البرامج و الحفلات .. شكرا تاني يا مريم و واصلي في قرايتنا و مدينا قدر زمنك بي فيد باك يخلينا ننجض شغلنا اكتر و يمرق حفلاتنا من حوارات " الساوند كان كعب "
ارمي لي مطار كلمات الشاعر خطاب حسن احمند الحان و غناء طارق ابوعبيدة
اعفي لي تأخر الرد .. بتكوني فاهمة سبب التأخير طبعا و اسه بكتب ليك و انا من جدة متوجه للمدينة بمعية سواقي الخصوصي زميل المنبر معاوية عبيد
_____ شكرا يا ستنا علي كل شي
Post: #6 Title: Re: إعادة إختراع الفنان السوداني... طارق أبوعبيدة في حفل الدمام Author: خدر Date: 03-23-2014, 09:00 PM Parent: #5
Post: #7 Title: Re: إعادة إختراع الفنان السوداني... طارق أبوعبيدة في حفل الدمام Author: أيمن محمود Date: 03-23-2014, 10:57 PM Parent: #6
Post: #8 Title: Re: إعادة إختراع الفنان السوداني... طارق أبوعبيدة في حفل الدمام Author: أيمن محمود Date: 03-24-2014, 06:52 AM Parent: #7
هلا يا مريم وطارق الانسان
Quote: إعادة إختراع الفنان السوداني
دي أنا ما فهمتها بصراحة
Post: #13 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-24-2014, 09:35 AM Parent: #8
أيمن محمود... ازيك... وشكرا على التعليق...
انا قصدته انه طارق أبوعبيدة ظهر في الحفلة دي بأسلوب مختلف عن ما اتعوّدناه في الفنانين السودانيين... من الحاجات الكانت مريحة جداً تعامله مع الأطفال!... في بداية الحفلة كل الأطفال الدقدق داك، من عمر تلاته سنين لحدي عمر سبعة سنين كده، اتلموا حول طارق... اتونس معاهم وقعد ليهم في الواطة... واكيد كان بكون شايف فيهم أولاده... القصة ما عايزين نشكّر تواضعه ولا دي هي المسألة... القصة انه بالحاجة دي انا مثلاً كنت مرتاحة لتحرّك أولادي حوله.. وانهم ما مصدر ازعاج ولا اني محتاجه أناديهم واقعّدهم... شعرته انهم بقو جزء من البرنامج وبقى عندهم دور فيه... البت الشايلها طارق دي لعبت ورقصت واستمتعت متعة شديدة... الصورة بتاعت الناس بقابضوا في اولادهم .. والفنان العرقان الكل شويه بمسح في راسه وهو متوتر ما بين فواصل الأغنيات.. دي كلها مشاهد ما كانت موجوده.. طارق كان بمسح العرق من راسه واثناء ذلك بتونس مع الكبار وبلعب مع الصغار... يمكن دي الحفلة الوحيدة الحضرتها في السعودية ولقيت انه النسوان قاموا يرقصوا من غير تحانيس ولا تردد... ومشهد الحفلة سريع بقى زيّه وزي حفلة بتلقاها في السودان...
Post: #12 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-24-2014, 09:26 AM Parent: #5
Quote: بتكوني فاهمة سبب التأخير طبعا و اسه بكتب ليك و انا من جدة متوجه للمدينة بمعية سواقي الخصوصي زميل المنبر معاوية عبيد
مولانا خدر شخصياً... ألف حمدلله على السلامة.. وبركة الظهرته... اصلاً انا من الشوفتو داك، ما اتخيلتك تكتب أي شي خلال تواجدك في السعودية... انت كان ما بتغني بتكون بتتكلم في التلفون..
Quote: شكرا يا مريم و شكرا دي موش للكلام الجميل القلتيهو عني , شكرا دي لانك اديتيني فيدباك انا منتظرو لي سنين و ما حا اقول ليك اسه شكرا علي الكلام الجميل و حا احتفظ بي فرحتي و شجاعتي عشان اقول ليك انو القلتيهو ده بالضبط هو فكرتي في الغناء و الموسيقي .. الحفل او التسجيل بالنسبة لي هو وجبة كاملة يجب انك كموسيقي تقدمها للجمهور طرب و تفاعل و ونسه و مشاغلة و حوارات حتي .. لانو الجمهور ما جايي عشان يشوفك لابس كيف او يتسلطن بي صوتك و مزيكتك .. الجمهور عاوز يحس بيك اخوهو و حبيبو و راجل جيرانهم و ود حلتهم الخ الخ و دي المهمة البنحاول و معي كثيرين اننا نتمها علي اكمل وجه وفق ظروف البرامج و الحفلات .. شكرا تاني يا مريم و واصلي في قرايتنا و مدينا قدر زمنك بي فيد باك يخلينا ننجض شغلنا اكتر و يمرق حفلاتنا من حوارات " الساوند كان كعب "
اتصور انا كنت قايلاها حاجة ناتجة عن طبعك، ما اتصورتها منهج... بالفعل الطريقة خلت الناس تستمتع جداً.. جنبي كان في شلّة سيدات واضح انهم ما بعرفوك، لكن جو عشان يلقو شي من ريحة البلد... كانوا بتونسوا سوا... "والله يا فلانه غنّاي خلاص، وبقعّد الكلمات وما مستعجل زي باقي الفنانيين."... "يا ولد، اجري قول ليه دايرين غنية ابراهيم عوض"... ... "الأغاني البختارها منوّعه... تعالي يا بت، قول ليه غنية ابراهيم عوض ما ينساها..."..
نادر عجبته الأغنية "أرمي لي مطار"... وعجبه انك دخّلت اسمي فيها في اللحظة الجينا نسلّم عليك... في الفيديو الانت منزّله ما ظهرنا لما جينا سلّمنا عليك لكن مسموعة في الدقيقة 2:43 ... انا لاحظته انك عملته الpersonalisation ده اكتر من مرّة خلال الحفلة... ودي كانت واحده من الحاجات الجميلة الخلت الناس تحس انهم جزء من حفلتك...
Post: #11 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-24-2014, 09:08 AM Parent: #4
سمارت ازيك...
اتلوّم طارق والله.. كان يجيك نص المسافة انت عارفاك بتتمي الباقي... والله الحفلة بتستااااااهل تسافري ليها عديل كده...
Quote: مولانا خدر زول لطيف، ذكي، و لمّاح عشان كده ما بستغرب يكون عمل حفلة راقية.
وفعلا دي كانت ملامح الحفلة البتكلم عنها... الذكاء انه الزول يقدر يضيف شي جديد لشي عادي، ويحوّله لشي ممتع..
Post: #9 Title: Re: إعادة إختراع الفنان السوداني... طارق أبوعبيدة في حفل الدمام Author: محمد مجيدو Date: 03-24-2014, 07:19 AM Parent: #1
خيانه .. يعني.... ما كلمتونا .... كان حضرنا الحفله .. وتشرفنا بلقياكم ... نحن يوم الجمعه كنا قاعدين في كورنيش الدمام ومستمتعين جدا بالجو الرهيب ...
خيرها في غيرها ... وبيلاي تاني اعملوا اعلان عشان الواحد يعرف ونبرمج معاكم ...
التحية للاخت مريم .. والفنان طارق ...
Post: #10 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-24-2014, 08:50 AM Parent: #9
اعفو لي يا جماعة ما تميت كلامي في البوست ده... انشغلت بي سفرية للإمارات وجيت ركلسته مع أبوي وأمي ... لسه عندي نقطة عايزه اشرحها عن سبب العنوان زي ما علّق أيمن محمود، عشان اوري قصدي شنو بي إعادة اختراع...
Post: #14 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-24-2014, 09:43 AM Parent: #9
Quote: خيانه .. يعني.... ما كلمتونا .... كان حضرنا الحفله .. وتشرفنا بلقياكم ... نحن يوم الجمعه كنا قاعدين في كورنيش الدمام ومستمتعين جدا بالجو الرهيب ...
خيرها في غيرها ... وبيلاي تاني اعملوا اعلان عشان الواحد يعرف ونبرمج معاكم ...
التحية للاخت مريم .. والفنان طارق ...
مرحب يا محمد مجيدو.... الإعلان بتاع الحفلة دي كان معلّق فووووووق في البورد ده قبل اسبوعين من الحفلة.. واستمر فترة طويلة... الحفلة كانت يوم الجمعة 15 مارس... وحضروها معظم البورداب البعرفهم... لكن خيرها في غيرها..
Post: #15 Title: Re: إعادة إختراع الفنان السوداني... طارق أبوعبيدة في حفل الدمام Author: مريم بنت الحسين Date: 03-24-2014, 10:26 AM Parent: #14
Quote: امنياتى الطيبه لطارق أبو عبيدة وكل فنان يحاول ان يبذل من اجل اهله واحبابه كل جميل
اخونا ملهم كردفان.. ألف شكر على رفع البوست والتعليق
